Mbotwakacafwa Baabo Bakacitikilwa Mapensho Anene Akutengashila mu 2023​—⁠“Twakabona Yehova Mbwaakatutondesha Lusuno”

Baibo yakaambila limwi ayi “mushobo umwi ulaakubukila ubye” alimwi ayi kulaakuba mapensho anene acitika cakuteengashila muciindi ca “mamanino a cishi.” (Mateyo 24:3, 7) Twakabona maswi aya abushinshimi mbwakakumanishikwa mumwaaka wancito wa 2023.a Sombi inkondo amapensho anene acitika cakutengashila ndyeshakalinga kucitika mushishi shishika pafwiifwi 100, Bakamboni bakwe Yehova bakakonkela cakubonenaako cakwe Yehova cakutondesha lusuno. Ino nshiinshi nshebakacita?

Mumwaaka wancito wa 2023, bamakwesu bakacitikilwa mapensho anene alicitikila na ayo abaako ceebo ca shintu bantu nshebacita eendilila 200. Makampani asebenseshekwa a Bakamboni bakwe Yehova, oonse pomwi akasebensesha maali amadolab eendilila 10 milyoni, ayo apekwa kucafwilisha ncito ya nsengwe yoonse kwaamba ayi bacafwe baabo bakakumwa amapensho anene alicitikila. Ici citokwiilikaawo amaali bamakwesu abenankashi ngobakapa kwaamba ayi bacafwe baabo bakakumwa bakala pafwiifwi ankobakala. Amubone maali ngomupa mukuliyandila mbwakasebenseshekwa kucafwa bamakwesu bakakumwa amapensho anene obilo akabacitikila.

“Ncakwiila Lusuno Lwancinencine Nkoluli”

Misena imwi yamu Nigeria liinji ilalobelwa. Nacibi boobo, bulobe bwakalingako mu October 2022 bwakalinga kwiinditeewo pa bulobe bwakalinga kubaako kwa myaaka 10 yainda. Luundu lwakulimaawo lunene mahekita eendilila 676,000 (na 1,670,432 acres) lwakanyonyooka, alimwi bantu beendilila 2 milyoni bakaswaamo mumaandabo. Cakufwambaana bamu musampi waku Nigeria bakasala Makomiti Apa Lucafwo Ndyekwacitika Mapensho kwaamba ayi bape bamakwesu shintu nshebakalinga kuyandika alimwi akubacafwa lwakumushimu.

Bamakwesu Abenankashi Mbobakakumwa

• Bashikushimikila bali 7,505 bakalongaamo mumaanda abo

• Maanda ali 860 akanyonyooka

• Maanda Abwaami ali 90 akalobelwa kwiilikaawo amusena womwi pa kucitila mabungano anene

Maali Apekwa Mukuliyandila Mbwakasebenseshekwa

Maali amadola eendilila 250,000 akasebenseshekwa kuula shakalinga kuyandika baabo bakalobelwa, ici citokwiilikawo:

• Shakulya mbuli laisi, biinzi, alimwi ashakulya shimwi shili mbuli masupageti

• Shakusebensesha shimwi mbuli mamatilesi alimwi amaneeti

• Kubambulula na kuyaka cipya maanda akanyonyooka

Ino nshiinshi bamakwesu nshebakacita kwaamba ayi basebenseshe kabotu maali apekwa mukuliyandila? Nshila yomwi, bakalinga kubona maanda mbwakanyonyooka kwaamba ayi bashibe na inga ayandikabo kubambululwa. Na cacanika ayi ŋanda itoyandika kuyakwa cipya, bakalinga kwiiyaka kweelana amaanda aanji mbwaayakwa kumusena uyo kwakubula kusebensesha maali aanji.

Bamakwesu abenankashi bakatambula lucafwo bakalumba abuumbi. Nankashi umwi wakaamba ayi: “Bulobe bwakapilinganya shintu mubuumi bwesu mukwiinga myuunda yesu yoonse yakalobelwa alimwi twakabula akwakukala. Twakalinyumfwa kabotu bamakwesu abenankashi ndyebakesa pa bushiku bweenka ubu kwaamba ayi batucaafwe akutucanina ŋanda mwakukala. Alimwi twakatambula lucafwo ndotwakalinga kuyandika bunene ciindi baku musampi ndyebakatutumina shakulya. Twakabula acakwaamba ndyetwakabona maswi acanika pa lilembo lyakwe Joni 13:34, 35 mbwaakakumanishikwa mubuumi bwesu. . . . Ncakwiila lusuno lwancinencine nkoluli. Nebo amukwashi wangu woonse kuswa panshi lyamoyo [tutobalumba] abuumbi bamakwesu pakusa mukutucafwa paciindi ndyetwakalinga kuyandika lucafwo.”

Bamwi mumushi bakabona mbotwakalinga kucafwa baabo bakalobelwa. Ba chiifi bakumusena wiitwa ayi Sabagreia, mu Bwaami bwa Bayelsa, bakaamba ayi: “Kuli mabunga alimwi amaceeci aanji mucishi, sombi Bakamboni bakwe Yehova beenkabo mbobacitawo cintu camushobo uyu. . . . Libunga [lyanu] ndyeliinditeewo kubota mucishi.”

“Twakabona Yehova Mbwaakatutondesha Lusuno”

Mu February 2023, kwakanyaka mulilo mankanda eendilila 400 uyo wakanyonyoola shintu shiinji mucishi ca Chile. Luundu lunene mahekita eendilila 430,000 (na 1,062,553 acres), pomwi ashintu shiyandika nshebasebensesha mucishi ici, shakanyonyooka. Bantu bashika kuma 8,000 bakalonga kuswa mumaanda abo. Mapenshi anene akutengashila ndyakacitikabo, baku ofesi ya musampi bakabika bubaambo bwakupa lucafwo.

Bamakwesu Abenankashi Mbobakakumwa

• Bashikushimikila bali 222 bakalonshekwa

• Maanda ali 20 akanyonyooka

Maali Apekwa Mukuliyandila Mbwakasebenseshekwa

Maali amadola eendilila 200,000 akasebenseshekwa kucafwa baabo bakakumwa, ici citokwiilikawo:

• Shakulya alimwi amaanshi

• Fyuwelo, shakusebensesha kubotesha, alimwi amusamu

• Kuyaka cipya maanda akanyonyooka

Mukwashi umwi bakalinyumfwa cibiibi abuumbi ndyebakacana ayi shintu shabo shoonse shanyonyooka, kwiilikaawo amaanda abo alimwi amakwebo abo. Ici cakapa kwaamba ayi cibayumine kucana shiyandika mumukwashi. Kwanshiku shiniini shakutaanguna, bamumukwashi bakalinga kulinyumfwa cibiibi abuumbi na babona pakalinga ŋanda yabo. Sombi ndyebakabona ayi batalika kubayakila ŋanda imwi, bakatalika kulinyumfwako kabotu. Ndyebakabona mbobakabatondesha lusuno abo bakalinga balyaaba kubacafwa, cakabacafwa kuliyumya mumapensho. Ici cakabacitikila bamumukwashi uyu cakabayuminisha abuumbi cakwaamba ayi abalo bakalyaaba kusebensela pomwi abamakwesu kuyaka ŋanda ya mukwesu umwi.

Bamakwesu abenankashi baanji bakasangalala ndyebakatambula lucafwo. Mukwesu umwi wakaamba ayi: “Bubaambo bwakwe Yehova bwa Makomiti Apa Lucafwo Ndyekwacitika Mapensho mbubotu abuumbi. Ndyepakeendabo bushiku bomwi kuswa ciindi mapensho ndyaakacitika, bamakwesu aba kabali bashika kale kumusena nkwaakacitikila kwaamba ayi bamakwesu bakakumwa babape shintu shakalinga kuyandika bunene. Cilayuminisha na wabelenga makani aamba pa bamakwesu bakatambula lucafwo mushishi shimwi. Sombi na cakucitikila, nkobuli mbocinyumfwika kupusanaako. Ceebo ulatalika kubona ayi libunga nshelicita shilacafwa abuumbi; ulabona bamakwesu mbobatondesha mibo yakwe Yehova; alimwi akubona mbobashinisha ayi tulicite shintu nshetutoyandika lwakumubili, lwakumushimu alimwi akushinisha ayi twatolelela kubona shintu munshila yeelete. Twakabona Yehova mbwaakatutondesha lusuno kwiinda mukutucafwa.”

Mapensho anene acitika cakuteengashila ananooya cifulilakobo bulya mbotutooya kumamanino abweende bwashintu ubu. (Luka 21:10, 11) Nacibi boobo, kwiinda mulibungano lya Bwineklistu tutoobona ayi Mwaami wesu shilusuno Klistu Yesu ali andiswe “kushikila kumamanino a cishi.” (Mateyo 28:20) Mulacafwilisha Bwaami alimwi a Mwaami wa Bwaami shilusuno, kwiinda mu maali akucafwilisha ncito nsengwe yoonse ngomupa mukuliyandila kusebensesha donate.jw.org alimwi anshila shimwi, kwiilikaawo akwaaba ciindi alimwi nkusu shanu. Twalumba abuumbi pakutolelela kutondesha bwaabi bwanu.