Tatubete Sweenka

1-2. (a) Ino nceebonshi nceenga twaambila ayi tatubi sweenka ndyetutokwiinda mumapensho? (b) Ino nshiinshi nsheshi twiiye mumutwi uyu?

NA TUTOKWIINDA mumapensho ayumu inga twalinyumfwa anga tuli muluundu mushinkite abuumbi alimwi twaluba. Nacibi boobo, ndyetutokwiinda mumapensho tatubi sweenka. Yehova Ishiwesu wakwiculu shilusuno alabona mapensho ngotwiindamo alimwi alisunishishi kutucafwa. Wakatushomesha ayi: ‘Ndaakukucafwa.’—Isa. 41:10.

² Mumutwi uyu tutokwiiya Yehova mbwatucafwa (1) kwiinda mukututanjilila, (2) kutupa nshetuyandika, (3) kutushitilisha, alimwi (4) kutuyuminisha. Yehova wakatushomesha ayi teshi akatulekeleshewo nabi tukeende mumapenshi ali buyani. Alimwi teshi akatusuuleewo. Aboobo tatubete sweenka.

YEHOVA ALATUTANJILILA

3-4. Ino Yehova alatutanjilila buyani? (Kulumbaisha 48:14)

³ Amubelenge Kulumbaisha 48:14. Yehova alicishi ayi inga tatucikonshi kulitanjilila sombi tulayandika kutanjililwa anguwe. Ino basebenshi bakwe bashomeka alabatanjilila buyani munshiku shino? Nshila yomwi mbwaacita boobo nkwiinda mukusebensesha Baibo. (Kulu. 119:105) Kwiinda mu Maswi akwe akatanjililwa amushimu usalashi, Yehova alatucafwa kusala kabotu shakucita akuba amibo itucafwa kuba alusangalalo akulangila kukala kwamuyayaya.a Kucakubonenaako, alatwiisha kulekelela bamwi akuleya kubabikila mfundilishi, kunooshomeka mushintu shoonse akusuna bamwi kuswa panshi lyamoyo. (Kulu. 37:8; Ebu. 13:18; 1 Pit. 1:22) Kutondesha mibo iyi kulapa kwaamba ayi tube bashali bali kabotu, tunoonyumfwana angotweebenaakwe akuba abushicibusa buli kabotu abamwi.

⁴ Kwiilikaawo, Yehova wakapa kwaamba ayi mu Baibo mulembwe amakani aamba pa bantu bakeenda mumapensho akoshenye angotwiindaamo alimwi bakalinyumfwa mbotulinyumfwa. (1 Koli. 10:13; Jemu. 5:17) Kubelenga makani ayo akukonkela nsheenga tweeya, kulatucafwa munshila shobilo. Cakutaanguna, tulashiba ayi kuli abamwi bakeenda mumapensho akoshenye angotutokwiindaamo alimwi bakacikonsha kuliyumya kwiinda mulucafwo lwakwe Yehova. (1 Pit. 5:9) Cabili, tuleeya mbweenga twaliyumya mumapensho ngotutokwiindaamo akutolelela kuba alusangalalo.—Loma. 15:4.

5. Ino mbaani Yehova mbwasebensesha kwaamba ayi atutanjilile?

⁵ Yehova alasebensesha abamakwesu abenankashi kwaamba ayi atutanjilile.b Kucakubonenaako, bamatanjilili balubasu balafwakashila mabungano kwaamba ayi batuyuminishe. Makani ngobaamba alayumya lushomo lwesu akutucafwa kutolelela kuba bacatene. (Milimo 15:40–16:5) Bamanene abalo balacafwa shikushimikila womwi awomwi kwaamba ayi atolelele kuba abushicibusa buyumu a Yehova. (1 Pit. 5:​2, 3) Bashali balaiisha bana babo kusuna Yehova, kusala kabotu shakucita akuba amibo ibotu. Alimwi balabaiisha kunobelenga Baibo lyoonse, kucanika kumabungano akunokwaabanamo lubasu muncito yakushimikila. (Tus. 22:6) Alimwi benankashi bashimpite lwakumushimu balacafwa benankashi bacanike kwiinda mukubatondesha cakubonenaako cibotu, kubayuminisha akubalwiitako sheenga shabacafwa.—Taita. 2:​3-5.

6. Ino nshiinshi nshotweelete kucita kwaamba ayi butanjilishi bwakwe Yehova butucaafwe?

⁶ Yehova wakatupa butanjilishi mbotuyandika kwaamba ayi tunoosala kabotu shakucita akuba alusangalalo mubuumi. Sombi ino nshiinshi nshotweelete kucita kwaamba ayi butanjilishi bwakwe butucaafwe? Tushimpi 3:​5, 6 ilaamba ayi: ‘Cinka manungo muli Yehova amoyo wako woonse. Kutacinka manungo mumaano ako akunyumfwisha shintu.’ Na twacita boobo, ‘alaakutululamikila nshila shesu,’ nkokwaamba ayi alaakutucafwa kuleya kulinjisha mumapensho amwi alimwi tulaakuba alusangalalo. Tulamulumba abuumbi Yehova ceebo cakwaamba ayi alitwishi kabotu, alitusuni alimwi alatupa butanjilishi butucafwa!—Kulu. 32:8.

YEHOVA ALATUPA NSHETUYANDIKA

7. Ino ninshila nshi shimwi Yehova mbwaatupa nshetuyandika? (Bene Filipi 4:19)

⁷ Amubelenge Bene Filipi 4:19. Kwiilika pa kututanjilila lwakumushimu, Yehova alatucafwa pakusebensa cankusu kwesu kwaamba ayi tucane shakulya, shakufwala amwakukala. (Mate. 6:33; 2 Tesa. 3:12) Nabi kwaamba ayi cilibo kabotu kulisukama mbweenga twacana nshetuyandika lwakumubili, Yehova alatuyuminisha kutalisukama cakwiindilila pamakani aya. (Mate. 6:25) Ino nceebonshi? Nceebo cakwaamba ayi Ishiwesu wakwiculu teshi akalekeleshewo basebenshi bakwe bashomeka ndyebatoyandika lucafwo. (Mate. 6:8; Ebu. 13:5) Inga twamushoma cakumaninina ayi alaakutupa nshetuyandika.

8. Ino Yehova wakamucafwa buyani Defedi?

⁸ Amuyeeye Yehova mbwaakacafwa Defedi. Defedi wakeenda mubukaalo buyumu paciindi ndyakalinga kucica Mwaami Saulo. Sombi Yehova wakamupa nshaakalinga kuyandika pomwi abasankwa mbwaakalingaabo kwaamba ayi batafwi. Defedi ndyakayeeya Yehova mbwakamucafwa paciindi ici, wakaamba ayi: ‘Kuswabo kubwanike kushikila abobulya ndyendacembela, nshikwe kubonawo kale baluleme kusuulwa kuli Yehova, nabi bana babo kusengelela shakulya.’ (Kulu. 37:25) Bweenka mbuli Defedi, mpashi amwebo mwakabonawo kale Yehova mbwakamucafwa kuba anshemwakalinga kuyandika na mbwaakacafwa bashominyinaanu.

9. Ino Yehova alabacafwa buyani basebenshi bakwe kuba anshebayandika na kwacitika mapensho akuteengashila? (Amubone ashikope.)

⁹ Kwiilikaawo, Yehova alapa basebenshi bakwe nshebayandika na kwacitika mapensho akuteengashila. Kucakubonenaako, ndyekwakaba nsala inene ku Jelusalemu muciindi ca Beneklistu bakutaanguna, bashominyinaabo bakalinga kukala mumisena imwi bakabapa shintu nshebakalinga kuyandika. (Milimo 11:​27-30; Loma. 15:​25, 26) Amunshiku shino basebenshi bakwe Yehova balacafwa bashominyinaabo batoyandika lucafwo. Na kwacitika mapensho akuteengashila, Yehova alapa kwaamba ayi basebenshi bakwe bacafwe baabo bacitikilwa mapensho ayo kwiinda mukubapa shintu shiyandika mbuli shakulya, maanshi, shakufwala alimwi amisamu. Bamakwesu abenankashi basebensa muncito yakuyaka balabamba Maanda a Bwaami amaanda abashominyinaabo akanyonyooka. Alimwi basebenshi bakwe Yehova balafwambaana kuyuminisha baabo bakanyonyookelwa maanda na bakafwita beshikamukowa nabi beshicibusa.

10-11. Ino nshiinshi nshomweeya kuswa kushakacitikila ba Borys?

¹⁰ Ceebo cakwaamba ayi Yehova ngushikwaaba, bantu batamusebenseli abalo alabapa nshebayandika. Aswebo tulakonkela cakubonenaako cakwe Yehova akucana nshila mbweenga twacafwa baabo batamusebenseli. (Gala. 6:10) Na katucita boobo inga twabacafwa kusuna kwiiya shiinji pali ndiswe apali Yehova. Amuyeeye shakacitikila ba Borys, abo bakalinga kusebensa mbuli ba heedi pa cikolo cimwi ku Ukraine. Nabi kwaamba ayi teshi Bakamboni, lyoonse bakalinga kucita shibotu ku banaacikolo Bakamboni alimwi bakalinga kulemeka nshobashoma. Ceebo ca nkoondo, bakaswaako kumusena nkobakalinga kukala akulongela kumwi kwakalinga kabotu. Alimwi bamakwesu abenankashi bakabacafwa. Bushiku bwa Ciibalusho ndyebwakashika, bakacanikaako. Ba Borys ndyebakayeeya pashintu shoonse bashominyineesu nshobakabacitila, bakaamba ayi: “Bakamboni bakalinga kumbikilako maano abuumbi alimwi bakancafwa. Ndabalumba abuumbi pashintu shoonse nshobakancitila.”

¹¹ Soonse inga twakonkela cakubonenaako cakwe Ishiwesu wakwiculu shinkuumbu kwiinda mukutondesha lusuno kubaabo batoyandika lucafwo, inga caba ayi mbashominyineesu nabi sobwe. (Luka 6:​31, 36) Tulalangila ayi lusuno ndotubatondesha lulaakubapa kusuna kuba bashikwiiya bakwe Yesu. (1 Pit. 2:12) Nabi babula kusalaawo kusebensela Yehova, swebo tulaakuba alusangalalo mukwiinga ‘kupa kulaleta lusangalalo abuumbi.’—Milimo 20:35.

YEHOVA ALATUSHITILISHA

12. Ino Yehova wakashomesha ayi alaakubashitilisha buyani basebenshi bakwe? (Kulumbaisha 91:​1, 2, 14)

¹² Amubelenge Kulumbaisha 91:​1, 2, 14. Munshiku shino, Yehova alatushomesha ayi alaakushitilisha basebenshi bakwe kushintu shili shoonse sheenga shanyonyoola bushicibusa bwabo anguwe. Yehova teshi akasuminishe Satana kupa kwaamba ayi tucileeke kumulambila munshila njaasuni. (Joni 17:15) Alimwi na ‘mapensho anene’ akatalike, inga twashoma cakutatoonsha ayi Yehova alaakutucafwa kutolelela kuba alushomo luyumu akutupulusha.—Ciyu. 7:​9, 14.

13. Ino nshiinshi Yehova nshaacita kwaamba ayi ashitilishe musebenshi wakwe womwi awomwi?

¹³ Ino nshiinshi Yehova nshaacita kwaamba ayi ashitilishe musebenshi wakwe womwi awomwi? Wakatupa Baibo kwaamba ayi tunoocikonsha kushiba ciluleme acitaluleme. (Ebu. 5:14) Na twakonkela njiisho shamu Baibo, tulashitilisha bushicibusa bwesu a Yehova alimwi tulasala shakucita shipa kwaamba ayi tube alusangalalo abuumi bubotu. (Kulu. 91:4) Kwiilikaawo, Yehova wakatupa bamakwesu abenankashi mulibungano abo batucafwa kutolelela kushomeka kuli nguwe. (Isa. 32:​1, 2) Bamakwesu abenankashi mulibungano balimusuni Yehova alimwi balamunyumfwila. Kuba pomwi ambabo kumabungano, muncito yakushimikila andyetutoocita shakulikondelesha, kulatuyuminisha akutucafwa kuleya kucita shintu shitabete kabotu.—Tus. 13:20.

14. (a) Ino nceebonshi teshi lyoonse Yehova ndyeenga watushitilisha kumapensho? (b) Ino Kulumbaisha 9:10 ilatucafwa kushoma nshi? (Amubone a futunoti.)

¹⁴ Kale kale, cimwi ciindi Yehova wakalinga kushitilisha basebenshi bakwe kwaamba ayi batacisikwi nabi kucaikwa. Sombi teshi lyoonse ndyaakalinga kucita boobo. Baibo ilaamba ayi bantu “boonse balashamwa pashindi shipusenepusene.” (Shiku. 9:11) Alimwi Yehova wakasuminishawo kale basebenshi bakwe bamwi kupenshekwa kwiilikaawo akucaikwa, kwaamba ayi atondeshe ayi Satana ngumubeshi. (Jobo 2:​4-6; Mate. 23:34) Ubu mbweenga caba akulindiswe. Ano nabi kwaamba ayi pacecino ciindi Yehova inga taamani mapensho ngotutokwiindaamo, inga twashoma cakutatoonsha ayi teshi akabasuuleewo abo boonse bamusuni.c—Kulu. 9:10.

YEHOVA ALATUYUMINISHA

15. Ino kupaila, kubelenga Maswi akwe Lesa akuba pomwi abashominyineesu kulatuyuminisha buyani? (2 Bene Kolinto 1:​3, 4)

¹⁵ Amubelenge 2 Bene Kolinto 1:​3, 4. Cimwi ciindi tulaba abuumba, kulisukama, akulefuka. Mpashi pacecino ciindi mutokwiinda mulipenshi litoomupa kulinyumfwa kuba nweenka. Sombi amushibe kwaamba ayi Yehova atonyumfwishisha mbomutolinyumfwa. Taalinyumfwibo cibiibi na watubona katupenga, sombi alatuyuminisha ‘akutucafwa mumapensho esu oonse.’ Munshila nshi? Na twapaila kuli Yehova kuswa panshi lyamoyo akumulwiita mbotutolinyumfwa, alatupa “luumuno lwakwe Lesa ulo lwiinda pabusongo bwa bantu boonse.” (Filip. 4:​6, 7) Alimwi tulayuminishikwa na twabelenga Maswi akwe Lesa. Kwiinda mu Baibo, Yehova alatulwiita mbwaatusuni, kutwiisha mbweenga twaba basongo akutucafwa kuba akulangila. Kwiilikaawo, tulayuminishikwa na twacanika kumabungano mukwiinga tuleeya makani amu Baibo ayuminisha akuba pomwi abamakwesu abenankashi batusuni.

16. Ino nshiinshi nshomweeya kuswa kucakubonenaako caba Nathan aba Priscilla?

¹⁶ Shakacitikila ba Nathan aba Priscilla bakala ku United States inga shatucafwa kunyumfwishisha Yehova mbwaatuyuminisha kusebensesha Maswi akwe. Myaaka iinji yainda, bakalinga basalawo kuya mukusebensela kumusena kwakalinga kuyandika beshikushimikila baanji. Ba Nathan bakaamba ayi: “Twakalinga kushomete ayi Yehova alaakutucafwa na tukalongele kumusena uko.” Nacibi boobo, ndyebakashika kumusena uko, cakuteengashila bakatalika kuciswa akwiinda mulipenshi lyakubula maali. Mukuya kwaciindi, bakaboolelabo kuŋanda alimwi bakatolelela kwiinda mulipenshi lyakubula maali. Ba Nathan bakaamba ayi: “Ndakalinga kuliipusha ayi, ‘Ino nceebonshi Lesa taakwe kutucafwa kweelana ambotwalinga kulangila?’ Alimwi ndakatalika kuyeeya ayi mpashi kuli cilubo ncondakacita.” Ndyepakeenda ciindi, ba Nathan aba Priscilla bakesa mukushiba ayi Yehova taakwe kubasuula. Ba Nathan bakaamba ayi: “Paciindi ndyetwakalinga kwiinda mubukaalo buyumu, Baibo yakalinga anga ngu shicibusa wesu musongo uyo wakalinga kutuyuminisha akutucafwa kushiba shakucita. Kubikila maano kubona Yehova mbwakatucafwa kuliyumya kwiinda kubikila maano kumapensho ngotwakalinga kwiindaamo, kwakatucafwa kushoma cakutatoonsha ayi Yehova alaakutolelela kutucafwa.”

17. Ino Yehova wakamuyuminisha buyani Nankashi Helga? (Amubone acikope.)

¹⁷ Bamakwesu abenankashi abalo inga batuyuminisha. Munshila nshi? Amuyeeye pa cakubonenaako caba Helga bakala ku Hungary. Kwamyaaka iinji, bakeenda mumapensho ayumu ayo akabapa kutalika kulisukama akulinyumfwa kubula mpindu. Sombi na bayeeya paciindi ndyebakalinga kwiinda mumapensho, balabona ayi Yehova wakalinga kubayuminisha kwiinda mukusebensesha bamakwesu abenankashi. Bakaamba ayi: “Lyoonse Yehova wakalinga kuncafwa na wabona ayi ndamaninwa nkusu ceebo cancito yakumubili njondakalinga kusebensa, kulama mwanaangu wakalinga mulwashi aceebo cakwiinda mumapensho amwi. Alanjuminisha bushiku abushiku kwamyaaka 30 yainda. Liinji alanjuminisha kwiinda mu maswi ayuminisha bamwi ngobandwiita. Paciindi ndyentoyandika kuyuminishikwa, liinji bamakwesu abenankashi balantumina mameseji, kundembela tukalata, alimwi ankundumba.”

18. Ino inga twacita buyani kwaamba ayi tuyuminishe bamwi?

¹⁸ Tulicite coolwe cakukonkela cakubonenaako cakwe Yehova kwiinda mukuyuminisha bamwi. Ino inga twacita buyani kwaamba ayi tuyuminishe bamwi? Nkwiinda mukubakutika cakukalika moyo, kubandikaabo munshila iyuminisha, alimwi akubacafwa kuba anshebatoyandika. (Tus. 3:27) Tuleelesha kuyuminisha baabo boonse batokwiinda mumapensho kwiilikaawo abaabo batasebenseli Yehova. Na bantu mbotubambenaabo balicite buumba, mbalwashi nabi na batolisukama, tulabafwakashila, kubakutika cakubikila maano akubabelengelako malembo ayuminisha. Na katukonkela cakubonenaako cakwe Yehova ‘uyo utuyuminisha mumapensho esu oonse,’ tulaakucafwa bashominyineesu kuliyumya mumapensho ngobatokwiindaamo akupa kwaamba ayi abo batasebenseli Yehova basune kwiiya pali nguwe.—Mate. 5:16.

YEHOVA TESHI AKACILEKEEWO KUNOOTUCAFWA

19. Ino Yehova alatucafwa buyani, alimwi ino cakubonenaako cakwe inga twacikonkela buyani?

¹⁹ Yehova alababikilako maano abuumbi abo boonse bamusuni. Taatulekeleshiiwo ndyetutokwiinda mumapensho. Bweenka mushali ucite lusuno mbwaabikila maano kumwanaakwe, Yehova alakwe alababikilako maano basebenshi bakwe bashomeka. Alatutanjilila, kutupa nshetuyandika, kutushitilisha akutuyuminisha. Na katucafwa baabo batokwiinda mumapensho akubayuminisha, tulatondesha ayi tutokonkela cakubonenaako cakwe Ishiwesu wakwiculu shilusuno. Ndyetucili mucishi cino, inga tweenda mubukaalo buyumu akuba abuumba. Sombi inga twashoma cakutatoonsha ayi Yehova teshi akatulekelesheewo. Wakatushomesha ayi: ‘Utaloondi, mukwiinga ndi andiwe.’ (Isa. 41:10) Aboobo inga twashoma cakutatoonsha ayi tatubete sweenka!