Yesu Mbwaakaabila Shakulya Bantu Baanji

Kusekelela kwa kwiibaluka bushiku bwakusotokela kwamu 32 C.E. kakutana kutalika, batumwi bakaboola kuswa muncito yakushimikila. Bakalinga kulemete, aboobo Yesu wakabatola abwaato ku Betisaida, kwaamba ayi bakookesheeko. Ano ndyebakalinga pafwiifwi akushika kwiitala, Yesu wakabona bantu baanji kababakonkela. Nabi kwaamba ayi Yesu wakalinga kusuni kuba eenka abatumwi bakwe, wakabanyumfwila nkuumbu akubatambula. Wakashilika balwashi mbobakaleta akutalika kubeeisha. Wakabaiisha pa Bwaami bwakwe Lesa, bushiku boonse. Lisuba ndyelyakalinga kuya mukupila, batumwi bakwe bakesa kuli nguwe akumulwiita ayi: ‘Bantu balyeelete banyumfwa nsala. Amubalwiite ayi banooya baye balangoole shakulya.’

Yesu wakabalwiita ayi: ‘Tabeelete kuya. Amubape shakulya.’ Batumwi bakamwiipusha ayi: ‘Sa mulisuni ayi tuye tuboolile shakulya?’ Filipi, womwi wa batumwi wakaamba ayi: ‘Nabi kwaamba ayi katucite maali aanji inga tatucikoonshi kuula shakulya shiinji sheenga shakwana bantu boonse aba.’

Yesu wakabeepusha ayi: ‘Ino tulicite shakulya shiinji buyani?’ Andulu wakakumbula ayi: ‘Tulicite buledi ili 5 atuswi tuniini tobilo. Shakulya nshetucite shaceyabo kulaale.’ Yesu wakaamba ayi: ‘Amushileete kuno.’ Wakalwiita bantu ayi bekale pa bwiisu mumakoto kabali 50 a 100. Yesu wakabwesa buledi answi, walanga kwiculu akupaila. Wakapa batumwi shakulya, lyalo balo bakaabila bantu. Basankwa bali 5,000 kwiilikaawo abanakashi abaana boonse bakalya akukuta. Ndyebakamana kulya, batumwi bakabweselela shakacaalako kwaamba ayi kutabi shili shoonse sheshi shinyonyooke. Kwakasula ma basiketi ali 12! Caankamiko cisangalasha abuumbi, sa tabushi?

Bantu bakasangalala abuumbi cakwaamba ayi bakalinga kusuni ayi Yesu abe mwaami wabo. Sombi Yesu wakalinga kucishi ayi tacina kushika ciindi cakwaamba ayi Yehova amubike pa Bwaami. Aboobo wakalwiita bantu ayi banooya akulwiita batumwi bakwe ayi baye kulubasu lumwi lwa Lweenge lwa Galili. Bakatanta bwaato sombi Yesu wakaya pakalundu eenka. Ino nceebonshi? Wakalinga kusuni kucana ciindi cakupaila kuli Baishi. Nabi kwaamba ayi Yesu wakalinga kucite shakucita shiinji, lyoonse wakalinga kucana ciindi cakupaila.