Amutolelele Kuyumya Kulangila Kwanu

1. Ino Yehova watushomesha nshi kunembo?

YEHOVA watushomesha buumi butamaani kunembo. Bamwi batolangila kuba abuumi bwamuyayaya kwiculu mbuli shilengwa shakumushimu shitafwi. (1 Koli. 15:50, 53) Nacibi boobo, baanji batolangila kusangalala akuba abuumi bubotu pacishi capanshi kwamuyayaya. (Ciyu. 21:3, 4) Inga caba ayi tutolangila kuba abuumi bwamuyayaya kwiculu na pacishi, soonse tulabona ayi kulangila nkotucite nkubotu abuumbi.

2. Ino nceebonshi nceenga twaambila ayi nshetulangila teshi shakuyeeyelabo?

² Liswi lyakwaamba ayi “kulangila,” kweelana ambolisebenseshekwa mu Baibo, inga lyasansulula “kulindila ayi shintu shibotu shilaakucitika.” Mukwiinga Yehova ngowakatushomesha, inga twashoma cakutatoonsha ayi nshetulangila shilaakukumanishikwa. (Loma. 15:13) Tulishi nshaakashomesha, alimwi tulishi ayi lyoonse alakumanisha shishomesho shakwe. (Shakube. 23:19) Tulishomete cakutatoonsha kwaamba ayi Yehova alicite luyaando alimwi ankusu shakukumanisha shili shoonse nshaashomesha. Aboobo nshetulangila teshi shakuyeeyelabo na nshetusunibo ayi shikacitike. Tulalangila shintu nshetushi ayi nshancine.

3. Ino nshiinshi nsheshi tubandike mumutwi uyu? (Kulumbaisha 27:14)

³ Ishiwesu wakwiculu alitusuni, alimwi alisuni kwaamba ayi tunoomushoma. (Amubelenge Kulumbaisha 27:14, NWT.) Kuba akulangila kuyumu muli Yehova kulaakutucafwa kuliyumya mumapensho, kuba alusangalalo akutaloonda nabi tukeende mubukaalo buli buyani kunembo. Amuleke tubandike kulangila mbokutushitilisha. Aboobo amuleke tutaangune kubona kulangila mbokubete anga nceela cakwiimikishako bwaato acimpoompo. Lyalo tutobandika mbweenga twayumya kulangila kwesu.

KULANGILA KWESU KULI ANGA NCEELA CAKWIIMIKISHAKO BWAATO

4. Ino nceebonshi nceenga twaambila ayi kulangila kuli anga nceela cakwiimikishako bwaato? (Bene Ebulu 6:19)

⁴ Munkalata njaakalembela bene Ebulu, mutumwi Paulo wakakoshanisha kulangila ku ceela cakwiimikishako bwaato. (Amubelenge Bene Ebulu 6:19.) Mukwiinga Paulo liinji wakalinga kutanta bwaato, wakalinga kucishi kwaamba ayi ceela cakwiimikishako bwaato ncobakalinga kusebensesha kwiimika bwaato pamusena womwi. Paciindi cimwi ndyaakalinga palweendo mu bwaato, kwakesa cipuupu cinene. Paciindi ico wakabona beshikweensha bwaato kabawaala sheela shakwiimikishako bwaato mumaanshi kwaamba ayi bwaato butatolaanishikwi akuya mukuuma mu mabwe abiibi. (Milimo 27:29, 39-41) Bweenka ceela cakwiimikishako bwaato mbocipa bwaato kukalikana, kulangila kwesu kulatucafwa kutolelela kuba pafwiifwi a Yehova paciindi ndyetutokwiinda mumapensho ali anga ncipuupu cinene. Kulangila kwesu kulatucafwa kukalika moyo ndyetutokwiinda mumapensho mukwiinga tulishi kwaamba ayi shintu shilaakuba kabotu kunembo. Mutaluubi kwaamba ayi Yesu wakatucenjesha ayi tulaakupenshekwa. (Joni 15:20) Aboobo kukutumana kuyeeya pasheesho Yehova nshaakatushomesha kulatucafwa kutolelela kumusebensela.

5. Ino kulangila kwakamucafwa buyani Yesu ndyakalangana alufu?

⁵ Amuyeeye kulangila mbokwakacafwa Yesu kutolelela kushomeka nabi ndyaakalinga kucishi ayi alaakufwa lufu lucisa. Pabushiku bwa Pentekositi yamu 33 C.E., mutumwi Pita wakaamba maswi abushinshimi kuswa mulibuku lya Kulumbaisha asansulula Yesu mbwaakalinga kukalikite moyo alimwi ambwaakalinga kushinishite. Wakaamba ayi: “Mubili wangu wa buntu ulaakookesha akulangila muli Lesa. Mukwiinga teshi mukandekeleshe ayi nkanoolibo mumusena wa bafu, nabi kundekelesha neMusebenshi wanu Usalalite ayi mbole. . . . Alimwi ceebo mwebo muli anebo, ndasangalala abuumbi.” (Milimo 2:25-28; Kulu. 16:8-11) Nabi kwaamba ayi Yesu wakalinga kucishi ayi alaakufwa, wakalinga kulangila cakutatoonsha ayi Lesa alaakumubusha alimwi alaakusangalala kuba pomwi alimwi abaIshi kwiculu.​—Ebu. 12:2, 3.

6. Ino mukwesu umwi wakaamba nshi pamakani akulangila?

⁶ Kulangila kwesu kwa Bwineklistu kwacafwa bamakwesu abenankashi baanji kuliyumya. Amuyeeye cakubonenaako caba Leonard Chinn, mukwesu ushomeka wakalinga kukala ku England. Ndyekwakalinga Nkondo Yapacishi Coonse Yakutaanguna, wakaangwa ceebo cakukaka kunjila busoja. Kwa myeenshi yobilo bakamubika museelo eenka. Lyalo pesule bakamukakatisha kusebensa ncito iyumu. Wakalemba ayi: “Nshendakeendaamo shakancafwa kushiba ayi kulangila kulayandika kwaamba ayi tucikoonshe kuliyumya. Tulicite shakubonenaako mbuli cakwe Yesu, ca batumwi, ca bashinshimi, alimwi ashishomesho shibotu abuumbi nshetucana mu Baibo. Ishi shoonse shilatucafwa kulangila kunembo akutupa kutolelela kuliyumya.” Kuli ba Leonard kulangila kwakalinga anga nceela cakwiimikishako bwaato, aswebo inga kwatucafwa.

7. Ino kwiinda mumapensho kulayumya buyani kulangila kwesu? (Bene Loma 5:3-5; Jemusi 1:12)

⁷ Na twaliyumya mumapensho akubona Yehova mbwaatucafwa, tulashiba ayi tulamusangalasha. (Amubelenge Bene Loma 5:3-5; Jemusi 1:12.) Aboobo kulangila kwesu kulayuminaako kwiinda mbokwakalinga ndyetwakeeyabo cancine. Satana alisuni ayi tunoolisukama abuumbi ndyetutokwiinda mumapensho, sombi kwiinda mulucafwo lwakwe Yehova inga twacikonsha kuliyumya.

KULANGILA KWESU KULI ANGA NCIMPOOMPO

8. Ino nceebonshi nceenga twaambila ayi kulangila kuli anga ncimpoompo? (1 Bene Tesalonika 5:8)

⁸ Baibo ilakoshanisha kulangila kwesu ku cimpoompo. (Amubelenge 1 Bene Tesalonika 5:8.) Shilumamba alafwala cimpoompo kwaamba ayi alishitilishe kumutwi. Munkondo yesu yakumushimu tulyeelete kushitilisha miyeeyo yesu kukulwanwa a Satana. Alasebensesha shintu shipusenepusene kwaamba ayi anyonyoole miyeeyo yesu. Bweenka cimpoompo mbocishitilisha mutwi wakwe shilumamba, kulangila kwesu kulashitilisha miyeeyo yesu kwaamba ayi tutolelele kushomeka kuli Yehova.

9. Ino nshiinshi shicitika na bantu kabatacite kulangila?

⁹ Kulangila buumi butamaani kulaakutucafwa kusala kabotu shakucita. Ano na twatalika kutoonsha nshetulangila akutalika kuyeeyabo pashintu nshetusuni, inga twalubako cishomesho ca buumi butamaani mbotutolangila. Amuyeeye shakacitikila Beneklistu bamwi muciindi cakale kale ku Kolinto. Bakacileka kulangila cishomesho cakwe Lesa ciyandika abuumbi ca kubushikwa kwa bafu. (1 Koli. 15:12) Paulo wakalemba ayi abo batashomi ayi bafu balaakubushikwa balekala buumi bwa kucitabo nshebasuni. (1 Koli. 15:32) Munshiku shino bantu baanji batashomi mushishomesho shakwe Lesa balacita shili shoonse kwaamba ayi balisangalashe mubuumi bwabo pacecino ciindi. Sombi swebo tatuciti boobo mukwiinga tulashoma mubuumi bubotu Lesa mbwatushomesha kunembo. Kulangila kwesu kuli anga ncimpoompo ca cikoshanyo cishitilisha miyeeyo yesu alimwi akutucafwa kuleya buumi bwakusuna bunene kulisangalasha uko kweenga kwanyonyoola bushicibusa bwesu a Yehova.​—1 Koli. 15:33, 34.

10. Ino kulangila inga kwatucafwa buyani kuleya miyeeyo itabete kabotu?

¹⁰ Kulangila kwesu inga kwatushitilisha kuleya kunooyeeya ayi teshi tukacikoonshewo kucita sheenga shasangalasha Yehova. Kucakubonenaako, bamwi inga kabayeeya ayi: ‘Teshi nkabe pabaabo beshi bakekale kwamuyayaya. Nsheeleliiwo alimwi teshi nkacikonshewo kucita sheesho Lesa nshaasuni ayi ncite.’ Mutaluubi kwaamba ayi uku nkokuyeeya kwakalinga kucite Elifasi ndyaakalinga kubandika a Jobo. Elifasi wakaamba ayi: ‘Anu muntu nciinshi kwaamba ayi abule kampenda?’ Wakatolelela akwaamba pali Lesa ayi: ‘Bona! Taashomi baanjelo bakwe, nabibo meeculu tasalalite mu meenso akwe.’ (Jobo 15:14, 15) Ubu bwakalinga mbubeshi bwa mwanaamunene! Mutaluubi kwaamba ayi Satana ngwaasuni ayi munooyeeya boobo. Alicishi kwaamba ayi na mwatolelela kuyeeya boobo mulaakucileka kulangila. Aboobo amukake bubeshi bwa mushobo uyo akubikila maano kushishomesho shakwe Yehova. Mutatoonshi kwaamba ayi alisuni ayi mukekale kwamuyayaya alimwi alaakumucafwa kucikonsha kucita boobo.​—1 Timo. 2:3, 4.

AMUTOLELELE KUYUMYA KULANGILA KWANU

11. Ino nceebonshi tulyeelete kukalika moyo ndyetutolindila kwaamba ayi Lesa akakumanishe nshaakashomesha?

¹¹ Teshi lyoonse ndyeciba cuubu kutolelela kuyumya kulangila. Mpashi inga catwaalila kukalika moyo ndyetutolindila ayi Lesa akumanishe shishomesho shakwe. Ano mukwiinga Yehova nkwaali kuswabo kale kale, ciindi nceenga twabona anga ncilaamfu kuli nguwe nciniini. (2 Pit. 3:8, 9) Alaakucita kweelana ambwaakashomesha munshila njaabona ayi nje ibotu, sombi mpashi inga taaciti boobo paciindi ncetutoyeeyela. Ino nciinshi ceenga catucafwa kutolelela kuyumya kulangila kwesu ndyetutolindila cakukalika moyo kwaamba ayi Lesa akumanishe shishomesho shakwe?​—Jemu. 5:7, 8.

12. Kweelana a Bene Ebulu 11:1, 6, ino lushomo akulangila shilicatene buyani?

¹² Mukwiinga Yehova ngweshi akakumanishe shishomesho nshetutolangila, kutolelela kuyumya bushicibusa bwesu anguwe, kulaakutucafwa kuyumya kulangila kwesu. Kwaamba ayi tunoolangila, tulyeelete kushoma ayi Yehova “ulapa shilambu kubantu abo bamuyandoola.” (Amubelenge Bene Ebulu 11:1, 6.) Kushoma cakutatoonsha kwaamba ayi ncakwiila Yehova nkwaali, kulaakutupa kutatoonsha kwaamba ayi alaakukumanisha nshaakashomesha. Amuleke tubandike nsheenga twaciita kwaamba ayi tuyumye bushicibusa bwesu a Yehova akutolelela kuyumya kulangila kwesu.

13. Ino inga twacita buyani kwaamba ayi tube abushicibusa a Lesa?

¹³ Amupaile kuli Yehova, akubelenga Maswi akwe. Nabi kwaamba ayi Yehova inga tatumubooni, inga twaba bushicibusa anguwe. Inga twabandika anguwe mumupailo, akushoma ayi atootukutika. (Jele. 29:11, 12) Inga twakutika kuli Lesa kwiinda mukubelenga Maswi akwe akukutumana kuyeeyawo. Kubelenga Yehova mbwakalama baabo bakalinga kushomeka kuli nguwe muciindi cakale kale, inga kwatucafwa kuyumya kulangila kwesu. Mukwiinga shoonse shili mu Maswi akwe Lesa “shakalembelwa kutwiisha, kwaamba ayi kwiinda mukuliyumya kwesu alimwi akuyuminishikwa kuswa mu Malembo tube akulangila.”​—Loma. 15:4, NWT.

14. Ino nceebonshi tulyeelete kuyeeya Yehova nshaakacitila bamwi?

¹⁴ Amukutumane akuyeeya Yehova mbwakakumanisha shishomesho shakwe. Amuyeeye Lesa nshaakacitila Abulaamu a Saala. Bakalinga bacembela kushika paciimo cakutaba abaana. Sombi Lesa wakabashomesha ayi balaakuba amwaana. (Mata. 18:10) Ino Abulaamu wakacita buyani? Baibo ilaamba ayi: ‘Wakashoma ayi alaakuba mushali wa mishobo yoonse.’ (Loma. 4:18) Nabi kwaamba ayi Abulaamu taakalinga kucishiiwo Lesa mbwaakalinga kusa mukukumanisha ncaakashomesha, wakalinga kucite lushomo ayi Yehova alaakukumanisha cishomesho Cakwe. Musankwa ulya ushomeka taakwe kulenshekwa nsoni. (Loma. 4:19-21) Makani mbuli aya alatwiisha ayi Yehova lyoonse alakumanisha nshaashomesha, nabi kaciboneka anga inga tacikonsheki.

15. Ino nceebonshi tulyeelete kuyeeya Lesa nshaakatucitila?

¹⁵ Amuyeeye Yehova nshaakamucitila. Amuyeeye kukumanishikwa kwa shishomesho shili mu Maswi akwe Lesa mbokwamucafwa. Kucakubonenaako, Yesu wakashomesha ayi baIshi balaakumupa nshemuyandika mubuumi. (Mate. 6:32, 33) Alimwi Yesu wakamushomesha ayi Yehova alaakumupa mushimu usalashi na mwamusenga. (Luka 11:13) Yehova watolelela kukumanisha shishomesho isho. Mpashi kuli shishomesho ashimwi Yehova nshaakakumanisha shakamucafwa. Kucakubonenaako, wakashomesha ayi alaakumulekelela, kumuyuminisha, akumupa nshemuyandika kwaamba ayi mutolelele kuba bayumu lwakumushimu. (Mate. 6:14; 24:45; 2 Koli. 1:3) Kukutumana kuyeeya Lesa nshaakamucitila, kulaakumucafwa kutolelela kushoma ayi alaakukumanisha nshemutolangila kunembo.

AMUSANGALALE CEEBO CA NSHEMUTOOLANGILA

16. Ino nceebonshi kulangila ncipo cibotu abuumbi?

¹⁶ Buumi butamaani mbotutoolangila ncipo cibotu abuumbi kuswa kuli Lesa. Tutoolangila buumi bubotu abuumbi kunembo ubo mbotushomete ayi bulaakubaako. Kulangila uku kuli anga nceela cakwiimikishako bwaato, kulatucafwa kuliyumya ndyetutokwiinda mumapensho, ndyetutoopenshekwa, nabi ndyetwalangana alufu. Kuli anga ncimpoompo, kulashitilisha miyeeyo yesu kwaamba ayi tucikoonshe kukaka shintu shibiibi akucita shibotu. Kulangila uku nkotucana mu Baibo kulatucafwa kumushiba kabotu Lesa alimwi akututondesha mbwaatusuni. Kutolelela kuyumya kulangila kwesu kulatucafwa abuumbi.

17. Ino nceebonshi kulangila kwesu kulatupa kusangalala?

¹⁷ Kwiinda munkalata Paulo njaakalembela bene Loma wakabayuminisha ayi: ‘Amusangalale ceebo ca nshemutolangila.’ (Loma. 12:12) Paulo wakalinga kusangalala mukwiinga wakalinga kushoma ayi na watolelela kushomeka alaakutambula buumi butamaani kwiculu. Aswebo inga twasangalala mukwiinga tulishomete cakutatoonsha kwaamba ayi Yehova alaakukumanisha shishomesho shakwe. Shikulumbaisha wakalemba ayi, “ulisangalete . . . ulangila Yehova Lesa wakwe, . . . uyo ushomeka lyoonse.”​—Kulu. 146:5, 6, NWT.