Ino Nceebonshi Bakamboni Bakwe Yehova Tabasekeleliko Maolide Amwi?

• Ino Bakamboni Bakwe Yehova balashiba buyani na inga basekelelako olide imwi nabi sobwe?

• Sa Bakamboni Bakwe Yehova baliisuni mikwashi yabo nabi kwaamba ayi tabasekeleliko maolide amwi?

• Sa Bakamboni Bakwe Yehova balakasha bantu kusekelelako maolide amwi?

Ino Bakamboni Bakwe Yehova balashiba buyani na inga basekelelako olide imwi nabi sobwe?

Bakamboni Bakwe Yehova kabatana kusalawo na inga basekelelako olide imwi nabi sobwe, balataanguna kubona Baibo nshoyaamba. Maolide amwi ashakusekelela shimwi bantu nshobacita, shilipusene abuumbi a Baibo nshoyaamba. Na caba boobo, Bakamboni Bakwe Yehova tabasekeleliko maolide alimwi ashakusekelela shamushobo uyo. Sombi maolide amwi, Kamboni womwi awomwi alyeelete kulisalila mwiine na inga waabanamo lubasu, ndyaatokweelesha “kwikala buumi bubotu pameenso akwe Lesa alimwi abantu.”​—Milimo 24:16.

Miipusho itokonkelaawo njimiipusho imwi Bakamboni Bakwe Yehova njobaliipusha kabatana kusalawo na inga basekelelako olide imwi nabi sobwe.a

• Sa olide iyi ilipusene a Baibo nshoyaamba?

  Njiisho yamu Baibo: “Amuswe pakati ka bakunsengwe, mwikale amwebo nweenka. Mutacati cintu citasalalite.”​—2 Bene Kolinto 6:15-17.

  Bakamboni Bakwe Yehova tabeeleshi nabibo paniini kwaabanamo lubasu mushintu shitasalalite alimwi shipusene a Baibo nshoyaamba. Ncoceeco tabasekeleliko maolide mwiilikitwe shitokonkelaawo.

  Maolide akaswa kunjiisho shakubeca na kubaabo bakalinga kupaila balesa bakubeca. Yesu wakaamba ayi: ‘Ulyeelete kulambilabo Yehova Lesa wako alimwi akusebenselabo nguwe.’ (Mateyo 4:10) Ceebo cakwaamba ayi Bakamboni Bakwe Yehova balakonkela Baibo nshoyaamba palilembo ili, tabasekeleliko Kilisimasi, Isita, alimwi abushiku bwakutaanguna mu mweenshi wa May bantu mbobeeta ayi May Day, mukwiinga kusekelela koonse uku kuleelikaawo kupaila balesa bamwi muciindi cakupaila Yehova eenkabo. Alimwi tabasekeleliko maolide mbuli aaya atokonkelaawo.

  • Kwanzaa. Libuku lyaamba ayi Encyclopedia of Black Studies lyakaamba ayi liswi lya Kwanzaa “lyakaswa ku maswi amu ciSwahili akwaamba ayi matunda ya kwanza, ayo asansulula ayi ‘shisepo shakutaanguna.’ Ici cilatondesha ayi olide iyi yakaswa ku shakusekelela shakalinga kubaako kale kale mu Africa na bantu batebula shishango shakutaanguna.” Nabi kwaamba ayi bamwi balabona anga kusekelela Kwanzaa takukumite ku shabupailishi, libuku lya Encyclopedia of African Religion lyakakoshanisha kusekelela Kwanzaa kukusekelela kwamu Africa uko bantu nkobacita na batebula shishango. Mukusekelela uko bantu balapa milambu ya kutondesha kulumba ku balesa babo akubamashali babo bakulukulu. Kwanzaa bantu bashiya baku America njobasekelela, ayalo yakaswa kukusekelela kwa mushobo uyu kwakupa shipo kubamashali babo bakulukulu akubalesa babo kwaamba ayi batondeshe kulumba.

    

  • Mid-Autumn Festival. Libuku limwi lyaamba pakusekelela uku kubako mu September nabi mu October, lyakaamba ayi “nkusekelela bantu nkobalumba lesa mwanakashi wa mweenshi.” (Holidays, Festivals, and Celebrations of the World Dictionary) Libuku limwi alyalo lilaamba ayi “bantu ndyebatosekelela olide iyi, banakashi balafukama kunembo lyakwe lesa mwanakashi.”​—Religions of the World—A Comprehensive Encyclopedia of Beliefs and Practices.

  • Thanksgiving (Kulumba). Bweenka mbuli kusekelela kwa Kwanzaa, olide iyi ayalo yakaswa kukusekelela kwakalinga kubaako kale kale bantu nkobakalinga kulemeka balesa bapusenepusene pesule lya kutebula. Mukuya kwaciindi, “maceeci a Beneklistu akatalika kunosekelela olide iyi yakale kale.”​—A Great and Godly Adventure—The Pilgrims and the Myth of the First Thanksgiving.

  Maolide muba shakulambila mishimu nabi kushoma mucoolwe. Baibo ilaamba ayi abo boonse ‘babambila tebulu lesa wa Coolwe’ balaba pabantu ‘bafutatila Yehova.’ (Isaya 65:11) Aboobo Bakamboni Bakwe Yehova tabasekeleliko maolide atokonkelaawo:

  • Kusekelela Mwaaka. Libuku limwi lilaamba pakusekelela mwaaka upya ayi “bantu basunishishi kusekana akunwa liinji balalya shakulya nshobabona ayi inga shabapa kuba acoolwe mumwaaka upya. Ndyebatosekelela mwaaka upya, balaamba nshobasuni kukumanisha mumwaaka uyo. Nshobacita shakatalikila mu Babiloni umo bantu mobakalinga kushomesha shintu shimwi kwaamba ayi bapekwe shoolwe ku balesa babo.”

  • Kusekelela Mwaaka Upya kwa Bantu Baku China (Chinese New Year nabi Korean New Year). Libuku lya Mooncakes and Hungry Ghosts—Festivals of China lilaamba ayi “paciindi ici mumwaaka, beshicibusa abamumukwashi, balacita shoonse nsheenga bacikonsha kwaamba ayi bakabe ashintu shibotu mumwaaka uyo upya. Balalemeka mishimu abalesa babo alimwi balalangila kuba ashintu shibotu mumwaaka uyo.” Libuku lya Encyclopedia of New Year’s Holidays Worldwide lilaamba ayi bantu baku Korea abalo mbobasekelela Mwaaka Upya. Lilaamba ayi: “Pakusekelela balapaila bamashali babo bakulukulu, kupaila mishimu kwaamba ayi batande mishimu ibiibi akwaamba ayi bakabe ashintu shibotu mumwaaka uyo. Alimwi balasonda kwaamba ayi bashibe shintu mbweshi shikabe mumwaaka uyo upya.”

  Maolide akaswa kunjiisho yakwaamba ayi muuya ulatolelela kubaako na muntu wafwa. Baibo ilaamba cakuteenda mweela ayi na muntu wafwa, taatoleleli kuba abuumi kumusena umwi. (Esekelo 18:4) Aboobo Bakamboni Bakwe Yehova tabasekeleliko maolide atokonkelaawo, ayo ayuminisha njiisho yakwaamba ayi muuya taufwiiwo:

  • All Souls’ Day (Bushiku bwa Bafu). Kweelana alibuku lya New Catholic Encyclopedia mbolyaamba, ubu “mbushiku bwakwiibaluka akulemeka bantu boonse bakafwa abo bakalinga kushomeka. Kuswa mu 500 C.E kushika mu 1500 C.E, bantu bakalinga kushoma ayi pabushiku ubu, mishimu ya bafu iyo yakalinga kupenga kaitana kuya kwiculu ceebo ca shintu shibiibi bantu abo nshobakacita kabatana kufwa, yakalinga kusita mushibanda, baloshi, babombwe alimwi akwiinda mushintu shimwi. Alimwi yakalinga kukonka bantu boomi, abo bakakalashawo bafu kabatana kufwa.”

  • Qingming Festival (Ch’ing Ming) alimwi a Hungry Ghost Festival. Bantu balacita kusekelela uku kobilo kwaamba ayi balemeke bamashali babo bakulukulu bakafwa. Libuku lya Celebrating Life Customs Around the World​—From Baby Showers to Funerals lilaamba ayi pabushiku bwa kusekelela Ch’ing Ming, bantu balatola shakulya, maanshi alimwi amaali kumaanda na kumusena nkobakabika bamashali babo bakulukulu kwaamba ayi batanonyumfwa nsala a nyotwa. Maali balataanguna kwaatenta kabatana kwaatola. Alimwi libuku ili lilaamba ayi pakusekelela kwa Hungry Ghost, bunene bunene pa bushiku mweenshi ndyeubulungana, bafu ndyebabona bunene bantu boomi nshobatoocita. Aboobo pabushiku ubu, bantu balabalemeka abuumbi bafu kwiilikaawo abamashali babo bakulukulu bakafwa, kwaamba ayi batabakalashi.

  Maolide muba shamasalamushi. Baibo ilaamba ayi: “Kutabi muntu uli woonse pakati kanu . . . muŋanga, shimasalamushi, shikusonda, muloshi, muntu wiipusha makani kubaŋanga, beshimaloto, na muntu wiipusha makani kubafu. Mukwiinga Yehova alipatite muntu woonse ucita shintu ishi shilensha bunya.’ (Dutolonomi 18:10-12) Bakamboni Bakwe Yehova tabasekeleliko olide ya Halloween mukwiinga tabasuni kwaabanamo lubasu mu shamasalamushi alimwi akubaabo baamba shakunembo. Alimwi tabasekeleliko maolide atokonkelaawo:

  • Sinhala and Tamil New Year. “Bantu nshobacita pakusekelela uku shileelikaawo akucita shintu shimwi paciindi ncobakasala beshikubona bweende bwa nyenyeenshi, isho nshobayeeya ayi shilaakubapa shoolwe.”​—Encyclopedia of Sri Lanka.

  • Songkran. Liina lya kusekelela uku bantu baku Asia nkobabaako, lyakaswa kuliswi lisansulula ayi ‘kusena’ na ‘kwaaluka.’ Pabushiku ubu balalya ashakulya alimwi baamba shakunembo balasekelela olide iyi na lisuba lyasenena mulikoto lya nyenyeenshi liitwa ayi zodiacal constellation.​—Food, Feasts, and Faith​—An Encyclopedia of Food Culture in World Religions.

  Kusekelela bantu nkobabaako ceebo ca kukonkela Milawo yakwe Mose nabi kwaamba ayi Milawo iyo yakacileka kusebensa Yesu ndyakaaba buumi bwakwe mbuli mulambu. Baibo ilaamba ayi: “Klistu ngowakamanisha nkusu sha Milawo.” (Bene Loma 10:4) Beneklistu balakonkela njiisho shili mu Milawo yakwe Mose iyo Yehova njaakapa bene Isilaeli. Nacibi boobo, tabaabanimo lubasu mukusekelela kwaambwa mu milawo iyi, bunene bunene kusekelela kwaamba pakusa kwakwe Mesiya, mukwiinga balashoma ayi wakesa kale. Baibo ilaamba ayi: “Shoonse ishi shintu nshimfulebo sha sheesho shancinencine shili kunembo. Sombi shancinencine isho, ngu Klistu.” (Bene Kolose 2:17) Ici ncocipa kwaamba ayi Bakamboni Bakwe Yehova batanokwaabanamo lubasu mukusekelela uko, alimwi pakusekelela uko bantu balacita ashintu shimwi shatakalingaamo mu Milawo yakwe Mose. Bakamboni Bakwe Yehova tabasekeleliko maolide atokonkelaawo:

  • Hanukkah. Bakalinga kucita kusekelela uku kwaamba ayi banookwiibaluka kwaabwa cipya kwa tempele ya baJuda kuli Yehova, mu Jelusalemu. Sombi Baibo ilaamba ayi Yesu wakaba Mupailishi Munene mu tente na tempele inene isalalite iyo ‘itakwe kuyakwa abantu alimwi iteshi ya mucishi ca panshi.’ (Bene Ebulu 9:11) Aboobo Beneklistu balashoma ayi tempele yakumushimu yakapyana tempele yakalinga yayakwa mu Jelusalemu.

  • Rosh Hashanah. Ubu mbushiku bwakutaanguna mu kalenda ya baJuda. Kale kale, pakusekelela uku bantu bakalinga kubenga amilambu kuli Lesa. (Shakubelenga 29:1-6) Nacibi boobo, ceebo cakwaamba ayi Yesu Klistu ngu Mesiya, wakapa kwaamba ayi ‘kubenga milambu akupa shipo kumane.’ Aboobo pacecino ciindi tatuyandiki kupa milandu yashinyama kuli Lesa.​—Danyelo 9:26, 27.

• Sa olide iyo ilayuminisha bantu bamubupailishi bupusene kupailila pomwi?

  Njiisho yamu Baibo: “Ino ono mushomi inga weendelana buyani autashomi? Ncipanganonshi ceenga caba pakati ka Ŋanda yakwe Lesa ashibumbwabumbwa?”​—2 Bene Kolinto 6:15-17.

  Nabi kwaamba ayi Bakamboni Bakwe Yehova baleelesha kukala muluumuno abeshikamukobonyinaabo alimwi tabakakatishi muntu uli woonse kushoma nshobashoma, tabaabanimo lubasu mu shakusekelela shiyuminisha bantu bamubupailishi bupusene kupailila pomwi, mbuli shitokonkelaawo.

  Kusekelela bamu maceeci nkobabaako kwa kulumbaisha muntu nabi kwa kuyuminisha bupailishi bupusenepusene kupailila pomwi. Lesa ndyaakatanjilila bantu bakwe kuya mucishi ncaakabashomesha, wakabalwiita nshobakalinga kweelete kucita na bacana ayi bantu bamucishi ico balapaila balesa bamwi. Wakabalwiita ayi: “Mutakapangi cipangano ambabo nabi abalesa babo. . . . Kulambila balesa babo, kulaakuba koose keshi kakamuletele lufu.” (Kulonga 23:32, 33) Aboobo Bakamboni Bakwe Yehova tabasekeleliko maolide mbuli atokonkelaawo.

• Bushiku Bantu Mucishi Mbobasenga Kulekelelwa Kuli Lesa (National Repentance Day). Umwi wa mumfulumeende uyo ngobakaambawo mu nyusipepa ya The National, a Papua New Guinean, wakaamba ayi bantu basekelela bushiku ubu “balashoma Beneklistu nshobashoma.” Alimwi wakaamba ayi “kusekelela bushiku ubu kulapa kwaamba ayi bantu mucishi babe amibo Beneklistu njobeelete kubaayo.”

• Vesak. Kweelana abupailishi bwaci Buddha, ubu mbobushiku busalalite abuumbi panshiku shabo shoonse. Libuku lya Festivals, and Celebrations of the World Dictionary lyakaamba ayi ubu mbobushiku mbobakalinga kusekelela Buddha ndyaakashalwa, mbwaakasebensa, ndyaakafwa, kwiilikaawo akusekelela ayi taakwe kushalilwa mucintu cimwi ndyaakafwa.

Kusekelela kumwi nabi tunshiyanshiya beshibupailishi ntobakonkela sombi tutamo mu Baibo. Yesu wakalwiita bamatanjilili babupailishi ayi: “Mulaubya maswi akwe Lesa ceebo ca milawo yanu ya bakulukulu.” Alimwi wakabalwiita ayi kulambila kwabo taakuwo mbokwakalinga mukwiinga bakalinga kwiisha “milawo ipangabo bantu anga njemilawo yakwe Lesa!” (Mateyo 15:6, 9) Ceebo cakwaamba ayi Bakamboni Bakwe Yehova balakonkela maswi aya Yesu ngakaamba, tabaabanimo lubasu mu kusekelela kuunji beshibupailishi nkobabaako.

• Epiphany (Three Kings’ Day, Timkat, na Los Reyes Magos). Pakusekelela uku, bantu balasekelela beshikubona bweende bwa nyenyeenshi abo bakaya mukubona Yesu ndyaakashalwa, nabi kubombekwa kwakwe. Pa kusekelela bantu bateshi Beneklistu nkobakalinga kubaako uko kwakalinga kwiilikaawo akulemeka balesa ba maanshi, shishiba amilonga, bakatalika kunoocita ashintu Beneklistu nsheenga basekelelako. (The Christmas Encyclopedia) Kusekelela kumwi kukoshenye akooku balakwiita ayi Timkat. Mukusekelela uku amwalo muli tunshiyanshiya tuunji.​—Encyclopedia of Society and Culture in the Ancient World.

• Kusekelela kwa kuya kwiculu kwakwe Maliya mbuli mooye. Libuku lya Religion and Society​—Encyclopedia of Fundamentalism lilaamba ayi bantu bacita kusekelela uku balashoma ayi Maliya banyina Yesu, wakaya kwiculu amubili wa buntu. Nacibi boobo, Beneklistu bakalingaako muciindi ca batumwi tabakalinga kuishiiwo njiisho iyi alimwi taakuwo Baibo mpoitondesha ayi ici cakacitika.

• Kusekelela kuba muntu umaninite kwakwe Maliya ndyaakamita. Libuku lya New Catholic Encyclopedia lilaamba ayi, “Baibo tayaambiwo ayi Maliya wakaba muntu umaninite ndyaakamita . . . Iyi ni njiishobo bamubupailishi njobaiisha.”

• Lent. Bushiku bantu mbobasekelela Lent bulaba mbushiku bwa kwaana akulikasha kulya. Kweelana alibuku lya New Catholic Encyclopedia mbolyaamba, bantu bakatalika kusekelela Lent “mumyaaka yamu 300 C.E,” kapali peenda kale myaaka 200 kuswa ciindi Baibo ndyeyakamana kulembwa. Libuku ili lyakeelikaawo akwaamba ayi pabushiku bwakutaanguna bwa kusekelela Lent, “bapailishi balalemba mucilingano pankumo sha bantu babo kusebensesha milota. Kucita boobo kulabeebalusha ayi balyeelete kwaana. Ba Katolika bakatalika kucita kusekelela uku mumwaaka wa 1091.”

• Sa olide iyo ilalemeka bunene muntu, kabunga na shintu shimwi shiimikaninaako cishi?

  Njiisho yamu Baibo: ‘Yehova waamba ayi: ‘Ulishingenwe uyo ucinka manungo mumuntunyina, ee, uyo ushoma mumuntubo ayi inga wamucafwa, ncakwiila uyo ufutatila Yehova.’’​—Jelemiya 17:5.

  Nabi kwaamba ayi Bakamboni Bakwe Yehova balalumba pashintu bamwi nshobacita alimwi balabapaililaako, tabaabanimo lubasu mu shakusekelela shitokonkelaawo:

  Maolide alemeka mweendeleshi na muntu umwi. Baibo ilaamba ayi: “Amucileeke kucinka manungo mumuntu ufwa. Muntu taaku mbwaabete, ino inga wamucafwa buyani?” (Isaya 2:22) Aboobo kweelana anjiisho iyi, Bakamboni Bakwe Yehova tabaabanimo lubasu mushakusekelela mbuli kusekelela bushiku bwakushalwa kwa mweendeleshi.

  Kusekelela fulagi ya cishi. Bakamboni Bakwe Yehova tabasekeleliko Flag Day. Ino nceebonshi? Mukwiinga Baibo ilaamba ayi: “Mutanoolambila shibumbwabumbwa.” (1 Joni 5:21) Bantu bamwi munshiku shino tababoniiwo ayi fulagi nkabumbwabumbwa. Nacibi boobo, muntu umwi wakeeya makani akale kale waliina lya Carlton J. H. Hayes wakaamba ayi: “Cintu cinene citondesha ayi muntu alicisuni abuumbi cishi mwaakala alimwi cisebenseshekwa pakupaila, ni fulagi.”

  Maolide na shakusekelela bantu mobapaila bantu mbobabona ayi balisalalite. Ino nshiinshi shakacitika musankwa umwi wakalinga kuloonda Lesa ndyaakafukama kwaamba ayi apaile mutumwi Pita? Baibo ilaamba ayi: “Pita wakamukasha kufukama. Wakamwaambila ayi, ‘Nyamuka, anebo ndimuntu bweenka mbuli ndiwe.’” (Milimo 10:25, 26) Ceebo cakwaamba ayi Pita abatumwi bamwi boonse bakakaka kupekwa bulemu bwinditeewo na kulambilwa, Bakamboni Bakwe Yehova tabaabanimo lubasu mu shakusekelela shakulemeka bantu bamwi babonwa ayi balisalalite, mbuli shitokonkelaawo:

  • All Saints’ Day. “Ubu mbushiku bwakulemeka bantu bamwi mbobabona ayi balisalalite, sombi kwakaswa kusekelela uku takushibikitwe.”​—New Catholic Encyclopedia.

  • Fiesta of Our Lady of Guadalupe. Uku nkusekelela bantu baku Mexico nkobabaako kwaamba ayi beebaluke mwanakashi ngobakalinga kubona ayi alisalalite alimwi ayi ngowakalinga banyina Yesu. Bantu bamwi balaamba ayi mwanakashi uyo wakaboneka munshila ya caankamiko mu 1531, ku mwanakashi umwi wakalinga mukandu.​—The Greenwood Encyclopedia of Latino Literature.

  • Bushiku mbobatumba liina (Name Day). Libuku limwi lilaamba ayi, “Pabushiku ubu, mwaana washalwa ndyebamutumba liina lya muntu umwi ngobakalinga kubona ayi alisalalite. Balamutumba liina ilyo pa kumubombeka kaali kateta nabi pakusekelela kubaako na watondesha ayi alashoma njiisho sha muceeci iyo.” Libuku ilyo lyakeelikaawo akwaamba ayi “pabushiku ubu bantu balacita shintu sheendelana ashabupailishi.”​—Celebrating Life Customs Around the World​—From Baby Showers to Funerals.

  Kusekelela kwa tubunga twa mapolitiki na kwa kwaalula shintu mucishi. Baibo ilaamba ayi: ‘Ncibotu kuyuba muli Yehova, kwiinda kucinka manungo mumuntu.’ (Kulumbaisha 118:8, 9) Bakamboni Bakwe Yehova tabasekeleliko Youth Day na Women’s Day mukwiinga balashoma ayi Lesa ngweshi akamane mapensho mucishi kuteshi bantu. Alimwi ici ncocipa kwaamba ayi batanokwaabanamo lubasu mukusekelela bushiku shishi shimwi ndyeshakasalawo kucileka kutola bantu mubusha (Emancipation Day) na kusekelela kumwi kukoshenye akooku. Balashoma ayi Bwaami bwakwe Lesa bweenkabo mbweshi bukamane kasalulushi ka mishobo akuleta bululami.​—Bene Loma 2:11; 8:21.

• Sa olide iyo ilapa kwaamba ayi cishi cimwi na mushobo umwi uboneke anga ulayandika kwiinda imwi?

  Njiisho yamu Baibo: ‘Lesa taasalululi, sombi alatambula muntu wa mushobo uli woonse umuloonda akucita shiluleme.’​—Milimo 10:34, 35.

  Nabi kwaamba ayi Bakamboni Bakwe Yehova baanji balicisuni cishi mobakala, tabaabanimo lubasu mukusekelela kupa kwaamba ayi cishi cimwi na mushobo umwi uboneke anga ulayandika kwiinda umwi mbuli mushakusekelela shitokonkelaawo.

  

  Kusekelela kwa kulumbaisha basoja. Muciindi cakuyuminisha nkoondo, Yesu wakalwiita bashikwiiya bakwe ayi: “Amusune balwani banu akubapaililaako abo bamupensha.” (Mateyo 5:44) Aboobo Bakamboni Bakwe Yehova tabasekeleliko maolide alemeka basoja, kwiilikaawo amaolide atokonkelaawo:

  • Anzac Day. “Anzac ileemikaninaako Australian and New Zealand Army Corps. Mukuya kwaciindi, bushiku bwa Anzac bwakaba bushiku bwakwiibaluka baabo bakacaikwa munkoondo.”​—Historical Dictionary of Australia.

  • Veterans Day (Remembrance Day, Remembrance Sunday, or Memorial Day). Maolide aya nga kulemeka “bacinenenene bakalinga basoja abaabo bakacaikwa munkoondo cishi cabo ndyecakalinga kulwana.”​—Encyclopædia Britannica.

  Kusekelela shakacitika mucishi na bushiku cishi ndyecakaba alwaanguluko. Yesu wakaamba pa bashikwiiya bakwe ayi: “Tabeshi bamucishi ca panshi bweenka anebo mboonteshi wamucishi.” (Joni 17:16) Nabi kwaamba ayi Bakamboni Bakwe Yehova balasuna kushiba makani aamba pashakacitika mucishi mobakala, tabasekeleliko maolide mbuli aaya atokonkelaawo:

  • Australia Day. Kweelana alibuku lya Worldmark Encyclopedia of Cultures and Daily Life mbolyaamba, bantu balasekelela olide ayi kwaamba ayi “beebaluke bushiku bumwi mu 1788 musoja umwi waku England ndyaakanyamuna fulagi ya cishi ca Australia akwaamba ayi cishi ici cinanolyeendelesha.”

  • Kusekelela bushiku cishi ndyecakaba alwaanguluko (Independence Day). Dikishonali imwi yakaamba ayi “ubu mbushiku bantu mbobasala kwaamba ayi banookwiibaluka cishi cabo ndyecakaba alwaanguluko.”​—Merriam-Webster’s Unabridged Dictionary.

• Sa bantu ndyebatosekelela olide iyo balacita shintu shibiibi?

  Njiisho yamu Baibo: ‘Mukwiinga kale kale mwakalinga kucite ciindi cinene cakucita shintu shisuni kucita bakunsengwe. Mwakalinga kwikala buumi bwakutalilemeka, lunkumbwa, bucakolwa, kusekelela kwa bufuule, kusekelela kwakukolwa alimwi akulambila shibumbwabumbwa kutasuminishikwi.’​—1 Pita 4:3.

  Kweelana anjiisho iyi, Bakamboni Bakwe Yehova tabaabanimo lubasu mukusekelela bantu mobanwa bwalwa cakwiindilisha akusekelela bantu mobacita shintu shitabete kabotu. Bakamboni Bakwe Yehova balasangalala kuba pomwi abeshicibusa babo alimwi na kabasuni balasalawo kunwa bwalwa, sombi cakuteendilisha. Baleelesha cankusu kukonkela njiisho yamu Baibo yaamba ayi: ‘Kulilabo ncemutoocita, kulya nabi kunwa, amulemeke Lesa mushintu shoonse nshemutoocita.’​—1 Bene Kolinto 10:31.

  Aboobo Bakamboni Bakwe Yehova tabaabanimo lubasu mushakusekelela shiteendelani a Baibo nshoyaamba shiyuminisha kutalilemeka amibo Lesa njaapatite. Ici cileelikaawo akusekelela kwa baJuda nkobeeta ayi Purim. Libuku lya Essential Judaism lyakaamba ayi kale kale bakalinga kucita kusekelela kwa Purim kwiibaluka baJuda mbobakalubulwa mu 400 B.C.E. Pacecino ciindi kusekelela uku “kulikoshenye akusekelela nkobeeta ayi Mardi Gras or Carnival.” Baanji ndyebatoocita kusekelela uku, “basankwa balafwala shakufwala sha banakashi, kunwa cakwiindilisha akuyobela abuumbi.”

Sa Bakamboni Bakwe Yehova baliisuni mikwashi yabo nabi kwaamba ayi tabasekeleliko maolide amwi?

Ee. Baibo ilaiisha bantu kusuna akulemeka bamumukwashi wabo boonse teshi mulandu anshobashoma. (1 Pita 3:1, 2, 7) Kwalo, na Kamboni Wakwe Yehova wacileka kwaabanamo lubasu mushakusekelela shimwi, beshikamukowa bakwe inga bakalala, kucimwa na kulinyumfwa ayi wabapondokela. Aboobo Bakamboni Bakwe Yehova baanji balalwiita beshikamukowa babo ayi balibasuni, kubasansulwita kabotu shipa kwaamba ayi batanosekelelako maolide amwi lyalo akunobafwakashila munshiku shimwi ndyekutaaku shakusekelela.

Sa Bakamboni Bakwe Yehova balakasha bantu kusekelelako maolide amwi?

Sobwe. Balicishi kwaamba ayi muntu womwi awomwi alyeelete kulisalila shakucita mwiine. (Joshuwa 24:15) Bakamboni Bakwe Yehova ‘balalemeka bantu boonse,’ teshi mulandu ankobapaila.​—1 Pita 2:17.