Comstock Images/Stockbyte via Getty Images
AMUTOLELELE KUBA BALIBAMBITE!
Ino Mulaakusala Aani Kuba Mweendeleshi?—Ino Nshiinshi Baibo Nshoyaamba?
Munsondo shiniini shitoosa, bantu balaakunoosala beendeleshi mushishi shipusenepusene nsengwe yoonse. Bantu balaakuyandika kusalawo cakucita ciyandika ndyeshi bakanoosala bantu beenga baba beendeleshi.
Ino nshiinshi Baibo nshoyaamba?
Nkusu sha beendeleshi ba bantu kuli mposheela
Baibo ilaamba ayi nkusu sha beendeleshi ba bantu kuli mposheela.
“Mutaciinki manungo mubamaami, mbantubo tabakoonshi kumufuna. Bushiku ndibafwa, balaboolela kubulongo. Pabushiku ubo nshibabambite shoonse shileela.”—Kulumbaisha 146:3, 4.
Nabibo beendeleshi bacishi kabotu kweendelesha mukuya kwaciindi balaakufwa. Kwiilikaawo, inga tabapi kwaamba ayi muntu weshi akabapyane akatolelele kusebensa incito shibotu nshebakalinga kusebensa.—Shikushimikila 2:18, 19.
Baibo ilaamba cakuteenda mweela ayi bantu tabacite nkusu shakweendelesha bantunyinaabo.
“Muntu taacite nkusu shakweendelesha buumi bwakwe.”—Jelemiya 10:23.
Ano sa pacecino ciindi kuli muntu uli woonse weenga weelela kuba mweendeleshi uli kabotu?
Mweendeleshi Lesa ngwaakasala
Baibo ilaamba ayi Lesa wakasala mweendeleshi weelela abuumbi alimwi ushomeka: Yesu Klistu. (Kulumbaisha 2:6) Yesu ngu Mwaami wa Bwaami bwakwe Lesa. Bwaami bwakwe Lesa nimfulumeende yakwiculu.—Mateyo 6:10.
Sa mulaakusumina Yesu kuba mweendeleshi wanu? Baibo ilaamba sheebo shitondesha kuyandika kwa mwiipusho uyu:
“Amulemeke mwaana [Yesu Klistu] kwaamba ayi Lesa atakalali akwaamba ayi mutalobi munshila, ceebo bukali bwakwe bulaabuka cakufwambaana. Balicite coolwe abo boonse bayuba muli nguwe.”—Kulumbaisha 2:12, NWT.
Cino ncociindi ndyemweelete kusala mweendeleshi ngomusuni. Bushinshimi bwamu Baibo bulatondesha ayi Yesu wakatalika kweendelesha mu mwaaka wa 1914 alimwi coononobo Bwaami bwakwe Lesa bulaakunyonyoola mfulumeende shoonse sha bantu.—Danyelo 2:44.
Kwaamba ayi mwiiyilewo shiinji akushiba nsheenga mwaciita ayi mube kulubasu lwa bweendeleshi bwakwe Yesu, amubelenge mutwi utokwaamba ayi “Amusale Kuba Kulubasu lwa Bwaami Bwakwe Lesa!”