Yesu Mbwaakeenda Pamaanshi

Yesu taakalinga kucitebo nkusu sha kushilika balwashi akubusha bafu, sombi wakalinga kucite ankusu pa cipuupu a mfula. Ndyaakamanisha kupaila pakalundu, Yesu wakalanga panshi, pa Lweenge lwa Galili akubona cipuupu cinene. Batumwi bakwe bakalinga mubwaato kabapenga kweensha bwaato ceebo ca cipuupu cinene. Yesu wakaseluka pakalundu akutalika kweenda pamaanshi kuya ku bwaato. Batumwi ndyebakabona muntu umwi kaaenda pamaanshi bakaloonda abuumbi. Sombi Yesu wakabalwiita ayi: ‘Mutaloondi. Ndime.’

Pita wakaamba ayi: ‘Nkambo, na ncakwiila ndimwe, amuŋambile ayi nse kuli ndimwe.’ Yesu wakalwiita Pita ayi: ‘Kosa.’ Aboobo Pita wakaswa mubwaato akweenda pamaanshi kuya kuli Yesu, cipuupu kacicipuupa. Sombi ndyaakashika pafwiifwi a Yesu, Pita wakalanga cipuupu lyalo wakaloonda. Nceceeco wakatalika kupila. Pita wakoolobesha ayi: ‘Nkambo, amumpulushe!’ Yesu wakamucata kulyaansa akwaamba ayi: ‘Ino nceebonshi watalika kutoonsha? Ino lushomo lwako lwaya kuli?’

Yesu a Pita bakatanta mu bwaato alimwi peenkaapo cipuupu cakoomuna. Ino utobona ayi batumwi bakalinyumfwa buyani pa sheeshi shakacitika? Bakaamba ayi: ‘Ncakwiila muli mwanaakwe Lesa.’

Kuli ciindi acimwi Yesu ndyaakoomusha cipuupu. Paciindi cimwi Yesu abatumwi bakwe ndyebakalinga kusubuka kuya kulubasu lumwi lwa lweenge, Yesu wakalinga kulete mubwaato. Ndyaakalinga kulete kwakesa cipuupu cinene. Maaba akatalika kuuma kubwaato alimwi bwaato bwakasula maanshi. Batumwi bakabusha Yesu kaboolobesha ayi: ‘Nobafundishi tulisuni kufwa! Amutucaafwe!’ Yesu wakabuka akulwiita cipuupu ayi: “Umuna!” Peenkaapo, cipuupu cakoomuna lyalo palweenge pakaboolabo tontolo. Yesu wakeepusha batumwi ayi: ‘Ino lushomo lwanu lwaya kuli?’ Bakalyamboosha ayi: “Cipuupu amaaba shilamunyumfwila.” Batumwi bakeeya ayi na kabashoma muli Yesu cakumaninina, tabakalinga kweelete kunoloonda cilicoonse.