Bakatolelela Kushimikila

Musankwa watakalinga kucikonsha kweenda, bushiku abushiku wakalinga kukala pamulyango wa tempele kaasengelela. Bushiku bumwi malumwi wakabona Pita a Joni kabanjila mu tempele. Wakabaambila ayi: ‘Ntosengaako kali koonse nkomucite.’ Pita wakaamba ayi: ‘Ntokupa cintu cimwi cibotu kwiinda amaali. Muliina lyakwe Yesu, nyamuka weende!’ Pita wakamucafwa kwiimikana lyalo musankwa uyo wakatalika kweenda! Bantu bakasangalala abuumbi pa caankamiko ici cakwaamba ayi bantu baanji bakaba bashomi.

Sombi bapailishi abaSaduki bakakalala. Bakacata batumwi, akubatola kukooti. Bakabeepusha ayi: ‘Ino ngani wakamupa nkusu shakushilika musankwa uyu?’ Pita wakakumbula ayi: ‘Twakapekwa nkusu ishi kuswa kuli Yesu Klistu uyo ngomwakacaya.’ Bamatanjilili babupailishi kabakalalite bakoolobesha ayi: ‘Amucileeke kwaamba pali Yesu!’ Sombi batumwi bakaamba ayi: ‘Tulyeelete kwaamba pali nguwe. Teshi tukacilekeewo.’

Pita a Joni ndyebakaangululwabo, bakaya ku bashikwiiya bamwi akubalwiita shakacitika. Bakapaila pomwi, akusenga Yehova ayi: ‘Twaseenga amutucaafwe kuba bataloondi kwaamba ayi tutolelele kusebensa ncito yanu.’ Yehova wakabapa mushimu usalashi, lyalo bakatolelela kushimikila akushilika. Bantu baanji bakaba bashomi. BaSaduki bakanyumfwila munyono batumwi, aboobo bakabacata akubabika mujeele. Nacibi boobo, mashiku Yehova wakatuma munjelo wakwe uyo wakacalula shisasa akulwiita batumwi ayi: ‘Amuboolele ku tempele akuya mukwiisha bantu.’

Macuunsa bushiku bwakakonkelawo, bamatanjilili babupailishi bamu kooti ya Sanihedilini bakabalwiita ayi: ‘Jeele ilicalitwe, sombi bantu mbomwakaanga tabamo baya! Bali mu tempele batokwiisha!’ Aboobo batumwi bakacatwa alimwi, akutolwa ku kooti ya Sanihedilini. Mupailishi munene wakaamba ayi: ‘Twakamukasha kwaamba pali Yesu!’ Sombi Pita wakabakumbula ayi: “Tulyeelete kunyumfwila Lesa, kuteshi bantu.”

Bamatanjilili babupailishi bakakalala abuumbi cakwaamba ayi bakalinga kusuni kucaya batumwi. Sombi muFalisi waliina lya Gamalyelo wakeemikana akwaamba ayi: ‘Amucenjele mpashi Lesa ali abasankwa aba. Sa mulisuni kulwana a Lesa?’ Bakanyumfwila nshaakaamba. Pesule lya kuuma batumwi amisako, bakabakasha kushimikila, lyalo bakabaleka ayi banooya. Sombi ishi tashikwe kupa batumwi kucileka kushimikila makani abotu cakutaloonda, mutempele akuŋanda aŋanda.