Mulalilo Wakweelaako Wakwe Yesu

BaJuda bakalinga kusekelela bushiku bwakwiibaluka Kusotokela mwaaka amwaaka, pabushiku bwa namba 14 mu mweenshi wa Nisani. Ishi shakalinga kubeebalusha Yehova mbwaakabaangulula kuswa mubusha ku Ijipiti akubaleta mucishi ncaakabashomesha. Mu mwaaka wa 33 C.E., Yesu abatumwi bakasekelela bushiku bwakwiibaluka Kusotokela mucipinda capeculu mu Jelusalemu. Ndyebakamana kulya, Yesu wakaamba ayi: ‘Womwi pali ndimwe atoongaba.’ Batumwi bakakankamana akwiipusha Yesu ayi: ‘Ino ngani uyo?’ Yesu wakaamba ayi: ‘Ngooyo ngweshi mpe buledi iyi.’ Lyalo wakakomoona buledi akupa Judasi Isikalyoti. Peenkaapo, Judasi wakanyamuka akuswaamo mucipinda.

Lyalo Yesu wakapaila, wakakomoona buledi akupa batumwi bakwe bakacaala. Wakabalwiita ayi: ‘Amulye buledi iyi. Ileemikaninaako mubili wangu uyo ngweshi nkaabe ceebo ca ndimwe.’ Lyalo wakapailila waini akupa batumwi bakwe. Wakaamba ayi: ‘Amunwe waini uyu. Uleemikaninaako bulowa bwaangu ubo bweshi bukatiilwe kwaamba ayi shibiibi shinoolekelelwa. Ntoomushomesha ayi mulaakuba ba maami pomwi andime kwiculu. Kamucita ceeci mwaaka amwaaka mukunjibaluka.’ Amunshiku shino bashikwiiya bakwe Yesu, balabungana pomwi pabushiku ubu macolesha mwaaka amwaaka. Pacecino ciindi, kubungana uku kuleetwa ayi Mulalilo wa Mwaami.

Ndyebakamanisha kulya, batumwi bakapikishanya pamakani awakalinga munene pakati kabo. Sombi Yesu wakabaambila ayi: ‘Munene pakati kanu, ngooyo ulibona ayi ngumwanike alimwi utalibooni ayi uleendaawo babye.’

‘Muli beshicibusa bangu. Ndamulwiita shoonse Bata nshobasuni ayi mulwiite. Conoono ntooya kwiculu kuli ba Bata. Mulaakucaala, alimwi bantu balaakushiba ayi muli bashikwiiya bangu na kamutondeshanya lusuno. Mulyeelete kunootondeshanya lusuno, bweenka nebo mbondakamusuna.’

Mukweelaako Yesu wakapaila, kusenga Yehova ayi ashitilishe bashikwiiya bakwe boonse. Wakasenga Yehova kwaamba ayi abacaafwe kunoosebensela pomwi muluumuno. Wakapailila liina lyakwe Yehova ayi lisalashikwe. Yesu abatumwi bakwe bakeemba nyimbo mukulumbaisha Yehova, lyalo bakaya pansengwe. Ciindi cakalinga pafwiifwi kwaamba ayi Yesu bamucaate.