Ino Lesa Wancinencine Ngani?

1. Ino nceebo nshi cakulambila Lesa?

Lesa wancinencine ngo wakalenga shintu shoonse. Taacite matalikilo alimwi alaakunoolikobo muyayaya. (Kulumbaisha 90:2) Makani abotu acanika mu Baibo akaswa kuli Lesa. (1 Timoti 1:11) Mukwiinga Lesa wakatupa buumi ngotweelete kulambilabo eenka.—Amubelenge Ciyubululo 4:11.

2. Ino nji mibo nshi njaacite Lesa?

Taakuwo muntu wakabono Lesa mukwiinga ngu Mushimu, uko nkokwaamba ayi mibo yakwe ilinditeewo pa mibo ya shilengwa shoonse pa cishi. (Joni 1:18; 4:24) Nacibi boobo, inga twashiba mibo njaacite Lesa kwiinda mu shintu nshaakalenga. Na twabona shisepo shipusenepusene a maluba shilatondesha ayi ngu Lesa wa lusuno a busongo. Kukomena kwa cishi aliculu akwalo kulatondesha ayi ulicite nkusu.—Amubelenge Bene Loma 1:20.

Inga tweyiilawo ashimwi pa mibo yakwe Lesa kwiinda mukubelenga Baibo. Baibo ilatwaambila shintu nshayanda a nshaapatite, nshaacita ku bantu, a mbwasebensesha mibo yakwe na twacita shibiibi nabi shibotu.—Amubelenge Kulumbaisha 103:7-10.

3. Sa Lesa ulicite liina?

Yesu wakaamba ayi: “NoBeeshiwesu nomuli kwiculu, alilemekwe liina lyanu.” (Mateyo 6:9) Nacibi ayi Lesa ulicite shimwi shakumushibilaako, ulicitebo liina lyomwi. Mushobo womwi awomwi ulicite bwa kulyaamba. Mu Cilenje lilaambwa ayi Yehova.—Amubelenge Kulumbaisha 83:18, NW.

Liina lyakwe Lesa mu ma Baibo aanji bakalikushamo a kubikamo Mwaami nabi Lesa. Ono Baibo ndiyakalembwa, liina lyakwe Lesa lyakalingaamo pafwafwi amankanda 7,000. Yesu wakashibisha bantu liina lyakwe Lesa ndyaakalinga kubeisha pali nguwe.—Amubelenge Joni 17:26.

4. Sa Yehova ulatulama?

Sa kufula kwa mapenshi kulatondesha ayi Lesa taatulami? Bantu bamwi balaamba ayi Lesa ulatupensha kwaamba ayi atusunke, ono ubo mbubeshi.—Amubelenge Jemusi 1:13.

Lesa wakatondesha bantu bulemu ndyakabapa cipo ca kulisalila. Sa inga tatumulumbi Lesa kwiinda mukusalaawo kumusebensela? (Joshuwa 24:15) Ono bantu baanji balasala kunoocita shibiibi ku bantu bamwi, aboobo bantu baanji balapenga. Lesa cilamucisa na wabona bantu kabalyatililwa.—Amubelenge Matalikilo 6:5, 6.

Yehova ngu Lesa utulama. Ulayanda ayi tunokala katusangalete. Onoono ulaakumana mapenshi a kunyonyoola bamucita shibi. Pacecino ciindi nkooli mulandu Lesa ngwasuminishisha mapenshi kutolelela paciindi ciniini. Mu Ciiyo 8, tulakwiiya pa mulandu uyo.—Amubelenge 2 Pita 2:9; 3:7, 13.

5. Ino inga twasena buyani pafwafwi kuli Lesa?

Yehova ulatwaambila ayi inga twasena pafwafwi anguwe kwiinda mu mupailo. Ulisuni bantu womwi awomwi. (Kulumbaisha 65:2; 145:18) Ulayandisha kulekelela bantu. Ulabona ndi tweelesha kucita shimusangalasha, nacibi ayi cimwi ciindi tulaalilwa. Nacibi ayi tatumaninitewo, inga twacinkonsha kuba bashicibusa bakwe Lesa.—Amubelenge Kulumbaisha 103:12-14; Jemusi 4:8.

Mukwiinga Lesa wakatupa buumi, tulyeelete kumusuna kwiinda muntu wumwi uli oonse. (Maako 12:30) Ndi mutotondesha lusuno kuli Lesa kwiinda mukwiiya pali nguwe a kucita nshomutokwiiya, mulakusena pafwafwi anguwe.—Amubelenge 1 Timoti 2:4; 1 Joni 5:3.