Bamakwesu Mbobakatondesha Lusuno Kwiinda Mukupa Lucafwo Ndyekwakacitika Mapensho Akutengashila mu 2022

Baibo yakaambila limwi ayi munshiku shino kulaakuba nkondo, shitentanshi, malwashi ashimwi “shiloondesha abuumbi.” (Luka 21:10, 11) Bushinshimi ubu bwakatolelela kukumanishikwa mu mwaaka wa ncito wa 2022.a Kucakubonenaako, inkondo ku Ukraine yakatolelela, alimwi yakakuma buumi bwa bantu baanji abuumbi. Paciindi ici baanji bakalinga kunoociinda mumapensho ceebo ca bulwashi bwa COVID-19. Kwiilikaawo, bantu baanji bakakumwa amapensho esa cakutengashila, mbuli shitentanshi shakacitika ku Haiti alimwi acipuupu cinene cakacitika ku Central America, ku Philippines, alimwi akwicwe lya kumalenge kwa Africa. Ino nshiinshi Bakamboni bakwe Yehova nshebakacita kwaamba ayi bacafwe baabo bakacitikilwa mapensho aya?

Mumwaka wancito wa 2022 libunga lyesu lyakapa lucafwo kubaabo bakacitikilwa mapensho anene akutengashila ashika 200! Alimwi twakasebensesha maali amadola ashika pafwiifwi a 12 miliyoni kupa lucafwo.b Amubone maali apekwa mbwaakasebensenshekwa kucafwa baabo bakacitikilwa mapensho acitika cakutengashila obilo.

Shitentanshi ku Haiti

Pa 14 August, 2021 kumalenge lya Haiti kwakacitika citentanshi cishika ku 7.2 kukomena. Cakabicaako, benankashi bobilo amukwesu womwi bakafwa. Bakapuluka bakapenga abuumbi mu miyeeyo ceebo cashintu shakumubili shakanyonyooka ku citentanshi. Mukwesu wa liina lya Stephane wakaamba ayi: “Mutauni yoonse mwakafwa bantu baanji aboobo mwakalinga kuba malilo nsondo ansondo kwa myeenshi iindilila yobilo.” Mukwesu aumwi wa liina lya Éliézer wakaamba ayi: “Bakamboni baanji tebakalinga kucite maanda mwakukala, shakufwala, nsapato, alimwi ashintu shimwi shiyandika. Kwa myeenshi iinji bakalinga kunoocicicte boowa ceebo ca shakacitika.”

Libunga lyesu lyakafwambaana kupa lucafwo. Musampi waku Haiti wakapa shakulya shiinji abuumbi shindilila ma kilogilamu eendilila 53,000 kwiilikaawo amatente, mamatilesi, alimwi amacaja amasola akucajishako ma fooni. Kwiilikaawo, mu mwaaka wancito wa 2022 maanda eendilila 100 akayakwa cipya na kubambululwa. Twakasebensesha maali amadola eendilila 1 miliyoni.

Bamakwesu abenankashi batolumba abuumbi. Ba Lorette bakaamba ayi: “Citentanshi ca kanyonyoola ŋanda yesu cakumaninina alimwi amakwebo esu. Tatwakalinga kucitewo shakulya. Sombi libunga lyakwe Yehova lyakatolelela kutucafwa ashintu shoonse nshetwakalinga kuyandika.” Ba Micheline bakaamba ayi: “Citentanshi cakanyonyoola ŋanda mondakalinga kukala abana bangu basankwa bobilo. Nshindakalinga kucishiwo cimwi cakucita kwiilika pa kupaila kwaamba ayi nsenge lucafwo, alimwi Yehova wakakumbula mupailo wangu kwiinda mulibunga lyakwe. Ano pacecino ciindi tulicite ŋanda yakayakwa kabotu motukala. Ndishinishite kucita nsheenga ndacikonsha kutondesha kulumba kuli Yehova.”

Lucafwo lwesu lwakashibikwa amfulumende. Mweendeleshi munene wa city hall yaku L’Asile wakaamba ayi: “Mwakacita kabotu abuumbi kufwambaana kupa lucafwo. Ntomulumba abuumbi ceebo cakwaamba ayi mwakatondesha bulemu kubeendeleshi. Ndisangalete kubona ayi taamubikili bunene maano ku maali. Sombi mulisuni kutondesha lusuno ku bantu kwiinda mukubacafwa.”

Imfula Inene Yacipuupu Iitwa ayi Ana Yakaloka ku Malawi aku Mozambique

Pa 24 January, 2022 imfula inene yacipuupu iitwa ayi Ana yakaloka ku Mozambique akuya kumbo kuya mukushika ku Malawi. Kwakalinga mfula inene a cipuupu cakalinga kweendela pa makilomita 100 muliwoola lyomwi. Alimwi cipuupu ici cakanyonyoola ntambo sha malaiti a mabiliji akupa kwaamba ayi kube bulobe.

Imfula yacipuupu iyi yakakuma Bakamboni beendilila 30,000 ku Malawi aku Mozambique. Mukwesu Charles uyo wakaabanamo lubasu mukupa lucafwo wakaamba ayi: “Ndyendakabona bamakwesu bakalinga kupenga abuumbi alimwi akufula kwashintu nshebakasowekelwa ndakalinyumfwa cibiibi abuumbi akumaninwa nkusu.” Alimwi cakabica ncakwaamba ayi shakulya ashishango shoonse shakaya maanshi. Baanji maanda abo akanyonyooka. Cakeendaawo kubica, mukwesu omwi wakafwitwa bakaakwe abana bakwe banakashi bobilo paciindi bwaato mobakalinga ndyebwakapindamuka.

Cipuupu ici cakalinga kuloondesha. Mashiku kuma 01 kumusena umwi wiitwa ayi Nchalo ku Malawi, mukwashi waba Sengeredo ku Malawi wakanyumfwa coongo ca kukunka kwa maanshi. Milonga yobilo yakesula! Mukwesu Sengeredo amukwashi wakwe bakasalawo ayi basweemo mu ŋanda. Bakacita kabotu kuswaamo mukwiinga tapana kwiinda aciindi cilaamfu ŋanda yabo yakawa ku maanshi. Shintu shabo shakanyonyooka na kuya amaanshi. Mukwashi uyu wakasalawo kuya ku Ŋanda ya Bwaami uko nkobakalinga kweenda mamineti ali 30 kuswa kumishaabo. Nacibi boobo paciindi ici bakeenda kwa mawoola obilo. Bakashika kabatontolete mibili yoonse alimwi kabalemete, sombi bakeendabo kabotu.

Musampi waku Malawi aku Mozambique bakatalika kupa lucafwo cakufwaambana. Bakalwiita bamatanjilili balubasu abamanene kwaamba ayi baye babone bamakwesu bakakumwa acipuupu ici akubona nshebakalinga kuyandika akubayuminisha. Bamuma Komiti apa Lucafwo Ndyekwacitika Mapensho Akutengashila bakatumwa kwaamba ayi baye batanjilile ncito yakupa lucafwo alimwi bakatalika kucafwa bamakwesu cakufwambaana kwaamba babe ashakulya ashintu shimwi shiyandika. Bakasebensesha maali amadola eendilila 33,000 kucafwa bantu alimwi amaali amadola eendilila 300,000 kwaamba ayi babambulule akuyaka cipya maanda.

Bamakwesu bamuma Komiti apa Lucafwo Ndyekwacitika Mapensho Akutengashila bakasebensesha kabotu maali. Kucita boobo kwakalinga kuyandika abuumbi mukwiinga shintu shakalinga kudulite abuumbi. Kucakubonenaako, mumyeenshi 7 yakupa lucafwo, mutengo wa busu ku Malawi wakatanta a 70 pesenti. Mutengo wa mafuta amu motoka awalo wakatanta. Kwaamba ayi basebenseshe kabotu maali bamakwesu bakoola shintu shiinji paciindi comwi, shakulya alimwi ashintu shakusebensesha pa kuyaka mweenka mu Malawi. Aboobo ici cakapa kwaamba ayi batasebenseshi maali aanji kunyamuna shintu alimwi akwaamba ayi bababosheleeko mutengo ceebo cakuula shintu shiinji.

Incito yakupa lucafwo kwacitika mapensho akutengashila ilabasangalasha bantu bakwe Yehova. Mukwesu wa liina lya Felisberto waku Mozambique wakaamba ayi: “Nshina kubonawo kale libunga lipa lucafwo lunene bobulya mbuli: shakuyakisha, maali akunyamwisha shintu, basebenshi bakuyaka, shakulya alimwi akutanjilila munshila yalusuno. Lucafwo ulu cakalinga ncakubonenaako cibotu cakutondesha lusuno lwa bwana bwankashi ulo Yesu ndwaakaamba pa Joni 13:34.” Mukalubinje wa liina lya Ester waku Malawi uyo wakanyonyokelwa ŋanda wakaamba ayi: “Ndakalinyumfwa kubula cakucita mukwiinga nshindakalinga kucitewo maali akwene akwaamba ayi inga ndayaka ŋanda imwi. Aboobo bamakwesu ndyebakesa mukunjakila ŋanda, ndakalinyumfwabo anga ndanjila kale mu Paladaiso.”

Ndyetutooya cisena pafwiifwi acishi cipya cakashomeshekwa, tutolangila kubona mapensho aanji esa cakutengashila. (Mateyo 24:7, 8) Nacibi boobo, ceebo ca bwaabi mbomutondesha kwiinda mukupa maali mukuliyandila, tulishomete kwaamba ayi bantu bakwe Yehova balaakunoocite shiyandika. Pa donate.jw.org. pali nshila shiinji mbweenga mwapa maali mukuliyandila. Twalumba abuumbi pa bwaabi bwanu.