MUTWI WAKWIIYA 30
LWIIMBO 36 Atushitilishe Myoyo Yesu
Shiiyo Shiyandika Nsheenga Tweeya Kuswa ku Bamaami ba Bene Isilaeli
‘Alimwi mulaakubona bupusano buli pakati ka bantu baluleme abataluleme, basebensela Lesa alimwi abatamusebenseli.’ —MALA. 3:18.
CITEENTE CINENE
Kwiiya Yehova mbwaakalinga kubona bamaami ba bene Isilaeli kutootucafwa kunyumfwishisha nshaatulangila kucita munshiku shino.
1-2. Ino nshiinshi Baibo nshoitulwiita pa bamaami bamwi ba bene Isilaeli?
BAIBO ilatulwiita pa basankwa beendilila 40 abo bakeendelesha mbuli bamaami ba bene Isilaeli.a Alimwi ilatulwiita cakuteenda mweela pashintu bamwi nshobakacita. Kucakubonenaako, nabi bamaami bamwi bakalinga kucita shibotu, bakacita shintu shimwi shibiibi. Amuyeeye pali Defedi uyo wakalinga mwaami uli kabotu. Yehova wakaamba ayi: ‘Musebenshi wangu Defedi . . . wakalinga kunyumfwila amoyo wakwe woonse alimwi wakalinga kucita nshendaamba asheeshobo sheenka nshendamusuminisha.’ (1 Baam. 14:8) Nacibi boobo, musankwa uyu wakacita bulale amwanakashi wakalinga kweebetwe akupa kwaamba ayi ibaye acaikwe mu nkondo.—2 Samwe. 11:4, 14, 15.
2 Baibo ilatulwiita apashintu shibotu bamaami batakalinga kushomeka kuli Yehova nshobakacita. Amuyeeye pacakubonenaako cakwe Leoboamu. Yehova wakaamba ayi Leoboamu wakalinga mwaami uyo “wakacita shintu shibiibi.” (2 Maka. 12:14, NWT) Nacibi boobo, kuli shintu shimwi shibotu Leoboamu nshaakacita. Kucakubonenaako, wakanyumfwila Yehova ndyaakamulwiita ayi atalwani mishobo ili 10 ya bene Isilaeli akubaleka kwaamba ayi balisalile mwaami wabo. Alimwi wakayumya mandabala aanji mu bwaami bwakwe kwaamba ayi ashitilishe bantu bakwe Lesa kubalwani babo.—1 Baam. 12:21-24; 2 Maka. 11:5-12.
3. Ino ngumwiipusho nshi uyandika ngotweelete kuliipusha alimwi ino tutokwiiya nshi mumutwi uyu?
3 Na bamaami ba bene Isilaeli bakalinga kucita shintu shibotu ashibiibi, ino Yehova wakalinga kushiba buyani na mwaami wakalinga kushomeka kuli nguwe nabi sobwe? Cikumbulo kumwiipusho uyu citootucafwa kushiba Yehova nshaatulangila kucita kwaamba ayi tumusangalashe. Tutokwiiya shintu shotatwe Yehova nshaakalinga kuyeeyawo kwaamba ayi asaleewo na mwaami wakalinga kabotu nabi sobwe. Cakutaanguna, na mwaami uyo wakalinga kusebensela Yehova camoyo woonse nabi sobwe. Cabili, na mwaami wakaana cancinencine nabi sobwe pesule lyakucita cilubo. Catatu, na mwaami wakatolelela kumulambila kweelana ambwaasuni nabi sobwe.
BAKASEBENSELA YEHOVA CAMOYO WOONSE
4. Ino mbupusano nshi bomwi bwakalinga pakati ka bamaami bakalinga kushomeka abatakalinga kushomeka?
4 Bamaami bakalinga kusangalashaYehova bakalinga kumusebensela camoyo woonse.b Jeoshafati ngu mwaami wakalinga kabotu uyo ‘wakalinga kusebensela Yehova camoyo woonse.’ (2 Maka. 22:9) Baibo ilaamba pali Josiya ayi: ‘Takuna kubawo kale mwaami wakeelanaakwe mukucita shoonse shakaamba Yehova camoyo wakwe woonse.’ (2 Baam. 23:25) Ino mbuyani pali Solomoni uyo wakatalika kucita shibiibi ndyaakacembela? ‘Taakalinga kulemeka Yehova amoyo wakwe woonse.’ (1 Baam. 11:4) Alimwi Baibo ilaamba pali Abija mwaami watakalinga kushomeka ayi: ‘Taakalinga kushomeka amoyo wakwe woonse kuli Yehova.’—1 Baam. 15:3.
5. Ino kusebensela Yehova camoyo woonse cilaamba nshi?
5 Ano ino kusebensela Yehova camoyo woonse cilaamba nshi? Muntu usebensela Yehova camoyo woonse taalambilibo Lesa ceebo cakwaamba ayi alicishi ayi alyeelete kucita boobo. Muciindi cakucita aboobo, alasebensela Yehova ceebo cakwaamba ayi alimusuni alimwi alamulemeka abuumbi. Alimwi alatolelela kusuna Yehova akumulemeka abuumbi mubuumi bwakwe boonse.
6. Ino inga twacita buyani kwaamba ayi tutolelele kusebensela Yehova camoyo woonse? (Tushimpi 4:23; Mateyo 5:29, 30)
6 Ino cakubonenaako ca bamaami bakalinga kushomeka inga twacikonkela buyani akutolelela kusebensela Yehova camoyo woonse? Tulyeelete kuleya cili coonse ceenga capa kwaamba ayi tucileeke kushomeka kuli Yehova. Kucakubonenaako, tulyeelete kucenjela ashintu nshotweebela na nshotucita ndyetutokookesha. Alimwi tulayandika kusala kabotu beshicibusa kwaamba ayi tutataliki kuyeeya ayi kuba amaali ncocintu ciyandika abuumbi mubuumi. Na twashiiba ayi kuli cintu cimwi catalika kupa kwaamba ayi lusuno ndotucite pali Yehova lunooya buceya, tulyeelete kucitawo comwi peenkapo.—Amubelenge Tushimpi 4:23; Mateyo 5:29, 30.
7. Ino nceebonshi kuleya shintu shitabete kabotu kulayandika?
7 Tatweelete kusuminisha cili coonse kutupa kucileka kusebensela Yehova camoyo woonse. Na twabula kucenjela inga twatalika kulibeca akuyeeya ayi ceebo cakwaamba ayi tutoocita shiinji muncito yakwe Yehova, shintu shitabete kabotu inga tashipi kwaamba ayi tucileeke kumusebensela cakushomeka. Kucakubonenaako, amuyeeye ayi bushiku bumwi lumwi lutobala abuumbi. Lyalo mwasalawo kunwa maanshi kwaamba ayi munyumfweko kutontola. Ano ino nciinshi ceenga cacitika na mwasalawo kukala palumwi bushiku boonse muciindi cakukala mucimfule? Inga tapeendi aciindi inga mwanyumfwa nyotwa alimwi. Ino nciinshi ncetutokwiiyaako? Tatweelete kweelabo pakucita shintu shakumushimu sheenga shayumya bushicibusa bwesu a Yehova. Bweenka mbweenga katutasuni kukala ciindi cilaamfu palumwi ndyelutobala abuumbi, tulayandika kulishitilisha kucintu cili coonse ca mucishi ici ceenga capa kwaamba ayi lusuno ndotucite pali Yehova luceye.—Efe. 2:2.
BAKAANA PASHILUBO NSHOBAKACITA
8-9. Ino Mwaami Defedi a Mwaami Esekiya bakacita buyani ndyebakalulikwa? (Amubone cikope cili papeeji yakutaanguna.)
8 Kweelana ambotweeya, Mwaami Defedi wakacita cilubo cinene. Sombi mushinshimi Natani ndyaakamululika pacilubo ncaakacita, Defedi cakuliceesha wakaana. (2 Samwe. 12:13) Defedi taakwe kulibeceshabo anga waana kwaamba ayi Natani abone anga ncakwiila waana, na kuloonda kwaanishikwa. Sombi maswi Defedi ngaakalemba ngotucana mu Kulumbaisha 51, alatondesha ayi wakaana cancinencine.—Kulu. 51:3, 4, 17, maswi ali peculu.
9 Mwaami Esekiya alakwe wakacita cilubo kuli Yehova. Baibo ilaamba ayi: ‘Wakalisumpula mumoyo wakwe lyalo bukali bwakwe Lesa bwakaseluka pali nguwe, bene Juda alimwi abene Jelusalemu.’ (2 Maka. 32:25) Ino nceebonshi Esekiya wakalisumpula? Mpashi nceebo cakwaamba ayi Yehova wakamupa bubile, wakamucafwa kukoma bene Asilya na ceebo ca kumushilika kubulwashi bwakalinga kusuni kumucaya. Mpashi kulisumpula nkokwakapa kwaamba ayi atondeshe bene Babiloni bubile boonse mbwaakalinga kucite. Mushinshimi Isaya wakamululika paceeci ncaakacita. (2 Baam. 20:12-18) Sombi bweenka mbuli Defedi, Esekiya alakwe wakaliceesha akwaana. (2 Maka. 32:26) Aboobo Yehova wakalinga kubona Esekiya ayi ngu mwaami ushomeka uyo ‘wakatolelela kucita shiluleme.’—2 Baam. 18:3.
Mwaami Defedi a Mwaami Esekiya bakaliceesha akwaana ndyebakalulikwa pashilubo nshobakacita (Amubone palagilafu 8 a 9)
10. Ino nshiinshi Mwaami Amasiya nshaakacita ndyaakalulikwa?
10 Mubupusano a Defedi a Esekiya, Amasiya mwaami wa baJuda wakacita shiluleme, “sombi taakalinga kushicita camoyo woonse.” (2 Maka. 25:2) Ino nciinshi ncakabisha? Pesule lyakwaamba ayi Yehova wamucafwa kukoma bene Edomu, Amasiya wakatalika kulambila balesa babo bakubeca.c Lyalo mushinshimi wakwe Yehova ndyaakamululika pa ncaakacita, taakalinga kusuniiwo kukutika nabibo paniini alimwi wakamutaanda.—2 Maka. 25:14-16.
11. Kweelana a 2 Bene Kolinto 7:9, 11, ino nshiinshi nshotweelete kucita kwaamba ayi Yehova atulekelele? (Amubone ashikope.)
11 Ino nshiinshi nshotutokwiiya kuswa kushakubonenaako ishi? Tulayandika kwaana cancinencine na twaciita cilubo akucita nsheenga twacikonsha kuleya kubooshawo cilubo ico. Ano ino mbuyani na bamanene mulibungano batululika nabi patuntu tutoboneka ayi ntuniini? Tatweelete kulinyumfwa ayi Yehova taatusuniiwo na ayi bamanene balitupatite. Nabibo bamaami bali kabotu ba bene Isilaeli abalo bakalinga kuyandika kululikwa. (Ebu. 12:6) Na twalulikwa, tulayandika (1) kuliceesha akusumina kululikwa, (2) kusebensela pacilubo ico, alimwi (3) kutolelela kusebensela Yehova camoyo woonse. Yehova alaakutulekelela shilubo shesu na twaana cancinencine.—Amubelenge 2 Bene Kolinto 7:9, 11.
Na twalulikwa, tulayandika (1) kuliceesha akusumina kululikwa, (2) kusebensela pacilubo ico, alimwi (3) kutolelela kusebensela Yehova camoyo woonse (Amubone palagilafu 11)f
BAKATOLELELA KULAMBILA YEHOVA KWEELANA AMBWAASUNI
12. Ino nciinshi cinene cakapa kwaamba ayi bamaami bashomeka babe bapuseneeko abamaami batakalinga kushomeka?
12 Bamaami Yehova mbwaakalinga kubona ayi balashomeka bakatolelela kumulambila kweelana ambwaasuni. Alimwi bakayuminisha bantu bakwe Lesa kucita boobo. Kwalo, kweelana ambotweeya, abalo bakalinga kucita shilubo. Sombi bakalinga kulambila Yehova eenkabo alimwi bakasebensa cankusu kunyonyoola shibumbwabumbwa shakalinga kumusena nkobakalinga kukala.d
13. Ino nceebonshi Yehova wakoombolosha Mwaami Aabu ayi taakalinga kushomeka?
13 Ino nceebonshi Yehova wakoombolosha bamaami bamwi ayi tabakalinga kushomeka? Ncakwiila kwaamba ayi teshi shintu shoonse nshobakalinga kucita shakalinga shibiibi. Kucakubonenaako, pesule lyakwaamba ayi Mwaami mubiibi Aabu wanyumfwa ayi Naboti wacaikwa ceebo ca nguwe, wakatondeshako kuliceesha akulinyumfwa cibiibi. (1 Baam. 21:27-29) Alimwi wakayaka mandabala akukoma balwani ba bene Isilaeli. (1 Baam. 20:21, 29; 22:39) Sombi kuli cintu cimwi cibiibi abuumbi Aabu ncaakacita. Kwiinda mukuyungwa amukaakwe, wakayuminisha kulambila shibumbwabumbwa. Taakwe kwaana cancinencine, mukwiinga wakatolelela kulambila shibumbwabumbwa.—1 Baam. 21:25, 26.
14. (a) Ino nceebonshi Yehova wakalinga kubona Mwaami Leoboamu ayi taakalinga kushomeka? (b) Ino ncibiibi nshi bamaami baanji batakalinga kushomeka ncobakacita?
14 Amuyeeye pali Leoboamu, mwaami aumwi watakalinga kushomeka. Kweelana ambotweeya mu palagilafu 2, wakacita shintu shibotu shiinji ndyaakalinga kweendelesha. Sombi bwaami bwakwe ndyebwakayuma, wakacileka kukonkela milawo yakwe Yehova akutalika kulambila shibumbwabumbwa. (2 Maka. 12:1) Kuswawaawo, taakwe kutolelela kunolambila Yehova eenkabo, sombi cimwi ciindi wakalinga kulambila shibumbwabumbwa. (1 Baam. 14:21-24) Leoboamu a Aabu teshi mbobamaami beenkabo bakacileka kulambila Yehova kweelana ambwaasuni. Cancine ncakwaamba ayi bamaami baanji batakalinga kushomeka bakalinga kulambila shibumbwabumbwa akuyuminisha bamwi kucita boobo. Ncakutatoonsha kwaamba ayi kumulambila kweelana ambwaasuni, cakalinga cintu ciyandika abuumbi Yehova ncaakalinga kuyeeyawo ndyaakalinga kusalawo na mwaami ali kabotu nabi sobwe.
15. Ino nceebonshi kutolelela kulambila Yehova kweelana ambwaasuni ncintu ciyandika abuumbi kuli nguwe?
15 Ino nceebonshi kulambila Yehova kweelana ambwaasuni cakalinga cintu ciyandika abuumbi kuli nguwe? Ceebo comwi ncakwaamba ayi mwaami ngowakalinga kucite mukuli wakucafwa bantu kulambila Yehova kweelana ambwaasuni. Alimwi na bantu kabalambila shibumbwabumbwa, balatalika kunoocita shibiibi shimwi akunoocita shintu shitabete kabotu kubamwi. (Osi. 4:1, 2) Kwiilikaawo, bamaami abantu mbobakalinga kweendelesha bakalinga kulyaabite kuli Yehova. Aboobo na bacileka kushomeka kuli Yehova akutalika kulambila shibumbwabumbwa, Baibo ilaamba ayi cakalingabo anga bacita bulale. (Jele. 3:8, 9) Na muntu wacita bulale, alamukalasha abuumbi uyo ngwaeebenaakwe. Alakwe muntu wakalyaaba kuli Yehova uyo utatoleleli kushomeka kuli nguwe, alamukalasha abuumbi.e—Duto. 4:23, 24.
16. Ino nciinshi cinene cipa kwaamba ayi Yehova anoobona ayi baluleme balipusene abantu bataluleme?
16 Ino nshiinshi nshotutokwiiyawo? Ncakutatoonsha kwaamba ayi tulyeelete kuba bashinishite kuleya cili coonse cikumite kubupailishi bwakubeca. Sombi alimwi tulyeelete kutolelela kulambila Yehova kweelana ambwaasuni akutolelela kunosebensa cankusu muncito yakwe. Mushinshimi Malaki wakaamba cakuteenda mweela bupusano buli pakati ka muntu uli kabotu amuntu utabete kabotu. Wakalemba ayi: ‘Mulaakubona bupusano buli pakati ka bantu baluleme abataluleme, basebensela Lesa alimwi abatamusebenseli.’ (Mala. 3:18) Tulisuni kwaamba ayi Yehova anootubona ayi tuli bantu baluleme. Aboobo tulisuni kuba bacenjete kwaamba ayi tutasuminishi cili coonse kutupa kucileka kusebensela Yehova, inga caba ayi nkutamaninina na shilubo shesu. Kucileka kusebensela Yehova ncilubo cinene abuumbi.
17. Ino nceebonshi tulyeelete kusala kabotu wakweebanaakwe?
17 Na tamubete mucikwati alimwi mutoyeeya kuba mucikwati, maswi Malaki ngakaamba inga amucafwa kusala kabotu wakweebanaakwe. Amuyeeye paceeci: Muntu inga kaacite mibo imwi ibotu, sombi na muntu uyo kaatasebenseli Yehova, sa alamubona ayi aliluleme? (2 Koli. 6:14) Na mukeebane amuntu uyo, sa alaakumucafwa kutolelela kushomeka kuli Yehova? Amuyeeye paceeci: Banakashi baswamashi Mwaami Solomoni mbaakeeba, mpashi bakalinga kuciteko mibo imwi ibotu. Sombi tabakalinga kulambila Yehova, alimwi mukuya kwaciindi bakapa kwaamba ayi Solomoni atalike kulambila shibumbwabumbwa.—1 Baam. 11:1, 4.
18. Ino nciinshi bashali ncobeelete kwiisha bana babo?
18 Nobashali, amusebenseshe shakubonenaako sha bamaami baambwa mu Baibo, kucafwa bana banu kusunishisha kusebensela Yehova. Amubacaafwe kunyumfwishisha ayi bamaami bakalinga kusangalasha Yehova mbaabo bakalinga kumulambila akuyuminisha bantu kucita boobo. Amwiishe bana banu kwiinda mushintu nshomwaamba anshomucita akutondesha ayi shintu shimucafwa kuba abushicibusa buyumu a Yehova mbuli kwiiya Baibo, kucanika kumabungano akwaabanamo lubasu muncito yakushimikila, nshoshintu shiyandika abuumbi mubuumi. (Mate. 6:33) Na mwabula kucita boobo, bana banu inga batalika kunoyeeya ayi balyeelete kuba Kamboni ceebo cakwaamba ayi bashali babo Mbakamboni. Aboobo inga kababona ayi kulambila Yehova takuyandiki abuumbi na mpashi inga bacilekabo akumusebensela.
19. Sa na muntu wacileka kusebensela Yehova cilaamba ayi inga taabi shicibusa wakwe alimwi? (Amubone akabokosi kacite mutwi utokwaamba ayi “Inga Mwaboolela Kuli Yehova!”)
19 Sa na muntu wacileka kusebensela Yehova cilaamba ayi inga taabi shicibusa wakwe alimwi? Sobwe, mukwiinga inga waana akuboolela kuli Yehova. Kwaamba ayi acite boobo, alyeelete kuliceesha akusumina lucafwo kuswa kubamanene mulibungano. (Jemu. 5:14) Sombi alaakucana shoolwe shiinji ceebo cakusebensa cankusu kwaamba ayi abe abushicibusa a Yehova alimwi!
20. Ino Yehova alaakunotubona buyani na twakonkela cakubonenaako ca bamaami bakalinga kushomeka?
20 Ino nshiinshi nshotweeya kuswa ku bamaami ba bene Isilaeli? Inga twaba anga mbamaami bakalinga kushomeka na twatolelela kusebensela Yehova camoyo woonse. Atwiiye kuswa kushilubo shesu, kwaana, akusebenselawo pashintu nshotutaciti kabotu. Alimwi atutolelele kwiibaluka kuyandika kwa kunolambilabo Lesa womwi alimwi wancine. Na mwatolelela kushomeka kuli Yehova, alaakunomubona ayi muli muntu ululeme.
LWIIMBO 45 Nshonjeeya Mumoyo
a Mumutwi uyu, maswi akwaamba ayi “bamaami ba bene Isilaeli” atosansulula bamaami boonse bakeendelesha bantu bakwe Yehova, inga caba ayi bakalinga kweendelesha mishobo yobilo ya baJuda, mishobo ili 10 yabene Isilaeli, na mishobo yoonse ili 12.
b KUSANSULULA MASWI: Liinji Baibo ilasebensesha liswi lyakwaamba ayi “moyo” kusansulula bwiine mbotubete. Ici cileelikaawo nshotusuni anshotuyeeya, mbotubona shintu, cituyuminisha kucita shintu shimwi alimwi anshotusuni kukumanisha.
c Paciindi cilya, liinji bamaami batakalinga bene Isilaeli bakalinga kulambila shibumbwabumbwa sha bantu mbobakalinga kukoma.
d Mwaami Asa wakacita shilubo shinene abuumbi. (2 Maka. 16:7, 10) Sombi Baibo ilaamba ayi Asa wakacita shintu shiluleme kuli Yehova. Nabi kwaamba ayi pakutaanguna wakalinga wakaka kululikwa, citoboneka kwaamba ayi mukuya kwaciindi wakaana. Yehova wakabona ayi wakacita shintu shibotu shiinji kwiinda shibiibi. Ciyandika ncakwaamba ayi, Asa wakalinga kulambila Yehova eenkabo alimwi wakeelesha cankusu kunyonyoola shibumbwabumbwa mu bwaami bwakwe.—1 Baam. 15:11-13; 2 Maka. 14:2-5.
e Inga twaboona ayi kulambila Yehova ncintu ciyandika abuumbi kuli nguwe, mukwiinga milawo yobilo yakutaanguna njaakapa bene Isilaeli kwiinda muli Mose yakalinga kukasha kulambila muntu nabi cintu cili coonse, sombi kunolambila Yehova eenkabo.—Kulo. 20:1-6.
f BUSANSULUSHI BWASHIKOPE: Munene wacanike atolulika mukwesu pamakani ambwanwa bwalwa. Mukwesu waliceesha akusumina kululikwa, wasebenselaawo, akutolelela kusebensela Yehova camoyo woonse.