Yesu Mbwaakacita Shaankamiko

Yesu wakesa pacishi mukushimikila makani abotu a Bwaami bwakwe Lesa. Kwaamba ayi Yesu atondeshe nshaakalinga kusa mukucita na akabe Mwaami, Yehova wakamupa mushimu usalashi kwaamba ayi anoocita shaankamiko. Wakalinga kushilika malwashi ali oonse. Kuli koonse nkwaakalinga kuya, bantu baanji bakalinga kuya kuli nguwe ayi abacaafwe, aboobo wakalinga kubashilika. Boofu, bakalinga kutalika kubona, bashinkite matwi bakalinga kutalika kunyumfwa, balema bakalinga kutalika kweenda, alimwi wakalinga kukusha shibanda mubantu. Nabi bacatabo cakufwala cakwe capeculu, bakalinga koola. Bantu bakalinga kukonkela Yesu kuli koonse nkwaakalinga kuya. Alimwi taakalinga kubatandaawo, nabi ndyaakalinga kusuni kuba eenka.

Paciindi cimwi, bantu bakaleta muntu umwi watakalinga kweenda muŋanda umo Yesu mwaakalinga kukala. Nacibi boobo, ŋanda iyo mwakalinga kuswite bantu cakwaamba ayi bakaalilwa kunjila. Aboobo bakatulula bulyango paciluli apo mpobakamunjishila kwaamba ayi bamushishe pakalinga Yesu. Lyalo Yesu wakaambila musankwa uyo ayi: ‘Nyamuka weende.’ Ndyaakatalika kweenda bantu boonse bakakankamana.

Paciindi cimwi, Yesu ndyaakalinga kunjila mumushi umwi wakacana basankwa bali 10 bakalinga balwashi manata na mankuntu, bakeemikana palaale akutalika koolobesha ayi: ‘Yesu tucafwe!’ Munshiku isho, beshimankuntu tabakalinga kusuminishikwa kuba pafwiifwi abantu batakalinga balwashi mankuntu. Yesu wakabalwiita ayi baye ku tempele mukwiinga mulawo wakwe Yehova wakalinga kwaamba ayi na muntu wakalinga mulwashi mankuntu lyalo woola, wakalinga kuyandika kuya ku tempele. Ndyebakalinga munshila bakoola. Womwi pabaabo ndyaakabona ayi woola wakaboolela kuli Yesu mukumulumba akulumbaisha Lesa. Womwibo pa basankwa 10 ngowakaya mukulumba Yesu.

Mwanakashi umwi wakalinga mulwashi kwamyaaka 12, wakalinga kusunishishi koola. Wakaya kwisule lyakwe Yesu kaali pa bantu baanji, akumucata kucakufwala capeculu. Peenkapo wakoola. Ndyeshakacitika ishi, Yesu wakeepusha ayi: “Ngani wancata?” Mwanakashi uyo wakaloonda abuumbi, sombi wakaya kuli Yesu akumulwiita cancine. Yesu wakamuyuminisha kwiinda mukwaamba ayi: ‘Mwanaangu koya muluumuno.’

Mutanjilili umwi wamu Sunagogi waliina lya Jailosi wakaya mukupaapaata kuli Yesu ayi: ‘Katiya ku ŋanda yangu! Mwanaangu mwanakashi waciswa abuumbi.’ Sombi Yesu kaatana kushika ku ŋanda yakwe Jailosi, mwaana uyo wakafwa. Yesu ndyaakashika wakacana bantu baanji kabalila pomwi amukwashi wakwe Jailosi. Yesu wakabalwiita ayi: ‘Amucileke kulila; mwaana woonabo.’ Lyalo wakacata mwaana uyo kulyaansa, akwaamba ayi: “Mwanike, buka!” Peenkaapo mwaana uyo wakabuka, lyalo Yesu wakalwiita bashali ba mwaana uyo ayi bamupe shakulya. Ino utoyeeya ayi bashali ba mwaana mwanakashi uyo bakalinyumfwa buyani?