Joni Nshaakabona

Mutumwi Joni ndyaakalinga kwaangitwe pa nsumbu ya Patimosi, Yesu wakamutondesha shili anga nshiloto na shitondesho shili 16 sha kunembo. Shili anga nshiloto ishi shakalinga kutondesha liina lyakwe Yehova mbolyakalinga kusa mukusalashikwa, Bwaami bwakwe mbweshi bukese alimwi akuyanda kwakwe mbweshi kukakumanishikwe pacishi capanshi bweenka mbuli kwiculu.

Mucili anga nciloto cimwi, Joni wakabona Yehova kaashite pacuuna cakwe ca Bwaami kwiculu, kashingulukitwe abamanene bali 24, kabafwete shakufwala shituba alimwi kabafwete cisoti ca bwaami ya golodi. Kucuuna cakwe ca Bwaami, kwakalinga kubyeka byeka anga ntulumba alimwi kwakalinga kunyumfwika cilulumo. Bamanene bali 24 bakafukama akulambila Yehova. Mucili anga nciloto cimwi, Joni wakabona likoto linene lya bantu bakaswa mushishi shoonse, bashikanda shipusenepusene alimwi baamba mishobo ipusenepusene, balambila Yehova. Mwanaambelele, nkokwaamba ayi Yesu, kaabatanjilila kumaanshi apa buumi. Lyalo mucili anga nciloto cimwi, wakabona Yesu watalika kweendelesha mbuli mwaami kwiculu pomwi abamanene bali 24. Mucili anga nciloto cakakonkelaawo, Joni wakabona Yesu kaalwana ansoka inene nkokwaamba ayi Satana ashibanda shakwe. Yesu wakabawaala pacishi capanshi kuswa kwiculu.

Lyalo Joni wakabona citondesho cibotu abuumbi ca mwanaambelele abali 144,000 kabeemfwi Pakalundu ka Siyoni. Alimwi wakabona munjelo kauluka pacishi, kaalwiita bantu ayi banoloonda Lesa akumupa bulemu.

Mucili anga nciloto acimwi, Joni wakabona nkondo ya Amagedoni. Munkondo iyi, Yesu alikoto lyakwe lya baanjelo bakakoma Satana acishi cakwe cibiibi. Mucili anga nciloto cakweelaako, Joni wakabona lucatano lwancine ncine pakati kashilengwa shakwiculu asha pacishi capanshi. Satana ashibanda shakwe bakanyonyoolwa cakumaninina. Boonse kwiculu alimwi apacishi capanshi bakalinga kulemeka liina lyakwe Yehova, akulambilabo nguwe eenka.