Amushome Ayi Yehova Wakamulekelela

1-2. Ino tulalinyumfwa buyani na twashiiba ayi Yehova wakatulekelela? (Amubone acikope cili papeeji yakutaanguna.)

MWAAMI Defedi wakalinyumfwa cibiibi abuumbi pa shintu shibiibi nshaakacita. (Kulu. 40:12; 51:3; maswi apeculu) Sombi wakaana kuswa panshi lyamoyo alimwi Yehova wakamulekelela. (2 Samwe. 12:13) Defedi wakasangalala ndyaakashiba ayi Yehova wakamulekelela.—Kulu. 32:1.

² Aswebo inga twasangalala na twashiiba ayi Yehova wakatunyumfwila nkuumbu alimwi wakatulekelela. Cilayuminisha kushiba ayi Yehova inga watulekelela nabi twaciita cilubo cinene kulilabo na twaana cancinencine, twapaila kuli nguwe kwaamba ayi atulekelele, twabandika abamanene, alimwi akucita nsheenga twacikonsha kwaamba ayi tutakaciboshiiwo kucita cilubo ico! (Tus. 28:13; Milimo 26:20; 1 Joni 1:9) Alimwi na Yehova watulekelela cilababo anga tatuna kucitawo acilubo!—Esek. 33:16.

3-4. Ino nankashi umwi wakalinga kulinyumfwa buyani pesule lyakubombekwa, alimwi ino tutokwiiya nshi mumutwi uyu?

³ Nacibi boobo, cimwi ciindi inga katutoonsha na ncakwiila Yehova wakatulekelela. Ubu mbobakalinga kulinyumfwa ba Jennifer abo bakakomenena mucancine. Ndyebakalinga bacikula bwangu bakatalika kucita shintu shitabete kabotu mubushishi. Ndyepakeenda myaaka iinji, bakaalula buumi bwabo akweelela kubombekwa. Bakaamba ayi: “Kantana kubombekwa, liinji ndakalinga kucita bufuule, kukolwa, kukalala abuumbi akubikila maano kukupanga maali. Ndakalinga kucishi ayi Baibo ilaamba ayi Yehova inga wandekelela pashilubo nshondakacita ceebo ca mulambu wakwe Klistu. Nacibi boobo, nabi kwaamba ayi ndakaana alimwi ndakasenga Yehova kwaamba ayi andekelele, nshindakalinga kushomaawo ayi ncakwiila wakandekelela.”

⁴ Sa cimwi ciindi mulatoonsha na Yehova wakamulekelela pashilubo nshomwakacita kale kale? Yehova alisuni ayi munooshoma ayi wakamulekelela bweenka Defedi mbwakalinga kushoma ayi ncakwiila Yehova wakamulekelela. Mumutwi uyu, tutokwiiya ncotuyandikila kunooshoma ayi ncakwiila Yehova wakatulekelela asheenga shatucafwa kucita boobo.

NCOTUYANDIKILA KUSHOMA AYI YEHOVA WAKATULEKELELA

5. Ino Satana alisuni ayi tunooshoma nshi? Amwaambe cakubonenaako.

⁵ Na katushoma ayi ncakwiila Yehova alitusuni alimwi wakatulekelela, teshi tukashome bubeshi bwakwe Satana. Munookwiibaluka ayi Satana alisuni ayi tucileeke kusebensela Yehova. Alaakucita nsheenga wacikonsha kwaamba ayi akumanishe kuyanda kwakwe. Kucakubonenaako, Satana inga weelesha kutupa kunooshoma ayi Yehova teshi akatulekelelewo shibiibi shesu. Amuyeeye pacakubonenaako ca musankwa waku Kolinto uyo wakakushikwa mulibungano ceebo cakucita bulale. (1 Koli. 5:​1, 5, 13) Musankwa uyo ndyaakaana, Satana wakalinga kusuni ayi bashominyina batamulekeleli alimwi batamutambuli mulibungano. Alimwi Satana wakalinga kusuni ayi musankwa uyo anoolinyumfwa ayi Yehova taakwe kumulekelela, kwaamba ayi ‘oongumane abuumbi’ lyalo acileeke kusebensela Yehova. Ishi Satana nshaeelesha kucita amunshiku shino. Sombi ‘tulishi nshila shakwe shabucenjeshi.’—2 Koli. 2:​5-11.

6. Ino nciinshi nceenga twaciita kwaamba ayi tucileeke kulinyumfwa cibiibi pashilubo nshotwakacita kale kale?

⁶ Inga twacileka kulinyumfwa cibiibi pashilubo nshotwakacita na katushoma cakutatoonsha ayi Yehova wakatulekelela. Na twaciita cilubo, tulalinyumfwa cibiibi. (Kulu. 38:​4, 8) Kulinyumfwa boobo kulibo kabotu mukwiinga inga kwatucafwa kwaalula buumi bwesu akutalika kucita shintu shiluleme. (2 Koli. 7:​10, 11) Sombi na twatolelela kulinyumfwa cibiibi pesule lyakwaamba ayi twaana, inga twalefuka abuumbi cakwaamba ayi inga twacileka akusebensela Yehova. Na katushoma ayi ncakwiila Yehova wakatulekelela, inga twacileka kulinyumfwa cibiibi. Lyalo inga twatolelela kumusebensela anjelacaamba isalalite alimwi calusangalalo. (Kolo. 1:​10, 11; 2 Timo. 1:3) Sombi ino nshiinshi nsheenga twaciita kwaamba ayi tunoshoma cakutatoonsha ayi Yehova wakatulekelela?

SHEENGA SHATUCAFWA KUNOOSHOMA AYI YEHOVA WAKATULEKELELA

7-8. Ino nshiinshi Yehova nshaakalwiita Mose, alimwi ino nciinshi nceenga twashooma? (Kulonga 34:​6, 7)

⁷ Munooyeeya Yehova nshaakaamba pali nguwe mwiine. Kucakubonenaako, amuyeeye pamaswi Yehova ngaakalwiita Mose pa Kalundu ka Sinayi.a (Amubelenge Kulonga 34:​6, 7.) Nabi kwaamba ayi Yehova alicite mibo iinji ibotu, wakasalawo kulwiita Mose ayi ngu Lesa ‘uswite nkuumbu alimwi ulekelela.’ Sa Lesa wamushobo uyu inga wakaka kulekelela musebenshi wakwe waana cancinencine pacilubo ncaakacita? Ico inga tacicitikiwo! Na Yehova wakaka kulekelela musebenshi wakwe waana, ingayi ngushilunkutwe alimwi taacite nkuumbu. Sombi ubo Yehova teshi mbwaabete alimwi teshi akabeewo amibo iyi!

⁸ Inga twashooma ayi na Yehova waamba ayi alicite nkuumbu, ingayi waamba cancine mukwiinga taabeciiwo. (Kulu. 31:5) Aboobo inga twashoma nshaatulwiita mu Maswi akwe. Na cilamuyumina kushoma ayi ncakwiila Yehova wakamulekelela, inga mwaliipusha ayi: ‘Sa ndashoma ayi ncakwiila Yehova alicite nkuumbu abuumbi alimwi inga walekelela muntu uli woonse weenga waana pashilubo nshaakacita?’ Na ubo mbomushoma, nkokwaamba ayi tamweelete kutoonsha ayi wakamulekelela amwebo.

9. Ino Kulumbaisha 32:5 ilatwiisha nshi pali Yehova mbwaatulekelela shibiibi shesu?

⁹ Munooyeeya Yehova nshatwiisha mu Baibo pamakani ambwaatulekelela. Kucakubonenaako, amuyeeye pamaswi Defedi ngaakalemba atondesha Yehova mbwaatulekelela. (Amubelenge Kulumbaisha 32:5.) Defedi wakaamba ayi: “Mwakalekelela milandu yakubisha kwangu yoonse.” Palilembo ili, liswi lyamu ciEbulu lyakasansululwa ayi “mwakalekelela,” inga lyasansulula “kunyamuna” na “kutola.” Aboobo Yehova ndyaakalekelela Defedi, cakalingabo anga wakanyamuna shibiibi shakwe akushitola. Lyalo Defedi wakasangalala ceebo cakushiba ayi Yehova wakamulekelela cakumaninina. (Kulu. 32:​2-4) Aswebo mbweenga twalinyumfwa. Na twaana cancinencine pashilubo nshotwakacita, tatweelete kutolelela kunyamuna mukuli ulemu wakulinyumfwa cibiibi. Ino nceebonshi? Nceebo cakwaamba ayi Yehova wakaunyamuna akuutola.

10-11. Ino maswi akwaamba ayi ‘alilibambite kulekelela’ alatwiisha nshi pali Yehova? (Kulumbaisha 86:5)

¹⁰ Pa Kulumbaisha 86:5 Defedi wakaamba pali Yehova ayi: ‘No Yehova muli babotu alimwi mulilibambite kulekelela. Lusuno lwanu lutamaani ndunene kubantu abo bapaila kuli ndimwe.’ Palilembo ili Defedi wakaamba ayi Yehova ‘alilibambite kulekelela.’ Maswi aya alasansulula ayi Yehova tafwambaani kukalala na twaciita shilubo alimwi lyoonse alasunishisha kulekelela baabo baana. Ino nceebonshi ncaacitila boobo? Lubasu lwakweelaako lwa lilembo ili lulaamba ayi: ‘Lusuno lwanu lutamaani ndunene kubantu abo bapaila kuli ndimwe.’ Mumutwi wamana twakeeya ayi Yehova wakashomesha kutondesha lusuno lutamaani kubaabo bamusuni alimwi teshi akabashiyewo. Aboobo na babisha lyalo baana, Yehova alatolelela kubatondesha lusuno lutamaani alimwi alaakubalekelela. (Isa. 55:7) Na cilamuyumina kushoma ayi Yehova wakamulekelela pacilubo ncomwakacita kale kale, inga mwaliipusha ayi: ‘Sa ndashoma ayi Yehova alilibambite kulekelela baabo boonse baana alimwi bapaila kuli nguwe kwaamba ayi abanyumfwile nkuumbu?’ Na ubo mbomushoma, nkokwaamba ayi amwebo Yehova wakamulekelela ndyemwakamusenga ayi amunyumfwile nkuumbu.

¹¹ Alimwi tulayuminishikwa kushiba ayi Yehova alicishi kabotu mbotwakalengwa alimwi ayi tatumaninite. (Kulu. 139:​1, 2) Amuleke tubandike pamaswi aamwi Defedi ngaakaamba eenga atucafwa kushoma ayi Yehova alisunishishi kutulekelela.

YEHOVA NSHAIBALUKA PALI NDISWE

12-13. Kweelana a Kulumbaisha 103:​14, ino nshiinshi Yehova nshaibaluka pali ndiswe, alimwi ino nshaibaluka shilamupa kucita nshi?

¹² Amubelenge Kulumbaisha 103:14. Defedi wakaamba ayi Yehova “ulishi [na aleebaluka, NWT] ayi twakaswa kubulongo.” Defedi ndyaakaamba maswi aya wakaamba acimwi cipa kwaamba ayi Yehova abe ulibambite kunolekelela basebenshi bakwe na baana: Lyoonse aleebaluka ayi tulabisha mukwiinga tatumaninite. Amuleke twiiyileewo ashimwi pamaswi aya Defedi ngaakaamba, kwaamba ayi twaanyumfwishishe kabotu.

¹³ Defedi wakaamba ayi Yehova “ulishi mbwaakatulenga.” Baibo ilaamba ayi “Lesa wakabwesa bulongo panshi akubumbaamo [Adamu].” Aboobo alicishi bantu mbobakalengwa alimwi anshobayandika. Kucakubonenaako, balayandika kulya, koona akuyooya. Alimwi ishi nshintu abantu bamaninite nshobayandika. (Mata. 2:7) Sombi Adamu a Efa ndyebakabisha, bantu bakaba bulongo munshila ipuseneeko. Tuli bulongo mukwiinga twakapyana kutamaninina kuswa kuli mbabo alimwi tulasuna kunoocita shintu shitabete kabotu. Yehova alicishi ayi cimwi ciindi inga twaciita shilubo ceebo cakwaamba ayi twakapyana bubi kuswa ku bashali besu bakutaanguna. Alimwi na twaciita shilubo lyalo twaana, alatutondesha nkuumbu akutulekelela.—Kulu. 78:​38, 39.

14. (a) Ino nciinshi cimwi Defedi ncakaamba citondesha Yehova mbwaatulekelela? (Kulumbaisha 103:12) (b) Ino cakubonenaako cakwe Defedi cilatondesha buyani Yehova mbwalekelela cakumaninina? (Amubone kabokosi kacite mutwi utokwaamba ayi “Yehova Mbwatulekelela Akulubaako.”)

¹⁴ Ino nciinshi cimwi ceenga catucafwa kushoma ayi Yehova wakatulekelela? (Amubelenge Kulumbaisha 103:12.) Defedi wakaamba ayi na Yehova watulekelela, shibiibi shesu alashitola kulaale andiswe “bweenka mbuli kumbo akwicwe mbokutalamukene.” Kumbo akwicwe kulitalamukene abuumbi alimwi mbasu ishi shobilo teshi shikakumaneewo. Ino ici cilatwiisha nshi pali Yehova na watulekelela shibiibi shesu? Libuku limwi lyakaamba palilembo ili ayi: “Lesa alatola shibiibi shesu kulaale abuumbi andiswe cakwaamba ayi cilababo anga mbweema bwa cintu cimwi bwacilekelabo limwi kunyumfwika. Aboobo inga twashooma ayi teshi akashibalukeewo nabi kutwiibalusha.” Cimwi ciindi na twanyumfwa bweema bwa shakulya na bwashintu shimwi, inga tweebaluka shakatucitikila kale kale. Sombi na Yehova watulekelela, cilababo anga bweema bwa shibiibi shesu bwacilekelabo limwi kunyumfwika cakwaamba ayi inga tashibalukiiwo nabi kutwaanisha.—Esek. 18:​21, 22; Milimo 3:19.

15. Ino inga twacita buyani na twatolelela kulinyumfwa cibiibi pashilubo nshotwakacita kale kale?

¹⁵ Ino maswi Defedi ngaakaamba mu Kulumbaisha 103 alatucafwa buyani kushoma ayi Yehova wakatulekelela? Na twatolelela kulinyumfwa cibiibi pashilubo nshotwakacita kale kale, inga twayeeya pashintu Yehova nshaibaluka. Aleebaluka ayi tamumaninitewo alimwi alalekelela baabo boonse balinyumfwa cibiibi pashilubo nshobakacita lyalo akwaana. Ishi amwebo nshomwakacita. Alimwi munookwiibaluka ayi Yehova teshi akayeeyewo pashilubo nshaakamulekelela nabi kumwiibalusha. Aboobo teshi akamwanisheewo nabi kumupa mulandu pashilubo isho alimwi. Taatoleleli kunooyeeyabo pashilubo nshomwakacita kale kale. Amwebo mbomweelete kucita. (Kulu. 130:3) Na twashoma ayi ncakwiila Yehova wakatulekelela, inga twacileka kulinyumfwa cibiibi akutolelela kumusebensela calusangalalo.

16. Ino nceebonshi tatweelete kutolelela kunoyeeya pashilubo Yehova nshaakatulekelela? Amwaambe cakubonenaako. (Amubone acikope.)

¹⁶ Amuyeeye pacakubonenaako ici. Kutolelela kulinyumfwa cibiibi pashintu nshotwakacita kale akale, kuli anga ngumuntu utokweensha motoka lyalo kaalangilishabo muligilasi litondesha shili kwisule. Cilibo kabotu kunolangaawo paligilasi ilyo ciindi aciindi mukwiinga inga kwacafwa dilaiva kuleya kulicana mumapensho. Sombi kwaamba ayi eende kabotu, alyeelete kubikila bunene maano kulanga kunembo nkwatooya. Aswebo cimwi ciindi cilibo kabotu kuyeeya pashilubo nshotwakacita mukwiinga inga kwatucafwa kutaboshaawo kucita shilubo isho. Sombi na twatolelela kunoyeeya pashilubo Yehova nshaakatulekelela inga twacileka kuba alusangalalo akwaalilwa kumusebensela kweelana apeela nkusu shesu. Muciindi cakucita boobo, atutolelele kulanga kunembo mukwiinga tuli munshila itola kubuumi butamaani mucishi cipya umo mweshi tukabule ‘kwiibalukaawo shintu shibiibi napaceyi.’—Isa. 65:17; Tus. 4:25.

AMUTOLELELE KUNOOSHOMA AYI YEHOVA WAKAMULEKELELA

17. Ino nceebonshi tulyeelete kutolelela kunooshoma ayi Yehova alitusuni alimwi ayi lyoonse alilibambite kutulekelela?

¹⁷ Tulyeelete kunooshoma ayi ncakwiila Yehova alitusuni alimwi lyoonse alilibambite kutulekelela. (1 Joni 3:19) Ino nceebonshi? Nceebo cakwaamba ayi Satana alaakutolelela kweelesha kunootupa kushoma ayi Yehova taatusuniiwo alimwi inga taatulekeleliiwo. Ishi nshonshila Satana nshaasebensesha kwaamba ayi tucileeke kusebensela Yehova. Alimwi mamanino ndyaatoya cisena pafwiifwi, ananooya ciindawo kweelesha kucita boobo mukwiinga alicishi ayi wacaashabo ciindi ciniini. (Ciyu. 12:12) Tulyeelete kutolelela kukaka bubeshi bwakwe Satana lyalo akutolelela kusebensela Yehova cakushomeka!

18. Ino nshiinshi nsheenga mwaciita kwaamba ayi munooshoma cakutatoonsha ayi Yehova alimusuni alimwi ayi lyoonse alilibambite kumulekelela?

¹⁸ Mutwi wamana wakamucafwa kushiba nsheenga mwaciita kwaamba ayi munooshoma ayi Yehova alimusuni. Lyalo mutwi uyu wamucafwa kushiba nsheenga mwaciita kwaamba ayi munooshoma ayi Yehova wakamulekelela. Kucakubonenaako, munokwiibaluka Yehova nshaakaamba pali nguwe mwiine. Munookutumana kuyeeya Baibo nshoyaamba pali Yehova mbwaatulekelela. Lyoonse munookwiibaluka ayi Yehova alicishi ayi tamumaninite alimwi ananoomunyumfwila nkuumbu. Alimwi na wamulekelela, alacita boobo cakumaninina. Lyalo bweenka Defedi mbwaakalinga kushomete cakutatoonsha ayi Yehova wakamulekelela, amwebo mulaakwaamba cakushinisha ayi, “Twalumba Yehova, pakundekelela ‘milandu yakubisha kwangu yoonse’!”—Kulu. 32:5.