Nsheenga Twaciita na Twacitilwa Shintu Shitaluleme

1-2. Ino bantu baanji balacita buyani na bacitilwa shintu shitaluleme alimwi ino njimiipusho nshi njeenga twaliipusha?

TULEKALA mucishi bantu baanji mobacita shintu shitaluleme kubamwi. Bantu balacitilwa shintu shitaluleme ceebo cakuba bakandu, musena nkobakaswa, mbobaboneka na ceebo ca shintu shimwi. Alimwi baanji balapenga ceebo ca beshimakwebo babile na beendeleshi abo babikilabo maano kukupanga maali. Shintu shitabete kabotu bamwi nshobacita inga shapa kwaamba ayi tupenge nabi bantu bamwi mbotushi.

² Baanji balakalala na bacitilwa shintu shitaluleme nabi na babona bamwi kabacitilwa shintu shamushobo uyo. Soonse tulisuni kunoocitilwa shintu shili kabotu akukala muluumuno. Bantu bamwi baleelesha kumana mapensho ngobatoobona mucishi. Balacita boobo kwiinda mukubusha shoongo kwaamba ayi baalule mfulumeende na milawo yamucishi, nabi kuvootela mweendeleshi wakabashomesha ayi inga wamana mapensho ngobatokwiindaamo. Nacibi boobo, so Beneklistu tulayuminishikwa ‘kutaba lubasu lwacishi’ akushoma ayi Bwaami bwakwe Lesa bweenkabo mbweshi bukamane kutalulama kuli mucishi. (Joni 17:16) Sombi na twaboona bantu kabacitila bamwi shintu shitaluleme, tulalinyumfwa cibiibi alimwi cimwi ciindi tulakalala. Inga twaliipusha ayi: ‘Ino ndyeelete kucita buyani na camushobo uyu cacitika? Sa kuli nsheenga ndaciita pacecino ciindi kwaamba ayi kutalulama kuli mucishi kumane?’ Kwaamba ayi tucane shikumbulo kumiipusho iyi, amuleke tutaangune kushiba Yehova a Yesu mbobalinyumfwa na babona bantu kabacitilwa shintu shitaluleme.

YEHOVA A YESU BALIPATITE SHINTU SHITALULEME

3. Ino nceebonshi tulakalala na twacitilwa shintu shitaluleme? (Isaya 5:7)

³ Baibo ilatondesha cipa kwaamba ayi tunolinyumfwa cibiibi na twacitilwa shintu shitaluleme nabi na twabona bamwi kabacitilwa shintu shamushobo uyo. Ilatulwiita ayi Yehova wakatulenga mucikoshanyo cakwe alimwi ngu Lesa ‘usunishi bululami akoombolosha cakutanyengelela.’ (Kulu. 33:5; Mata. 1:26) Taacitili bamwi shintu shitaluleme alimwi taasuniiwo kwaamba ayi bantu banoocitila bamwi shintu shamushobo uyo! (Duto. 32:​3, 4; Mika 6:8; Seka. 7:9) Kucakubonenaako, muciindi ca mushinshimi Isaya, Yehova wakanyumfwa “kulila” kwa bene Isilaeli baanji abo bakalinga kucitilwa shintu shitaluleme kubene Isilaelinyinaabo. (Amubelenge Isaya 5:7.) Yehova wakaanisha baabo batakalinga kukonkela milawo yakwe akucitila bamwi shintu shitaluleme.—Isa. 5:​5, 13.

4. Ino Yesu alalinyumfwa buyani na wabona muntu umwi kaacitilwa shintu shitaluleme? (Amubone acikope.)

⁴ Bweenka mbuli Yehova, Yesu alakwe alisunishi bululami alimwi alipatite shintu shitaluleme. Ndyaakalinga pacishi, bushiku bumwi wakabona musankwa umwi wakalinga kuyuminite lyaansa na mulwashi stroko. Yesu wakamunyumfwila nkuumbu musankwa uyo akumushilika. Sombi bamatanjilili babupailishi ndyebakabona nshaakacita, bakakalala. Bakaamba ayi Yesu wapwaya mulawo wa Sabata. Ici cakatondesha ayi tabakwe kubikaako amaano ayi musankwa uyo woola. Ino Yesu wakalinyumfwa buyani pa nshobakacita? Baibo ilaamba ayi ‘wakalinyumfwa cibiibi abuumbi ceebo ca kubica kwa myoyo yabo.’—Maako 3:​1-6.

5. Ino nshiinshi nshotweelete kunokwiibaluka na twakalala ceebo ca kucitilwa shintu shitaluleme?

⁵ Ceebo cakwaamba ayi Yehova a Yesu balakalala na babona muntu kaacitilwa shintu shitaluleme, nkokwaamba ayi aswebo inga twakalala na twaboona bantu kabacitilwa shintu shamushobo uyo. (Efe. 4:26) Nacibi boobo, tulyeelete kunokwiibaluka ayi nabi twakalala, kukalala uko inga takupi kwaamba ayi bantu bacileeke kucitila bamwi shintu shitaluleme. Alimwi na twatolelela kunookalalitebo kwaciindi cilaamfu, inga twaciswa nabi kulefuka maningi. (Kulu. 37:​1, 8; Jemu. 1:20) Aboobo ino nshiinshi nshotweelete kucita na bamwi batucitila shintu shitaluleme nabi na twabona bamwi kabacitilwa shintu shamushobo uyo? Cakubonenaako cakwe Yesu inga catucafwa kushiba nsheenga twaciita.

YESU NSHAAKACITA NDYAAKABONA BAMWI KABACITILWA SHINTU SHITALULEME

6. Ino nshintu nshi shitaluleme bantu bamwi nshobakalinga kucitilwa Yesu ndyaakalinga pacishi? (Amubone acikope.)

⁶ Yesu ndyaakalinga pacishi, wakabona bantu baanji bakalinga kucitilwa shintu shitaluleme. Wakabona bantu mbobakalinga kulyatililwa ku bamatanjilili babupailishi. (Mate. 23:​2-4) Alimwi wakalinga kubona bantu mbobakalinga kucitilwa shibiibi maningi ku beendeleshi bene Loma. BaJuda baanji tabakalinga kusuniiwo kutolelela kweendeleshekwa a bene Loma. Bamwi bakapanga atukoto twakalinga kulwana bene Loma. Sombi Yesu taakwe kunjilawo mukakoto kali koonse kakalinga kulwana bene Loma. Alimwi ndyaakashiba ayi bantu balisuni kumubika pa bwaami, wakaswaawo.—Joni 6:15.

7-8. Ino nceebonshi Yesu taakwe kweelesha kumana mapensho oonse ndyaakalinga pacishi? (Joni 18:36)

⁷ Yesu taakwe kwaabanamo lubasu mumapolitiki kwaamba ayi eeleshe kumana mapensho ngaakalinga kubona. Ino nceebonshi? Mukwiinga wakalinga kucishi ayi bantu tabaciteewo nkusu shakweendelesha bamwi alimwi inga tabacikoonshi kumana mapensho mucishi. (Kulu. 146:3; Jele. 10:23) Alimwi inga tabacikoonshi kukushawo Satana akutamaninina isho shipa kwaamba ayi tunoopenga. Satana ngwatokweendelesha cishi cino. Ngushilunkutwe alimwi bantu baanji balacita shintu mbuli nguwe. (Joni 8:44; Efe. 2:2) Alimwi nabi bantu bali kabotu inga tabacikoonshi kumana mapensho ali mucishi ceebo cakwaamba ayi teshi lyoonse ndyebacita shintu shiluleme.—Shiku. 7:20.

⁸ Yesu wakalinga kucishi ayi Bwaami bwakwe Lesa bweenkabo mbweshi bukakusheewo mapensho oonse ashilengesha kwaamba ayi tunoopenga. Ncoceeco wakasebensa cankusu kushimikilako bamwi ‘makani abotu a Bwaami bwakwe Lesa.’ (Luka 8:1) Ndyaakacita boobo, wakayuminisha bantu bakalinga kusunishishi kwaamba ayi bacileeke kupenga akubona shintu shibiibi mucishi. (Mate. 5:6; Luka 18:​7, 8) Taakuwo mfulumeende ya bantu yeshi ikacikoonshe kumana mapensho mucishi. Bwaami bwakwe Lesa bweenkabo mbweshi bukacikoonshe kucita boobo, alimwi Bwaami ubu “tabwishi bwa mucishi ca panshi pano.”—Amubelenge Joni 18:36.

AMUKONKELE CAKUBONENAAKO CAKWE YESU NA MWACITILWA SHINTU SHITALULEME

9. Ino nceebonshi mulashoma ayi Bwaami bwakwe Lesa bweenkabo mbweshi bukacikoonshe kukushawo mapensho oonse bantu ngobeendaamo?

⁹ Tutookala “munshiku shakweelaako” sha cishi cino. Aboobo tutokwiinda mumapensho aanji kwiinda ambocakalinga Yesu ndyaakalinga pacishi. Sombi bweenka mbocakalinga muciindi cakwe Yesu, Satana abantu babiibi mbobapa kwaamba ayi tunoopenga. (2 Timo. 3:​1-5, 13; Ciyu. 12:12) Bweenka mbuli Yesu, aswebo tulashoma ayi Bwaami bwakwe Lesa bweenkabo mbweshi bukakusheewo shibiibi shoonse, kwiilikaawo a Satana uyo uleta mapensho aanji ngotwiindaamo. Ceebo cakwaamba ayi tuli kulubasu lwa Bwaami ubu, tatubushi shoongo nabi kushoma mfulumeende sha bantu ayi inga shakushawo kutalulama. Amuyeeye pacakubonenaako cakwe nankashi waliina lya Stacy.a Ba Stacy kabatana kwiiya cancine, liinji bakalinga kunjila mutukoto twa bantu bakalinga kubusha shoongo kwaamba ayi bamane kutalulama mucishi. Sombi ndyepakeenda ciindi, bakatalika kutoonsha na nshobakalinga kucita inga shacafwa bantu akumana mapensho. Bakaamba ayi: “Cimwi ciindi ndakalinga kuyeeya ayi nshontoocita mpashi inga tashipi kwaamba ayi bantu bacileeke kucita shintu shitaluleme. Sombi pacecino ciindi ndashoma cakutatoonsha ayi Bwaami bwakwe Lesa bulaakumana mapensho oonse bantu ngobeendaamo. Ndicishi ayi Yehova alaakumana mapensho oonse ayo nebo ngeenga nshicikoonshi kukushaawo.”—Kulu. 72:​1, 4.

10. Kweelana a Mateyo 5:​43-48, ino nceebonshi tatweeleshi kwaalula mfulumeende nabi milawo yamucishi? (Amubone acikope.)

¹⁰ Bantu baanji munshiku shino balenjila mutukoto uto tweelesha kwaalula mfulumeende. Nacibi boobo, baanji baba mutukoto uto balakalala maningi, tabakonkeli milawo alimwi cimwi ciindi balacisa bamwi. Sombi isho Yesu teshi nshaakatwiisha kunoocita. (Efe. 4:31) Mukwesu waliina lya Jeffrey wakaamba ayi: “Na bantu babusha shoongo, inga bakalala muciindi ciniinibo akutalika kunyonyoola shintu, kwiipa, akucisana beene abeene.” Nacibi boobo, Yesu wakatwiisha kunotondesha lusuno kubantu boonse, kwiilikaawo abaabo batupikisha nabi batupensha. (Amubelenge Mateyo 5:​43-48.) Alimwi tulacita nsheenga twacikoonsha kwaamba ayi tunokonkela cakubonenaako cakwe.

11. Ino nceebonshi cimwi ciindi inga catubeta ciyumu kukonkela cakubonenaako cakwe Yesu?

¹¹ Nabi kwaamba ayi tulicishi ayi Bwaami bwakwe Lesa bulaakukushaawo mapensho oonse kwamuyayaya, cimwi ciindi inga catubeta ciyumu kukonkela cakubonenaako cakwe Yesu na twacitilwa shintu shitaluleme. Amuyeeye mbwaakalinyumfwa nankashi waliina lya Janiya bamwi ndyebakamulwiita maswi atabete kabotu ceebo cakupusana cikanda ambabo. Wakaamba ayi: “Ndakakalala maningi alimwi ndakalinga kusuni kwaamba ayi bantu abo baanishikwe. Lyalo ndakayeeya kunjila mukakoto kakalinga kuyuminisha bantu kutasalulula bamwi nabi kubacitila shintu shitabete kabotu ceebo ca cikanda ncobacite. Ndakalinga kuyeeya ayi kucita boobo inga kwancafwa kunolinyumfwako kabotu.” Nacibi boobo, ndyepakeenda ciindi ba Janiya bakesa mukushiba ayi bakalinga kweelete kwaalula mbobakalinga kuyeeya. Bakaamba ayi: “Ndakatalika kushoma bantu alimwi anshobakalinga kwaamba, muciindi cakushoma muli Yehova. Ndakasalawo kuswaamo mutukoto uto akucileka kucita shintu nshobakalinga kucita.” Nabi kwaamba ayi tulakalala na twacitilwa shintu shitaluleme nabi na twabona bamwi kabacitilwa shintu shamushobo uyo, tulyeelete kucenjela kwaamba ayi tutakalali cakwiindilila. Alimwi tulyeelete kutolelela kutaabanamo lubasu mushacishi.—Joni 15:19.

12. Ino nceebonshi tulyeelete kunoosala kabotu makani ngotubelenga, ngotweebela na ngotukutika?

¹² Ino nciinshi ceenga catucafwa kutakalala na twacitilwa shintu shitaluleme nabi na twabona bamwi kabacitilwa shintu shamushobo uyo? Comwi nceenga twaciita nkunosala kabotu makani ngotubelenga, ngotweebela na ngotukutika. Makani amwi abikwa pa intaneti alaambwa munshila yakwaamba ayi bantu bakankamane akutalika kutongooka mfulumeende. Liinji beshikwaamba nyusi balaamba nshobatoyeeya kuteshi shakacitika. Ano nabi kwaamba ayi makani ngotwabelenga ngancine, sa kutolelela kubelenga makani ayo inga kwapa kwaamba ayi mapensho amane? Sobwe. Na twatoola ciindi cilaamfu kubelenga na kukutika kumakani amushobo uyu, inga capabo kwaamba ayi tutalike kulisukama maningi, kulinyumfwa cibiibi akukalala. (Tus. 24:10) Alimwi inga twacileka akubika sha Bwaami panembo mubuumi bwesu akuluba kwaamba ayi Bwaami bwakwe Lesa bweenkabo mbweshi bukamane mapensho oonse pacishi.

13. Ino kubelenga Baibo bushiku abushiku inga kwatucafwa buyani na twaboona bantu kabacitilwa shintu shitaluleme?

¹³ Na katubelenga Baibo bushiku abushiku akunookutumana kuyeeyawo, tulaakushiba kabotu nsheenga twaciita na twacitilwa shintu shitaluleme nabi na twabona bamwi kabacitilwa shintu shamushobo uyo. Nankashi waliina lya Alia wakalinyumfwa cibiibi maningi ndyaakabona bantu bamwi kumusena nkwaakalinga kukala kabacitilwa shintu shitabete kabotu. Wakalinyumfwa cibiibi ceebo cakwaamba ayi bantu bakalinga kucita shintu shamushobo uyo tabakalinga kwaanishikwaawo. Wakaamba ayi: “Na ndashoma cakutatoonsha ayi Yehova alaakukushaawo mapensho aya, nkokwaamba ayi ndyeelete kwaalula mbonjeeya. Paciindi ceenka cilya, ndakabelenga lilembo lya Jobo 34:​22-29. Lilembo ili lyakancafwa kushiba ayi Yehova alabona shintu shoonse. Lakwe eenkabo ngwaacishi kabotu bwakoombolosha bantu alimwi eenkabo ngweenga wacikonsha kumana mapensho bantu boonse ngobeendaamo.” Sombi ino nshiinshi nsheenga twaciita pacecino ciindi ndyetutolindila kwaamba ayi Bwaami bwakwe Lesa bukakusheewo mapensho oonse pacishi?

NSHEENGA TWACIITA PACECINO CIINDI

14. Ino nciinshi nceenga twacikoonsha kucita? (Bene Kolose 3:​10, 11)

¹⁴ Inga tatucikoonshi kukasha bantu kucita shintu shitaluleme kubamwi, sombi inga twacikoonsha kunoocitila bamwi shintu shibotu. Kweelana ambotweeya, inga twakonkela cakubonenaako cakwe Yesu kwiinda mukubatondesha lusuno. Aboobo tuleelesha kucita shibotu kubantu boonse, kwiilikaawo akubaabo batucitila shintu shitaluleme. (Mate. 7:12; Loma. 12:17) Alimwi Yehova alasangalala na katucita boobo.—Amubelenge Bene Kolose 3:​10, 11.

15. Ino kwiisha bantu cancine camu Baibo kulabacafwa buyani?

¹⁵ Nshila ibotu mbweenga twacaafwa bantu nkwiinda mukubeeisha pali Yehova. Ino nceebonshi nceenga twaambila boobo? Nceebo cakwaamba ayi na bantu beeya pali Yehova alimwi kabasuni kumusangalasha, balaalula buumi bwabo akutalika kucita shibotu kubamwi akubatondesha lusuno. (Isa. 11:​6, 7, 9) Amuyeeye pacakubonenaako caba Jemal. Kabatana kwiiya cancine, bakalinga benjila mukakoto kakalinga kulwana mfulumeende mucishi cabo mukwiinga bakalinga kulinyumfwa ayi tayakalinga kweendelesha kabotu. Bakaamba ayi: “Inga toaluli bantu kwiinda mukubalwana. Sombi na beeya cancine camu Baibo, inga baaluka. Nebo ncocakancafwa kwaaluka.” Ba Jemal nshobakeeya shakabacafwa kucileka kulwana. Aboobo na tweeisha bantu cancine camu Baibo, inga twabacafwa kucileka kucita shintu shitabete kabotu kubamwi.

16. Ino nceebonshi mulisunishishi kunoolwiitako bamwi pa Bwaami bwakwe Lesa nsheshi bukacite?

¹⁶ Bweenka mbuli Yesu, tulisunishishi kunoolwiitako bamwi ayi Bwaami bwakwe Lesa bweenkabo mbweshi bukakusheewo mapensho kwamuyayaya. Cishomesho ici inga cayuminisha baabo beenga bacitilwa shintu shitaluleme. (Jele. 29:11) Ba Stacy mbotwalinga twaambaawo bakaamba ayi: “Ceebo cakwaamba ayi ndicishi ayi Lesa alaakukushaawo mapensho oonse pacishi, ndaliyumya akukalika moyo na ndacitilwa shintu shitaluleme nabi na ndabona bamwi kabacitilwa shintu shamushobo uyo. Yehova alatuyuminisha kwiinda mu Maswi akwe.” Tulyeelete kuba balibambite kunoolwiitako bamwi shishomesho shamu Baibo isho sheenga shabayuminisha. Na twashiba kabotu Baibo nshoyaamba pamakani akupenga, cilaakutubeta cuubu kusansulwiitako bamwi ncotupengela a Yehova nsheshi akacite kwaamba ayi amane mapensho oonse, inga caba ayi tuli kucikolo na kuncito.b

17. Ino Yehova alatucafwa buyani na twacitilwa shintu shitaluleme?

¹⁷ Tulicishi kwaamba ayi tunanocitilwa shintu shitaluleme kulilabo na Satana kaali ‘mweendeleshi wa cishi cino.’ Sombi inga twalangila kuciindi shintu ndyeshi shikabe kabotu mukwiinga Yehova wakatushomesha ayi alaakunootucafwa, alimwi ayi alaakunyonyoola Satana akukushawo shintu shibiibi shoonse. (Joni 12:31) Kucakubonenaako, kwiinda mu Maswi akwe, Yehova alatulwiita ncokubetele mapensho aanji pacishi alimwi ayi alababikilako maano abo bacitilwa shintu shitabete kabotu. (Kulu. 34:​17-19) Cakubonenaako cakwe Yesu catucafwa kushiba nsheenga twaciita na twacitilwa shintu shitaluleme. Alimwi conoono Bwaami bwakwe Lesa bulaakumana mapensho oonse, lyalo bantu balaakucileka kupenga. (2 Pit. 3:13) Aboobo atutolelele kucita nsheenga twacikonsha kushimikilako bamwi makani abotu a Bwaami bwakwe Lesa, akunoolangila ciindi mucishi coonse ndyeshi mukasulebo ‘bululami akoombolosha cakutanyengelela.’—Isa. 9:7.