Nsheenga Mwaciita Kwaamba ayi Boonse Banoofubilaamo Mumubandi Wakulibambila Kuya Muncito Yakushimikila

Bweenka mbuli mabungano amwi, kubungana kwakulibambila kuya muncito yakushimikila ncipo kuswa kuli Yehova citupa coolwe ca kutondeshanya lusuno alimwi akucita shibotu. (Ebu 10:24, 25) Kubungana uku kulyeelete kuba kwa mamineti 5 kushika ku 7. Ici cileelikaawo kubaanya likoto, kwaamba musena wakuya mukushimikilaako alimwi akupaila. (Na kubungana uku kwacitika pesule lya mabungano, kulyeelete kutola ciindi ciniini.) Shikutanjilila mubandi alyeelete kulibambila makani eenga acafwa boonse batoya muncito yakushimikila bushiku ubo. Kucakubonenaako, baanji beshikucanika kukubungana uku pabushiku bwa Cibelu, tabaabanimo lubasu mukushimikila kwamukati kansondo, aboobo mpashi inga cacafwa abuumbi kubandikabo nsheenga baamba ku mwineŋanda. Ino ngamakani ali amwi eenga abandikwa, ngeenga bafubilaamo beshikushimikila?

• Lubasu lwa nsheenga mwaamba lucanika mu Kabuku Kamabungano—Abuumi bwa Bwineklistu Anciito Yesu

• Mbweenga twatalika mubandi kwiinda mukwaamba makani ashitoocitika na makani akaambwa panyusi

• Mbweenga mwakumbula shaamba baabo bakaka

• Mbweenga mwakumbula muntu utashomi ayi Lesa nkwaali, muntu ushoma mukusanduka, muntu waamba mushobo umwi, na muntu wa mubupailishi bumwi butacaniki kumusena nkomushimikila

• Mbweenga mwasebensesha lubasu lucanika pa webusaiti ya jw.org, pa JW Library^®, na mu Baibo

• Mbweenga twasebensesha Shisebensesho Nshetusebensesha Ndyetutokwiisha

• Mbweenga mwashimikila kusebensesha nshila shipusenepusene mbulikushimikila kwiinda mukusebensesha fooni, kulemba makalata, kushimikila kumisena kucanika bantu baanji, kucita lweendo lwakuboolelaako na kutanjilila shiiyo sha Baibo

• Kwiibalusha pamakani akuyandika kwa kulishitilisha, kwaalula bwakushimikila, kulilemeka, kubona shintu munshila yeelete na makani amwi akoshenye asheeshi

• Kubandika ciiyo na kweebela vidyo kuswa mukabuloshuwa ka Amubikile Maano Kukubelenga Akwiisha

• Mbweenga mwayuminisha alimwi akucafwa ngomutosebensaakwe muncito yakushimikila

• Kubandika lilembo lyaamba pancito yakushimikila na cakucitika ciyuminisha cakacitika muncito yakushimikila