Likani lya Pakalundu

Pesule lya kusala batumwi bali 12, Yesu wakaseluka pakalundu akuya pakalinga kubungene bantu baanji. Bantu abo bakaswa ku Galili, ku Judeya, ku Taya, ku Sidoni, ku Silya, alimwi amumisena imwi yakalinga mweela Mulonga wa Joodani. Bakaleta bantu bakalinga balwashi abamwi bakalinga kupenshekwa ashibanda. Yesu wakaboolesha boonse. Lyalo wakekala kweela kwa kalundu akutalika kubeeisha. Wakaamba nshotweelete kucita na tulisuni kuba abushicibusa a Lesa. Tulyeelete kushiba ayi tulayandika Yehova alimwi akwiiya kumusuna. Sombi inga tatusuni Lesa na katutasuni bantu. Tulyeelete kucitila bantu boonse shintu shibotu, kwiilikaawo abalwani besu.

Yesu wakaamba ayi: ‘Tooelete kusunabo babyo. Ulyeelete kusuna balwani bako alimwi akunoolekelela bamwi kuswa panshi lya moyo. Na wakalasha muntu umwi, ulyeelete kufwambaana kuya mukulilekelela. Ulyeelete kucitila bamwi nshoosuni ayi abalo bakucitile.’

Yesu wakaamba makani ayandika ambobeelete kunoobona shintu shakumubili. Wakabalwiita ayi: ‘Ciyandika abuumbi nkuba abushicibusa buyumu a Yehova kwiinda kuba amaali aanji. Mwiipi inga weepa maali, sombi taakuwo weenga weepa bushicibusa bwako a Yehova. Utanoolisukama pa nsheshi ukalye, kunwa nabi kufwala. Langilisha tuyuni, Lesa alatupa shakulya shikwene lyoonse. Kulisukama inga takukupi kuba abuumi bulaamfu. Unokwiibaluka ayi, Yehova alishi nshoyandika.’

Bantu tabakwe kunyumfwawo kale muntu wakalinga kwiisha mbuli Yesu. Bamatanjilili babupailishi babo tabakwe kubeeishaawo kale makani amushobo uyu. Yesu wakalinga kucishi kwiisha kabotu abuumbi mukwiinga shoonse nshaakalinga kubeeisha shakaswa kuli Yehova.