Bwakusebensesha Lubasu lwa Nsheenga Mwaamba

Kuswabo mu January 2018, papeeji yakutaanguna ya Kabuku Kamabungano aBuumi bwa Bwineklistu Alimwi Anciito Yesu, palacanika lubasu lwa nsheenga mwaamba. Ino inga twalusebensesha buyani lubasu ulu?

Ciindi Ndyemucite Lubasu lwa Shikwiiya: Mulyeelete kusebensesha mwiipusho, lilembo alimwi ansheshi tukabandikewo shicanika palubasu lwa nsheenga mwaamba. Sombi ici tacaambi ayi mulyeelete kusebensesha maswi asebenseshekwa muvidyo ya nsheenga mwaamba. Inga mwasala kusebensesha cakucitika cipuseneeko, maswi akutalikila apuseneeko, nshila yakubandikishanya ipuseneeko alimwi ashimwi. Inga mwaabila libuku kuswa paayo Ngotusebensesha Ndyetutokwiisha, nabi kwaamba ayi palubasu ndomwapekwa tabana kwaamba ayi mucite boobo.

Ndyemutoshimikila: Lubasu lwa nsheenga mwaamba lwakabambilwa kumucafwa. Na muntu watondesha ayi alisuni kwiiya akushiba shiinji, inga mwatolelela mubandi mpashi kwiinda mukusebensesha makani acanika mulweendo lwakuboolelaako. Mpashi inga mwaalula lubasu lwa nsheenga mwaamba nabi kusebensesha makani amwibo. Sa kuli makani kuswa mukabuku Kamabungano ka mweenshi wamana na lilembo lipuseneeko lyeenga lyashika pamyoyo yabantu bakumusena nkomushimikila? Sa bantu bakumusena nkomukala inga basangalala amakani atokwaamba pa shakacitika conoono nabi makani ngobakanyumfwa panyusi? Inga mwasebensesha lubasu lwa nsheenga mwaamba munshila shipusenepusene. Nacibi boobo, mulyeelete ‘kucita shoonse ceebo ca makani abotu, kwaamba ayi mwaabileko bamwi.’—1 Koli. 9:22, 23.