Ino Ndilili Inkondo Ndyeshi Shikamaane?—Ino Nshiinshi Baibo Nshoyaamba?

Cishi ca Iran ndyecakalwana cishi ca Israel Pacibelu pa 13 April 2024, ba António Guterres ba Secretary-General mukabunga ka United Nations bakaamba ayi, “Cino ncociindi ndyetweelete kucitaawo comwi kwaamba ayi bantu bekaleko muluumuno. Cino ncociindi cakutondesha mubo wakulikasha abuumbi.”

Inkondo ili ku Middle East ncakubonenaako comwi ca shitocitika nsengwe yoonse.

“Pacecino ciindi, bantu batocayana abuumbi munkondo shiliiko mucishi kwiinda mbocakalinga kuswabo ciindi Inkondo Yapacishi Coonse Yabili ndyeyakamana. Alimwi shakuma bantu bashika 2 biliyoni, nkokwaamba ayi muntu womwi pabantu bali 4.”—United Nations Security Council, January 26, 2023.

Shishi muli nkondo bantu mobatocayana abuumbi shileelikaawo Israel, Gaza, Syria, Azerbaijan, Ukraine, Sudan, Ethiopia, Niger, Myanmar, alimwi a Haiti.a

Ino ndilili inkondo ndyeshi shikamaane? Sa beendeleshi inga bacikonsha kupa kwaamba ayi kube luumuno? Ino nshiinshi Baibo nshoyaamba?

Mucishi muli nkondo

Inkondo shitocitika nsengwe yoonse ncitondesho cakwaamba ayi conoonobo inkondo shoonse shilaakumana. Inkondo shiliiko shitookumanisha bushinshimi bwamu Baibo bwaamba panshiku nshetutokalaamo. Baibo ilaamba paciindi ncetubeteemo ayi ‘mamanino acishi.’—Mateyo 24:3.

• ‘Mulaakunyumfwa nkondo ampuuwo sha nkondo. . . . Mushobo umwi ulaakubukila ubye, abwalo buleelo bulaakubukila bulelonyina.’—Mateyo 24:6, 7.

Amubelenge mutwi wamu Chitonga waamba ayi “Ino Citondezyo ‘Camazuba Aamamanino,’ naa ‘Ciindi Camamanino’ Ninzi?” kwaamba ayi mubone inkondo shiliiko mboshitokumanisha bushinshimi bwamu Baibo.

Inkondo yeshi ikamane nkondo shoonse

Baibo yakaambila limwi ayi inkondo shilaakumana. Ino ici cilaakukonsheka buyani? Kuteshi munkusu shabantu sombi kwiinda mu Amagedoni, nkokwaamba ayi ‘inkondo ya bushiku bunene bwakwe Lesa Shinkusu shoonse.’ (Ciyubululo 16:14, 16) Pesule lyankondo iyi, Lesa alaakukumanisha cishomesho cakwe cakwaamba ayi bantu bakekale muluumuno kwamuyayaya.—Kulumbaisha 37:10, 11, 29.

Kwaamba ayi mushibileewo ashimwi pankondo yakwe Lesa yeshi ikamane nkondo shoonse, amubelenge mutwi wamu Chitonga waamba ayi “Ino Nkondo ya Amagedoni Ninzi?”