Yesu Mbwaakayiisha Bashikwiiya Bakwe Bwakupaila

Ba Falisi bakalinga kusuni kucita shintu kwaamba ayi bantu bababoone. Bakalinga kutondesha nkuumbu kwaamba ayi bamwi bababoone ayi balicite nkuumbu. Bakalinga kupaila mumisena mucanika bantu baanji kwaamba ayi boonse bababoone. Bafalisi bakalinga kulabilila mipailo ilaamfu akunoipaila lyoonse mumisena mobapailila baJuda, amunshila kwaamba ayi bantu babanyumfwe mbobatoopaila. Nceceeco bantu bakakankamana Yesu ndyakabalwiita ayi: ‘Mutanoopaila anga mba Falisi. Balabona anga Lesa alasangalala na kabapaila mipailo ilaamfu, sombi tasangalaliiwo.’ Mupailo ngumubandi pakati kanu a Yehova. Mutanooboshaawo maswi womwi awomwi. Yehova alisuni ayi munoomulwiita shili mumoyo.

‘Anu mbulya mbomweelete kupaila: ‘NoBeeshiwesu nomuli kwiculu, liina lyanu alisalashikwe. Abwise Bwaami bwanu. Kuyanda kwanu akucitwe panshi pano bweenka mbuli kwiculu.’’ Alimwi Yesu wakabaambila ayi balyeelete kupaila kwaamba ayi abape shakulya, abalekelele shibiibi, akupailila pashintu shimwi shibasukamika.

Yesu wakaamba ayi: ‘Mutacileeki kupaila. Amutolelele kusenga shintu shibotu kuli Ishiwanu, Yehova. Mushali uli woonse alasuna kupa mwanaakwe shintu shibotu. Na mwanaanu wasenga buledi, sa inga mwamupa libwe? Na wasenga nswi, sa inga mwamupa nsoka?’

Lyalo Yesu wakasansulula ncaakaambila bobulya ayi: ‘Na mwebo mulicishi kupa bana banu shipo shibotu, ino lakwe Ishiwanu Yehova, inga waalilwa buyani kumupa mushimu usalashi? Ncomweelete kucitabo nkumusenga.’ Sa awebo ulacita shintu Yesu nshaakaiisha? Ino nshintu nshi nshopaililaawo?