Tulalumba Yehova Abuumbi Pakutulekelela Shibiibi Shesu

1-2. Ino bukaalo bwesu bulikoshenye buyani a bwamusankwa wacanike waambwa mupalagilafu 1?

AMUYEEYE pacakubonenaako ca musankwa wacanike wakakomenena mumukwashi wa babile. Sombi bushiku bumwi, bashali bakwe bacaikwa. Walinyumfwa buumba abuumbi. Nacibi boobo, kuli makani aamwi alefula ngeshi anyumfwe. Wesa mukushiba ayi bashali bakwe bakanyonyoola maali abuumbi alimwi bakalinga kucite nkongole shiinji. Aboobo taakuwo maali ali oonse ngobakashiya ngeshi abwese. Nacibi boobo, alyeelete kulipila nkongole shoonse bashali bakwe nshobakashiya alimwi bantu balyaasuni maali abo peenkaapo. Sombi teshi akacikonshewo kulipila nkongole shoonse nshobakashiya.

² Aswebo bukaalo bwesu inga bwakoshanyaako a bwamusankwa wacanike uyu. Adamu a Efa bashali besu bakutaanguna, bakalinga kumaninite alimwi bakalinga kukala mu paladaiso ibotu abuumbi. (Mata. 1:27; 2:​7-9) Bakalinga kucite coolwe cakukala buumi busangalasha kwamuyayaya. Sombi kwakacitika cintu cibiibi abuumbi. Adamu a Efa bakabisha. Aboobo bakasowa coolwe cakukala mu Paladaiso a cakulangila kukala kwamuyayaya. Ino nshiinshi bana babo nshobakapyana kuswa kuli mbabo? Baibo ilatulwiita ayi: “Bubi bwakesa mucishi capanshi ceebo ca muntu womwi [Adamu] alimwi bubi ubo bwakaleta lufu. Mbweeke ubo lufu lwakashika kubantu boonse mukwiinga boonse bakabisha.” (Loma. 5:12) Twakapyana bubi kuswa kuli Adamu, ubo bupa kwaamba ayi tunoofwa. Bubi ubu buli anga ni nkongole inene abuumbi, njeenga muntu uli woonse taacikonshi kulipila.—Kulu. 49:8.

3. Ino nceebonshi shilubo shesu shilakoshanishikwa ku “nkongole”?

³ Mu Baibo, bubi bwakakoshanishikwa ku nkongole. (Mate. 18:​32-35) Na twabiisha, cilaba anga twaba ankongole kuli Yehova. Tulayandika kulipila pacilubo ico nceenga twaciita. Na twabula kulipila nkongole iyo, inga yamanabo na twafwa.—Loma. 6:​7, 23.

4. (a) Ino naakwiinga nshiinshi shicitika kubantu bacita shibiibi, kwakubula lucafwo lwakwe Lesa? (Kulumbaisha 49:​7-9) (b) Ino liswi lyakwaamba ayi “bubi” lilasansulula nshi mu Baibo? (Amubone kabokosi kacite mutwi utokwaamba ayi “Bubi.”)

⁴ Palweesu inga tatucikoonshiiwo kuboosha shintu shoonse Adamu a Efa nshobakasowa. (Amubelenge Kulumbaisha 49:​7-9.) Kwakubula lucafwo lwakwe Lesa, naakwiinga katutalangili kukala buumi bwamuyayaya nabi kubushikwa kwa bafu. Naakwiinga katucitabo na twafwa, taakuwo kulangila kubushikwa, bweenka mbuli shinyama.—Shiku. 3:19; 2 Pit. 2:12.

5. Ino Ishiwesu shilusuno wakatucafwa buyani kulipila nkongole ya shibiibi shesu? (Amubone cikope cili papeeji yakutaanguna.)

⁵ Amuyeeye pamusankwa wacanike ngotwalinga twaambaawo kumatalikilo. Ino inga walinyumfwa buyani na musankwa umwi mubile walyaaba kumulipililaako nkongole shoonse? Ncakutatoonsha kwaamba ayi musankwa wacanike uyo inga walumba abuumbi akusumina lucafwo ulo. Alakwe Yehova Ishiwesu shilusuno, wakatupa cipo cipa kwaamba ayi tulipililwe nkongole ya bubi mbotwakapyana kuswa kuli Adamu. Yesu wakaamba ayi: “Lesa wakasunisha bantu boonse ba mucishi capanshi abuumbi. Aboobo wakatuma Mwanaakwe wakashalwabo eenka kwaamba ayi uyo woonse umushoma ataloobi, sombi abe abuumi butamaani.” (Joni 3:16) Kwiilikaawo, cipo ici cilapa kwaamba ayi cikonsheke kuli ndiswe kuba abushicibusa bubotu a Yehova.

6. Ino tutokwiiya nshi mumutwi uyu, alimwi ino nceebonshi?

⁶ Ino inga twafubilamo buyani mu cipo ici cibotu abuumbi cipa kwaamba ayi cikonsheke kunoolekelelwa shibiibi shesu? Kwaamba ayi tucane cikumbulo kumwiipusho uyu, tutobandika maswi amu Baibo apusenepusene alimwi a ncaasansulula. Kukutumana kuyeeya Yehova nshaakatucitila kwaamba ayi anotulekelela, kutootucafwa kunomulumba abuumbi.

YEHOVA ALISUNI AYI TUBE BESHICIBUSA BAKWE

7. (a) Ino nciinshi cimwi Adamu a Efa ncobakasowa? (b) Mbuli bana bakwe Adamu a Efa, ino nducafwo nshi ndotuyandika abuumbi? (Bene Loma 5:​10, 11)

⁷ Adamu a Efa ndyebakabisha, bakasowa coolwe cakukala kwamuyayaya alimwi bakaba balwani bakwe Yehova Ishiwabo. Kabatana kubisha, bakalinga mumukwashi wakwe Lesa. (Luka 3:38) Sombi ndyebakapondokela Yehova, wakabatandaamo mumukwashi wakwe kabatana kutalika kuba abaana. (Mata. 3:​23, 24; 4:1) Taakuwo mwanaabo uli woonse, kwiilikaawo andiswe, wakalinga kucikonsha kuba mumukwashi wakwe Yehova. Aboobo twakalinga kuyandika lucafwo kwaamba ayi tube abushicibusa bubotu anguwe. (Amubelenge Bene Loma 5:​10, 11.) Twakalinga kuyandika kucileka kuba balwani bakwe Lesa akuba beshicibusa bakwe. Cikankamika ncakwaamba ayi Yehova mwiine ngwaakataanguna kucitawo comwi kwaamba ayi ici cikonsheke. Ino nshiinshi nshaakacita?

LESA WAKAPA KWAAMBA AYI CIKONSHEKE KULI NDISWE KUBA BESHICIBUSA BAKWE

8. Ino nciinshi Yehova ncaakacita?

⁸ Yehova wakabamba nshila kwaamba ayi cikonsheke kuli ndiswe kuba beshicibusa bakwe, nabi kwaamba ayi tulabisha. Wakabamba nshila ya kuboosha sheesho Adamu nshaakasowa kwiinda mukutupa cintu ceelene mweelo asheesho Adamu nshaakasowa. Malembo amu ciGiliki aalo alaamba panshila Yehova njaakabamba kwaamba ayi cikonsheke kumuntu kuba abushicibusa bubotu anguwe.—Loma. 3:25.

9. Ino nshiinshi Yehova nshaakacita kwaamba ayi bene Isilaeli banoolekelelwa shibiibi shabo?

⁹ Yehova wakabamba nshila kwaamba ayi bene Isilaeli banoolekelelwa shibiibi shabo akuba abushicibusa bubotu anguwe. Bene Isilaeli bakalinga kuba akusekelela kulibetele bushiku bomwi mumwaaka. Kusekelela uko kwakalinga kwiitwa ayi Bushiku Bwakusalashikwa Kuswa Kushibiibi. Pabushiku ubu, mupailishi munene wakalinga kubenga milambu ya shinyama kwaamba ayi shibiibi sha bantu shilekelelwe. Nacibi boobo, milambu yashinyama tayakalinga kupa kwaamba ayi shibiibi sha bene Isilaeli shilekelelwe cakumaninina mukwiinga shinyama tasheelene abantu. Sombi na bene Isilaeli bakaana babenga milambu Yehova njaakabalwiita, wakalinga kulibambite kubalekelela shibiibi shabo. (Ebu. 10:​1-4) Milambu bene Isilaeli njobakalinga kubenga pa Bushiku Bwakusalashikwa Kuswa Kushibiibi, yakalinga kubacafwa kushiba ayi bakalinga bamucita shibiibi alimwi bakalinga kuyandika cintu ciinditeewo kwaamba ayi shibiibi shabo shilekelelwe cakumaninina.

10. Ino nciinshi Yehova ncaakacita kwaamba ayi cikonsheke kubantu kunoolekelelwa shibiibi shabo?

¹⁰ Ino nciinshi Yehova ncaakacita kwaamba ayi cikonsheke kubantu kunoolekelelwa shibiibi shabo? Wakabamba bubaambo bwakwaamba ayi Mwanaakwe “acaikwe linkanda lyomwibo . . . kwaamba ayi shibiibi sha bantu baanji shilekelelwe.” (Ebu. 9:28) Yesu wakaaba “buumi bwakwe kwaamba ayi alubule bantu baanji.” (Mate. 20:28) Ino cilubula nciinshi?

MWEELO WAKALIPILWA KWAAMBA AYI KATUBA BESHICIBUSA BAKWE LESA

11. (a) Kweelana a Baibo mboyaamba, ino nceebonshi mweelo wacilubula wakalinga kuyandika kulipilwa? (b) Ino ngumuntu wamushobo nshi wakalinga kucikonsha kulipila cilubula?

¹¹ Kweelana a Baibo mboyaamba, Yehova wakasalawo kwaamba ayi mweelo wacilubula ulipilwe kwaamba ayi tunolekelelwa shibiibi shesu alimwi ayi cikonsheke kuba abushicibusa anguwe. Ino ngu mweelo nshi wacilubula wakalinga kuyandika kulipilwa kwaamba ayi bantu babe asheesho Adamu nshaakasowa? Munokwiibaluka ayi Adamu a Efa bakasowa coolwe cakuba bantu bamaninite a cakulangila kukala kwamuyayaya. Aboobo cilubula cakalinga kuyandika kuba mweelo weelene anshobakasowa. (1 Timo. 2:6) Cilubula cakalinga kweelete kulipilwa amusankwa munene wakalinga (1) kumaninite; (2) weenga wacikonsha kukala kwamuyayaya pacishi; alimwi (3) wakalinga kulyaabite kwaaba buumi bwakwe ceebo ca ndiswe. Muntu wamushobo uyo ngowakalinga kucikonshabo kulipilila sheesho Adamu a Efa nshobakasowa.

12. Ino nceebonshi Yesu wakacikonsha kulipila mweelo wacilubula wakalinga kuyandika?

¹² Amuyeeye pasheebo shotatwe shitokonkelaawo shakapa kwaamba ayi Yesu acikoonshe kulipila mweelo wacilubula. (1) Wakalinga muntu umaninite alimwi “taakwe kucitawo cibiibi.” (1 Pit. 2:22) (2) Ceebo cakwaamba ayi wakalinga kumaninite, wakalinga kucikonsha kukala kwamuyayaya pacishi. (3) Wakalinga kulyaabite kufwa akwaaba buumi bwakwe bumaninite ceebo ca ndiswe. (Ebu. 10:​9, 10) Yesu wakalinga muntu umaninite bweenka Adamu muntu wakutaanguna mbwaakalinga kaatana kubisha. (1 Koli. 15:45) Aboobo Yesu ndyaakatufwita, wakacikonsha kulipila mweelo wakalinga kuyandika kwaamba ayi abooshe sheesho Adamu nshaakasowa. (Loma. 5:19) Ici cakapa kwaamba ayi Yesu abe “Adamu mucaalishi.” Takuyandiki muntu aumwi umaninite kwaamba ayi ese mukulipilila sheesho Adamu nshaakasowa, mukwiinga Yesu wakafwa “linkanda lyomwibo” kwamana.—Ebu. 7:27; 10:12.

13. Ino nciinshi cipa kwaamba ayi cikonsheke kuli ndiswe kuba abushicibusa bubotu a Yehova?

¹³ Ino nciinshi cipa kwaamba ayi cikonsheke kuli ndiswe kuba abushicibusa bubotu a Yehova? Yehova wakabamba nshila kwaamba ayi shibiibi shesu shinoolekelelwa. Yesu wakaaba buumi bwakwe bumaninite akulipila mweelo wakalinga kuyandika kwaamba ayi shibiibi shesu shilekelelwe.—Efe. 1:7; Ebu. 9:14.

YEHOVA ALATWAANGULULA KUBUBI ALUFU AKUTULULAMIKA

14. Ino nshiinshi nsheshi tubandikeewo ano, alimwi ino nceebonshi?

¹⁴ Ino tulafubilaamo buyani mushintu Yehova nshaakatucitila? Kwaamba ayi tucane cikumbulo kumwiipusho uyu, tutobandika pabusansulushi bwa maswi obilo amu Baibo atucafwa kunyumfwishisha mbotufubilaamo mu kulekelela kwakwe Yehova.

15-16. (a) Ino Baibo ilasansulula nshi ndyeyaamba ayi ‘twakaangululwa’? (b) Ino kwaangululwa kuswa kububi alufu kulatupa kulinyumfwa buyani?

¹⁵ Baibo ilaamba ayi twakaangululwa, ceebo cakwaamba ayi cilubula cakalipilwa. Mutumwi Pita wakaamba pa kwaangululwa uku ayi: “Lesa wakamulubula kuswa kubuumi butaaku mbobubete ubo bwakaswa kubamashali banu bakulukulu. Mukucita boobo taakwe kusebensesha cintu cimana ncito mbuli silifa nabi golodi, sobwe. Wakamulubula kwiinda mubulowa buyandika abuumbi bwakwe Klistu, uyo wakalinga anga ngu mwanaambelele utacite kampenda nabi cimeenga.”—1 Pit. 1:​18, 19.

¹⁶ Ceebo ca mulambu wacilubula, twakaangululwa kuswa ku bubi alufu, isho shipa kwaamba ayi tunoopenga abuumbi. (Loma. 5:21) Tulalumba Yehova a Yesu abuumbi kwaamba ayi twakaangululwa ceebo ca bulowa bwakwe Yesu.—1 Koli. 15:22.

17-18. (a) Ino kululamikwa cilaamba nshi? (b) Ino tulafubilaamo buyani ceebo cakwaamba ayi Yehova alatululamika?

¹⁷ Baibo ilaamba ayi Yehova alalulamika basebenshi bakwe. Ici cilaamba ayi taatulangili kulipilila shilubo nshotucita. Ano nabi kwaamba ayi alacita boobo, taaluli njiisho shakwe shiluleme. Alatululamika kuteshi ceebo cakwaamba ayi twacitawo comwi. Alimwi taasuminishi bantu kutolelela kucita shibiibi. Sombi alilibambite kutulekelela mukwiinga tulatondesha lushomo mushintu lakwe a Yesu nshobakacita kwaamba ayi batupe cilubula.—Loma. 3:24; Gala. 2:16.

¹⁸ Ino tulafubilaamo buyani na Yehova watululamika? Bamwi balafubilaamo mukwiinga balasalwa kuya kwiculu mukweendelesha pomwi a Yesu alimwi balaba bana bakwe Lesa. (Taita. 3:7; 1 Joni 3:​1, NWT) Alabalekelela shibiibi shabo. Cilababo anga tabana kucitaawo ashibiibi isho, aboobo baleelela kuba mu Bwaami. (Loma. 8:​1, 2, 30) Bamwi balulamikwa balaakukala kwamuyayaya pacishi. Yehova wakabalekelela shibiibi shabo alimwi bakaba beshicibusa bakwe. (Jemu. 2:​21-23) Bamu Likoto Linene abo beshi bakapuluke Amagedoni, balicite coolwe cakulangila kutafwaawo. (Joni 11:26) ‘Baluleme abataluleme’ abo bakafwa balaakubushikwa. (Milimo 24:15; Joni 5:​28, 29) Mukuya kwaciindi, basebenshi bakwe Yehova boonse bamunyumfwila pacishi, balaakuba acoolwe ca “kutambula bulemu alwaanguluko bweenka mbuli bana bakwe Lesa.” (Loma. 8:21) Tutocilangila ciindi ici ndyeshi tukabe baana bamaninite bakwe Yehova Ishiwesu!

19. Ino bukaalo bwesu bwakaaluka buyani ceebo ca shintu Yehova a Yesu nshobakatucitila? (Amubone akabokosi kacite mutwi utokwaamba ayi “Kulekelela Kwakwe Yehova.”)

¹⁹ Ncakutatoonsha kwaamba ayi tatwakalinga kuciteewo kulangila bweenka mbuli musankwa wacanike ngotwaambaawo kumatalikilo, uyo wakasowekelwa shintu shoonse akupyana nkongole inene njaatakalinga kucikonsha kulipila. Sombi Yehova wakatucafwa. Bukaalo bwesu bwakaaluka mukwiinga Yehova wakabamba nshila kwaamba ayi shibiibi shesu shinoolekelelwa alimwi Yesu wakalipila cilubula. Lushomo lwesu muli Yesu Klistu lulapa kwaamba ayi twaangululwe kuswa kububi alufu. Na Yehova watulekelela shibiibi shesu, cilababo anga tatuna kushicitaawo. Alimwi ciyandika abuumbi, inga twaba abushicibusa bubotu a Yehova Ishiwesu wakwiculu shilusuno.

20. Ino tulaakwiiya nshi mumutwi utokonkelaawo?

²⁰ Tulalumba Yehova a Yesu abuumbi na katukutumana kuyeeya pashintu shoonse nshobakatucitila. (2 Koli. 5:15) Kwakubula lucafwa lwabo, naakwiinga katutacitewo kulangila nabibo paniini! Mumutwi utokonkelaawo, tulaakubandika pashikoshanyo shamu Baibo shiinji sheenga shatucafwa kunyumfwishisha ayi na Yehova watulekelela, tatuyandiki kutolelela kulipa mulandu.