Nkalata Kuswa ku Likoto Litanjilila

Nobashominyinesu Nomusunikwi:

Mbuli basebenshi bakwe Yehova, tulisuni Maswi akwe Lesa, Baibo. Tulashoma cakutatoonsha kwaamba ayi muli makani akale kale ancine, butanjilishi bucafwa mubuumi, alimwi amakani atondesha patuba kwaamba ayi Yehova alitusuni. (Kulumbaisha 119:105; Luka 1:3; 1 Joni 4:19) Tulisunishi kucafwa bamwi kwiiya cancine ciyandika abuumbi ncetucana mu Maswi akwe Lesa. Aboobo tulikondetwe abuumbi kwaabila libuku ililya, “Nsheenga Mweeya Kuswa mu Baibo.” Ngaaya makani aniinibo kulansha kulibuku ili.

Lubasu lunene lwakabambilwa bacanike. Nacibi boobo, inga twalisebensesha kucafwa banene basuni kwiiya shiinji kuswa mu Baibo. Alimwi mukwiinga Baibo ndibuku muntu uli woonse ndyeenga wabelenga, soonse tulaakufubilaamo kwiinduluka mushiiyo shiliimo, shaamba makani eenga atucafwa kucana lusangalalo lwancinencine.

Libuku ili lilicite makani amu Baibo atokwaamba sha matalikilo akulengwa kwa muntu. Makani amu Baibo aliimo akasansululwa munshila yuubu kunyumfwisha alimwi bakeelesha cankusu kwalemba kweelana ambwakalinga kucitika.

Alimwi makani ali mulibuku ili kwiilikaawo ashikope shakabambwa munshila icafwa kuyeeyela makani atokwaambwawo mbwaakalinga kucitika paciindi ico.

Libuku ili lilatucafwa kubona Baibo mboyaamba pamakani akuma bantu—abo bakalinga kunyumfwila Lesa abaabo batakalinga kumunyumfwila. Alimwi lilatucafwa kubona nsheenga tweeyawo. (Bene Loma 15:4; 1 Bene Kolinto 10:6) Libuku ili lilicite mbasu shili 14. Kumatalikilo alubasu lomwi alomwi kuli makani aniini atokwaamba nsheenga tweeyawo.

Na muli mushali, inga mwabelenga ciiyo comwi acomwi amwanaanu, lyalo akubandika shikope shiliimo. Lyalo noonse nobilo inga mwabelenga lilembo lyamu Baibo paswa ciiyo. Amucafwe mwanaanu kubona makani ngabelenga mu Baibo mbwatokweendelana aciiyo cili mulibuku. Nshila iyi inga yasebensa nabi ndyemutocafwa munene kunyumfwisha shiteente shinene shaambwa mu makani amu Baibo.

Tulishomete kwaamba ayi libuku ili lilaakubacafwa abo basuni kwiiya makani amu Baibo akukonkela nshobeeya mubuumi bwabo. Inga caba ayi mbacanike nabi bacinene. Kucita boobo inga kwabacafwa abalo kulambila Yehova mumukwashi wakwe ngwaasuni abuumbi.