BUUMI BWA BWINEKLISTU
“Paulo Wakalumba Lesa Akuyuminishikwa”
Libungano lyaku Loma ndyebakanyumfwa ayi Paulo atoosa, bakabungana pomwi akweenda mushiinso wamakilomita 64 kuya mukumuciinsha. Ino lusuno lwabo lwakulyaaba ulu lwakamukuma buyani Paulo? “Ndyaakababona, Paulo wakalumba Lesa akuyuminishikwa.” (Mili. 28:15) Nabi kwaamba ayi Paulo liinji ngowakalinga kuyuminisha bamwi mumabungano ngaakalinga kufwakashila, lakwe ngowakayuminishikwa abuumbi paciindi ici ndyaakalinga kaili.—2 Koli. 13:10.
Munshiku shino bamatanjilili balubasu balafwakashila mabungano kwaamba ayi bayuminishe bamakwesu abenankashi. Ano bweenka mbuli musebenshi wakwe Lesa uli woonse, abalo kulaba ciindi ndyebeshi kulinyumfwa kulema, kulisukama, akulefuka. Aboobo ino mulaakucita buyani na mutanjilili walubasu amukaakwe bakese mukufwakashila libungano lyakumishaanu kwaamba ayi “kukabe kuyuminishanya”?—Loma. 1:11, 12.
Amucanikeeko kukubungana kwakulibambila kuya mukushimikila. Mutanjilili walubasu alayuminishikwa na beshikushimikila balyaaba kwabanaamo lubasu mukushimikila ciindi ndyaatofwakashila libungano. (1 Tesa. 1:2, 3; 2:20) Ino mbuyani kulibambila kucitaako bupainiya bwakucafwilisha mweenshi ndyeshi mukabe ansondo yalubasu. Sa inga mwalembeshaako kusebensaakwe na mukaakwe na kulibambila kuyaakwe kuciiyo canu ca Baibo? Bamatanjilili balubasu abakaabo balasangalala kusebensa abeshikushimikila bapusene pusene, bapya nabi baabo balinyumfwa ayi tabacishi kabotu kushimikila.
Amubeeteeko kuŋanda kumishaanu. Sa inga mwalyaaba kubeetaako kumishaanu? Kucita boobo kulatondesha ayi mulibasuni. Ici tacaambi ayi mulyeelete kuba ashintu shiinji.—Luka 10:38-42.
Amukutike akusebensesha nshebamulwiita akululika kwabo. Mulusuno mutanjilili walubasu alatucafwa kubona mbweenga twaya panembo muncito yakwe Yehova. Mpashi cimwi ciindi inga watululika. (1 Koli. 5:1-5) Cilamupa lusangalalo abuumbi na twanyumfwila akukonkela kululikwa nkweenga twapekwa.—Ebu. 13:17.
Amutondeshe kulumba. Amumulwiite mutanjilili walubasu na mukaakwe mbomwacafwikwa akufwakasha kwabo. Inga mwabalwiitaabo pamulomo na kubalembela kakaadi.—Kolo. 3:15.