Mbweenga Mwayiisha Mwanaanu

Yehova ndyakabikako mukwashi, wakapa bashali mulimo wakulela baana. (Bene Kolose 3:20) Nobashali mulicite mulimo wakwiisha mwanaanu kusuna Yehova akwaamba ayi akule kabotu. (2 Timoti 1:5; 3:15) Mulyeelete kushiba shili mumoyo wa mwanaanu. Nacibi boobo, baana balaiiya kucakubonenaako canu. Kwaamba ayi mwiishe kabotu mwanaanu Maswi akwe Yehova, mulyeelete kutaanguna kwaabika mumoyo wanu.​—Kulumbaisha 40:8.

1 BAANA TABEELETE KULOONDA KUBANDIKA ANDIMWE

BAIBO ILAAMBA AYI: “Mulyeelete kuba bantu bafwambaana kukutika, bacelwa kwaamba.” (Jemusi 1:19) Mbuli mushali mulisuni kwaamba ayi bana banu batanoloonda kubandika andimwe. Bana banu balyeelete kushiba kwaamba ayi na kabasuni kwaamba mutobakutika. Mulyeelete kuba muluumuno abana banu kwaamba ayi batanoloonda kwaamba andimwe. (Jemusi 3:18) Na bashiba kwaamba ayi mulabakalalila akubapa milandu kabatana kwaamba cili coonse, tabakonshi kwaanguluka kumwaambila shili kumoyo wabo. Amubakalikile moyo bana banu, alimwi lyoonse munobaambila ayi muli basuni.​—Mateyo 3:17; 1 Bene Kolinto 8:1.

NSHEENGA MWACITA:

• Na bana banu kabayanda kwaamba andimwe amubakutike

• Kamubandika abana banu lyoonse, kuteshibo na kapali mapensho

2 AMWEELESHE KUNYUMFWISHISHA MWANAANU NCATOYANDA KWAAMBA

BAIBO ILAAMBA AYI: “Muntu ucenjete ulataanguna kuyeeya katana kucita cintu cili coonse.” (Tushimpi 13:16) Cimwi ciindi mulyeelete kubikako maano kwaamba ayi munyumfwishishe nshebatoyanda kumwaambila ambobalinyumfwa. Linji linji, baana balisuni kukomenesha makani aniini kuba anga nganene alimwi akwaamba nshobatacishi kabotu. “Uyo ukumbula katana kunyumfwisha makani, ngumuluya.” (Tushimpi 18:13) Mutanoofwambaana kukalala.​—Tushimpi 19:11.

NSHEENGA MWACITA:

• Mutanoobanjilila kunembo nakabaamba alimwi mutakalali nabi baamba shintu shitana kumukondelesha

• Munookwibaluka mbomwakalinga amwebo kubwanike ashintu shakalinga kuboneka kucindama kuli ndimwe

3 AMUCATANE MUSHINTU NSHEMWAAMBA

BAIBO ILAAMBA AYI: “Omwanaangu, kokutika shitookufunda baiso, akutanyansha shitokwiisha banyoko.” (Tushimpi 1:8) Yehova wakapa bashali boonse bobilo mulimo wa kufunda baana. Mulyeelete kubayiisha kwaamba ayi banoomupa bulemu alimwi akumunyumfwila. (Bene Efeso 6:1-3) Baana balashiba na bashali babo ‘tabasuminishani mushintu nshebaamba.’ (1 Bene Kolinto 1:10) Na mwapusana miyeeyo, bana banu tabeelete kunyumfwako mukwiinga ici inga calengesha ayi batanoomupa bulemu.

NSHEENGA MWACITA:

• Amubandike akusuminshanya mbweshi munoobafunda bana banu

• Na mwapusana miyeeyo ambomweebenaabo pa makani akufunda baana, amweeleshe kunyumfwisha shitoyeeya bakaanu nabi beebanu

4 AMUBAMBE SHAKUCITA

BAIBO ILAAMBA AYI: “Iisha mwaana nshila njaaelete kweendelamo.” (Tushimpi 22:6) Kwiisha kabotu baana teshi cintu cuubu. Mulyeelete kubamba shakucita sheenga shamucafwa kwiisha akululika kabotu bana banu. (Kulumbaisha 127:4; Tushimpi 29:17) Kululika baana teshibo kubakalalila nabi kubooma, sombi mulyeelete kubacafwa kushiba ncebayandikila kukonkela milawo. (Tushimpi  28:7) Alimwi mulyeelete kubayiisha kusuna Maswi akwe Yehova alimwi akuyeeya panjiisho shilimo. (Kulumbaisha 1:2) Kucita boobo kulaakubacafwa kuba amoyo usalalite.​—Bene Ebulu 5:14.

NSHEENGA MWACITA:

• Mulyeelete kwiisha bana banu kushiba Yehova akumushoma

• Amubaiishe kutalamuka mibo ibiibi, mbuli yeeyo icanika pa intaneti. Amubaiishe kushiba mbweenga bacica bantu bacata bana akoona ambabo