Yesu Mbwaakashimikila Makani a Bwaami

Pesule lyakubombekwa, Yesu wakatalika kushimikila ayi: ‘Bwaami bwakwe Lesa bwasena pafwiifwi.’ Bashikwiiya bakwe bakalinga kumukonkela ndyaakalinga kuya mu Galili amu Judeya moonse. Yesu ndyaakaboolela ku Nasaleti, nkwaakalinga kukala, wakaya mu Sunagogi, akutalika kubelenga libuku lyakwe Isaya cakupoosha ayi: ‘Yehova wampa mushimu usalashi, kwaamba ayi nshimikile makani abotu.’ Ino wakalinga kusansulula nshi ndyakaamba maswi aya? Wakalinga kusansulula ayi nabi kwaamba ayi bantu bakalinga kusuni kubona Yesu kaacita shaankamiko, luyaando lunene ndwaakatambwiita mushimu usalashi, nkushimikila makani abotu. Lyalo wakalwiita bakalinga kumukutika ayi: ‘Bushinshimi ubu bwakumanishikwa sunu.’

Lyalo, Yesu wakaya ku Lweenge lwa Galili, uko nkwakacana bashikwiiya bakwe bali 4 bakalinga beshikucaya nswi. Wakabeeta akubalwiita ayi: “Amunkonkele, ndaakumupa nkusu shakuleta bantu kuli ndime bweenka mbomwalinga kucata nswi.” Bashikwiiya aba bakalinga Pita, Andulu, Jemusi a Joni. Peenkaapo bakacileka ncito yakucaya nswi, lyalo akumukonkela. Bakashimikila makani a Bwaami bwakwe Yehova mu Galili moonse. Bakashimikila mu masunagogi, mumamakeeti amunshila. Bantu baanji bakalinga kubakonkela kuli koonse. Makani aamba pali Yesu akashika mumisena yoonse, abantu bakalinga kukala ku Silya bakalinga kwaamba pali nguwe.

Mukuya kwaciindi, Yesu wakapako bashikwiiya bakwe nkusu sha kushilika akukusha shibanda. Bashikwiiya bakwe bamwi bakalinga kuyaakwe ndyaakalinga kushimikila mumisena yoonse. Banakashi bamwi bashomeka mbuli Maliya waku Magadala, Joana, Susana abamwi, bakalinga kulama Yesu abashikwiiya bakwe.

Pesule lya kwiisha bashikwiiya bakwe, Yesu wakabatuma kuya mukushimikila. Ndyebakalinga kushimikila mu Galili, bantu baanji bakaba bashikwiiya akubombekwa. Baanji bakalinga kusuni kuba bashikwiiya bakwe Yesu, nceceeco ncakaambila ayi bali anga ngumuunda usuni kutebulwa. Wakaamba ayi: ‘Amusenge Yehova kwaamba ayi atume basebenshi baanji, bakutebula.’ Lyalo wakasala bashikwiiya 70 akubatuma bobilo bobilo mukushimikila makani abotu mu Judeya. Bakaiisha bantu bapusenepusene pa Bwaami bwakwe Lesa. Ndyebakaboola, bakalinga kusunishishi kulwiita Yesu shakacitika ndyebakalinga kushimikila. Satana wakaalilwa kukasha ncito yakushimikila.

Yesu wakalwiita bashikwiiya bakwe ayi na akaboolele kwiculu bakatolele kusebensa ncito iyi iyandika abuumbi. Wakabalwiita ayi: ‘Munooshimikila makani abotu pacishi coonse. Munokwiisha bantu Maswi akwe Lesa akubabombeka.’