Peculu kucipiko: Marek M. Berezowski/Anadolu Agency via Getty Images; paanshi kucipiko: Halfpoint Images/Moment via Getty Images; pakati: Zhai Yujia/China News Service/VCG via Getty Images; peculu kululyo: Ismail Sen/Anadolu Agency via Getty Images; paanshi kululyo: E+/taseffski/via Getty Images
AMUTOLELELE KUBA BALIBAMBITE!
2023 Ngu Mwaaka Wakapa Bantu Baanji Kulisukama—Ino Nshiinshi Baibo Nshoyaamba?
Mu 2023, kwakacitika shintu shiinji nsengwe yoonse shakatondesha patuba ayi tutokala munshiku Baibo nshoyaamba ayi ‘inshiku shakweelaako.’ (2 Timoti 3:1) Amubone shintu shitoocitika mucishi mboshikoshenye a Baibo nshoyakaambila limwi ayi nsheshi shikanoocitika munshiku shino.
Baibo nshoyakaambila limwi pashintu shitoocitika nsengwe yoonse
‘Inkondo ampuuwo sha nkondo.’—Mateyo 24:6.
“Mushishi shiinji inkondo shitooya cifulilaako isho shitoopa kwaamba ayi bantu baanji baliciise akufwa.”a
Amubelenge mutwi waamba ayi “Ino Ngani Eshi Akapulushe Bantu Batatolwanako Nkondo?” awaamba ayi “Mfulumeende Nsengwe Yoonse Shasebensesha Maali Amadola Eendilila 2 Tililyoni Kucafwa Bamasoja.”
“Shitentanshi mumisena ipusenepusene.”—Maako 13:8.
“Kuswabo mwaaka wa 2023 ndyewakatalika, nsengwe yoonse kwakacitika shitentaanshi shinene shili 13 shiindilila pa 7-magnitude. Alimwi mumwaaka uyu ndyekwakacitika shitentaanshi shiinji kuswabo ciindi ndyetwakatalika kusunga makani ashicitika.”b
Amubone mutwi wamu Chitonga waamba ayi “Muzuzumo Wanyika ku Turkey Aku Syria.”
“Shintu shiloondesha.”—Luka 21:11.
“Kulungula cakwiindilila kwamana; kwatalika kulungula cakubila.”—Ba António Guterres, ba secretary-general bamu kabunga ka United Nations.c
Amubelenge mutwi waamba ayi “Kulungula Cakwiindilila Nsengwe Yoonse Mumwaaka wa 2023 Mucilimo.”
“Nsala.”—Mateyo 24:7.
“2023 ngu mwaaka wakapa kwaamba ayi bantu abo batokwaalilwa kucanina mukwashi wabo shiyandika, beendeewo kulisukama.”d
Amubelenge mutwi waamba ayi “Inkondo Alimwi a Kwaaluka Kwa Mbokuca Shapa Kwaamba ayi Kube Nsala Nsengwe Yoonse.”
‘Shiindi shiyumu abuumbi.’—2 Timoti 3:1.
“Nsengwe yoonse, muntu womwi pa bantu bali 8 alicite lipenshi lya mumiyeeyo.”e
Amubelenge mutwi waamba ayi “Namba ya Bacanike Batoociswa Bulwashi bwa Mumiyeeyo Itooya Panembo.”
Ino nshiinshi nsheenga twalangila mu 2024?
Taakuwo ucishi kabotu sheshi shikacitike mu 2024. Sombi shitoocitika mucishi shitotondesha ayi conoonobo Bwaami bwakwe Lesa na mfulumeende yakwiculu, ilaakukushawo mfulumeende sha bantu ashintu shoonse shipa kwaamba ayi bantu banopenga akulisukama.—Danyelo 2:44; Ciyubululo 21:4.
Ndyetutolindila kwaamba ayi ishi shikacitike, na twalisukama inga twacinka manungo muli Lesa kwaamba ayi atucaafwe. Baibo ilaamba ayi:
‘Na ndanyumfwa boowa, ndacinka manungo muli ndimwe.’—Kulumbaisha 56:3.
Ino inga twatondesha buyani ayi tulacinka manungo muli Lesa? Tutomusenga ayi mwiiye shiinji Baibo nshoyaamba pacishomesho cakwaamba ayi mapenshi kunembo alaakumana. Amweeleshe kwiiya Baibo andiswe munshila ya kubandikishanya kwakubula kulipila kwaamba ayi mubone mbweenga mwebo amukwashi wanu mwafubilaamo mushishomesho shamu Baibo.
a Makani Amushishi Shimwi, “Inkondo Nsengwe Yoonse: Ino Nshiinshi Shitoopa Kwaamba ayi Kube Nkoondo Nsengwe Yoonse?” akaambwa aba Emma Beals aba Peter Salisbury, 30 October, 2023.
b Makani Atokwaamba Pacitentaanshi, “Mwaaka wa 2023: Namba ya Shitentaanshi Shinene Itolangilwa Kuya Panembo,” May, 2023.
c United Nations, “Secretary-General’s Opening Remarks at Press Conference on Climate,” July 27, 2023.
d Pulogilamu ya Shakulya Nsengwe Yoonse, “Kuceya kwa Shakulya Nsengwe Yoonse.”
e World Health Organization, “World Mental Health Day 2023,” October 10, 2023.