Ino Likoto Litanjilila lya Bakamboni Bakwe Yehova Nciinshi?

Likoto Litanjilila nkakoto kaniini ka Beneklistu bashimpite lwakumushimu abo bapa butanjilishi ku Bakamboni Bakwe Yehova nsengwe yoonse. Incito yabo ilicite mbasu shobilo.

• Balatanjilila ncito yakupa butanjilishi bwamu Baibo kwiinda mu mabuku, mabungano, alimwi ashikolo sha Bakamboni bakwe Yehova.​—Luka 12:42.

• Balatanjilila ncito ya Bakamboni Bakwe Yehova icitwa nsengwe yoonse kwiinda mukupa butanjilishi bwaamba pakushimikila kubantu baanji alimwi abwakusebensesha shabupe bantu nshebapa.

Bamu Likoto Litanjilila balakonkela cakubonenaako ca ‘batumwi abamanene mu Jelusalemu,’ bamuciindi ca Beneklistu bakutaanguna abo bakalinga kupa butanjilishi pamakani ayandika kumabungano oonse a Beneklistu. (Milimo 15:2) Bweenka mbuli basankwa abo bashomeka, bamu Likoto Litanjilila teshi bamatanjilili ba libunga lyesu. Balalangoola butanjilishi kuswa mu Baibo, alimwi baleebaluka ayi Yehova Lesa wakasala Yesu Klistu kuba Mutwi walibungano.​—1 Bene Kolinto 11:3; Bene Efeso 5:23.

Ino mbaani bali mu Likoto Litanjilila?

Bamu Likoto Litanjilila mba Kenneth Cook, Jr., ba Gage Fleegle, ba Samuel Herd, ba Geoffrey Jackson, ba Jody Jedele, ba Stephen Lett, ba Gerrit Lösch, ba Jacob Rumph, ba Mark Sanderson, ba David Splane, aba Jeffrey Winder. Balasebensela ku maofesi esu anene ku Warwick mu New York, ku U.S.A.

Ino Likoto Litanjilila lilibambitwe buyani?

Likoto Litanjilila lyakapanga makomiti ali 6 kwaamba ayi anolanga pa mbasu shipusenepusene sha ncito yesu, alimwi womwi awomwi wa bamu Likoto litanjilila alasebensela mu komiti yomwi na kwiindaawo.

• Komiti ya Beshikubunganya: Ilalanga pamakani asha milawo alimwi akucafwilisha na kwacitika mapensho alicitikila, na kwacitika cintu ceenga capa kwaamba ayi Bakamboni Bakwe Yehova bapenshekwe pamakani anshebashoma, alimwi a na kwabuka makani akutengashila eenga akuma Bakamboni Bakwe Yehova.

• Komiti Ilanga pa Basebenshi: Ilalanga pabubaambo bwa baabo basebensela pa Bethel.

• Komiti Ilanga Pamakani Akupulinta: Ilalanga pamakani akupulinta mabuku aamba shamu Baibo akwaatola kumisena nkwatoyandika, kuyaka misena nkotubunganina, maofesi abasansulushi alimwi amaofesi amisampi.

• Komiti ya Ncito: Ilalanga pancito yesu yakushimikila ‘makani abotu a Bwaami.’​—Mateyo 24:14.

• Komiti ya Kwiisha: Ilatanjilila bubaambo bwakubaamba shakulya shakumushimu nshotwiiya kwiinda mumabungano, mushikolo, maswi akalekodwa alimwi a mumavidyo.

• Komiti ya Kulemba: Ilatanjilila bubaambo bwakubaamba shakulya shakumushimu nshotutambula kwiinda mumabuku akupulinta, pa webusaiti yesu alimwi akulanga pancito yabusansulushi.

Kwiilika pancito njobasebensa mu makomiti aya, nsondo ansondo bamu Likoto Litanjilila balabungana kwaamba ayi babandike shitoyandika mulibunga. Na babungana, bamu Likoto Litanjilila balabandika Malembo nshaamba alimwi balasuminisha mushimu usalashi wakwe Lesa kwaamba ayi ubatanjilile akusalawo kucita comwi.​—Milimo 15:25.

Ino mbaani beshikucafwilisha Likoto Litanjilila?

Mbeneklistu bashomeka bacafwilisha makomiti a Likoto Litanjilila. (1 Bene Kolinto 4:2) Balicite nkusu alushibo lwakusebensa ncito isebensa komiti mobasebensela alimwi balacanikaako kukubungana kwa komiti mobabete kubaako nsondo ansondo. Nabi kwaamba ayi tabaabanimo lubasu mukusala nshotucita mulibunga, beshikucafwilisha balaamba miyeeyo alimwi amakani oonse eenga acafwa bamu Likoto Litanjilila. Kwiilikaawo, balashinisha kwaamba ayi shasalwa kucitwa mukomiti mobabete shakumanishikwa akunoobona na nshobasala shitoswitilila. Alimwi mpashi inga bapekwa ncito kuba mu Likoto Litanjilila yakufwakashila bamakwesu mushishi shipusenepusene na kupekwa lubasu pa shakucitika mbuli kubungana kwa pamwaaka nabi pakumanisha Cikolo ca Gilyadi.