Mutanoolubaako Kupaililaako Bamwi

1. Ino tulishi buyani ayi mipailo yesu ilayandika kuli Yehova?

MUPAILO ncipo cilibetele Lesa ncaakatupa. Amuyeeye paceeci: Yehova wakapa baanjelo mikuli imwi. (Kulu. 91:11) Alimwi wakapa a Mwanaakwe mikuli iyandika maningi. (Mate. 28:18) Ano sa kuli angwaakapa mukuli wakukutika mipailo yesu? Sobwe. Taakuwo ngwaakapa mukuli uyu. Yehova mwiine ngwaakutika akukumbula mipailo yesu.—Kulu. 65:2.

2. Ino nceebonshi nceenga twaambila ayi mutumwi Paulo ncakubonenaako cibotu ca muntu wakalinga kupaililaako bamwi?

² Nabi kwaamba ayi inga twapaila kuli Yehova cakwaanguluka pashintu shitusukamika, tulyeelete kunoopaililaako abamwi. Mutumwi Paulo alakwe mbwaakalinga kucita. Kucakubonenaako, munkalata njaakalembela bene Efeso, wakaamba ayi: “Ndamwiibaluka mumipailo yangu.” (Efe. 1:16) Kwiilikaawo, Paulo wakalinga kupaililaako amuntu womwi awomwi. Kucakubonenaako, wakalwiita Timoti ayi: “Ndalumba Lesa, . . . lyoonse ndinkuyeeya mumipailo yangu mashiku amalumwi.” (2 Timo. 1:3) Paulo alakwe wakalinga kwiinda mumapensho mubuumi bwakwe ayo ngaakalinga kupaililaawo. (2 Koli. 11:23; 12:​7, 8) Nacibi boobo, wakalinga kupaililaako abamwi.

3. Ino nceebonshi cimwi ciindi tulalubaako kupaililaako bamwi?

³ Cimwi ciindi tulalubaako kupaililaako bamwi. Ino nceebonshi? Nankashi waliina lya Sabrinaa wakaamba ceebo comwi cilengesha. Wakaamba ayi: “Tulicite shakucita shiinji mubuumi. Aboobo inga twabikila bunene maano kumapensho ngotutokwiindaamo cakwaamba ayi katupaililabo pa nshotutoyandika.” Sa andimwe camushobo uyu cilamucitikila? Na ubo mbocibete, nkokwaamba ayi mutwi uyu utoomucafwa kushiba ncociyandikila kunoopaililaako bamwi asheenga shamucafwa kunoocita boobo.

INO NCEEBONSHI TULYEELETE KUNOOPAILILAAKO BAMWI?

4-5. Ino nceebonshi kupaililaako bamwi kulacafwa abuumbi? (Jemusi 5:16)

⁴ Kupaililaako bamwi inga kwabacafwa abuumbi. (Amubelenge Jemusi 5:16.) Sa ncakwiila kupaililaako bamwi inga kwapa kwaamba ayi bukaalo mbobabeteemo bwaaluke? Ee inga bwaaluka. Yesu uyo wakalinga kucishi ayi mutumwi Pita alaakumukaka, wakamulwiita ayi: ‘Ndakupaililaako kwaamba ayi lushomo lwako lutamaani.’ (Luka 22:32) Paulo alakwe wakalinga kucishi ayi kupaililaako bamwi inga kwapa kwaamba ayi bukaalo mbobabeteemo bwaaluke. Ndyaakaangwa ku Loma nabi kwaamba ayi taakuwo ncaakabisha, wakalembela Filimoni ayi: “Ntooshoma kwaamba ayi Lesa ulaakukumbula mipailo yanu akumboosha kuli ndimwe.” (Filimo. 22) Alimwi ici ncocakacitika. Tapana kwiinda aciindi Paulo wakaangululwa akutalika alimwi kushimikila.

⁵ Nabi kwaamba ayi kupaililaako bamwi kulacafwa, tacaambi ayi tulakakatisha Yehova kucita cili coonse nceenga twamusenga. Alabona basebenshi bakwe mbobasunishisha kwaamba ayi nshobatopaililaawo shicitike, alimwi cimwi ciindi alasalawo kubacitila nshobasenga. Kushiba makani aya inga kwatucafwa kunoopaila kuli Yehova kuswa panshi lya moyo kumulwiita bukaalo bamwi mbobatokwiindaamo, akushoma cakutatonsha ayi alaakucitaawo comwi paciindi ceelete munshila mwiine njaasuni.—Kulu. 37:5; 2 Koli. 1:11.

6. Ino kupaililaako bamwi inga kwakuma buyani mbotulinyumfwa pali mbabo? (1 Pita 3:8)

⁶ Kupaililaako bamwi kulatucafwa kwiiya ‘kunotondesha nkuumbu.’ (Amubelenge 1 Pita 3:8.) Na muntu ucite nkuumbu wabona umwi kaapenga, alacitawo comwi kwaamba ayi amucaafwe. (Maako 1:​40, 41) Munene waliina lya Michael wakaamba ayi: “Na ndapaililaako bamwi pashintu nshobatoyandika, ndanyumfwishisha kabotu mapensho ngobatokwiindaamo alimwi ndabasuna abuumbi. Ndalinyumfwa kuba pafwiifwi ambabo nabi kwaamba ayi balo inga kabatacishiiwo ayi ubo mbocibete.” Munene waliina lya Richard wakaamba cibotu acimwi ciswaamo. Wakaamba ayi: “Na katupaililaako bamwi, tulasunishisha kucitaawo comwi kwaamba ayi tubacaafwe.” Wakeelikaawo akwaamba ayi: “Na twacitawo comwi kwaamba ayi tucafwe muntu ngotutopaililaako, cilababo anga aswebo tutokwaabanamo lubasu kukumbula mipailo njotutomupaililaako.”

7. Ino kupaililaako bamwi kulatucafwa buyani kunoobona mapensho ngotutokwiindaamo munshila ili kabotu? (Bene Filipi 2:​3, 4) (Amubone ashikope.)

⁷ Kupaililaako bamwi kulatucafwa kunoobona mapensho ngotutokwiindaamo munshila ili kabotu. (Amubelenge Bene Filipi 2:​3, 4.) Soonse tuleenda mumapensho ceebo cakwaamba ayi tulekala mucishi citokweendeleshekwa a Satana. (1 Joni 5:19; Ciyu. 12:12) Na liinji katupaililaako bamwi, tulebaluka ayi mapensho ngotutokwiindaamo abalo ‘bashominyineesu mucishi coonse capanshi ngobatokwiindaamo.’ (1 Pit. 5:9) Nankashi painiya waliina lya Katherine wakaamba ayi: “Kupaililaako bamwi kulancafwa kushiba ayi teshi ndime neenka nentokwiinda mumapensho. Kuyeeya pa cancine ici kulancafwa kutanoyeeya bunene pamapensho ngontokwiindaamo.”

BALAYANDIKA KUNOBAPAILILAAKO

8. Ino mbaani mbeenga twapaililaako?

⁸ Ino mbaani mbeenga twapaililaako? Inga twapaililaako bamwi mbuli balwashi, bacanike beshikusekwa na kukakatishikwa kucita shintu shitabete kabotu ku banaacikolonyinaabo, na abo batoopenga ceebo cakucembela. Kwiilikaawo, bashominyineesu baanji batopikishikwa ku bamumukwashi wabo na ku mfulumende. (Mate. 10:​18, 36; Milimo 12:5) Bamakwesu bamwi bakacicaawo pamaandaabo ceebo ca nkoondo. Bamwi batoopenga ceebo camapensho acitika cakuteengashila. Baanji tatubeshiiwo alimwi tatuna kubabonaawo kale. Sombi na katubapaililaako tulakonkela mulawo Yesu ngwakatupa wakwaamba ayi “amusunane.”—Joni 13:34.

9. Ino nceebonshi tulyeelete kunoopaililaako bamakwesu batanjilila mulibunga lyakwe Yehova alimwi abamakaabo?

⁹ Inga twapaililaako abaabo bakapekwa nkusu shakutanjilila mulibunga lyakwe Yehova, nkokwaamba ayi bamakwesu bamu Likoto Litanjilila abeshikubacafwilisha, bamu Komiti Yamusampi mushishi shipusenepusene, bamakwesu batanjilila pa Bethel, bamatanjilili balubasu, bamanene, abasebenshi bacafwilisha. Buunji bwa bamakwesu aba batokwiinda mumapensho. Nacibi boobo, balasebensa cankusu kutucafwa. (2 Koli. 12:15) Kucakubonenaako, mutanjilili walubasu waliina lya Mark wakaamba ayi: “Lipenshi lyomwi linene ndyencite nkuba kulaale abashali bangu mukwiinga bacembela. Boonse bobilo balaciswa ciswa. Nabi kwaamba ayi munene wangu mwanakashi abeebaye balabalama kabotu, ndalinyumfwa cibiibi ceebo cakwaamba ayi nshicikoonshi kuba pomwi ambabo kwaamba ayi mbacaafwe kweelana ambonsuni.” Tulyeelete kunobapaililaako bamakwesu aba basebensa cankusu, inga caba ayi tulicishi mapensho ngobatokwiindaamo nabi sobwe. (1 Tesa. 5:​12, 13) Inga katupaililaako abamakaabo mukwiinga balasebensela pomwi abameebaabo cakushomeka. Ici cilapa kwaamba ayi bameebaabo batolelele kukumanisha mikuli njobakapekwa mulibunga.

10-11. Sa Yehova alakutika na twapaililaako bamakwesu abenankashi baanji paciindi comwi? Amusansulule.

¹⁰ Kweelana ambotweeya, liinji tulapaililaako bamakwesu abenankashi baanji paciindi comwi. Kucakubonenaako, nabi kwaamba ayi taakuwo muntu ngotutoyeeyawo, inga twasenga Yehova kwaamba ayi acafwe baabo bali mujeele akuyuminisha baabo bakafwitwa shikamukowa nabi shicibusa. Munene waliina lya Donald wakaamba ayi, “Kuli bamakwesu abenankashi baanji batokwiinda mumapensho cakwaamba ayi cimwi ciindi inga twabapaililaakobo boonse paciindi comwi kwakubula kubaamba meena.”

¹¹ Sa Yehova alakutika mipailo yamushobo uyo? Ee! Cimwi ciindi tatushibiiwo lucafwo lwiine bamakwesu abenankashi ndobatoyandika. Aboobo cilibo kabotu kubapaililaako boonse paciindi comwi. (Joni 17:20; Efe. 6:18) Mipailo yamushobo uyo ilatondesha ayi ‘tulibasuni bashominyineesu.’—1 Pit. 2:17.

NDYETUTOPAILILAAKO MUNTU WOMWI AWOMWI

12. Ino kubashiba kabotu bashominyineesu inga kwatucafwa buyani kunokwaamba cakululama ndyetutopaililaako bamwi?

¹² Amubashibe kabotu bashominyineesu. Kwiilika pa kupaililaako bamakwesu abenankashi baanji paciindi comwi, cili kabotu akupaililaako muntu womwi awomwi akumwaamba liina. Sa mulibungano lyanu kuli mukwesu nabi nankashi utocisililwa? Sa kuli wacanike ulefukite ceebo cakukakatishikwa kucita shintu shitabete kabotu ku banaacikolonyina? Sa kuli mushali ulibo eenka utokweelesha cankusu kulela mwanaakwe kweelana ‘akululika alwiiyo lwakwe Yehova?’ (Efe. 6:4) Na mwabashiba kabotu bashominyineesu, mulaakubasuna abuumbi akunoobayeeyelaako. Lyalo ici cilaakumuyuminisha kunobapaililaako.b—Loma. 12:15.

13. Ino nshiinshi nsheenga twaciita kwaamba ayi tunopaililaako baabo mbotuteshi?

¹³ Amupailileko bamwi akubaamba meena. Inga twacita boobo nabi kubashominyineesu mbotutana kubonanaabo kale. Kucakubonenaako, amuyeeye pa bamakwesu abenankashi baangitwe ku Crimea, ku Eritrea, ku Russia aku Singapore. Na mwaya pa jw.org, inga mwacana meena abashominyineesu bali mujeele.c Mutanjilili walubasu waliina lya Brian wakaamba ayi: “Kulemba liina lya mukwesu nabi nankashi uli mujeele akulyaamba cakuposha, kulancafwa kumwiibaluka akumwaamba liina ndyentopaila palwaangu.”

14-15. Ino nshiinshi sheenga shatucafwa kunokwaamba cakululama ndyetutopaililaako bashominyineesu?

¹⁴ Amwaambe cakululama ndyemutobapaililaako. Ba Michael mbotwalinga twambaawo bakaamba ayi: “Ndyentobelenga makani pa jw.org aamba pabamakwesu bali mujeele, ndeelesha kuyeeya mbweenga ndalinyumfwa naakwiinga ndime ndi mujeele. Ndicishi ayi inga ndalisukama pamukaangu, alimwi inga ndasuna kushinisha kwaamba ayi kaaba ashoonse nshayandika. Aboobo ici cilancafwa kuyeeya pacintu comwi nceenga ndaamba ndyentopaililaako bamakwesu beebete bali mujeele.”—Ebu. 13:3.

¹⁵ Na katweelesha kuyeeya buumi mbobubete ku bamakwesu baangitwe, inga catucafwa kuyeeya pashintu shimwi nsheenga twaamba ndyetutobapaililaako. Kucakubonenaako, inga twapaila kwaamba ayi beshikulindilila jeele batanopensha bamakwesu akwaamba ayi abo bacite nkusu shakweendelesha bamwi banobasuminisha kulambila Yehova cakwaanguluka. (1 Timo. 2:​1, 2) Alimwi inga twapaila kwaamba ayi bamakwesu abenankashi bali mulibungano mukwesu wangitwe mwaakaswa bayuminishikwe ceebo ca kushomeka kwakwe. Nabi mpashi inga twapaila ayi bantu bateshi Bakamboni bakabone cakubonenaako cibotu ca mukwesu nabi nankashi wangitwe lyalo akusumina kubashimikila. (1 Pit. 2:12) Inga tweelesha kucita sheeshi nabi ndyetutopaililaako bamakwesu abenankashi batokwiinda mumapensho amwi. Na katulangilisha cakubikila maano, kwaamba meena abashominyineesu akwaamba cakululama ndyetutobapaililaako, tulaakutondesha ayi ‘tulisunene abuumbi.’—1 Tesa. 3:12.

TULYEELETE KUNOOBONA MIPAILO YESU MUNSHILA YEELETE

16. Ino nciinshi ceenga catucafwa kunoobona mipailo yesu munshila yeelete? (Mateyo 6:8)

¹⁶ Kweelana ambotweeya, na katupaililaako bamwi bukaalo bwaabo inga bwaaluka. Nacibi boobo, tulyeelete kunoobona mipailo yesu munshila yeelete. Ino nceebonshi? Mukwiinga na tutopaila tulalwiita Yehova makani ngaacishi kale; alimwi tatweelete kumulwiita mbwaeelete kukumbula mipailo yesu. Yehova alashiba basebenshi bakwe nshobayandika, beene kabatana kushiba nabi swebo. (Amubelenge Mateyo 6:8.) Ano ino nceebonshi tulyeelete kunoopaililaako bamwi na lakwe alaba kaacishi kale nshobatoyandika? Kwiilika pa nshetwaambawo mumutwi uyu, kucita boobo kulatondesha ayi tulabikila maano kubamwi. Lusuno lulatuyuminisha kunoopaililaako bamwi. Alimwi Yehova alasangalala na basebenshi bakwe kabakonkela cakubonenaako cakwe cakutondesha lusuno.

17-18. Ino nceebonshi kupaililaako bamwi kulayandika? Amwaambe cakubonenaako.

¹⁷ Nabi kwaamba ayi cimwi ciindi mipailo yesu inga taipi kwaamba ayi bukaalo bwaaluke kubaabo mbotutopaililaako, ilatondesha ayi tulibasuni bamakwesu abenankashi alimwi Yehova alabona mbotubasuni. Kucakubonenaako, amuyeeye pa bashali bacite baana baniini bobilo—musankwa amwanakashi. Lyalo musankwa waciswa. Mwanakashi wasenga baishi ayi: “Dadi ndasenga amucitewo comwi kwaamba ayi munene wangu abe kabotu. Waciswa maningi!” Baishi balo kabatalikite kale kucitawo comwi kwaamba ayi mwanaabo abe kabotu; balimusuni alimwi batomubikilako maano. Nacibi boobo, baishi inga basangalala maningi kubona mwanaabo mwanakashi mbwaamubikilako maano munene wakwe cakwaamba ayi inga wabasenga ayi bamucaafwe.

¹⁸ Yehova alakwe alatuyuminisha kunoobikilana maano akunopaililaako bashominyineesu. Kucita boobo kulatondesha ayi tatubikilibo maano kushintu nshotusuni palweesu, sombi ayi tulibasuni bamakwesu abenankashi alimwi Yehova alabona mbotubasuni. (2 Tesa. 1:3; Ebu. 6:10) Alimwi kweelana ambotweeya, cimwi ciindi mipailo yesu inga yapa kwaamba ayi bukaalo muntu umwi mbwabeteemo bwaaluke. Aboobo atucite nsheenga twacikoonsha kutanoolubaako kupaililaako bamwi.