Sheenga Shatucafwa Kushimikila Kabotu—Kwaabila Libuku lya Bbaibbele Ncoliyiisya
Mulandu Ncociyandikila: Libuku lya Bbaibbele Ncoliyiisya ncisebensesho cisuniki muncito yesu yakushimikila. Nacibi boobo, tulyeelete kutaanguna kumupa muntu katutana kutalika kwiiya akwe. Aboobo soonse tulyeelete kushiba nshila ibotu njeenga twasebensesha kwaabila libuku lya Bbaibbele Ncoliyiisya ndyetutoshimikila. (Tus. 22:29) Kuli nshila shiinji nsheenga twasebensesha, aboobo shikushimikila uli woonse ulyeelete kusebensesha nshila njeenga wabona ayi ilacafwa.
Nsheenga Twacita:
• Amwaambe mwiipusho ubotu ngweenga mwasebensesha kutondesha mwine ŋanda mutwi womwi wa mulibuku ili. Mpashi inga mwasala mwiipusho womwi pamiipusho icanika papeeji yakutaanguna kwa mutwi uli woonse. Pesule lya kunyumfwa mwine ŋanda mbwakumbula, amubelenge lilembo lyeelela akumutondesha palagilafu itokwaamba pamakani ayo mpashi akubandikishanya paniini.
• Nshila imwi nkutalika mubandi kwiinda mukusebensesha makani ali pamapeeji akumatalikilo akutondesha mwine ŋanda nkweenga wacana shikumbulo shamu Baibo mulibuku ili. Mucikoshanyo, inga mwaamba sha mapensho akacitika coonono alimwi akumulwiita ayi bantu baanji balayandoola shikumbulo kumiipusho mbuli yeeyo ili pa peeji 3. Na inga mwaamba ayi tutofwakashila babyesu kwaamba ayi tubandike abo makani abotu aamba sha buumi bwa kunembo. Lyalo amumutondeshe mapikica ali pamapeeji 4-5 akumwiipusha ayi, “Ino ngumulasho uli ngweenga mwasuna ayi ukakumanishikwe?” Munshila imwi inga mwaamba ayi mutofwakashila bantu kwaamba ayi mubandike abo paniinibo shikumbulo sha miipusho inene ipensha bantu mubuumi. Lyalo amumutondeshe mwine ŋanda miipusho ili panshi papeeji 6, akumwaambila ayi asalewo mwiipusho ngweenga wasuna kwiiya.
• Amusebenseshe nshila yakutalika Ciiyo ca Baibo peenkapo. Inga mwaamba ayi: “Tutotondesha babyesu libuku ndyetusebensesha kwiiya Baibo. Sa mwakalibonawo kale? [Amulindile bakumbule.] Na mulicite ciindi ciniinibo, inga ndakondwa kumutondesha mbweenga mwalisebensesha a Baibo yanu.”
Amweeleshe Kucita Sheeshi Mweenshi Uno:
• Ndyemutoocita Kulambila Kwamumukwashi amweeleshe kucita citondesho ca sheeshi nshetwaambawo.
• Ndyemutoshimikila, amwaambileko baabo mbomutosebensa aabo nshemwalibambila kwaamba.(Tus. 27:17) Amulibambile shakwaamba sheenga shamucafwa.