Mbweenga Mwacafwilisha na Kwacitika Mapensho Anene

Mapensho anene acitika cakuteengashila atoocitika abuumbi munshiku shino. Na kwacitika mapensho anene bubaambo bwakupa lucafwo bulayandika kubambwa kabotu alimwi cakubikila maano abuumbi. Aboobo, bamu Likoto Litanjilila bakabika bubaambo bwakwaamba ayi musampi uli woonse ube a Dipatimenti Ilanga Pamakani Akupa Lucafwo na Kwacitika Mapensho Anene.

Na bamakwesu bamu dipatimenti iyi bashiba ayi kwacitika mapensho anene, cakufwambaana balabandika abamanene bakumusena uko kwaamba ayi bashibe lucafwo beshikushimikila ndweenga bayandika. Na mapensho nganene abuumbi cakwaamba ayi beshikushimikila bakumusena uko inga tabacikonshi kucafwilisha, baku musampi balatuma bamakwesu beelela, kutanjilila muncito yakupa lucafwo. Bamakwesu aba inga basengako bamakwesu abenankashi beenga balyaaba kucafwilisha na kupako shintu shimwi shiyandika, na kuula akwaabila shitoyandika kumusena uko.

Kucita shintu munshila iyi kulacafwa munshila shiinji. Kucakubonenaako, kulaceeshako ncito, kulapa kwaamba ayi shintu shitapilingani, alimwi maali ashintu shilasebenseshekwa kabotu. Ishi nshintu sheenga tashikonsheki na bamakwesu balicitilabo beene.

Bamakwesu bakasalwa amusampi inga bashiba maali alimwi abeshikucafwilisha batoyandika muncito yakupa lucafwo. Alimwi inga beelesha kushiba bacinene ba mfulumeende bakumusena uko, beenga batucafwa kwaamba ayi tufwambaane kupa lucafwo. Aboobo mutalibikili bubaambo bwa kusenga maali akucafwilisha baabo bacitikilwa mapensho anene, kubatumina shitoyandika, na kuya mukucafwilisha kumusena kwacitika mapensho anene kamutana kulwiitikwa.

Nacibi boobo, tulisuni kucafwilisha na kwacitika mapensho anene. (Ebu 13:16) Tulibasuni bamakwesu! Ino nshiinshi nsheenga twaciita kwaamba ayi tucafwilishe? Ciyandika abuumbi, nkupaililako baabo bakumwa amapensho alimwi abaabo batoopa lucafwo. Alimwi inga twacafwilisha kwiinda mukupa maali akucafwilisha ncito icitwa nsengwe yoonse. Kwiinda mubutanjilishi bwa Likoto Litanjilila, baku maofesi amisampi balaakushiba kabotu nkweenga maali ayo asebenseshekwa kabotu. Na mulisuni kwaabanamo lubasu muncito yakupa lucafwo, inga mwalemba foomu ya Local Design/Construction Volunteer Application (DC-50).

AMWEEBELE VIDYO ICITE MUTWI UTOKWAAMBA AYI BULOBE BWAKANYONYOOLA SHINTU KU BRAZIL, LYALO AKUKUMBULA MWIIPUSHO UTOKONKELAAWO:

Ino nshiinshi shamuyuminisha pa lucafwo Bakamboni Bakwe Yehova ndobakapa pesule lya bulobe bwakacitika ku Brazil mu 2020?