Inkondo Yaku Ukraine Yanjila Mumwaaka Wabili—Ino Nshiinshi Baibo Nshoyaamba Sheenga Shatupa Kulangila?

Pacisanu pa 24 February, 2023, mwaaka ulaakukwaana kuswa ciindi cintu cibiibi abuumbi ndyecakacitika ku Ukraine, nkokwaamba ayi kutalika kwa nkondo. Kweelana amalipooti amwi, bamasoja baku Ukrain abaku Russia bashika pafwiifwi a 300,000 bakacaikwa na kulicisa alimwi citoboneka ayi bantu bashika pafwiifwi a 30,000 batatolwanako nkondo, bakafwa ceebo ca nkondo iyi. Nacibi boobo, mpashi bantu bakafwa akulicisa mbaanji kwiinda amalipooti aaya.

Cabicaako ncakwaamba ayi inkondo iyi taitolangilwa kumana conoono.

• “Pafwiifwi amwaaka womwi kuswa ciindi bamasoja baku Russia ndyebakenjila mucishi ca Ukraine, taakuwo shitotondesha ayi inkondo iyi inga yamana conoono. Taakuwo cishi citoboneka ayi inga cakoma munkondo iyi alimwi shishi shobilo ishi tashina kucana nshila ya mbweenga shacatana pomwi kwaamba ayi shibe muluumuno.”​—NPR (National Public Radio), February 19, 2023.

Bantu baanji batolinyumfwa cibiibi na babona bantu batacite mulandu mbobatopenga nsengwe yoonse, ceebo ca nkondo iyi ankondo shimwi shitoocitika. Ino nshiinshi Baibo nshoyaamba sheenga shatupa kulangila? Sa kulaakubawo ciindi inkondo ndyeshi shikamaane?

Inkondo yeshi ikamane nkondo shoonse

Baibo ilaamba pa nkondo yeshi ikapulushe bantu, kuteshi kubacaya. Inkondo iyo ileetwa ayi Amagedoni, alimwi ilasansululwa ayi ‘inkondo ya bushiku bunene bwakwe Lesa Shinkusu shoonse.’ (Ciyubululo 16:14, 16) Kwiinda munkondo iyi, Lesa alaakukushawo mfulumeende sha bantu shoonse isho shapa kwaamba ayi kube nkondo shiinji shacaya bantu. Kwaamba ayi mushibe nkondo ya Amagedoni mbweshi ikalete luumuno lwamuyayaya pacishi, amubelenge mitwi itokonkelaawo:

• “Ino Inkondo ya Amagedoni Nciinshi?”

• “Tutolangila Amagedoni!”