Kupa Lucafwo Mumisena Muli “Nkondo Ampuuwo sha Nkondo”

Munshiku shino shakweelaako tulalangila “kunyumfwa nkondo ampuuwo sha nkondo.” (Mateyo 24:6) Nacibi boobo bamakwesu balatambula lucafwo luyandika na bacana mapensho ceebo ca nkondo. Lipooti Namba 3 Yamu 2022 Kuswa ku Likoto Litanjilila lyakaamba makani asangalasha kulansha pa lucafwo lutopekwa ku baabo batoopenga ku Eastern Europe ceebo ca nkondo ili ku Ukraine. Ino bamakwesu batoocafwana buyani nabi kwaamba kuli nkondo pafwiifwi? Ino lucafwo ndobatopekwa lwabacafwa buyani bamakwesu baku Ukraine?

Ino Bakabatolela Buyani Nshebakalinga Kuyandika?

Inkondo ndyeyakatalika ku Ukraine pa 24 February, 2022, bamu Komiti ya Beshikubunganya bakasuminisha ayi kube kukusha maali akupa lucafwo ku bamakwesu baku Ukraine. Lyalo peenka apo baku musampi waku Ukraine bakatalika kuula shintu akushaaba kwiinda mukusebensesha ma Komiti ali 27 apa Lucafwo Paciindi Ndyekwacitika Mapensho Anene.

Kwiilika pa lucafwo kuswa ku musampi waku Ukraine, bamakwesu baku Maofesi Anene Abakamboni Bakwe Yehova cakufwambaana bakatalika kuyeeya mbweenga bapa lucafwo. Bamu Komiti ya Beshikubunganya alimwi abamu Komiti Ilanga Pamakani Akupulinta bamu Likoto Litanjilila, bakasenga bamu Dipatimenti Ilanga Pamakani Akuula Shintu Nsengwe Yoonse kusebensela pomwi abeshikwiimikaninako musampi waku Ukraine aku Poland kwaamba ayi babone pamakani aya akubika bubaambo bwakuula shakalinga kuyandika. Mumusampi womwi awomwi bamakwesu bamu dipatimenti Ilanga Pamakani Akuula shintu, Yakutuma, Ilanga pa Milawo, bamu Komiti ya Musampi waku Ukraine alimwi abamu Dipatimenti Ilanga Pamakani Akuula Shintu Nsengwe Yoonse bakalinga kubungana bushiku abushiku kwaamba ayi basebensele pomwi.

Ba Jay Swinney basebensela mu Dipatimenti Ilanga Pamakani Akuula Shintu Nsengwe Yoonse bakaamba ayi: “Citaanshi, twakabona shakalinga kuyandika, twakalinga kusuni kwaabila shakulya alimwi ashakusebensesha shimwi bamakwesu nshebakashibila kale. Nacibi boobo, tacakalinga cuubu kushiba nshebakalinga kuyandika. Kwiilikaawo, twakalinga kuyandika kushiba mbweenga twatoola shintu ishi cakufwambaana paciindi ndyekuli nkondo kwakubula kulibika mumapensho.”

Kusa mukushika pa 9 March, 2022, twakashiba shintu bamakwesu shebakalinga kuyandika bunene mbuli, nyama a nswi shamutukopo, laisi, binzi ashakulya shimwi shitafwambaani kunyonyooka, isho shakalinga kweelete kutumwa pomwi ashintu mbuli soopo alimwi amatishu. Paciindi ici bakacana kwaamba ayi muntu omwi wakalinga kuyandika shintu shiyandika maali amadola ali 65 (K1047.47). Mukwiinga bamakwesu bakalinga kuyandika lucafwo bakalinga baanji, bamu Komiti ya Beshikubunganya bakasuminisha ayi kube kusebensesha maali aanji akupa lucafwo. Ano ino bamakwesu bakacita buyani kwaamba ayi batole shintu kubaabo bakalinga kuyandika lucafwo kwakubula kubika buumi bwabo mumapensho?

Pa 13 March bamakwesu bobilo baku Poland bakeelesha kutola shakulya kukusha ku musampi waku Poland kutola kuŋanda ya kusungilamo shakulya ili pafwiifwi a ndabala ya Lviv ku Ukraine. Kabatana kuya, bamakwesu baku musampi waku Poland aku Ukraine bakacafwa bamakwesu aba bakalyaaba kulibambila lweendo. Baku Musampi bakabamba mapepa oonse akalinga kuyandika kwaamba ayi bamakwesu aba bacikonshe kwiinda kabotu paboda. Bakashinisha ayi pa myotoka ya bamakwesu balembawo maswi akutondesha ayi bakalinga kutola shintu shakucafwa bantu. Alimwi bakasebensela pomwi abamakwesu ku Ukraine kwaamba ayi bashibe nshila ifwiifwi alimwi ili kabotu njeenga beenda pesule lya kwiinda paboda. Kwiinda mulucafwo lwakwe Yehova alimwi akulibambila kabotu, bamakwesu bakacikonsha kwaabanya shintu kuma Komiti Apa Lucafwo Paciindi Ndyekwacitika Mapensho Anene mubushiku bomwi kuswa ndyeshakashika ku Lviv, alimwi akuboolelabo kabotu ku Poland.

Nabi kwaamba ayi lweendo lwakutaanguna ulu lwakutola shakalinga kuyandika bakeendabo kabotu, bamakwesu bakatolabo shintu shiniini shitashiki makilogilamu ali 1,000. Sombi shakalinga kuyandika shakalinga kushika makilogilamu ali 200,000. Ano ino shintu ishi shiinji bobulya shakalinga kusa mukutumwa buyani cakufwambaana?

‘Bantu Bako Balaakulyaaba Amyoyo Yoonse’

Pesule lya kubelenga makani pa jw.org akalinga kwaamba pa mapensho bamakwesu ngobatokwiindaamo paceebo ca shakalinga kucitika ku Ukraine, bamakwesu nsengwe yoonse bakalinga kusuni kucafwilisha. Baanji bekala kulaamfu bakalinga kupako cabupe ca maali ca ncito ya nsengwe yoonse mukwiinga bakalinga kucishi ayi maali alaakusebenseshekwa kabotu. Bamwi bakala muma boda ashishi shili pafwiifwi a Ukraine, bakalinga kusebensesha ciindi, nkusu alimwi a nshintu shabo kwaamba ayi bacafwilishe. Amubone shakubonenaako shitokonkelaawo.

Ku Poland basebenshi bakalyaaba bakatuma shintu shiinji abuumbi, alimwi baana baniini bakalemba makaadi. Ba Bartosz Kościelniak basebensa mu Dipatimenti Ilanga Pamakani Akuula Shintu ku musampi waku Poland bakaamba ayi: “Kwa mankanda aanji ndabelenga lilembo lya Kulumbaisha 110:3 ilyo lyaamba ayi bantu bakwe Yehova balaakulyaaba amyoyo yabo yoonse. Sombi kubona bamakwesu baanji mbobalyaaba kusebensa ncito cakufwambaana caampa kubona ayi maswi aya ngancine.”

Kamboni Wakwe Yehova umwi ucite kampani inyamuna shintu kutola kucishi cimwi wakaaba myotoka yakwe akubikamo mafuta kwaamba ayi baisebenseshe. Wakaamba ayi: “Kuli ndime ntobona ayi ncoolwe cakutondesha ayi ndisuni Yehova alimwi abamakwesu abenankashi. Alimwi ndisangalete kwaamba ayi ndakacafwilisha.” Mukwesu wakaaba mafuta eendilila malita 7,700, alimwi bamakwesu bakasebensesha ciindi ankusu shabo kweenda mushinso ulaampa makilomita ashika pafwiifwi a 48,000 kutola shintu nkoshakalinga kuyandika.

Ceebo cakwaamba ayi bamakwesu abenankashi bakasebensa cakulyaaba alimwi calusuno, kusa mukushika pa March 28, kacili peendabo nshiku 15 kuswa ciindi ndyebakatola shintu lweendo lwakutaanguna, cakakonsheka kutola shintu shilema ma Kg ali 100,000 shakalinga kuyandika ku Ukraine mbuli shakulya, shakusebensesha shimwi alimwi amisamu! Alimwi ceebo ca shintu shimwi bamakwesu nshebakapa mukuliyandila, cakapa kwaamba ayi maali akalinga kuyandika kuula shintu shoonse aceyeleeko abuumbi. Pacecino ciindi Bakamboni Bakwe Yehova bakatola shintu shilema ma Kg 190,000 shakucafwilisha bamakwesu ku Ukraine. Ino shintu ishi shakabacafwa buyani bamakwesu baku Ukraine?

“Mwakalinga Amaswi Akalinga Kutondesha Mbomutusuni!”

Shintu shakatumwa ndyeshakashika ku Lviv bamu ma Komiti Apa Lucafwo Paciindi Ndyekwacitika Mapensho Anene bakaabila shintu kubaabo boonse bakalinga kuyandika lucafwo mu Ukraine. Shintu ishi shakatolwa mumandabala apusenepusene, alimwi mandabala amwi akalinga kulaamfu amakilomita ashika 1,300 kuswa ku Lviv. Nabi kwaamba ayi incito iyi yakasebenswa kabotu, sombi yakatola ciindi.a

Ba Markus Reinhardt bamu Komiti ya Musampi waku Ukraine bakaamba ayi: “Paciindi camapensho ici, bamakwesu baanji babona lusuno Yehova ndwaacite pali mbabo. Alimwi babona ayi cilayandika abuumbi kukonkela cakubikila maano butanjilishi buswa ku libunga lyakwe nabi paciindi mapensho anene acitika cakutengashila kaatana kutalika. Kucakubonenaako, soonse bakatulwiita kunoosungako shakulya alimwi amaanshi mumaanda esu nsheenga twasebensesha kwa nsondo shiinji. Munene waliina lya Anton usebensela ku Kyiv wakaamba ayi: ‘Tulalumba kwaamba ayi libunga lyakwe Yehova lyatucafwa kulibambila bukaalo bwa mapensho. Kuba ashakulya, maanshi alimwi a ledyo shatucafwa kupulusha buumi bwesu.’ Tulalumba abuumbi kwaamba ayi bamakwesu bakakonkela butanjilishi ubu mukwiinga cakacafwa baku musampi kuba a ciindi cakubamba shintu bamakwesu nshebakalinga kuyandika.”

Ino bamakwesu bakalinyumfwa buyani ndyebakatambula nshebakalinga kuyandika? Ba Mykola aba Zinaida bekala ku Kharkiv bakaamba ayi: “Twalumba abuumbi pakutubikilako maano. Twalumba abuumbi pa shakulya a musamu nshemwakatupa. Ncakutatoonsha twabona Yehova mbwatubikila maano.” Ba Valentyna abalo bekala ku Kharkiv bakaamba ayi: “Kuswabo ciindi nkondo ndyeyakatalika, kwakuula shintu kwakalinga kuba milaini ilaamfu. Cimwi ciindi cakalinga kushupa kuula nshetwakalinga kuyandika. Sombi Yehova wakalinga kucishi alimwi wakalinga kubona mapensho ngotwakalinga kucite. Wakatuma bamakwesu kutupa nshetwakalinga kuyandika, alimwi bakatuletela shintu sheenka nshetwakalinga kuyandika abuumbi! Paciindi shintu ndyeshishupite akuboneka anga taakuwo wakutucafwa, twabona Yehova a libunga lyakwe mbobatubikilako maano munshila ilibetele. . . Tulisangalete abuumbi kubona Yehova mbwaatucafwa paciindi ndyetutoyandika bunene lucafwo.”

Ba Yevhen aba Irina, bakacica kuswa ku Mariupol, bakaamba ayi: “Twalumba abuumbi pakutubikila maano amukwashi wesu. Kwaamba lushinisho mwakatucafwa paciindi ceelete. Pakutaanguna twakalinga kuyeeya ayi mu shibokosi mwakalingabo shintu nshetwakalinga kuyandika, ano ndyetwakashicalula twakacana ayi mwakalinga amaswi akalinga kutondesha mbomutusuni!”

Ncakutatoonsha inga mwabona Yehova mbwaakasebensesha mushimu wakwe usalashi kutanjilila bantu bakwe kwaamba ayi batolelele bamakwesu nshebakalinga kuyandika paciindi ndyekuli “nkondo ampuuwo sha nkondo.” Maali ngomupa mukuliyandila kucafwilisha ncito ya nsengwe yoonse, alimwi aanji akapekwa kwiinda mukusebensesha nshila shicanika pa donate.jw.org, akasebensa abuumbi. Tutolumba abuumbi pa bwaabi bwanu.

Kupa Lucafwo Cakufwambaana Alimwi Munshila Yeenga Taibiki Buumi Bwa Bamakwesu Mumapensho

1. 

   Pa 24 February, 2022: Bamu Komiti ya Beshikubunganya bakasuminisha kusebensesha maali kucafwa bamakwesu ku Ukraine, ici cakapa kwaamba ayi baku ofesi ya musampi batalike kucafwa baabo bakashikilwa mapensho.

2. 

   Pa 24 February–8 March, 2022: Baku ofesi ya musampi ku Ukraine bakoolako shintu shimwi akutalika kushaabila bamakwesu bakalinga mumapensho kwiinda mukusebensesha ma Komiti apa Lucafwo Paciindi Ndyekwacitika Mapensho. Alimwi baku musampi bakatalika kulibambila kutambula shintu shakalinga kuswa ku Poland akushaabila ku bamakwesu.

3. 

   Pa 9 March, 2022: Bamu Komiti ya Beshikubunganya bakasuminisha kutola shakucafwilisha bamakwesu ku Ukraine.

4. 

   Pa 10–12 March, 2022: Bakalibambila kwaamba ayi beeleshe kutola shakulya ashintu shimwi kuswa ku Poland kushitola ku Lviv mu Ukraine.

5. 

   Pa 13 March, 2022: Bakatola shakulya ashintu shimwi kuswa ku Poland kushitola ku Lviv mu Ukraine.

6. 

   Pa 14–16 March, 2022: Bamakwesu bakalyaaba kucafwilisha kusebensa muncito shakuyaka bakabungana pa musena wakucitilawo Mabungano Anene kufwiifwi a Poznan Mu Poland kwaamba ayi balongele shintu shoonse pomwi mbuli shakulya ashimwi mbuli soopo.

7. 

   Pa 17 March, 2022: Ndyepakeenda nshiku 4 kuswa ciindi cakutaanguna ndyebakatola shakulya ashintu shimwi, bakatalika kutola ashimwi ku boda yaku Ukraine shakalinga kulema ma Kg ali 13,000.

8. 

   Pa 21–27 March, 2022: Shakacalaako bakashileta pomwi ku Poland akushituma ku Ukraine, alimwi bakashitola nkoshakalinga kuyandika mu bushiku bomwi.

9. 

   March 28, 2022: Munshiku shilibo 20 kuswa ndyebakabasumisha kusebensesha maali kucafwilisha bamakwesu ku Ukraine, bakatuma ashakusebensesha kubuuya alimwi amisamu shakalinga kulema ma Kg ali 100,000.

Kusa mukushika pacecino ciindi, Bakamboni Bakwe Yehova bakatuma shintu shakucafwilisha bamakwesu ku Ukraine shilema ma Kg ali 190,000.