Amushome Ayi Yehova Alimusuni

1. Ino nceebonshi mwakasalawo kusebensela Yehova mubuumi bwanu boonse? (Amubone acikope.)

SA MUTOKWIIBALUKA ciindi ndyemwakapaila kuli Yehova akumulwiita ayi mulisuni kumusebensela mubuumi bwanu boonse? Mwakacita boobo ceebo cakwaamba ayi mwakamushiba kabotu akumusuna. Mwakamushomesha ayi munanoobika panembo kucita kuyanda kwakwe mubuumi bwanu alimwi ayi mulaakutolelela kumusebensela amoyo wanu woonse, buumi bwanu boonse, miyeeyo yanu yoonse ankusu shanu shoonse. (Maako 12:30) Kuswabo ciindi ico, lusuno lwanu pali nguwe lwatolelela kuyuminaako. Aboobo ino inga mwakumbula buyani na muntu wamwiipusha ayi, “Sa ncakwiila Yehova mulimusuni?” Inga mwashikilabo kukumbula ayi, “Ndimusuni abuumbi kwiinda muntu uli woonse na cintu cili coonse!”

2-3. Ino Yehova alisuni ayi tunooshoma nshi, alimwi ino tutokwiiya nshi mumutwi uyu? (Jelemiya 31:3)

² Ano ino inga mwakumbula buyani na muntu wamwiipusha ayi, “Sa ncakwiila Yehova alimusuni?” Mpashi inga mwawayawaya kukumbula ceebo cakuyeeya ayi Yehova inga taasuni muntu mbuli ndimwe. Nankashi umwi wakalinga kulinyumfwa ayi taakuwo bakalinga kumusuni ndyaakalinga mwanike, wakaamba ayi: “Ndicishi ayi Yehova ndimusuni. Calo ico nshintonshiiwo nabibo paniini. Sombi liinji ndatoonsha na Yehova alakwe alinsuni.” Aboobo ino nshiinshi sheenga shamucafwa kushiba kabotu Yehova mbwaalinyumfwa pali ndimwe?

³ Yehova alisuni ayi munooshoma cakutatoonsha ayi alimusuni. (Amubelenge Jelemiya 31:​3, NWT.) Cancine ncakwaamba ayi Yehova alisuni ayi mwiiye shiinji pali nguwe akuba abushicibusa anguwe. Alimwi ndyemwakaaba buumi bwanu kuli nguwe akubombekwa, wakamupa cipo cilibetele, nkokwaamba ayi kutalika kumutondesha lusuno lutamaani. Ici cilaamba ayi alimusuni abuumbi alimwi teshi akamushiyewo. Ceebo cakwaamba ayi alatondesha lusuno lutamaani kubasebenshi bakwe bashomeka, boonse alababona ayi “ncintu cilibetele.” Aboobo mulayandika abuumbi kuli nguwe. (Mala. 3:​17, NWT) Yehova alisuni ayi munooshoma ayi alimusuni bweenka mutumwi Paulo mbwaakalinga kulinyumfwa. Paulo wakaamba cakutatoonsha ayi: ‘Ndishinishite kwaamba ayi taaku ceenga catupansaanya alusuno lwakwe Lesa pali ndiswe. Lufu nabi buumi, baanjelo nabi beendeleshi ba kwiculu, shintu sha pacecino ciindi nabi shintu sheshi shikaboneke nabi shili kwiculu nabi panshi lya cishi, taaku cilengwa nabi comwi ceenga catupansaanya alusuno lwakwe Lesa.’ (Loma. 8:​38, 39) Mumutwi uyu tutokwiiya ncotuyandikila kunooshoma ayi Yehova alitusuni ansheenga twaciita kwaamba ayi tunooshoma cakutatoonsha ayi alitusuni.

NCOMUYANDIKILA KUSHOMA AYI YEHOVA ALIMUSUNI

4. Ino mbubeshi nshi Satana mbwaasuni ayi tunooshoma, alimwi ino inga twabukaka buyani?

⁴ Na kamushoma ayi Yehova alimusuni, inga mwacikoonsha “kulwana maano a bucenjeshi bwakwe Satana.” (Efe. 6:11) Satana alisuni ayi tucileeke kusebensela Yehova. Alaakucita nsheenga wacikonsha kwaamba ayi akumanishe kuyanda kwakwe. Nshila yomwi mbwaacita boobo nkweelesha kutupa kunoyeeya ayi Yehova taatusuniiwo. Sombi ubo mbubeshi bwakwaansa. Baibo ilakoshanisha Satana ku nkalamu. (1 Pit. 5:​8, 9) Liinji inkalamu shilasuna kucata shinyama shitacite nkusu alimwi sheenga shaalilwa kulishitilisha. Satana alakwe alasuna kutulwana na tutolinyumfwa kumaninwa nkusu, kulema, kulinyumfwa cibiibi ceebo ca shintu shakatucitikila kale kale, tutokwiinda mumapensho nabi na tutolisukama pa sheenga shacitika kunembo. (Tus. 24:10) Alayeeya ayi inga watulefula abuumbi cakwaamba ayi twacileka akusebensela Yehova. Sombi inga ‘twapikisha Mubiibi’ anshila shakwe shabucenjeshi kwiinda mukucita nsheenga twacikoonsha kwaamba ayi tunooshoma cakutatoonsha ayi Yehova alitusuni.—Jemu. 4:7.

5. Ino nceebonshi cilayandika kunolinyumfwa ayi Yehova alimusuni abuumbi alimwi alamubona ayi mulayandika?

⁵ Na katushoma ayi Yehova alitusuni, bushicibusa bwesu anguwe bulaakuyuminaako. Ino nceebonshi nceenga twaambila boobo? Yehova wakatulenga munshila yakwaamba ayi katutondesha lusuno kubamwi abalo kabatutondesha lusuno. Kukashalilo, na muntu kaatutondesha lusuno, aswebo tulamusuna. Aboobo na katulinyumfwa ayi Yehova alitusuni abuumbi alimwi alatubona ayi tulayandika, aswebo tulaakumusuna abuumbi. (1 Joni 4:19) Alimwi na twamusuna abuumbi, alakwe alaakutusuna abuumbi. Baibo ilaamba cakuteenda mweela ayi: ‘Amusene pafwiifwi a Lesa alakwe alaakusena pafwiifwi amwebo.’ (Jemu. 4:8) Ano ino nshiinshi nsheenga twaciita kwaamba ayi tunooshoma cakutatoonsha ayi Yehova alitusuni?

SHEENGA SHAMUCAFWA KUNOOSHOMA AYI YEHOVA ALIMUSUNI

6. Ino nshiinshi nsheenga mwaciita na mulatoonsha ayi Yehova alimusuni?

⁶ Amutolelele kupaila kuli Yehova kwaamba ayi amucaafwe kunyumfwishisha ncaamusunini. (Luka 18:1; Loma. 12:12) Inga mwapaila kuli Yehova nabibo mankanda aanji pabushiku kwaamba ayi amucaafwe kushiba mbwaalinyumfwa pali ndimwe. Cimwi ciindi, inga kamulinyumfwa cibiibi abuumbi cakwaamba ayi inga kamwaalilwa kushoma ayi Yehova alimusuni. Sombi munokwiibaluka ayi Yehova ngumunene kwiinda moyo wanu. (1 Joni 3:​19, 20) Alimushi kabotu kwiinda ambomulishi nobeene; alimwi alabona mibo ibotu njomucite nabi kwaamba ayi mwebo inga kamubona anga tamwiiciteewo. (1 Samwe. 16:7; 2 Maka. 6:30) Aboobo mutanoowayawaya kumulwiita shoonse shili kumoyo wanu akumusenga ayi amucaafwe kushoma ayi alimusuni. (Kulu. 62:8) Pesule lyakupaila kuli nguwe, cilayandika abuumbi kwaamba ayi mwaciita shintu shitokonkelaawo.

7-8. Ino libuku lya Kulumbaisha lilatucafwa buyani kushoma ayi Yehova alitusuni?

⁷ Amushome Yehova nshamulwiita mu Maswi akwe. Yehova wakasebensesha mushimu wakwe ucite nkusu kutanjilila basankwa bakalemba Baibo. Aboobo inga twashooma ayi nshobakalemba pali Yehova nshancine. Kucakubonenaako, Defedi wakasansulula kabotu Yehova mbwaatubikilako maano ndyakaamba ayi: ‘Yehova alibo muliimfwa kubaabo balefukite alimwi alafuna baabo batacite cakulangila.’ (Kulu. 34:18) Na mwalefuka abuumbi, inga mwalinyumfwa ayi taakuwo weenga wanyumfwishisha mbomutolinyumfwa na weenga wamucafwa. Sombi Yehova wamushomesha ayi na mwalinyumfwa boobo, alababo muliimfwa andimwe kwaamba ayi amucaafwe mukwiinga alashiba ayi mutoyandika lucafwo lwakwe. Defedi alimwi wakalemba ayi: ‘Amubike minsonshi yangu munkomwi yanu ya cipaya.’ (Kulu. 56:8) Yehova alabona na mwalinyumfwa cibiibi andyemutoopenga. Alamubikilako maano abuumbi alimwi cilamucisa kumoyo na mutoopenga. Bweenka maanshi ali mulibotolo mbwaayandika kumuntu uli palweendo muluyanga, Yehova alakwe alabikila maano abuumbi kuminsonshi yanu cakwaamba ayi aleebaluka shiindi shoonse ndyemupenga akulila. Pa Kulumbaisha 139:​3, palaamba ayi: “Nshila shangu shoonse mwebo mulishishi.” Yehova alabona shoonse nshomucita, sombi alabikila bunene maano ku shintu shibotu nshomucita. (Ebu. 6:10) Ino nceebonshi? Mukwiinga alalumba abuumbi pashintu shoonse nshomucita kwaamba ayi mumusangalashe.a

⁸ Yehova alasebensesha malembo ayuminisha kwaamba ayi amulwiite ayi alamubikilako maano alimwi alimusuni abuumbi. Sombi kweelana ambotweeya, Satana alisuni ayi munooshoma ayi Yehova taamusuniiwo. Aboobo na cimwi ciindi mwatalika kutoonsha na Yehova alimusuni, inga mwaliipusha ayi, ‘Ino ngani ngonjeelete kushoma—“ishi wa bubeshi” na “Lesa wacancine”?’—Joni 8:44; Kulu. 31:​5, NWT.

9. Ino nciinshi Yehova ncashomesha baabo bamusuni? (Kulonga 20:​5, 6)

⁹ Munooyeeya Yehova mbwaalinyumfwa pabaabo bamusuni. Amuyeeye pa maswi Yehova ngaakalwiita Mose abene Isilaeli. (Amubelenge Kulonga 20:​5, 6.) Yehova wakashomesha ayi alaakutolelela kutondesha lusuno lutamaani kubaabo bamusuni. Ceebo cakwaamba ayi Yehova alashomeka, inga twashooma ayi inga tasaliiwo kutatondesha lusuno kumuntu umusuni. (Neye. 1:5) Aboobo na mwatalika kutoonsha na Yehova alimusuni, inga mwaliipusha ayi, ‘Sa Yehova ndimusuni?’ Lyalo inga mwayeeya paceeci: Na mulimusuni alimwi mutoocita nsheenga mwacikoonsha kwaamba ayi mumusangalashe, inga mwashooma ayi alimusuni abuumbi. (Danye. 9:4; 1 Koli. 8:3) Munshila imwi inga twaamba ayi, na mwebo tamutonshiiwo ayi Yehova mulimusuni, nkokwaamba ayi tamweelete kutoonsha ayi alakwe alimusuni. Inga mwashoma cakutatoonsha ayi ananomutondesha lusuno lyoonse alimwi teshi akamushiyewo.

10-11. Ino Yehova alisuni ayi cilubula munoocibona buyani? (Bene Galatiya 2:20)

¹⁰ Munookutumana kuyeeya pacilubula. Cilubula ca mulambu wakwe Yesu Klistu ncipo ciinditeewo Yehova ncaakapa bantu. (Joni 3:16) Ano sa Yehova wakatuma Mwanaakwe kwaamba ayi amufwiite andimwe? Ee! Amuyeeye pacakubonenaako ca mutumwi Paulo. Wakacita shintu shimwi shibiibi abuumbi kaatana kuba Mwineklistu. Alimwi nabi pesule lya kuba Mwineklistu, wakalinga kweelete kutolelela kusebensela mu mbasu mwaatakalinga kucita kabotu ceebo cakutamaninina. (Loma. 7:​24, 25; 1 Timo. 1:​12-14) Sombi Paulo wakesa mukutalika kushoma ayi Yehova wakaaba Mwanaakwe mbuli cipo kuli nguwe. (Amubelenge Bene Galatiya 2:20.) Yehova ngwaakatanjilila Paulo kulemba maswi aya mu Baibo. Alimwi shoonse shilembetwe mu Baibo shakalembelwa kutwiisha. (Loma. 15:4) Aboobo Yehova alisuni ayi munooshoma ayi mulambu wakwe Yesu ncipo kuli ndimwe. Na kamuyeeya pakuyandika kwa cilubula alimwi ayi ncipo Yehova ncaakamupa, mulaakunoshoma cakutatoonsha ayi Yehova alimusuni.

¹¹ Tulamulumba Yehova ceebo cakwaamba ayi wakatuma Yesu pacishi kusa mukutufwita. Sombi cimwi Yesu ncaakesita pacishi nkusa mukwiisha bantu cancine pali Lesa. (Joni 18:37) Wakeelikaawo akutwiisha ayi Yehova alibasuni abuumbi bana bakwe.

YESU MBWAATUCAFWA KUSHOMA AYI YEHOVA ALITUSUNI

12. Ino nceebonshi inga twashoma Yesu nshakaamba pali Yehova?

¹² Yesu ndyaakalinga pacishi, wakalinga kunyumfwa kabotu kulwiitako bamwi Yehova mbwaabete. (Luka 10:22) Inga twashoma Yesu nshakaamba pali Yehova. Ino nceebonshi? Mukwiinga Yesu wakalinga a Yehova kwiculu kwamyaaka iinji, kwiinda cilengwa camushimu cili coonse. (Kolo. 1:15) Yesu alicishi kabotu Baishi mbobamusuni. Alimwi alabona Yehova mbwaatondesha lusuno ku baanjelo bashomeka aku bana bakwe bashomeka bali pacishi. Ino Yesu alatucafwa buyani kushoma ayi Lesa alitusuni?

13. Ino Yesu alisuni ayi tushibe nshi pali Yehova?

¹³ Yesu alisuni ayi tushibe kabotu Yehova mbwaalinyumfwa pali ndiswe. Mu mabuku a Makani Abotu, Yesu wakaamba pali Yehova ayi “Ishiwanu” mankanda aanji. Alimwi ndyaakalinga kubandika abashikwiiya bakwe, wakalinga kusebensesha maswi mbuli “Ishiwanu wa kwiculu” na “Ishiwanu uli kwiculu.” (Mate. 5:16; 6:26) Yesu kaatana kusa pacishi, basebenshi bakwe Yehova bashomeka bakalinga kwiita Yehova ayi ‘Shinkusu Shoonse,’ ‘Lesa Wiinditeewo,’ ‘Mulengi Wiinditeewo’ alimwi amaswi amwi abulemu. Sombi liinji Yesu wakalinga kwiita Yehova ayi ‘Ishiwesu.’ Liswi ili lilatondesha ayi Yehova alisuni ayi basebenshi bakwe banoolinyumfwa kuba pafwiifwi anguwe bweenka mwaana mbwalinyumfwa kuba pafwiifwi abaishi bacite lusuno. Aboobo Yesu wakalinga kutwiisha ayi Yehova alitusuni bweenka mushali musankwa uli kabotu mbwaasuna bana bakwe. Amuleke twiiye shiinji pashiindi shobilo Yesu ndyaakasebensesha liswi lyakwaamba ayi “Ishiwanu” kwaamba pali Yehova.

14. Ino Yesu wakatondesha buyani ayi soonse tulayandika abuumbi kuli Yehova Ishiwesu wakwiculu? (Mateyo 10:​29-31) (Amubone acikope.)

¹⁴ Atutaangune kubandika pamaswi Yesu ngaakaamba ngotucana pa Mateyo 10:​29-31. (Amubelenge.) Tutiinga ntuyuni tuniini abuumbi uto tweshi tukabule kulambilawo Yehova nabi kumusuna. Sombi Ishiwesu alatubikilako maano abuumbi cakwaamba ayi alashiba katiinga komwi akomwi nkokabete. Na Yehova alabikila maano ku tuyuni utu tuniini, inga twashoma cakutatoonsha ayi alabikila maano abuumbi ku womwi awomwi wandiswe mukwiinga tulimusuni alimwi tulamulambila! Alimwi Yesu wakaamba ayi Ishiwesu alicishi anamba ya misusu womwi awomwi wandiswe njaacite mumutwi. Ceebo cakwaamba ayi Yehova alicishi atuntu tuniini pali ndiswe mbuli misusu, inga twashoma cakutatoonsha ayi alatubikilako maano abuumbi. Ncakutatoonsha kwaamba ayi Yesu alisuni ayi soonsebo tunoolinyumfwa ayi tulayandika abuumbi kuli Ishiwesu wakwiculu.

15. Ino maswi Yesu ngaakaamba pa Joni 6:44 alamwiisha nshi pali Ishiwanu wakwiculu?

¹⁵ Atubandike pacintu acimwi Yesu ncakatwiisha, ico Yehova Ishiwesu wakwiculu ncaakacita. (Amubelenge Joni 6:44.) Ishiwanu wakwiculu wakamucafwa kwaamba ayi mumushiibe akumusuna. Ino nceebonshi ncaakacitila boobo? Nceebo cakwaamba ayi wakabona mibo ibotu njomucite. (Milimo 13:48) Yesu ndyaakaamba maswi ngotucana pa Joni 6:​44, mpashi wakalinga kuyeeya pamaswi Yehova ngaakaamba acanika pa Jelemiya 31:​3, apo mpwakalwiita bantu bakwe ayi: “Ndakamusenya kuli ndime alusuno lutamaani.” (Jele. 31:​3, NWT; amweelanye a Osiya 11:4.) Ino maswi aya alasansulula nshi? Ishiwesu wakwiculu shilusuno lyoonse alabona mibo ibotu njomucite mpashi mwebo njomubona ayi tamwiiciteewo.

16. (a) Ino nciinshi Yesu ncaakatwiisha, alimwi ino nceebonshi inga twamushoma? (b) Ino nshiinshi sheenga shamucafwa kushoma ayi Yehova ngu Ishiwanu uli kabotu abuumbi ngomucite? (Amubone kabokosi kacite mutwi utokwaamba ayi ‘Yehova Ngu Mushali Musankwa Soonse Ngotuyandika.’)

¹⁶ Yesu wakamwiisha ayi Yehova teshibo Baishi eenka, sombi amwebo Mbaishiwanu. Alisuni kwaamba ayi munooshoma ayi Yehova alimusuni alimwi alamubikilako maano abuumbi. Aboobo na cimwi ciindi mwatalika kutoonsha na Yehova alimusuni, munokwiibaluka Yesu nshaakaamba akumushoma mukwiinga lyoonse alaamba lushinisho alimwi alibeshi kabotu Baishiwesu.—1 Pit. 2:22.

AMUTOLELELE KUNOOSHOMA AYI YEHOVA ALIMUSUNI

17. Ino nceebonshi tulyeelete kutolelela kunooshoma cakutatoonsha ayi Yehova alitusuni?

¹⁷ Tulyeelete kucita nsheenga twacikoonsha kwaamba ayi tutolelele kunooshoma ayi Yehova alitusuni. Kweelana ambotweeya, Satana atoocita nsheenga wacikonsha kwaamba ayi tucileeke kusebensela Yehova. Alisuni kutulefula. Aboobo alaakutolelela kweelesha kutupa kunooshoma ayi Yehova taatusuniiwo. Tatweelete kushoma bubeshi bwakwe Satana!—Jobo 27:5.

18. Ino nshiinshi nsheenga mwaciita kwaamba ayi mutolelele kushoma ayi Yehova alimusuni?

¹⁸ Mumutwi uyu, mweeya nsheenga mwaciita kwaamba ayi munooshoma ayi Yehova alimusuni. Inga mwapaila kuli nguwe akumusenga kwaamba ayi amucaafwe kunyumfwishisha ncaamusunini. Munookutumana kuyeeyawo abuumbi pamalembo aamba Yehova mbwaababikilako maano abuumbi abo bamusuni. Lyoonse munookwiibaluka ayi Yehova alatondesha lusuno kubaabo bamusuni alimwi ayi wakaaba Mwanaakwe mbuli cipo kuli ndimwe. Alimwi munooshoma ayi Yehova ngu Ishiwanu bweenka Yesu mbwakaamba. Lyalo na muntu umwi akamwiipushe ayi: “Sa ncakwiila Yehova alimusuni?” mulaakukumbula cakushinisha ayi: “Ee, alinsuni! Alimwi bushiku abushiku ndacita nsheenga ndacikonsha kwaamba ayi ntondeshe ayi ndimusuni!”