Bakashomesha Yehova

Ndyepakeenda myeenshi yobilo pesule lyakuswa mu Ijipiti, bene Isilaeli bakashika pa Kalundu ka Sinayi, lyalo bakayaka mwakukala. Yehova wakalwiita Mose ayi aye pa Kalundu, lyalo ndyaakashika pa Kalundu wakamulwiita ayi: ‘Ndakabapulusha bene Isilaeli. Na bakanyumfwile akukonkela milawo yangu, balaakuba bantu bangu balibetele.’ Mose wakaboolela akuya mukulwiita bene Isilaeli Yehova nshaakaamba. Ino bakacita buyani? Bakakumbula ayi: ‘Tulaakucita shoonse Yehova nshaamba.’

Mose wakaboolela alimwi pakalundu. Ndyaakashika, Yehova wakaamba ayi: ‘Pabushiku bwatatu, ndaakubandika andiwe. Ubalwiite bantu ayi taakuwo weelete kusa pa Kalundu ka Sinayi.’ Mose wakaswa pakalundu akuya mukulwiita bene Isilaeli kwaamba ayi balibambile kukutika kuswa kuli Yehova.

Pabushiku bwatatu, bene Isilaeli bakabona kubeka akunyumfwa cilulumo. Mpeeke pakalundu pakesa likumbi litikeme alimwi kwakanyumfwika lupeenga lwakalila cankusu. Lyalo Yehova wakesa pa kalundu mumulilo. Bene Isilaeli bakaloonda abuumbi akututuma. Kalundu ka Sinayi koonse kakalinga kuswitebo bwiishi alimwi kakatenkaana abuumbi. Alwalo lupeenga lwakalinga kuya ciindaawo kulila. Lyalo Lesa wakaamba ayi: ‘Ndime Yehova. Tamweelete kulambila balesa bamwi bali boonse.’

Mose wakaboolela alimwi pakalundu, lyalo Yehova wakamupa milawo ya bantu mbobakalinga kweelete kumulambila ambobakalinga kweelete kukala. Mose wakalemba milawo iyo akwiibelenga kubene Isilaeli. Lyalo bakashomesha ayi: ‘Tulaakucita shoonse Yehova nshaamba.’ Bakashomesha kuli Lesa. Ano sa bakacita nshobakashomesha?