Miipusho Kuswa Kubeshikubelenga
Ino wakalemba Tushimpi 30:18, 19 wakalinga kusansulula nshi ndyakaamba ayi “musankwa mbwaasuna mwanakashi” cakalinga ‘ciyumu kunyumfwisha’?
Bantu baanji cilababeta ciyumu kushiba maswi aya ncaasansulula kwiilikaawo abaabo bakeeya shiinji pamakani amu Baibo. Mu Baibo ya New World Translation, maswi oonse ali pamavesi aya alaamba ayi: ‘Kuli shintu shotatwe shinkankamika abuumbi. Nabibo shili 4 nshentanyumfwishi: Shintu isho nkuuluka kwa nkwashi mwiculu, kweenda kwa nsoka pamwaandami, kweenda kwa bwaato palweenge amusankwa mbwaasuna mwanakashi.’—Tus. 30:18, 19.
Kale kale twakalinga kunyumfwisha ayi maswi akwaamba ayi “musankwa mbwaasuna mwanakashi” akalinga kwaamba pacintu cibiibi. Ino nceebonshi? Mavesi amwi mucapita iyi alaamba pashintu shibiibi shitaambi ayi “mbubo.” (Tus. 30:15, 16) Alimwi vesi 20 ilaamba pa “mwanakashi mufuule” uyo waamba ayi taakuwo cibiibi ncakacita. Aboobo twakalinga kuyeeya ayi vesi iyi yakalinga kwaamba pashintu shicita cintu cimwi bamwi kwakubula kushiba. Twakalinga kuyeeya ayi bweenka mbuli kuuluka kwa nkwashi mwiculu, kweenda kwa nsoka pamwaandami, akweenda kwa bwaato palweenge, musankwa inga wacita cintu cimwi bamwi kwakubula kushiba. Aboobo twakalinga kuyeeya ayi maswi akwaamba ayi “musankwa mbwaasuna mwanakashi” akalinga kwaamba pacintu cimwi cibiibi alimwi ayi akalinga kwaamba pamusankwa uyo wakalinga kucenjeeka mwanakashi wacanike kwaamba ayi akumanaakwe.
Sombi citoboneka ayi kuli sheenga shatupa kushoma ayi mavesi aya alaamba pacintu cibotu. Wakalemba maswi acanika pamavesi aya wakalinga kusansululabo shintu shakamukankamika.
Mabuku akutaanguna amu ciEbulu palembetwe makani amu Baibo alatondesha ayi vesi 19 ilaamba pashintu shibotu. Dikishonali imwi isansulula malembo amu ciEbulu yakaamba ayi liswi lyamu ciEbulu lyakasansululwa ayi “nshentanyumfwishi” pa Tushimpi 30:18, “lilasansulula cintu cikankamika na ciboneka anga inga tacicitiki.”
Musankwa umwi wiite abuumbi waliina lya Crawford H. Toy usebensa pa Harvard University ku United States, alakwe wakaamba ayi mavesi aya taasansululi cintu cibiibi. Wakaamba ayi: “Wakalemba mavesi aya wakalinga kweelesha kusansulula shintu nshaakalemba mboshakalinga kumukankamika.”
Aboobo inga twaamba ayi maswi ngotucana pa Tushimpi 30:18, 19 alaamba pashintu shibotu maningi alimwi mpashi nsheenga tatunyumfwishi. Bweenka mbuli wakalemba maswi acanika palilembo ili, aswebo cilatukankamika na twabona nkwashi mboicikoonsha kuuluka mwiculu mwiine, insoka itacite myeendo mboicikoonsha kweenda pa mwaandami, bwaato bulemu mbobucikoonsha kweenda palweenge, amusankwa wacanike amwanakashi wacanike mbobasunana akusangalala kuba mucikwati pomwi.