MUTWI WAKWIIYA 7
LWIIMBO 15 Amulumbaishe Mutaanshi Kushalwa Wakwe Yehova!
Ino Mulafubilaamo Buyani Mukulekelela Kwakwe Yehova?
‘Mwebo mulalekelela shibiibi shesu cancinencine.’—KULU. 130:4.
CITEENTE CINENE
Tutobandika pashikoshanyo shimwi shamu Baibo shitondesha Yehova mbwaatulekelela munshila ilibetele. Mutwi uyu utootucafwa kunoolumba Yehova abuumbi pakulekelela kwakwe.
1. Ino nceebonshi nciyumu kushiba muntu ncaatosansulula na waamba ayi ndakulekelela?
“NDAKULEKELELA.” Mpashi mulanyumfwa kabotu na mwanyumfwa liswi ili bunene bunene na mulicishi ayi mwakaamba na kucita cintu cakakalasha umwi! Ano ino liswi lyakwaamba ayi “ndakulekelela” lilasansulula nshi? Sa muntu ngomwakakalasha atosansulula ayi mutotolelela kunyumfwana bweenka mbocakalinga? Nabi sa mpashi atosansulula ayi taasuniiwo kutolelela kubandika pashakacitika? Bantu balasansulula shintu shipusenepusene na baamba ayi ndakulekelela.
2. Ino Malembo alakusansulula buyani kulekelela kwakwe Yehova? (Amubone amakani amweela.)
2 Pali bupusano bunene abuumbi Yehova mbwaatulekelela sobantu batamaninite ambotulekelela bamwi. Taaku muntu weenga watulekelela mbuli Yehova mbwatulekelela. Shikulumbaisha wakaamba pali Yehova ayi: ‘Mwebo mulalekelela shibiibi shesu cancinencine, paceebo ceeci swebo tulamulemeka abuumbi.’a (Kulu. 130:4) Ncakwiila Yehova ‘alatulekelela cancinencine.’ Ngwaatutondesha kulekelela ncocaamba. Mumavesi amwi mu Malembo amu ciEbulu, bakalemba Baibo bakasansulula Yehova mbwalekelela kwiinda mukusebensesha liswi ndyebatana kusebenseshaawo kusansulula bantu mbobalekelelana.
3. Ino kulekelela kwakwe Yehova kulipusene buyani akwesu? (Isaya 55:6, 7)
3 Na Yehova walekelela muntu, cibiibi cakwe cilafuutwa cakumaninina alimwi tulatolelela kuba abushicibusa buyumu anguwe. Tulalumba abuumbi kwaamba ayi Yehova alatolelela kutulekelela cakumaninina.—Amubelenge Isaya 55:6, 7.
4. Ino Yehova alatucafwa buyani kunyumfwishisha kulekelela cancinencine ncocaamba?
4 Na kulekelela kwakwe Yehova kulipusene akwesu, ino swebo sobantu inga twacikonsha buyani kunyumfwishisha kulekelela cancinencine ncocaamba? Yehova alasebensesha shikoshanyo shibotu kwaamba ayi atucaafwe kunyumfwishisha mbwaatulekelela. Mumutwi uyu, tutobandika pashikoshanyo shimwi. Shitootucafwa kushiba ayi na twaana, Yehova alakusha shibiibi shesu akutusuminisha kuba abushicibusa buyumu anguwe alimwi. Ndyeshi tunoobandika pashikoshanyo ishi, shitootucafwa kumusuna abuumbi akunoomulumba Ishiwesu ucite nkuumbu alimwi utulekelela munshila shipusenepusene.
YEHOVA ALAKUSHA SHIBIIBI SHESU
5. Ino nciinshi cicitika na Yehova walekelela shibiibi shesu?
5 Mu Baibo, liinji shibiibi shilakoshanishikwa ku mikuli ilemu. Mwaami Defedi wakaamba pashibiibi shakwe ayi: “Milandu yangu yandemya mutwi cakuyanda kupila panshi. Ncakwiila yafula cakundemena anga ndayumuna shilemu.” (Kulu. 38:4) Sombi Yehova alalekelela shibiibi sha bantu baana. (Kulu. 25:18; 32:5) Liswi lyamu ciEbulu lyakasebenseshekwa mumavesi aya, lilasansulula “kunyamuna” na “kukusha.” Aboobo na Yehova walekelela shibiibi shesu, cilababo anga wanyamuna mukuli ulemu ngotwalinga kunyamwite pacifushi.
“Mwakalekelela” (Kulu. 32:5)
6. Ino Yehova alashitola kulaale buyani andiswe shibiibi shesu?
6 Baibo ilasebensesha cikoshanyo acimwi kutondesha Yehova mbwatola kulaale andiswe shibiibi shesu. Kulumbaisha 103:12 ilatulwiita ayi: “Bweenka mbuli kumbo akwicwe mbokutalamukene, mbweeke ubo shibiibi shesu mbwaashitalamusha kuswa kuli ndiswe.” Kumbo akwicwe kulitalamukene abuumbi alimwi mbasu ishi shobilo inga tashikumaniiwo. Ici cilaamba ayi Yehova alatola shibiibi shesu kulaale abuumbi andiswe. Ici cilatuyuminisha akutucafwa kushiba ayi Yehova alatulekelela cakumaninina!
“Bweenka mbuli kumbo akwicwe mbokutalamukene” (Kulu. 103:12)
7. Ino Baibo ilasansulula buyani Yehova nshaacita kushibiibi shesu? (Mika 7:18, 19)
7 Nabi kwaamba ayi Yehova alatola shibiibi shesu kulaale andiswe munshila yacikoshanyo, sa alatolelela kushiyeeya? Sobwe. Mwaami Esekiya wakaamba pali Yehova ayi: “Shibiibi shangu shoonse mwashisowela kwisule lyanu.” (Isa. 38:9, 17, NWT) Ici cilaamba ayi Yehova alasowa shibiibi sha baabo baana alimwi taatoleleli kulangaako. Munshila imwi maswi aya inga asansululwa ayi: “Mwapa kwaamba ayi [shibiibi shangu] shibebo anga tashina kucitikaawo.” Baibo ilayuminisha citente ici mucikoshanyo acimwi ncotucana pa Mika 7:18, 19. (Amubelenge.) Mavesi aya alaamba ayi Yehova alawaala shilubo shesu panshi peene palweenge. Kale kale, tacakalinga kukonsheka kusubula cintu cakalokela panshi peene palweenge.
“Shibiibi shangu shoonse mwashisowela kwisule lyanu” (Isa. 38:17)
‘Mulaakuwaala shilubo shesu panshi peene palweenge’ (Mika 7:19)
8. Ino nshiinshi nshotweeya kusa mukushika waano?
8 Baibo ilatondesha patuba ayi na Yehova watulekelela, alakusha shibiibi shesu cakumaninina aboobo tatuyandiki kunoolipa mulandu. Ncakwiila kweelana a Defedi mbwakaamba, “balicite coolwe abo Lesa mbaalekelela shibiibi shabo, abo bacite shibiibi nshaakashiminganya! Balicite coolwe abo Lesa mbwaateebalukili shibiibi shabo.” (Loma. 4:6-8) Uku nkokulekelela cancinencine!
YEHOVA ALAFUUTA SHIBIIBI SHESU
9. Ino Baibo ilatucafwa buyani kushiba ayi Yehova alatulekelela cakumaninina?
9 Kwiinda mucilubula, Yehova alafuuta shibiibi sha baabo baana. Amuleke tubandike Baibo mboisansulula Yehova mbwaacita boobo. Mu Baibo tulabelenga ayi Yehova alasaansha akusukulusha shibiibi. Ici cilapa kwaamba ayi mucita shibiibi abe usalalite. (Kulu. 51:7; Isa. 4:4, NWT; Jele. 33:8) Yehova mwiine alasansulula shiswaamo na wacita boobo: “Nabi shibiibi shanu shilasalala anga mbulowa, shilaakuboolabo tuu anga ninkobokobo. Ncakwiila nabi shilibo pyupyupyu anga ngumuswa malowa, shilaakuboolabo tuu anga mbutonje.” (Isa. 1:18) Nciyumu abuumbi kuwasha cakufwala cituba cicite shibala shisalala kwaamba ayi citube. Yehova alasebensesha cikoshanyo ici kutucafwa kushiba ayi shibiibi shesu inga shawashikwa akutuba anga ncakufwala catalinga kusombeleteewo.
“Nabi shibiibi shanu shilasalala anga mbulowa, shilaakuboolabo tuu anga ninkobokobo” (Isa. 1:18)
10. Ino ncikoshanyo nshi cimwi Yehova ncaasebensesha kwaamba ayi atucaafwe kunyumfwishisha mbwaatulekelela?
10 Kweelana ambotwakeeya mumutwi wamana, shibiibi shilakoshanishikwa aku nkongole. (Mate. 18:32-35) Aboobo lyoonse na twabishisha Yehova, cilababo anga nkongole itoya cikomenenaako. Tulicite nkongole inene abuumbi kuli nguwe! Sombi na Yehova watulekelela shibiibi shesu, cilababo anga watulekelela nkongole njotwalinga kucite. Taatulangili kulipilila shibiibi nshaakatulekelela. Bweenka muntu mbwasangalala na bamulekelela nkongole njaalinga kucite, aswebo tulasangalala na Yehova watulekelela!
“Ndakakulekelela nkongole yoonse” (Mate. 18:32)
11. Ino Baibo ilasansulula nshi ndyeyaamba ayi shibiibi shesu shilakushikwa? (Milimo 3:19)
11 Yehova taatulekelelibo nkongole na shibiibi shesu, sombi alashikusha cakumaninina. (Amubelenge Milimo 3:19.) Kucakubonenaako, amuyeeye ayi muntu ngomwakakongolako maali walemba libala linene lya X palipepa palembetwe maali ngomwakakongola. Nacibi boobo, muntu uli woonse inga kaacaabona maali alembetwe palipepa palembwa X. Sombi kukusha cintu cimwi kulipuseneeko. Kwaamba ayi tunyumfwishishe cikoshanyo ici, tulyeelete kunookwibaluka ayi inki bantu njobakalinga kusebensesha kale kale cakalinga cuubu kwifuuta kusebensesha maanshi. Muntu wakalinga kubwesabo kasani katontola lyalo akufuuta shakalembwa. Aboobo na nkongole ‘yakushikwa’ na kulekelelwa, ingayi camana yamana. Bantu inga tababoni shakalinga kulembetwewo. Cakalinga kubabo anga muntu taakalinga kuciteewo ankongole. Tulalumba abuumbi kushiba ayi na Yehova watulekelela shibiibi shesu, cilababo anga tatuna kubishaawo!—Kulu. 51:9.
“Kwaamba ayi shibiibi shanu shikushikwe” (Milimo 3:19)
12. Ino nciinshi ncotutokwiiya kuswa kucikoshanyo ca likumbi lishiya mbi?
12 Kuli nshila aimwi Yehova mbwaasansulula mbwalekelela shibiibi shesu. Wakaamba ayi: ‘Shilubo shanu ndashipalanganya bweenka mbooncita makumbi, ee, shibiibi shanu ndashisisa kwisule lya likumbi lishiya mbi.’ (Isa. 44:22) Na Yehova watulekelela, cilababo anga wafweeka shibiibi shesu kusebensesha likumbi lishiya mbi kwaamba ayi shitanoboneka kuli ndiswe akuli nguwe.
“Shilubo shanu ndashipalanganya bweenka mbooncita makumbi” (Isa. 44:22)
13. Ino tulalinyumfwa buyani na Yehova watulekelela shibiibi shesu?
13 Ino shikoshanyo ishi shitotwiisha nshi? Na Yehova watulekelela shibiibi shesu, tatweelete kutolelela kunoolipa mulandu pashilubo nshotwakacita mubuumi bwesu boonse. Kwiinda mubulowa bwakwe Yesu Klistu, nkongole shesu shilalekelelwa cakumaninina. Na Yehova watulekelela pacilubo ncotwakacita, cilababo anga tatuna kucicitaawo. Ubu Yehova mbwaatulekelela na twaana kushibiibi shesu.
YEHOVA ALABA ABUSHICIBUSA BUYUMU ANDISWE ALIMWI
Na Ishiwesu wakwiculu watulekelela, tulaba abushicibusa bubotu anguwe (Amubone palagilafu 14)
14. Ino nceebonshi inga twashooma ayi Yehova alaakutulekelela cakumaninina? (Amubone a shikope.)
14 Na Yehova watulekelela, inga twashoma ayi ngushicibusa wesu alimwi. Ceebo cakwaamba ayi Yehova alatulekelela cakumaninina, tatuyandiki kutolelela kunoolipa mulandu. Tatuyandiki kunoloonda ayi Yehova wakatubikila mfundilishi alimwi atolangoola nshila ya bwakutwaanisha. Camushobo uyo teshi cikacitikeewo. Yehova inga twamushoma na watulekelela. Yehova wakalwiita mushinshimi Jelemiya ayi: “Ndaakulekelela bubi bwabo alimwi shibiibi shabo teshi nkashiibalukeewo.” (Jele. 31:34) Mutumwi Paulo alakwe wakaamba pa maswi aya. (Ebu. 8:12) Sombi ino maswi aya alasansulula nshi?
“Shibiibi shabo teshi nkashiibalukeewo” (Jele. 31:34)
15. Ino Yehova alasansulula nshi na waamba ayi shibiibi shesu teshi akashiibalukeewo?
15 Mu Baibo, liswi lyakwaamba ayi “kwiibaluka” teshi lyoonse ndyelisansulula ayi muntu atokwiibaluka cintu cimwi na kuyeeyawo pacintu ico. Sombi inga lyasansulula amuntu kucitawo comwi pacintu cimwi. Kapondo wakalinga kupoopetwe pacisamu pafwiifwi a Yesu wakasenga ayi: ‘Ba Yesu, mukanjibaluke mwaakunjila mu Bwaami bwanu.’ (Luka 23:42, 43) Wakalinga kusenga Yesu kwaamba ayi akamucitile cintu cimwi. Yesu wakalwiita musankwa uyu ayi alaakumubusha. Aboobo na Yehova waamba ayi shibiibi shesu teshi akashiibalukeewo, alasansulula ayi teshi akacitewo comwi. Teshi akatwanisheewo kunembo pashilubo nshaakatulekelela.
16. Ino Baibo ilatukoshanisha ku nshi?
16 Baibo ilasebensesha cikoshanyo acimwi kutucafwa kunyumfwishisha mbotulinyumfwa kwaanguluka na Yehova watulekelela. Ilaamba ayi mukwiinga tatumaninite, tuli “basha ba bubi.” Sombi na Yehova watulekelela, tulababo anga mbasha abo ‘bakaangululwa munkusu sha bubi.’ (Loma. 6:17, 18; Ciyu. 1:5) Na twashiiba ayi Yehova watulekelela, tulasangalala abuumbi bweenka mbuli musha waangululwa.
“Mwakaangululwa munkusu sha bubi” (Loma. 6:18)
17. Ino kulekelelwa shibiibi shesu kulapa buyani kwaamba ayi tushilikwe? (Isaya 53:5)
17 Amubelenge Isaya 53:5. Cikoshanyo cakweelaako nceshi tubandikeewo cilatukoshanisha kubantu bacite bulwashi bucaya. Yehova wakatushilika munshila yacikoshanyo ceebo ca mulambu wacilubula uyo ngwaakatupa kwiinda mu Mwanaakwe. (1 Pit. 2:24) Na twabiisha, tulanyonyoola bushicibusa bwesu a Yehova. Sombi ceebo ca cilubula, inga watulekelela akuba abushicibusa buyumu anguwe alimwi. Bweenka muntu woola kubulwashi bunene mbwasangalala abuumbi, aswebo tulasangalala na toola lwakumushimu akuboosha bushicibusa bwesu a Yehova ceebo cakwaamba ayi watulekelela.
“Ceebo ca shilonda shakwe twakashilikwa” (Isa. 53:5)
KULEKELELA KWAKWE YEHOVA MBOKUTUKUMA MUBUUMI BWESU
18. Ino nshiinshi nshotweeya kushikoshanyo shaamba pakulekelela kwakwe Yehova? (Amubone akabokosi kacite mutwi utokwaamba ayi “Yehova Mbwatulekelela.”)
18 Ino nshiinshi nshotweeya kushikoshanyo shaamba pakulekelela kwakwe Yehova? Na watulekelela, alacita boobo cakumaninina alimwi kwamuyayaya. Ici cilapa kwaamba ayi tube abushicibusa bubotu a Ishiwesu wakwiculu. Nacibi boobo, kulekelelwa a Yehova ncipo ncaatupa ceebo cakwaamba ayi alitusuni alimwi ngushikwaaba, kuteshi ceebo cakwaamba ayi twakacitawo comwi.—Loma. 3:24.
19. (a) Ino nciinshi ncotweelete kunoolumba? (Bene Loma 4:8) (b) Ino tulaakwiiya nshi mumutwi utokonkelaawo?
19 Amubelenge Bene Loma 4:8. Tulalumba abuumbi kwaamba ayi Yehova alatulekelela! (Kulu. 130:4) Nacibi boobo, kuli cintu cimwi ciyandika ncotweelete kucita kwaamba ayi Yehova atulekelele. Yesu wakaamba ayi: “Na mwebo tamulekeleli bantu shibiibi shabo, alakwe Ishiwanu teshi akamulekeleleewo shibiibi shanu.” (Mate. 6:14, 15) Aboobo tulyeelete kukonkela cakubonenaako cakwe Yehova akunoolekelela bamwi. Mumutwi utokonkelaawo, tulaakwiiya mbweenga twacita boobo.
LWIIMBO 46 Twalumba Yehova
a Malembo akutaanguna amu ciEbulu alasebensesha liswi lyakwaamba ayi “kulekelela,” lisansulula ayi uku nkokulekelela cancinencine kweenkabo nabi kwaamba ayi kuli nshila shipusenepusene shakulekelela. Muma Baibo aanji taamuwo citeente ici ciyandika cicanika pa Kulumbaisha 130:4.