Imfula Inene Inyonyoola Shintu—Ino Nshiinshi Baibo Nshoyaamba?

Nsengwe yoonse, bantu baanji batoopenga ceebo ca mfula inene itonyonyoola shintu. Amunyumfwe malipooti atokonkelaawo:

“Kuswa Pacibelu kushika Pacitatu, mu tauni inene yamu China mwakaloka mfula inene abuumbi itana kulokawo kale kwamyaaka 140 yainda.”—AP News, August 2, 2023.
“Pacinayi bwakalinga mbushiku bwabili imfula yacipuupu yakalinga kwiitwa ayi Typhoon Khanun ndyeyakaloka abuumbi akuleta muuwo unene kulubasu lwakumalenge lwa Japan, akucaya bantu bobilo. . . . Citoboneka kwaamba ayi cipuupu ici cilaakupa kwaamba ayi ku central Taiwan kukaloke mfula inene abuumbi.”—Deutsche Welle, August 3, 2023.
“Pacibelu a Pasondo, mu Nova Scotia ku Canada mwakalinga maanshi aanji abuumbi ceebo ca mfula inene yakaloka kufwiifwi alweenge lwa Atlantic. Alimwi mu Canada tamuna kulokawo kale mfula inene yamushobo uyu kwamyaaka 50 yainda.”—BBC News, July 24, 2023.

Ino nshiinshi Baibo nshoyaamba pashintu mbuli sheeshi shitocitika?

Citondesho ca “nshiku shakweelaako”

Baibo ilaamba ayi tutokala muciindi ciitwa ayi ‘inshiku shakweelaako.’ (2 Timoti 3:1) Yesu wakaambila limwi ayi muciindi ncetutokalaamo, tulaakunobona “shintu shiloondesha.” (Luka 21:11) Kwaaluka kwa mbokuca nkokutolengesha bunene ayi kunoocitika shintu shiinji shiloondesha alimwi shinene cakuteengashila.

Sheenga shatupa kulangila

Baibo ilatulwiita ayi shintu shiinji shilondesha shitoocitika pacishi shilyeelete kutupa kulangila. Ino nceebonshi? Yesu wakaamba ayi: ‘Na mukabone shintu ishi kashicitika, mukeshibe kwaamba ayi Bwaami bwakwe Lesa buli pafwiifwi.’—Luka 21:31; Mateyo 24:3.

Shintu shitoocitika nshetutoobona shilatondesha ayi conoonobo Bwaami bwakwe Lesa bulaakupa kwaamba ayi shintu shilicitikila pacishi shicileeke kucitika, kwiilikaawo amapensho esa ceebo ca mfula ya cipuupu.—Jobo 36:27, 28; Kulumbaisha 107:29.

Kwaamba ayi mushibe shiinji Bwaami bwakwe Lesa nsheshi bukacite kwaamba ayi bumane mapensho alicitikila pacishi, amubelenge mutwi waamba ayi “Ino Ngani Weshi Akapulushe Cishi?”