Yesu Mbwaakaboolela Kwiculu

Yesu wakabonana abashikwiiya bakwe mu Galili. Wakabapa mulawo uyandika abuumbi wakwaamba ayi: ‘Kamuya mukaiishe bantu bamishobo yoonse. Mukabeeishe shintu shoonse nshendakamwiisha alimwi akubabombeka.’ Lyalo wakabashomesha ayi: ‘Mutaluubi ayi nanooli amwebo lyoonse.’

Kwanshiku shili 40 kuswa ciindi Yesu ndyaakabushikwa, wakabonekela kubeshikwiiya bakwe baanji ku Galili aku Jelusalemu. Wakabeesha makani aanji ayandika akucita shaankamiko shiinji. Lyalo Yesu wakabonana abatumwi kwaciindi cakweelaako, pakalundu ka Maolifi. Wakabalwiita ayi: ‘Mutakaswiimo mu Jelusalemu. Sombi mukatolelele kulindila cipo ico baTa ncobakashomesha.’

Batumwi bakwe tabana kunyumfwishisha ncaakalinga kusansulula. Bakamwiipusha ayi: ‘Sa ano mutooba Mwaami wabene Isilaeli?’ Yesu wakabakumbula ayi: ‘Tacina kushika ciindi cakwe Yehova kwaamba ayi mbe Mwaami. Conoono mulaakutambula mushimu usalashi, alimwi mulaakuba bakamboni bangu. Kamuya mukashimikile mu Jelusalemu, Judeya, Samaliya akumisena yakulaale yapa cishi capanshi.’

Lyalo Yesu wakatolwa mwiculu alimwi likumbi lya kamufwekelela. Bashikwiiya bakwe bakatolelela kulanga kwiculu, sombi wakacileka kuboneka.

Bashikwiiya bakaswaawo pakalundu ka maOlifi akuya ku Jelusalemu. Ciindi aciindi bakalinga kubungana pomwi mucipinda capeculu akupaila. Bakalinga kulindila Yesu ayi abape butanjilishi abumwi.