Yehova Nshaakacita Kwaamba Ayi Atulubule Kububi Alufu

1-2. (a) Ino bubi nciinshi, alimwi ino Yehova wakatushomesha nshi? (Amubone a “Kusansulula Maswi.”) (b) Ino tutokwiiya nshi mumutwi uyu alimwi amumitwi imwi ili mu Njashi Yamulindilishi iyi? (Amubone alubasu lutokwaamba ayi “Cishibisho Kubeshikubelenga” mumagazini iyi.)

SA INGA mwasuna kushiba Yehova Lesa mbwaamusuni? Inga mwashiba cikumbulo kumwiipusho uyu na mweeya Yehova nshaakacita kwaamba ayi amulubule kububi alufu. Bubia ngumulwani mubiibi abuumbi ngweenga tamucikonshi kukoma palwaanu. Soonse tulabisha bushiku abushiku alimwi tulafwa ceebo cakuba bantu batamaninite. (Loma. 5:12) Nacibi boobo, Yehova wakatushomesha ayi alaakutulubula kuswa kububi alufu alimwi alaakucikonsha kucita boobo.

² Kwamyaaka pafwiifwi a 6,000 yainda, Yehova wacafwa bantu kunomusebensela nabi kwaamba ayi tabamaninite. Ino nceebonshi? Nceebo cakwaamba ayi alitusuni. Yehova alibasuni bantu kuswabo ndyaakabalenga. Alimwi wakacita shiinji kwaamba ayi anootucafwa na twabiisha, ceebo cakwaamba ayi alitusuni abuumbi. Yehova alicishi kwaamba ayi bubi mbobupa kwaamba ayi tunoofwa. Sombi taasuniiwo kwaamba ayi tunoofwa. Alisuni ayi tukekale kwamuyayaya. (Loma. 6:23) Ici ncaasuni kuli ndimwe. Mumutwi uyu, tutoocana shikumbulo kumiipusho iyi yotatwe: (1) Ino Yehova wakacafwa buyani bantu batamaninite kuba akulangila? (2) Ino nshiinshi nshobakacita bantu batamaninite baambwa mu Baibo kwaamba ayi basangalashe Yehova? (3) Ino nshiinshi Yesu nshaakacita kwaamba ayi alubule bantu kuswa kububi alufu?

INO YEHOVA WAKACAFWA BUYANI BANTU BATAMANINITE KUBA AKULANGILA?

3. Ino nciinshi cakapa kwaamba ayi Adamu a Efa babishe?

³ Yehova ndyaakalenga Adamu a Efa, wakalinga kusuni ayi banoosangalala. Wakabapa musena ubotu mwakukala, cipo ca cikwati alimwi anciito isangalasha. Bamulunyungu lwabo bakalinga kweelete kushalana akususha cishi, akucaalula kuba paladaiso bweenka mumuunda wa Edeni mbomwakalinga. Wakabapabo mulawo womwi. Alimwi wakabacenjesha ayi na bakasalewo kutakonkela mulawo uyo, balaakufwa. Tulicishi shakacitika. Munjelo mubiibi uyo watakalinga kusuni Lesa nabi bantu, wakeelesha Adamu a Efa kwaamba ayi batanyumfwili Lesa. Adamu a Efa bakanyumfwila Satana. Bakabisha, ceebo cakwaalilwa kushoma Ishiwabo uyo wakalinga kubasuni abuumbi. Aboobo Yehova nshaakaamba shakacitika. Ceebo cakutanyumfwila kwabo, Adamu a Efa bakapenga kwabuumi bwabo boonse. Bakatalika kucembela, lyalo mukuya kwaciindi bakafwa.—Mata. 1:​28, 29; 2:​8, 9, 16-18; 3:​1-6, 17-19, 24; 5:5.

4. Ino nceebonshi Yehova alipatite bubi? (Bene Loma 8:​20, 21)

⁴ Yehova wakasalawo kwaamba ayi makani aya alembwe mu Baibo kwaamba ayi tunyumfwishishe cintu cimwi ciyandika. Makani aya alatucafwa kunyumfwishisha ncaapatite bubi abuumbi. Bubi bulatupansaanya kuli Ishiwesu alimwi bulapa kwaamba ayi tunoofwa. (Isa. 59:2) Satana alipatite Yehova abantu. Ici ncocakapa kwaamba ayi eeleshe Adamu a Efa kwaamba ayi babishe, alimwi watolelela kweelesha bantu munshiku shino. Aboobo Adamu a Efa ndyebakabisha, mpashi Satana wakayeeya ayi wapilinganya luyaando Yehova ndwaakalengela bantu. Sombi taakwe kunyumfwishisha Yehova mbwaasuni bantu abuumbi. Lesa taakwe kwaalula luyaando lwakwe pa bamulunyungu lwakwe Adamu a Efa. Ceebo cakwaamba ayi alisuni bantu, peenkaapo wakabacafwa kuba akulangila. (Amubelenge Bene Loma 8:​20, 21.) Yehova wakalinga kucishi ayi kulaakuba bantu bamwi beshi bakasalewo kunoomunyumfwila akutondesha ayi balimusuni. Wakapa kwaamba ayi cikonsheke kubantu aba kuba abushicibusa anguwe akulubulwa kuswa kububi alufu. Ino nshiinshi Yehova nshaakalinga kweelete kucita kwaamba ayi ishi shoonse shikonsheke?

5. Ino ndilili Yehova ndyaakacafwa bantu batamaninite kuba akulangila? Amusansulule. (Matalikilo 3:15)

⁵ Amubelenge Matalikilo 3:15. Ciindi cakutaanguna Yehova ndyaakacafwa bantu batamaninite kuba akulangila, nciindi ndyaakaamba ayi alaakunyonyoola Satana. Lesa wakaamba ayi kulaakuba “lunyungu” lweshi lukapulushe bantu. Mukuya kwaciindi, lunyungu ulo lulaakunyonyola Satana akumana mapensho oonse ngaakatalikisha mumuunda wa Edeni. (1 Joni 3:8) Sombi cakutaanguna, Satana wakalinga kweelete ‘kuluma’ lunyungu ulo, na kupa kwaamba ayi lucaikwe. Ici Yehova cakamucisa kumoyo abuumbi. Sombi wakalinga kulyaabite kupenga akusuminisha “lunyungu” kupenga kwaamba ayi alubule bantu kuswa kububi alufu.

NSHOBAKACITA BANTU BATAMANINITE BAAMBWA MU BAIBO KWAAMBA AYI BASANGALASHE YEHOVA

6. Ino nshiinshi Abelo, Nowa abantu bamwi bashomeka nshobakacita kwaamba ayi babe abushicibusa a Yehova?

⁶ Paniini paniini, Yehova wakacafwa bantu batamaninite kushiba kabotu mbweenga baba abushicibusa anguwe. Abelo uyo wakalinga mwaana wabili wakwe Adamu a Efa, ngowakalinga muntu wakutaanguna kushoma muli Yehova pesule lyakupondoka kwakacitika mu Edeni. Abelo wakabenga mulambu ceebo cakwaamba ayi wakalinga kusuni Yehova, wakalinga kusuni kumusangalasha alimwi akuba abushicibusa anguwe. Abelo wakalinga mweembeshi. Aboobo wakacaya mbelele shimwi shaana akushibenga mulambu kuli Yehova. Ino Yehova wakalinyumfwa buyani? “Wakamukondwa Abelo akutambula mulambu wakwe.” (Mata. 4:4) Yehova wakalinga kutambula amilambu ya bantu bamwi bakalinga kumusuni alimwi bakalinga kushoma muli nguwe, mbuli Nowa. (Mata. 8:​20, 21) Yehova ndyaakalinga kutambula milambu iyo, wakatondesha ayi bantu batamaninite inga bamusangalasha akuba abushicibusa anguwe.b

7. Ino nciinshi ncetutokwiiya kuswa kucakubonenaako cakwe Abulaamu cakuba ulyaabite kubenga mwanaakwe?

⁷ Abulaamu wakalinga kucite lushomo luyumu muli Yehova. Yehova wakamusenga ayi acite cintu ciyumu abuumbi. Wakamulwiita ayi abenge Isaki mwanaakwe musankwa mbuli mulambu. Cilyeelete kwaamba ayi Abulaamu wakalinyumfwa cibiibi abuumbi ndyaakalwitikwa kucita boobo. Nacibi boobo, wakalinga kulyaabite kubenga mwanaakwe. Sombi Abulaamu ndyaakalinga kusuni kucaya mwanaakwe, Lesa wakamukasha. Cakubonenaako ici cilatwiisha Yehova nshaakalinga kusa mukucita kunembo. Yehova wakalinga kulyaabite kubenga Mwanaakwe ngwaasuni abuumbi mbuli mulambu. Kucita boobo kwakalinga kusa mukutondesha ayi Yehova alibasuni abuumbi bantu.—Mata. 22:​1-18.

8. Ino milambu ya shinyama bene Isilaeli njobakalinga kubenga yakalinga kwiimikaninaako nshi? (Bene Lefi 4:​27-29; 17:11)

⁸ Yehova ndyakabapa Milawo bene Isilaeli, wakabalwiita ayi banoobenga milambu ya shinyama kwaamba ayi banoolekelelwa shibiibi shabo. (Amubelenge Bene Lefi 4:​27-29; 17:11.) Milambu iyo yakalinga kwiimikaninaako mulambu winditeewo uyo wakalinga kusa mukulubula bantu cakumaninina kuswa kububi. Lesa wakatanjilila bashinshimi kulemba pa lunyungu lwakashomeshekwa. Bakalemba ayi Mwanaakwe Lesa ulibetele, alaakupenshekwa akucaikwa. Wakalinga kusa mukubabo anga ni mbelele yabengwa mulambu. (Isa. 53:​1-12) Amuyeeye paceeci: Yehova wakalinga kusa mukwaaba Mwanaakwe ngwaasuni abuumbi kwaamba ayi alubule bantu kuswa kububi alufu, kwiilikaawo andimwe!

YESU NSHAAKACITA KWAAMBA AYI ALUBULE BANTU KUSWA KUBUBI

9. Ino Joni Mubombeki wakaamba nshi pali Yesu? (Bene Ebulu 9:22; 10:​1-4, 12)

⁹ Mu 29 C.E., Joni Mubombeki wakabona Yesu waku Nasaleti akwaamba ayi: “Amubone Mwanaambelele wakwe Lesa uyo ukusha shibiibi sha bantu ba mucishi coonse ca panshi!” (Joni 1:29) Maswi aya akatondesha ayi Yesu ndolunyungu lulibetele Lesa ndwaakashomesha. Yesu wakalinga kusa mukwaaba buumi bwakwe mbuli mulambu. Mukweelaako, lunyungu lwakwe Yehova lwakesa pacishi mukulubula bantu cakumaninina kuswa kububi.—Amubelenge Bene Ebulu 9:22; 10:​1-4, 12.

10. Ino Yesu wakatondesha buyani ayi ‘wakesa mukwiita’ bamucita shibiibi?

¹⁰ Yesu wakabikila bunene maano kukucafwa bantu bakalinga kulinyumfwa cibiibi ceebo cakuba bamucita shibiibi. Wakabeeta kwaamba ayi babe bashikwiiya bakwe. Wakalinga kucishi ayi bubi ncocinene cipa kwaamba ayi bantu banopenga. Aboobo wakacafwa bunene bantu abo bakalinga kupenga ceebo ca shibiibi nshobakacita. Wakasebensesha cikoshanyo akulwiita bantu ayi: “Teshi bantu bayumu balangoola mushiliki, sombi balwashi beenka.” Wakeelikaawo akwaamba ayi: “Nshikwe kwisa mukwiita baluleme, sombi bamucita shibiibi.” (Mate. 9:​12, 13) Yesu wakacita kweelana anshakaamba. Mwanakashi umwi ndyakatontosha Yesu kushimpanta aminsonshi yakwe, Yesu wakabandikaakwe muliswi liboombu akumulekelela shibiibi shakwe. (Luka 7:​37-50) Alimwi Yesu wakeeisha mwanakashi mwine Samaliya cancine ciyandika nabi kwaamba ayi wakalinga kucishi ayi alakala amusankwa watakalinga ibaye. (Joni 4:​7, 17-19, 25, 26) Bantu balafwa ceebo ca bubi. Sombi Lesa wakapa Yesu ankusu shakubusha basankwa, banakashi alimwi abaana abo bakalinga bafwa.—Mate. 11:5.

11. Ino nceebonshi bantu bakalinga kucita shibiibi bakalinga kulinyumfwa kwaanguluka kuba pomwi a Yesu?

¹¹ Inga twanyumfwishisha cakapa kwaamba ayi bantu bakalinga kucita shibiibi banoolinyumfwa kwaanguluka kuba pomwi a Yesu. Wakalinga kushiba mbobakalinga kulinyumfwa akubanyumfwila nkuumbu. Tabakalinga kuloonda kubandikaakwe. (Luka 15:​1, 2) Alimwi Yesu wakabalumba akubacitila shibotu bantu bamushobo uyo ceebo cakushoma muli nguwe. (Luka 19:​1-10) Wakacafwa bantu kushiba Yehova mbwaacite nkuumbu abuumbi. (Joni 14:9) Yesu nshaakalinga kwaamba akucita shilatwiisha ayi Yehova alicite nkuumbu, alibasuni bantu batamaninite alimwi alisuni kubacafwa. Yesu wakacafwa bantu batamaninite kusuna kwaalula buumi bwabo akuba bashikwiiya bakwe.—Luka 5:​27, 28.

12. Ino nshiinshi Yesu nshaakalwiita bashikwiiya bakwe palufu lwakwe?

¹² Yesu wakalinga kucishi ayi alakwaaba buumi bwakwe. Kwa mankanda aanji, wakalwiita bashikwiiya bakwe ayi alakwaabwa lyalo akucaikwa pacisamu cakupenshesha. (Mate. 17:22; 20:​18, 19) Kweelana a Joni Mubombeki mbwakaamba abashinshimi bamwi mbobakaambila limwi, Yesu wakalinga kucishi ayi mulambu wakwe ulaakukusha shibiibi sha bantu ba mucishi coonse ca panshi. Alimwi Yesu wakaamba ayi pesule lyakwaaba buumi bwakwe, ‘alaakuyobolola bantu boonse’ kuli nguwe. (Joni 12:32) Abo bashoma muli Yesu akweelesha kukonkela cakubonenaako cakwe, inga basangalasha Yehova. Na bacita boobo, ‘balaakwaangululwa munkusu sha bubi.’ (Loma. 6:​14, 18, 22; Joni 8:32) Aboobo Yesu wakatondesha kutaloonda akulyaaba kufwa lufu lucisa kwaamba ayi atulubule.—Joni 10:​17, 18.

13. Ino Yesu wakafwa buyani, alimwi ino lufu lwakwe lulatwiisha nshi pali Yehova? (Amubone acikope.)

¹³ Yesu wakaabwa kuli shicibusa wakwe umwi ngwaakalinga kunyumfwanaakwe. Lyalo balwani bakwe bakamucata, kumucobola, akumubekesha milandu njaatana kucita. Bakamoombolosha ayi acaikwe alimwi bakamupensha. Mukweelaako, bashilumamba bakamupoopa pacisamu kwaamba ayi bamucaaye. Yesu wakaliyumya cakushomeka ndyaakalinga kupenshekwa akunyumfwa kucisa paciindi ici. Nacibi boobo, Yehova wakeendaawo kulinyumfwa cibiibi, ndyaakabona Mwanaakwe kaapenga. Yehova wakalinga kucite nkusu shakupa kwaamba ayi Mwanaakwe atatoleleli kupenshekwa, sombi taakwe kucita boobo. Yehova wakalinga kumusuni abuumbi Mwanaakwe. Ano ino nceebonshi wakamuleka kwaamba ayi apenshekwe akucaikwa? Nceebo cakwaamba ayi alitusuni. Yesu wakaamba ayi: “Lesa wakasunisha bantu boonse ba mucishi capanshi abuumbi. Aboobo wakatuma Mwanaakwe wakashalwabo eenka kwaamba ayi uyo woonse umushoma ataloobi, sombi abe abuumi butamaani.”—Joni 3:16.

14. Ino mulambu wakwe Yesu ulamwiisha nshi?

¹⁴ Mulambu wakwe Yesu mbumboni bwiinditeewo butondesha ayi Yehova alibasuni bamulunyungu lwakwe Adamu a Efa. Mulambu uyu ulatondesha ayi Yehova alimusuni abuumbi. Wakaaba Mwanaakwe ngwaasunishi akuliyumya ndyaakalinyumfwa cibiibi abuumbi kwaamba ayi amulubule kuswa kububi alufu. (1 Joni 4:​9, 10) Alisuni kutucafwa soonse kwaamba ayi tumusebensele nabi kwaamba ayi tatumaninite, alimwi alisuni ayi kunembo akakusheewo bubi cakumaninina!

15. Ino nciinshi ncotweelete kucita kwaamba ayi tufubileemo mu cipo ca cilubula ca mulambu wakwe Yesu Lesa ncaakatupa?

¹⁵ Cipo ca cilubula Lesa ncaakatupa ndyaakabenga Mwanaakwe wakashalwabo eenka mbuli mulambu, cilapa kwaamba ayi cikonsheke kunolekelelwa shibiibi shesu. Sombi tulyeelete kucitawo comwi kwaamba ayi Lesa atulekelele. Ino nciinshi ncotweelete kucita? Joni Mubombeki a Yesu mwiine boonse bakaamba ncotweelete kucita. Bakaamba ayi: ‘Amwaane kuswa kushibiibi shanu mukwiinga Bwaami bwakwe Lesa buli pafwiifwi!’ (Mate. 3:​1, 2; 4:17) Aboobo na tulisuni kuba abushicibusa a Yehova akulekelelwa shibiibi shesu, tulyeelete kwaana kuswa kushibiibi shesu. Sombi ino kwaana cilaamba nshi alimwi ino kulatucafwa buyani kunosangalasha Yehova nabi kwaamba ayi tulabisha? Tulaakucana cikumbulo kumwiipusho uyu mumutwi utokonkelaawo.