Yesu Mbwaakasala Batumwi Bali 12

Pesule lyakwaamba ayi Yesu wasebensa ncito yakwe yakushimikila kwamwaaka womwi amyeenshi 6, wakalinga kuyandika kusala bakusebensaakwe. Ino mbaani mbaakalinga kusa mukunosebensaabo? Ino mbaani mbaakalinga kusa mukwiisha kwaamba ayi banotanjilila libungano lya Bwineklistu? Kwaamba ayi asale kabotu, Yesu wakalinga kuyandika butanjilishi bwakwe Yehova. Aboobo wakaya kukalundu kwaamba ayi abe eenka alimwi wakapaila mashiku woonse. Ndyebwakaca, Yesu wakeeta bashikwiiya bakwe bamwi, akusala batumwi bakwe bali 12. Sa ulibeshi meena abo? Meena abo ngu Pita, Andulu, Jemusi, Joni, Filipo, Batolomeyo, Tomasi, Mateyo, Jemusi mwanaakwe Alufeyasi, Tadeyasi, Simoni, alimwi a Judasi Isikalyoti.

Batumwi bali 12 bakalinga kuya aYesu kuli koonse nkweenga waya. Pesule lya kubaiisha, wakabatuma beenka kuya mukushimikila makani abotu. Yehova wakabapa nkusu shakukusha shibanda akushilika bantu balwashi.

Yesu wakalinga kwiita batumwi bali 12 ayi beshicibusa bakwe, alimwi wakalinga kubashoma. Bafalisi bakalinga kubona batumwi ayi mbantubo alimwi ayi tabakalinga kwiiteewo. Sombi Yesu wakabaiisha bwakusebensa kabotu incito yabo. Bakalinga kuyandika kuba pomwi a Yesu paciindi ciyandika abuumbi mubuumi bwakwe, nkokwaamba ayi paciindi kaatana kufwa apesule lyakubushikwa. Bweenka mbuli Yesu, batumwi bamwi pa bali 12 bakalinga bene Galili. Bamwi bakalinga kweebete.

Batumwi tabakalinga kumaninitewo alimwi bakalinga kucita shilubo. Cimwi ciindi bakalinga kwaamba kwakubula kuyeeya, kwaalilwa kusala kabotu, kwaalilwa kukalika moyo, akupikishanya pa wakalinga munene pakati kabo. Sombi bakalinga bantu bali kabotu basuni Yehova. Mbobakalinga bakutaanguna kuba mulibungano lya Bwineklistu Yesu ndyaakaboolela kwiculu.