Mutawayiwayi Kucafwa Baabo Basuni Kwiiya

1. Ino nshiinshi bantu nshobacita na twabashimikila makani abotu? (Milimo 13:​47, 48; 16:​14, 15)

MUCIINDI ca Beneklistu bakutaanguna, bantu baanji bakasangalala ndyebakanyumfwa makani abotu aamba pali Yesu alimwi bakalinga kusuni kuba Beneklistu peenkaapo. (Amubelenge Milimo 13:​47, 48; 16:​14, 15.) Amunshiku shino, bamwi balasangalala maningi na banyumfwa makani abotu ciindi cakutaanguna. Alimwi bamwi bakakaka kukutika makani abotu ciindi cakutaanguna, mukuya kwaciindi balasuna kwiiya pali Lesa akutalika kumulambila. Ino nshiinshi nshotweelete kucita na twacaana bantu ‘balibambite kutambula buumi butamaani’ ndyetutooshimikila?

2. Ino ncito yesu yakucafwa bantu kuba bashikwiiya ilikoshenye buyani amuntu ulima gadeni?

² Amuyeeye pacakubonenaako ici. Incito yesu yakucafwa bantu kuba bashikwiiya inga twaikoshanisha kumuntu ulima gadeni. Shishango shimwi mugadeni yakwe inga shafwambaana kupya shimwi kashitana. Aboobo alatalika kuyapa sheesho shapya, kwakubula kulindila ayi shishango shoonse shili mugadeni shikapite pomwi. Nacibo boobo, alatolelela kutilila akushibikilako maano asheesho shitana kupya. Aswebo na twacaana muntu usuni kwiiya cancine, tulyeelete kufwambaana kumucafwa kuba shikwiiya wakwe Yesu. Lyalo kubaabo batalibambite kutalika kwiiya, tulyeelete kutolelela kweelesha kubacafwa kushiba kuyandika kwa kwiiya pali Lesa acancine camu Baibo. (Joni 4:​35, 36) Kushiba na muntu alisuni kwiiya nabi sobwe, inga kwatucafwa kushiba kabotu mbweenga twamucafwa. Amuleke ano tubandike nsheenga twaciita ciindi cakutaanguna ndyetwabandika amuntu usuni kwiiya. Tutobandika ansheenga twaciita kwaamba ayi tumucaafwe kutolelela kuya panembo.

MBWEENGA TWACAAFWA BANTU BASUNI KWIIYA

3. Ino nshiinshi nshotweelete kucita na twacaana bantu basuni kwiiya ndyetutoshimikila? (1 Bene Kolinto 9:26)

³ Na twacaana bantu basuni kwiiya ndyetutoshimikila, tulisuni kubacafwa peenkaapo kwaamba ayi batalike kweenda panshila itola kubuumi butamaani. Ciindibo cakutaanguna ndyetwabandika ambabo, tulyeelete kubika bubaambo bwakutalika kubeeisha Baibo akubeeta kwaamba ayi bakacanikeeko kumabungano.—Amubelenge 1 Bene Kolinto 9:26.

4. Amwaambe cakubonenaako ca muntu umwi wakalinga kusuni kutalika kwiiya Baibo peenkaapo.

⁴ Kutalika ciiyo ca Baibo. Bantu bamwi mbotucana ndyetutoshimikila, balasuna kutalika kwiiya Baibo peenkaapo. Kucakubonenaako, bushiku bumwi Pacinayi, mwanakashi umwi wacanike waku Canada wakaya pakakoci kamabuku akubwesa buloshuwa ya Amusangalale Abuumi Kwamuyayaya! Nankashi wakalinga pakakoci wakalwiita mwanakashi uyo ayi na kaasuni inga watalika akwiiya Baibo mubuloshuwa iyi kwakubula kulipila. Mwanakashi uyo wakalinga kusuni kwiiya, aboobo bakapaana ma fooni namba. Ndyepakeenda ciindi, bushiku bweenka ubo mwanakashi uyo wakatumina meseji nankashi akumwiipusha ndyeenga batalika kwiiya. Nankashi ndyaakaamba ayi Pacibelu inga batalika kwiiya, mwanakashi uyo wakaamba ayi: “Sa inga tamusi ciilo Pacisanu? Ndaakunoolibo paŋanda.” Nankashi wakeeyaakwe mwanakashi uyo Pacisanu. Lyalo wakacanikaako akumabungano Pasondo alimwi wakatolelela kuya panembo cakufwambaana.

5. Ino nciinshi ceenga catucafwa kushiba ndyeenga twatalika kwiisha muntu Baibo? (Amubone ashikope.)

⁵ Kwalo, teshi boonse basuna kutalika kwiiya Baibo peenkaapo mbuli mwanakashi wacanike uyu mbwaakacita. Bamwi paleenda ciindi kwaamba ayi basune kutalika kwiiya. Mpashi inga twataanguna kubandikaabo pamakani ngobasuni. Nacibi boobo, na twatolelela kubabikilako maano akunoobabona ayi inga basumina kutalika kwiiya, inga tapeendi aciindi inga twatalika kubeeisha Baibo. Ino nshiinshi nsheenga twabalwiita na tulisuni kutalika kubeeisha Baibo? Amuleke tunyumfwe nshobakaamba bamakwesu abenankashi bacishi kabotu bwakutalika shiiyo sha Baibo.

6. Ino ngamaswi nshi ngeenga twaamba kwaamba ayi tucafwe muntu kusuna kutolelela kwiiya Baibo?

⁶ Bamakwesu abenankashi abo bacishi kabotu bwakutalika shiiyo sha Baibo, bakaamba ayi mumisena imwi cili kabotu kutasebensesha maswi mbuli “kwiiya,” “ciiyo ca Baibo,” na “kumwiisha” ndyemusuni kutalika ciiyo ca Baibo. Bakacana ayi nshila ibotu nkusebensesha maswi mbuli “kubandikishanya,” “mubandi,” alimwi a “kushiba kabotu Baibo.” Kwaamba ayi muntu uyo akasumine kubandikaakwe alimwi bushiku bumwi, inga mwaamba ayi, “Cilasangalasha kubona Baibo mboikumbula miipusho iyandika mubuumi,” na ayi “Baibo teshibo libuku lyaamba pamakani akupaila, sombi ilatucafwa amunshila shipusenepusene.” Lyalo inga mweelikaawo akwaamba ayi: “Mumamineti aniinibo, inga mweeya cintu cimwi ceenga camucafwa maningi mubuumi bwanu.” Na mwakonkela sheeshi nshotwambaawo ndyemutoshimikila mumisena imwi, inga tamuyandiki kulwiita muntu ayi “inga mwasala bushiku aciindi cakwiiya” na ayi “tunanokwiiya nsondo ansondo,” mukwiinga maswi aya alapa bamwi kulinyumfwa ayi balyeeletebo kunoocita kweelana ambomwapangana.

7. Ino ndilili bamwi ndyebashiba ayi ncobatokwiiya ncocancine? (1 Bene Kolinto 14:​23-25)

⁷ Amubeete kucanikaako kumabungano. Muciindi ca mutumwi Paulo, citoboneka ayi bamwi ndyebakacanikaako kumabungano ciindi cakutaanguna, bakashiba ayi ncobatokwiiya ncocancine. (Amubelenge 1 Bene Kolinto 14:​23-25.) Amunshiku shino, mbociba kubantu baanji bacanikaako ciindi cakutaanguna kumabungano esu. Baanji balafwambaana kuya panembo lwakumushimu na batalika kucanikaako kumabungano. Ino ndilili ndyeenga mwabeeta kwaamba ayi bakacanikeeko? Muciiyo 10 mulibuku lya Amusangalale Abuumi Kwamuyayaya! muli lubasu lwa kwiita shikwiiya kwaamba ayi akacanikeeko kumabungano. Sombi tamweelete kulindila ayi na mukashike muciiyo ici ndyeshi mukamwiite shikwiiya wanu. Ciindi cakutaanguna ndyemwabandikabo amuntu usuni kwiiya Baibo, inga mwamwiita kucanikaako kumabungano akumamanino ansondo, mpashi kwiinda mukumulwiita mutwi wa likani lya Baibo lyeshi likabeeko na makani amwi ngeshi tukeeye mu Ciiyo ca Njashi Yamulindilishi.

8. Ino nshiinshi nsheenga twalwiita muntu ndyetutomwiita kwaamba ayi akacanikeeko kumabungano? (Isaya 54:13)

⁸ Ndyemutokwiita muntu usuni kwiiya kwaamba ayi akacanikeeko kumabungano, mulyeelete kumusansulwiita mabungano esu mbwaapusene ambobapaila kubupailishi nkwaaya. Shikwiiya Baibo umwi ndyaakacanikaako kumabungano akumamanino ansondo akubona Ciiyo ca Njashi Yamulindilishi mbocicitwa, wakeepusha nankashi wakalinga kumwiisha ayi, “Sa balinga kutanjilila ciiyo balibeshi meena boonse mbomupailaabo?” Nankashi wakaamba ayi soonse tuleelesha kushiba meena abaabo boonse mbotubunganaabo, bweenka mbotushiba meena abamumukwashi wesu. Lyalo shikwiiya wakaamba ayi kuceeci kumishaabo baanji tabashibeneewo meena. Alimwi inga twayandika kusansulwiita muntu luyaando lunene ncotwiita kumabungano. (Amubelenge Isaya 54:13.) Tulaya mukulambila Yehova, kwiishikwa anguwe akuyuminishanya abashominyineesu. (Ebu. 2:12; 10:​24, 25) Aboobo mabungano esu alacitwa munshila ibambitwe kabotu alimwi tatukonkeli tunshiyanshiya ndyetutobungana. (1 Koli. 14:40) Kwiilikaawo, Maanda a Bwaami alayakwa munshila ibotu kwaamba ayi cinootubeta cuubu kwiiya. Alimwi tatubandiki pa shamapolitiki ceebo cakwaamba ayi tatwaabanimo lubasu mushacishi; alimwi tatupikishanyi abantu pamapensho ali mucishi na pamiyeeyo njeenga kabacite. Ndyemutokwiita shikwiiya kwaamba ayi akacanikeeko kumabungano, inga cabota akumutondesha vidyo yaamba ayi Nciinshi Cicitika pa Ŋanda ya Bwaami? kwaamba ayi ashibile limwi nsheshi akacane na akese.

9-10. Ino nshiinshi nsheenga twaamba ndyetutokwiita muntu kumabungano kwaamba ayi atakaloondi kucanikaako? (Amubone acikope.)

⁹ Bamwi balawayawaya kutalika kunocanikaako kumabungano esu ceebo cakuloonda ayi tulaakubalwiita kucileka kuya kubupailishi bwabo akutalika kunoobungana andiswe. Inga mwacaafwa muntu kushiba ayi tulasangalala kubungana pomwi abeensu alimwi tatubakakatishi kwaabanamo lubasu kumabungano nabi kuswaako kubupailishi bwabo. Bacite mikwashi abalo inga bacanikaako kwiilikaawo abana babo baniini. Alimwi kumabungano esu, tatupansaanyi baana kubashali babo kwaamba ayi beeshikwe beenka. Balekala pomwi abashali akunokwiiyila pomwi. Kucita boobo kulacafwa bashali kushiba ayi bana babo balishitilishitwe akushiba nshobatokwiiya. (Duto. 31:12) Kwiilikaawo, tatwiinshimo mbale yakusenga maali na kupa bantu ma envelupu mulembetwe mweelo wa maali ngobeelete kupa. Muciindi cakucita boobo, tulakonkela maswi Yesu ngaakatulwiita akwaamba ayi: “Mwakapekwabo, amwebo mukapebo.” (Mate. 10:8) Alimwi inga twasansulwiita muntu ayi tayandiki kufwala shakufwala shidulite kwaamba ayi akacanikeeko. Lesa alabikila maano kumuntu mbwaabete mumoyo, kuteshi mbwaaboneka pansengwe.—1 Samwe. 16:7.

¹⁰ Na muntu uyo wacanikaako, amucite nsheenga mwacikonsha kwaamba ayi mumutambule kabotu. Inga mwalwiitako bamanene abeshikushimikila bamwi ayi ngu shikwiiya Baibo wanu. Na walinyumfwa ayi mwamutambula kabotu, alaakusuna kucanikaako alimwi. Ciindi cakubungana, inga mwasebensesha Baibo yanu pomwi anguwe na lakwe taaciteewo, akumucafwa kunoocana malembo mwaambi ngatokwaamba. Alimwi inga mwamucafwa akushiba bwakunokonkelaamo mu Ciiyo ca Njashi Yamulindilishi.

MBWEENGA TWACAFWA SHIKWIIYA BAIBO

11. Ino nshiinshi nsheenga mwaciita kwaamba ayi mutondeshe ayi mulamuyeeyelaako shikwiiya Baibo wanu na mwasuminishanya bushiku aciindi cakwiiya?

¹¹ Ino nshiinshi nshotweelete kunokwiibaluka na twatalika kwiisha muntu Baibo? Nkushiba ayi cimwi ciindi alaba ashakucita shiinji alimwi teshi lyoonse ndyaaba aciindi cinene cakwiiya. Aboobo na mwasuminishanya bushiku aciindi cakwiiya, amushinishe kushika paciindi ceenka ico nabi kwaamba ayi bantu baanji kumusena uko tabalaami ciindi. Alimwi ciindi cakutaanguna kwiiya amuntu uyo, inga cabota kutatola ciindi cilaamfu kwiiyaakwe. Bamakwesu abenankashi bamwi bacishi kabotu kutanjilila shiiyo sha Baibo bakaamba ayi ncibotu kuteeya ciindi cilaamfu nabi kwaamba ayi shikwiiya inga kaacisuni kwiiya. Alimwi tamweelete kunokwaamba bunene. Amupe shikwiiya Baibo wanu ciindi cinene cakwaamba mbwaatoyeeya ambwaatolinyumfwa.—Tus. 10:19.

12. Ino nduyaando nshi ndotweelete kubaalo na twatalikabo kwiisha muntu Baibo?

¹² Na twatalikabo kwiisha muntu Baibo, luyaando lwesu nkumucafwa kushiba Yehova a Yesu akubasuna abuumbi. Kwaamba ayi tucikoonshe kucita boobo, lyoonse tulyeelete kunomutondesha Baibo nshoyaamba kuteshi kunomulwiitabo nshotucishi. (Milimo 10:​25, 26) Paulo ndyaakalinga kwiisha bantu, liinji wakalinga kubalwiita pali Yesu Klistu, uyo Yehova ngwaakatuma kwaamba ayi atucaafwe kushiba Baishi akubasuna. (1 Koli. 2:​1, 2) Paulo wakaamba apakuyandika kwa kucafwa bashikwiiya bapya kuba amibo iyandika iyo ikoshanishikwa ku golodi, silifa amabwe amakwebo. (1 Koli. 3:​11-15) Mibo imwi pamibo iyo ndushomo, busongo, kunyumfwisha shintu akuloonda Yehova. (Kulu. 19:​9, 10; Tus. 3:​13-15; 1 Pit. 1:7) Amweeleshe kunookwiisha mbuli Paulo kwiinda mukucafwa bashikwiiya Baibo banu kuba alushomo luyumu, akuba abushicibusa buyumu a Ishiwesu wakwiculu shilusuno.—2 Koli. 1:24.

13. Ino inga twatondesha buyani ayi tatuyumininibo pacintu comwi alimwi tulakalika moyo ndyetutoocafwa bantu basuni kwiiya? (2 Bene Kolinto 10:​4, 5) (Amubone acikope.)

¹³ Munokwiisha mbuli Yesu kwiinda mukutanoyumininabo pacintu comwi akuba bantu bakalika moyo. Munoleya kwiipusha miipusho yeenga yapa muntu kunyumfwa nsoni. Na kuli makani amwi shikwiiya ngaatatonyumfwishisha, inga mwasena palubasu lutokonkelaawo lyalo akuboolelaawo palubasu ulo ciindi cimwi. Alimwi muciindi cakumukakatisha kusumina makani amwi ngeenga weeya, amumupe ciindi kwaamba ayi akayeyeewo lyalo akwaalula mbwaabona makani ayo. (Joni 16:12; Kolo. 2:​6, 7) Baibo ilakoshanisha njiisho shakubeca ku “shintu shiyumu nta” nshotweelete “kumwaya.” (Amubelenge 2 Bene Kolinto 10:​4, 5, NWT.) Maswi amu ciGiliki akasebenseshekwa palilembo ili, alasansulula ciyubilo ceelete kumwaikwa. Inga tacibi cuubu kuli shikwiiya Baibo kucileka kushoma makani ngaakatalika kale kale kushoma. Aboobo tulyeelete kutaanguna kumucafwa kuyaka ciyubilo cipya, nkokwaamba ayi kumucafwa kunoocinka manungo muli Yehova. Lyalo cilaakumubeta cuubu kucileka kushoma njiisho shakubeca.—Kulu. 91:9.

MBWEENGA TWACAFWA BAPYA ABO BACANIKAAKO KUMABUNGANO

14. Ino nshiinshi nshotweelete kucita kubapya abo beenga bacanikaako kumabungano?

¹⁴ Yehova alisuni ayi tunoocita shibotu kubantu boonse teshi mulandu ankobakaswa, nkulilo yabo na maali ngobacite. (Jemu. 2:​1-4, 9) Aboobo ino inga twacita buyani kwaamba ayi tutondeshe lusuno kubapya beenga bacanikaako kumabungano?

15-16. Ino nshiinshi nsheenga twaciita kwaamba ayi bapya balinyumfwe ayi twabatambula kabotu na bacanikaako kumabungano?

¹⁵ Bantu bamwi balesa mukucanika kumabungano kwaamba ayi bashibebo shicitika na mpashi Kamboni nabi muntu umwi utokwiiya Baibo ukala kumusena kumwi wakabalwiita ayi bakacanikeeko. Aboobo na twabona mupya kumabungano, tulyeelete kubandikaakwe. Amumutambule kabotu, sombi mutamupi kulinyumfwa kutaanguluka. Amumusenge kwaamba ayi mukalaakwe. Amusebenseshe Baibo amabuku anu akwiiyaamo pomwi anguwe nabi kumupa Baibo amabuku akwiiyaamo ngeenga wasebensesha. Alimwi inga mwayeeya apanshila shimwi mbweenga mwamucafwa kulinyumfwa kutasoweka. Musankwa umwi wakacanikaako kumabungano pa Ŋanda ya Bwaami, wakalwiita mukwesu wakamutambula ayi wakalinga kulisukuma ceebo cakwaamba ayi taakwe kufwala mbotufwala na tutooya kumabungano. Mukwesu wakasansulwita musankwa uyo ayi nabi kwaamba ayi tulafwala kabotu na tutooya kumabungano, tatupusene abantu bamwi boonse. Mukuya kwaciindi musankwa uyo wakabombekwa, sombi taakwe kulubaawo mukwesu nshaakamulwiita. Nacibi boobo, ndyetutotondesha ayi tulababikilako maano bapya beenga bacanikaako kumabungano, tulyeelete kuleya kubeepusha miipusho pamakani ngotuteelete kushiba na miipusho yeenga yabapa kunyumfwa nsoni.—1 Pit. 4:15.

¹⁶ Kuli nshila aimwi mbweenga twatondesha ayi twabatambula kabotu bapya beenga bacanikaako kumabungano. Kucakubonenaako, ndyetutokwaamba pa bantu bateshi Bakamboni na pashintu nshobashoma, tulyeelete kwaamba munshila yabulemu inga caba ayi mumibandi, ndyetutokumbulaawo na ndyetutokumanisha mbasu nsheenga twapekwa. Tatweelete kusebensesha maswi eenga abakalasha na eenga apa kwaamba ayi batakesiko lyobilo kumabungano. (Taita. 2:8; 3:2) Tatweelete kwaamba maswi atabete kabotu pashintu nshobashoma. (2 Koli. 6:3) Bamakwesu bapekwa coolwe cakwaamba makani a Baibo balyeelete kucenjela maningi ndyebatokwaamba pashintu bamwi nshobashoma. Alimwi inga batondesha ayi balababikilako maano bantu bateshi Bakamboni kwiinda mukusansulula maswi na makani ngeenga babula kunyumfwishisha.

17. Ino nciinshi ncotweelete kucita na twacaana bantu ‘balibambite kutambula buumi butamaani’ ndyetutoshimikila?

¹⁷ Bushiku buli boonse bweenga bweenda, tulyeelete kwiindaawo kusebensa cankusu muncito yakucafwa bantu kuba bashikwiiya mukwiinga ciindi citooya bumana. Alimwi tulaakutolelela kucana bantu ‘balibambite kutambula buumi butamaani.’ (Milimo 13:48) Na twacaana bantu bamushobo uyo, tatweelete kuwayawaya kutalika kubeeisha Baibo akubeeta kwaamba ayi bakacanikeeko kumabungano. Na twacita boobo, inga twabacafwa kutalika kweenda ‘panshila itola kubuumi butamaani.’—Mate. 7:14.