Makani Akusebensesha amu Kabuku Kamabungano Abuumi Alimwi Anciito
MARCH 5-11
BUBONI BUCANIKA MUMASWI AKWE LESA | MATEYO 20-21
“Uyo Woonse Usuni Kuba Munene Pakati Kanu, Ulyeelete Kuba Musebenshi Wanu”
(Mateyo 20:3) Macuunsa ciindi kacili pafwiifwi a 9 koloko, muntu uyu wakaya kumushika akucana bamwi bakalinga kushiitebo;
nwtsty Shakweebela
Kumushika
Misena yamakwebo imwi, mbuli yeeyi yatondeshekwa, yakalinga mweela mwanshila. Beshikuulisha bakalinga kubika makwebo abo munshilabo cakwaamba ayi cakalinga cuyumu kwiindaamo. Bantu bakumusena uko bakalinga kuula shintu shakusebensesha mbuli, shakubumba, shintu shimwi shidulite, ashakulya mbuli bucisa. Mukwiinga takwakalingaawo mafiligi, bantu bakalinga kuya mukuula shintu bushiku abushiku. Beshikuula inga banyumfwa makani kuswa kubeshimakwebo na kubeshikufwakashabo, baana bakalinga kusekana, batakalinga kusebensa bakalinga kulindila kunjila ncito. Yesu wakoolesha balwashi alimwi Paulo wakashimikila kumusena wamakwebo na mushika. (Mili. 17:17) Ono mubupusano, bafundishi ba milawo aba Falisi bakalinga kusuni abuumbi kupekwa bulemu mumisena iyi.
(Mateyo 20:20, 21) Lyalo muka Sebedi, abana bakwe basankwa bobilo, wakaya kuli Yesu, wafukama kunembo lyakwe ayi asenge cimwi cintu. 21 Lyalo Jesu wakamwiipusha ayi, “Utooyandanshi?” Alakwe wakakumbula ayi, “Amushomeshe ayi bana bangu basankwa bobilo aba, bakekale umwi kululyo lwanu, aumwi kucipiko muBwaami bwanu.”
nwtsty makani acafwa kwiiya pali Mate. 20:20, 21
muka Sebedi: Nkokwaamba ayi, banyina babatumwi Jemusi alimwi aJoni. Kweelana alibuku lyakwe Maako, Jemusi a Joni mbobakaya kuli Yesu. Citoboneka mbobakepusha mwiipusho, ono sombi bakacita boobo kwiinda muli banyinawabo, ba Salome, abo beelete bakalinga baishi nkashi bakwe Yesu.—Mate. 27:55, 56; Maako 15:40, 41; Joni 19:25.
umwi kululyo lwanu, aumwi kucipiko: Mbasu shoonse shobilo apa shilatondesha musena wabulemu ankusu, ono sombi lubasu lucite bulemu bunene lyoonse ndwakululyo.—Kulu. 110:1; Mili. 7:55, 56; Loma. 8:34.
(Mateyo 20:25-28) Ono Yesu wakabeeta akubalwiita ayi: “Mwebo mulishi ayi baleli bakunsengwe balalyatilila bantu, abalo beendeleshi balakakatisha baabo mbobeendelesha. 26 Ubu teshi mboceelete kuba pakati kanu; sombi uyo usuni kuba munene pakati kanu ulyeelete kuba musebenshi wanu, 27 alimwi uyo usuni kuba wakutaanguna pakati kanu ulyeelete kuba musha wanu. 28 Bweenka mbuli MwanaaMuntu utakwe kwisa mukusebenselwa, sombi mukusebensela bamwi akwaaba buumi bwakwe kwaamba ayi alubule bantu baanji.”
nwtsty makani acafwa kwiiya pali Mate. 20:26, 28
musebenshi: Na “musha.” Baibo liinji ilasebensesha liswi lyaci Giliki di·aʹko·nos kwaamba muntu utolelela kusebensela bamwi cakuliceesha. Liswi ili lilasebenseshekwa kusansulula Klistu mbwakalinga (Loma. 15:8), basebenshi na basha bakwe Klistu (1 Koli. 3:5-7; Kolo. 1:23), basebenshi bacafwilisha (Fili. 1:1; 1 Timo. 3:8), abasebenshi bamuŋanda (Joni 2:5, 9) alimwi abasebenshi bamfulumeende (Loma. 13:4).
utakwe kwisa mukusebenselwa, sombi mukusebensela bamwi: Na “kuteshi mukwaabilwa, sombi kwaabila.”
Kulangoola Buboni Bwakumushimu
(Mateyo 21:9) Mpeeke bantu abo bakalinga panembo lyakwe abaabo bakalinga pesule bakatalika koolobesha ayi: “Amumupulushe Mwanaakwe Defedi! Ulicite coolwe uyo utoosa muliina lyakwe Yehova! Amumupulushe mwebo nomukala kwiculu!”
nwtsty makani acafwa kwiiya pali Mate. 21:9
Amumupulushe: Na., “Hosanna.” Liswi lyaci Giliki ili lilaswa kumaswi aci Ebulu aamba ayi “twapaila ayi, amumupulushe” na “twasenga, amumupulushe.” Liswi ili apa litokwaamba kusenga lupulusho kuli Lesa na kukoma; inga lyasansululwa ayi “twasenga, amupe lupulusho.” Mukuya kwaciindi, bakatalika kulisebensesha mbuli mupailo akulumba. Muci Ebulu liswi ili lilacanika pa Kulu. 118:25, lwiimbo lwakalinga lubasu lwa Nyimbo shakalinga kwimbwa ciindi ca Pasika shiitwa ayi Hallel. Aboobo, maswi aya ngaakesa kumiyeeyo paciindi ici. Nshila yomwi Lesa mbwakakumbula mupailo uyu wakupulusha Mwanaakwe Defedi nkwiinda mukumubusha kuswa kubafu. Pa Mate. 21:42, Yesu wakaamba maswi acanika pa Kulu. 118:22, 23 ayo aamba pali Mesiya.
Mwanaakwe Defedi: Maswi aya alatondesha mulunyungu mwakashalilwa Yesu alimwi alubasu lwakwe mbuli Mesiya wakashomeshekwa.
(Mateyo 21:18, 19) Ndyaakalinga kuboolela kumushi macuunsa, wakanyumfwa nsala. 19 Lyalo wakabona mukuyu mweela nshila, aboobo wakayaako, sombi taakwe kucanawo shisepo sombi matewubo eenka aboobo wakawaambila ayi: “Kuswa sunu utakacatiwo nkuyu lyobilo.” Aboobo mukuyu wakayuma peenkapo.
jy 244 mapa. 4-6
Kusebensesha Cisamu Camukuyu Kwiisha Makani Alushomo
Ino nceebo nshi Yesu ncakalengesha mukuyu kuyuma? Wakatondesha mulandu ncakacitila boobo ndyakaamba ayi: “Ntoomulwiita calushinisho ayi na mulashoma cakutatonsha, inga mwacita bweenka mbuli mbondacita mukuyu uyu sombi teshi ceeci ceenka, mulakonsha nabi kwaambila kalundu aka ayi, ‘Swaawo apo mpoobete uye uliwaale mu lweenge,’ cilaakucitika. Alimwi shintu shoonse nsheenga mwasenga mumupailo calushomo, mulaakushitambula.” (Mateyo 21:21, 22) Aboobo wakabooshawo makani ngakaambawo kale kwisule ayi lushomo inga lwa lonsha Kalundu.—Mateyo 17:20.
Aboobo kwiinda mukulengesha ayi mukuyu uyume, Yesu wakatondesha kuba alushomo muli Lesa mbokusuniki. Wakaamba ayi: “Nceceeco ncentomulwitila ayi, Pa shintu shoonse nshemutopailila akusenga, amube alushomo ayi mwashitambula kale, alimwi mulaakushitambula.” (Maako 11:24) Ciiyo cibotu abuumbi ku bashikwiiya bakwe Yesu boonse! Ici cakalinga kusuniki abuumbi ku batumwi bakwe ceebo ca mapensho anene akalinga kusa kunembo. Pali kucatana akumwi pamakani akuyuma kwa mukuyu alushomo.
Bweenka mbuli mukuyu, bene Isilaeli bakalinga kuboneka anga balibo kabotu. Bene Isilaeli bakalinga mucipangano ca bushicibusa a Lesa, palaale bakalinga kuboneka anga bakalinga kukonkela milawo yakwe. Nacibi boobo, taakuwo wakalinga kucite lushomo nabi mibo ibotu. Bakakaka aMwanaakwe Lesa! Aboobo, kwiinda mukulengesha mukuyu kuyuma, Yesu wakatondesha mamanino mbwakalinga kusa mukuba amushobo uyu watakalinga kucite lushomo alimwi watakalinga kushala shisepo.
Kubelenga Baibo: (Mateyo 20:1-19)
MARCH 12-18
BUBONI BUCANIKA MUMASWI AKWE LESA | MATEYO 22-23
“Amunyumfwile Milawo Yobilo Inene”
(Mateyo 22:36-38) “Bafundishi, ngumulawonshi unene pamilawo yoonse?” 37 Lyalo wakamukumbula ayi: “‘Ulyeelete kusuna Yehova Lesa wako amoyo wako woonse, abuumi bwako boonse alimwi amiyeeyo yako yoonse.’ 38 Uyu ngomulawo unene alimwi ngowakutaanguna.
nwtsty makani acafwa kwiiya pali Mate. 22:37
moyo: Munshila yacikoshanyo, liswi lyakwaamba ayi moyo liinji lilasansulula buntu bwamukati. Nacibi boobo na liswi ili lyaambwa pantu pomwi amaswi akwaamba ayi “buumi” “amiyeeyo,” busansulushi bulalulamikwa pamakani amuntu mbwalinyumfwa anshasuni. Maswi otatwe asebenseshekwa apa (moyo, buumi, alimwi amiyeeyo) aleenda pomwi lyoonse; na kusebenseshekwa pomwi, kuyuminisha bunene abuumbi kuyandika kwa kusuna Lesa cakumaninina.
buumi: Na “muntu woonse.”
miyeeyo: Nkokwaamba ayi, nkusu shakuyeeya. Muntu ulyeelete kusebensesha nkusu shakuyeeya kwaamba ayi ashibe Lesa akumusuna. (Joni 17:3, ftn.; Loma. 12:1) Mumaswi aya akaswa pa Duto. 6:5, malembo aci Ebulu eene alasebensesha maswi otatwe, ‘moyo, buumi, alimwi ankusu.’ Ono muci Giliki bakasebensesha maswi akwaamba ayi “miyeeyo” muciindi ca “nkusu” kweelana ambwalembetwe mulibuku lyakwe Mateyo. Mpashi kuli shiinji shakalengesha ayi maswi aya asebenseshekwe munshila iyi. Cakutaanguna, nabi kwaamba ayi kale kale takwakalinga liswi lyaamba cakululama ayi “miyeeyo” muci Ebulu, lyoonse liswi ili lyakalinga kwiilikwawo pa liswi lyaci Ebulu lya “moyo.” Na twalisebensesha munshila yacikoshanyo liswi lyakwaamba ayi moyo lilaamba buntu boonse bwamukati, kwiilikaawo amuntu nshayeeya, mbwalinyumfwa, mbwabona shintu, acimupa kucita shintu. (Duto. 29:4; Kulu. 26:2; 64:6; amubone makani acafwa kwiiya pali moyo muvesi iyi.) Nceceeco, muci Ebulu balasebensesha liswi lyakwaamba ayi “moyo,” lyalo muci Giliki balasebensesha liswi lyeendelana lya “miyeeyo.” (Mata. 8:21; 17:17; Tus. 2:10; Isa. 14:13) Mpashi cimwi cakalengesha ayi Mateyo asebenseshe liswi lyaci Giliki lya kwaamba ayi “miyeeyo” muciindi ca “nkusu” ndyebakalemba maswi akaswa pa Duto. 6:5 ncakwaamba ayi muci Ebulu liswi lyakwaamba ayi “nkusu [na, “nkusu shisebensa,” ftn.]” inga lyeelikaawo nkusu shakusebensa alimwi ankusu shakuyeeya. Ono muli moonse mweenga cabeta, maswi akalembwa mumakani abotu kuswa ku Dutolonomi alilembetwe mumaswi apusene mukwiinga maswi aya obilo muci Ebulu amuci Giliki alaamba cintu comwi.
(Mateyo 22:39) Mulawo wabili ngooyu, awalo ulikoshenyebo autaanshi ayi, ‘Suna mubyo bweenka mboolisuni omwiine.’
nwtsty makani acafwa kwiiya pali Mate. 22:39
Wabili: Pa Mate. 22:37, Palilembetwe Yesu mbwakakumbula muFalisi, ono Yesu wanungaawo pacikumbulo akwaamba mulawo wabili (Lefi 19:18), kwiisha kwaamba ayi milawo yobilo iyi ilicatene pomwi alimwi mpopeemfwi milawo yoonse amakani abashinshimi.—Mate. 22:40.
mubyo: Muci Giliki liswi lya “mubyo” (lilaamba., “uyo uli pafwiifwi”) talisansululibo abo mbomukalabo pafwiifwi. Inga lyeelikaawo amuntu uli woonse ngomunyumfwana akwe.—Luka 10:29-37; Loma. 13:8-10.
(Mateyo 22:40) pamilawo yobilo iyi mpopeemfwi milawo yoonse amakani abashinshimi.”
nwtsty makani acafwa kwiiya pali Mate. 22:40
mulawo . . . Bashinshimi: “Mulawo” cilaamba mabuku amu Baibo kuswa ku Matalikilo kushika ku Dutolonomi. “Bashinshimi” cilaamba mabuku abushinshimi kuswa mu Malembo amuci Ebulu. Nacibi boobo, na maswi aya aambwa pantu pomwi, lyalo inga asansulula kwaamba Malembo aci Ebulu oonse.—Mate. 7:12; 22:40; Luka 16:16.
mpopeemfwi: Muci Giliki liswi lyakwaamba ayi “mpopeemfwi” yasebenseshekwa munshila yacikoshanyo kusansulula “kushomwa; na kwaamba ayi mpopaswa.” Aboobo Yesu wakalinga kutondesha ayi teshibo Milawo ili Likumi sombi Malembo oonse aci Ebulu akalinga kuyakitwe palusuno.—Loma. 13:9.
Kulangoola Buboni Bwakumushimu
(Mateyo 22:21) Bakamukumbula ayi: “Nshakwe Kaisala.” Lyalo wakabaambila ayi: “Aboobo amupe Kaisala shintu shakwe Kaisala, sombi shintu shakwe Lesa amupe Lesa.”
nwtsty makani acafwa kwiiya pali Mate. 22:21
amupe Kaisala shintu shakwe Kaisala: Maswi akwe Yesu aya ngotucana palilembo lyakwe Maako 12:17 alimwi a Luka 20:25 nceciindi comwibo Yesu ncakaambako pali muleli munene waku Loma. “shintu shakwe Kaisala” shileelikawo kulipila misonko akupa bulemu bweelete kubeendeleshi.—Loma. 13:1-7.
shintu shakwe Lesa amupe Lesa: Ici cileelikaawo kulambila kwakulyaaba camoyo woonse kwa muntu, lusuno lwakwe loonse, akunyumfwila cakushomeka.—Mate. 4:10; 22:37, 38; Mili. 5:29; Loma. 14:8.
(Mateyo 23:24) Nobamatanjilili boofu, mulaalilwa kumina kansenye, sombi yalo ngamela mulaimina!
nwtsty makani acafwa kwiiya pali Mate. 23:24
mulasansa linsenye mucakunwa canu, sombi yalo ngamela mulaimina: Mansenye akalinga tulongoolo tuniini abuumbi, ashalo ngamela shakalinga shinyama shinene abuumbi bene Isilaeli nshebakalinga kushi kabotu alimwi nshebatakalinga kusuminishikwa kulya. (Lefi 11:4, 21-24) Yesu wakasebensesha maswi asekesha, ndyakaamba ayi bapailishi balasansa linsenye mucakunwa cabo kwaamba ayi litababishi kweelana amulawo, sombi bakalinga kwaalilwa kukonkela cakumaninina makani anene aambwa mumulawo, kucita boobo wakakukoshanisha akumina ngamela.
Kubelenga Baibo: (Mateyo 22:1-22)
MARCH 19-25
BUBONI BUCANIKA MUMASWI AKWE LESA | MATEYO 24
“Amutolelele Kubikila Maano Kushintu Shakumushimu Munshiku Shakweelaako”
(Mateyo 24:12) alimwi ceebo cakufula kwabubi, lusuno lwa bantu baanji lulaakuceya.
it-2-E 279 pala. 6
Lusuno
Lusuno lwa Muntu Inga Lwaceya. Ndyakalinga kulwita bashikwiiya bakwe shintu shakalinga kusa kunembo, Yesu Klistu wakatondesha ayi lusuno (a·gaʹpe) lwa bantu beshi kulibona ayi balashoma Lesa lulaakuceya. (Mate. 24:3, 12) Mbuli citondesho ayi tuli munshiku shikatasha, mutumwi Paulo wakaamba ayi bantu balaakuba “beshikuyandisha maali.” (2 Timo. 3:1, 2) Aboobo cakutatoonsha muntu inga wacileka kukonkela njiisho shibotu alimwi lusuno lubotu ndwalinga kucite inga lwamana. Aboobo ici citotuyuminisha kushiba kuyandika kwakutolelela kukomenya lusuno lwesu kwiinda mukuyeeyawo pa Maswi akwe Lesa akukonkela njiisho shakwe mubuumi bwesu.—Efe. 4:15, 22-24.
(Mateyo 24:39) alimwi tabakwe kubikilaako maano kushikila maanshi ndyaakesa akubalobya boonse, bweenka ubo akwalo kubaako kwa Mwanaamuntu mbweshi kukabe.
w99 11/15 19 pala. 5
Sa Mutoocita Shoonse Lesa Nshaasuni?
5 Pamakani anshiku shesu shikatasha Yesu wakaamba ayi: “Bweenka mbuli mbocakalinga munshiku shakwe Nowa, akwalo kubaako kwa MwanaaMuntu mbweshi kukabe. Ceebo munshiku shakwe Nowa, muyoba kootana kwisa, bantu bakalinga kulya, kunwa akweebana, kushikila bushiku Nowa ndyaakenjila mubwaato; alimwi tabakwe kubikilaako maano kushikila maanshi ndyaakesa akubalobya boonse, bweenka ubo akwalo kubaako kwa MwanaaMuntu mbweshi kukabe.” (Mateyo 24:37-39) Na kashicitwa mukweelanya, kulya akunwa teshi shibiibi, alimwi cikwati mbubaambo mwiine Yehova mbwakatalika. (Matalikilo 2:20-24) Nacibi boobo, na twabona ayi twatalika kubikila maano abuumbi kushintu shakumubili, inga caba kabotu kupaililawo. Yehova inga watucafwa kutaanguna kubika sha Bwaami panembo, kucita shintu sheelete, akukumanisha mukuli wesu kuli nguwe.—Mateyo 6:33; Bene Loma 12:12; 2 Bene Kolinto 13:7.
(Mateyo 24:44) Paceebo ceeco, amwebo mulyeelete kunolibambite lyoonse ceebo MwanaaMuntu ulaakwisa paciindi ncemutamwiingashite.
jy 259 pala. 5
Batumwi Bakasenga Citondesho
Wakalwiita bashikwiiya bakwe ayi bakalinga kweelete kutolelela kulangila, alimwi akulibambila. Lyalo kwaamba ayi ayuminishe makani aya, Yesu wakaamba cikoshanyo acimwi ayi: “Sombi mwishibe ayi, na mwine ŋanda kaashi ciindi nceshi ashiteemo mwiipi, inga kaalashabo, kwaamba ayi atesi mukwiipa muŋanda yakwe. Paceebo ceeco, amwebo mulyeelete kunolibambite lyoonse ceebo MwanaaMuntu ulaakwisa paciindi ncemutamwiingashite.”—Mateyo 24:43, 44.
Kulangoola Buboni Bwakumushimu
(Mateyo 24:8) Shoonse ishi ngamatalikilobo amapensho mbuli amwanakashi uli pafwiifwi akutumbuka.
nwtsty makani acafwa kwiiya pali Mate. 24:8
mapensho apakutumbuka: Muci Giliki aya ngamaswi aamba kunyona kunene kunyumfwa muntu uli pafwiifwi akutumbuka. Nabi kwaamba ayi muvesi iyi atosebenseshekwa kwaamba kucisa, amapensho ali oonse, maswi aya inga atondesha ayi mapensho akaambilwa limwi ali mbuli ayo apakutumbuka, alakuya panembo akukomena alimwi alakushika akuciindi camapensho anene akaambwa pa Mateyo 24:21 ndyeshi akacalebo paniini kutalika.
(Mateyo 24:20) Kamupaila kwaamba ayi kucica kwanu kutakabi ciindi ca mupewo nabi pabushiku bwa Sabata;
nwtsty makani acafwa kwiiya pali Mate. 24:20
ciindi ca mupewo: Muciindi ca infula inene, miyoba, alimwi aciindi ca mupewo, cakalinga ciyumu abuumbi kweenda, kucana shakulya akwakukala.—Esila 10:9, 13.
pabushiku bwa Sabata: Cakalinga ciyumu kweenda lweendo lulaamfu konyamwite katundu mumisena mbuli Judeya, ceebo ca milawo yakukasha kweenda ciindi ca Sabata; alimwi milyango inene ya ndabala tayakalinga kucalulwa ciindi ici.—Amubone Mili. 1:12 alimwi alubasu lwa Makani Aayungizidwe. B12.
Kubelenga Baibo
(Mateyo 24:1-22) Ono Yesu ndyaakalinga kuswa kutempele, bashikwiiya bakwe bakamushikila kwaamba ayi bamutondeshe mbuli mboyakayakwa tempele. 2 Wakabakumbula akwaamba ayi: “Te mwashibona shoonse ishi? Ntoomulwiita calushinisho ayi taaku libwe nabi lyomwi lyeshi likacaale palibwenyina, oonse alakumwayululwa.”3 Ndyaakalinga kushiite paKalundu ka Olifi, bashikwiiya bakwe bakaya kuli nguwe beenka akumwiipusha ayi, “Amutulwiite, ino shintu ishi shilaakucitika lili alimwi nciinshi ceshi cikabe citondesho cakubaako kwanu acamamanino abweende bwashintu?” 4 Wakabakumbula akwaamba ayi, “Amucenjele kwaamba ayi kutakabi muntu nabi womwi eshi akamucenjeeke. 5 Mukwiinga bantu baanji balaakwisa muliina lyangu akunokwaamba ayi, ‘Ndime Klistu,’ alimwi balaakucenjeeka bantu baanji. 6 Mulaakunyumfwa nkondo ampuuwo sha nkondo, sombi mwebo mutakalisukami. Ishi shilaakucitika, sombi teshi kwaamba ayi ngomamanino a cishi. 7 “Mushobo umwi ulaakubukila ubye, abwalo buleelo bulaakubukila bulelonyina kulaakuba nsala ashitentanshi mumisena ipusenepusene 8 Shintu shoonse ishi ngamatalikilo amapensho ali mbuli kunyongwa kwa mwanakashi utoyanda kutumbuka. 9 “Lyalo balaakumutola mukupenshekwa alimwi akumucaya. bantu ba mishobo yoonse balaakumupata ceebo ca liina lyangu. 10 Ciindi ico, bantu baanji balaakucileka kushoma balaakutalika kulyaaba akupatana beenka beenka. 11 Kulaakuba bashinshimi baanji bakubeca akucenjeeka bantu baanji; 12 alimwi mukwiinga bubiibi bulaakufula, lusuno lwa bantu baanji lulaakuceya. 13 Sombi uyo eshi akayuminine kushikila kumamanino ulaakupulushikwa. 14 Alimwi makani Abotu a Bwaami aya alaakushimikilwa mucishi coonse kwaamba ayi akabe mbobukamboni kubantu boonse kuswawaawo mamanino alaakushika. 15 “Aboobo, na mukabone cintu cisesemya cileta bunyonyooshi ncaakaamba mushinshimi Danyelo kaciimfwi mumusena usalalite (uyo ubelenga asebenseshe maano), 16 lyalo abo bali kuJudeya bakacicile kutulundu. 17 Uyo eshi akanooli paciluli ca ŋanda, atakaseluki kwaamba ayi akushe shili muŋanda yakwe, 18 alakwe eshi akanooli mumuunda atakabooleli kuŋanda mukubwesa cakufwala ca peculu. 19 Mapensho kubanakashi beshi bakanooli pakati, abeshi bakanoocite baana bayamwa munshiku isho! 20 Kamupaila kwaamba ayi kucica kwanu kutakabi ciindi ca mupewo nabi pabushiku bwa Sabata; 21 mukwiinga kuciindi ico kulaakuba mapensho anene atana kubonekawo kale, kuswabo kumatalikilo acishi ca panshi kushikila asunu ncakwiila teshi akabooleewo. 22 Nshiku isho sha neshitakwe kufwimpishikwa, naakwiinga taaku muntu nabi womwi wakacaala kaali muumi sombi ceebo ca baabo basalitwe, inshiku isho shilaakufwimpishikwa.
MARCH 26–APRIL 1
BUBONI BUCANIKA MUMASWI AKWE LESA | MATEYO 25
“Kamulibambitebo Lyoonse”
(Mateyo 25:1-6) ‘Bwaami bwa kwiculu inga bwakoshanishikwa abamooye likumi abo bakanyamuna malampi akuciinsha shibwiinga. 2 Pabamyooye aba, bosanwe bakalinga baluya, sombi bamwi bosanwe bakalinga bacenjete. 3 Aba bosanwe baluya ndibakabwesa malampi, tabakwe kuyumuna mafuta amwi palubasu. 4 Sombi bacenjete bakayumuna mafuta amwi mumisaashi. 5 Ceebo shibwiinga wakacelwa kwisa, boonse bamyooye bakatalika kushinshila kushikila baya amutulo. 6 “Ono pakati ka mashiku kwakanyumfwika maswi abantu bakalinga kuyobela ayi, ‘Ngooyo shibwiinga waashika! Amwise mukamutambule!.’
(Mateyo 25:7-10) Mpeeke bamyooye boonse balya bakabuka, akutalika kubamba malampi abo. 8 Lyalo bamyooye baluya bakaambila babyabo bacenjete ayi, ‘Amutucafweko mafuta anu ceebo malampi esu atooyanda kushimika.’ 9 Bacenjete bakakumbula ayi, ‘Tau, inga yaceya na twabaana. Kamuyabo kubeshikuulisha mukoole aanu mafuta.’ 10 Bamyooye baluya balya bakacica mukuula mafuta, shibwiinga alakwe wakapoola. Mpeeke bamyooye bacenjete, abo bakalinga kulibambite, bakenjilaakwe shibwiinga muŋanda yabwiinga lyalo akumulyango kwakacalwa.
(Mateyo 25:11, 12) Pesule bamyooye baluya bakashika abalo bakatalika kwaamba ayi, ‘Nkambo, nkambo, amutucalwiteeko!’ 12 Sombi shibwiinga wakabakumbula ayi, ‘Kumulwiita calushinisho, nebo nshimwishiiwo.’
Kulangoola Buboni Bwakumushimu
(Mateyo 25:31-33) “Ono MwanaaMuntu ndyeshi akese mubulemu abaanjelo bakwe boonse ba kwiculu, ulaakwikala pacuuna cakwe ca Bwaami. 32 Lyalo mishobo yoonse ya bantu ilaakubungana kuli nguwe, mpeeke ulaakupansaanya bantu bweenka mbuli mweembeshi mbwaapansaanya mbelele ampongo. 33 Ulaakubika mbelele kululyo lwakwe, ashalo mpongo kucipiko.
w15 3/15 p. 27 pala. 7
Amucafwe Bamakwaabo Klistu Cakushomeka
7 Munshiku shino, tulicishi kabotu cikoshanyo ca mbelele ampongo ncocaamba. MwanaaMuntu,” na “mwaami,” ngu Yesu. Maswi akwaamba ayi “bamakwesu” alemikaninaako bamakwesu abenankashi bananikitwe abo beshi bakanolela kwiculu pomwi a Klistu. (Loma. 8:16, 17) “Mbelele” alimwi “ampongo” shileemikaninaako bantu kuswa kumishobo yoonse. Aba tabananikitwe amushimu usalashi. Ono ino bantu abo balaakoomboloshekwa paciindi cili? Ishi shilaakucitika kumamanino amapensho anene atoosa conoono. Ino nciinshi ceshi cikalengeshe ayi womwi awomwi wa bantu aba akoomboloshekwe kuba mpongo na mbelele? Balaakoomboloshekwa kweelana anshebakacitila bamakwaabo bakwe Yesu pacishi ca panshi. Pacecino ciindi mamanino acishi cino ali pafwiifwi abuumbi, aboobo tulalumba abuumbi kwaamba ayi Yehova watucafwa kunyumfwisha kabotu cikoshanyo cili pa Mateyu capita 24 a 25!
(Mateyo 25:40) Lakwe Mwaami ulaakukumbula ayi, ‘Ntoomulwiita calushinisho ayi, ilyo lyoonse ndimwakacita sheeshi kuwomwi wa baaba bamakwesu bataaku mbobabete, ndime mwakalinga kucitila.’
w09 10/15 p. 16 mapa. 16-18
“Munanooli Beshicibusa Bangu”
16 Na mulisuni kukala pacishi ca panshi mu Bwaami bwakwe Lesa, inga mwatondesha buyani bushicibusa bwanu kubamakwaabo Klistu? Atubandika shintu shotatwe nshomweelete kucita. Cakutaanguna, mulyeelete kwabanaamo lubasu camoyo woonse muncito yakushimikila. Klistu wakalwita bashikwiiya bakwe kushimikila makani abotu cishi coonse. (Mate. 24:14) Ono bamakwaabo Klistu bacili pacishi ca panshi inga tabacikonshi beenka kusebensa ncito iyi kwakubula lucafwo kuswa ku bambelele shimwi. Bamulikoto lya mbelele shimwi balacafwa bamakwaabo Klistu kukumanisha ncito Lesa njaakabapa kwiinda mukwabanaamo lubasu muncito yakushimikila. Musebenshi ushomeka alimwi ucenjete pantu pomwi a Klistu balalumba abuumbi pancito isebensa ba mbelele shimwi kutondesha bushicibusa bwabo.
17 Cabili nceenga bacita ba mbelele shimwi kwaamba ayi bacafwe bamakwaabo bakwe Klistu, nkupa maali eenga acafwa kutola panembo ncito yakushimikila. Yesu wakayuminisha bashikwiiya bakwe kupanga bushicibusa “abuboni butaluleme.” (Luka 16:9) Uku teshi kwaamba ayi tulyeelete kulipila kwaamba ayi tube beshicibusa bakwe Yesu na Yehova. Ono na katusebensesha buboni bwesu kutola panembo Bwaami bwakwe Yehova anciito icitwa alibunga lyakwe pacishi ca panshi, tulatondesha ayi Yesu ngushicibusa wesu alimwi tulimusuni “mumicito amucancinencine,” kuteshibo pamulomo sobwe. (1 Joni. 3:16-18) Tulaabila buboni bwesu na katwabanaamo lubasu muncito yakushimikila, alimwi na twapa maali akusebensesha kukuyaka akubamba misena nkotupailila, amaali akutola panembo ncito yakushimikila. Inga caba ayi twapa shiniini nabi shiinji, Yehova a Yesu balalumba abuumbi kupa kwesu calusangalalo.—2 Koli. 9:7.
18 Nshila yatatu soonse mbotutondesha ayi tuli beshicibusa bakwe Klistu, nkwiinda mukunyumfwila bamanene. Basankwa aba bakasalwa amushimu usalashi kweelana abutanjilili bwakwe Klistu. (Efe. 5:23) Mutumwi Paulo wakalemba ayi: “Amunyumfwile bamatanjilili banu akulibombya.” (Ebu. 13:17) Cimwi ciindi inga caba ciyumu kunyumfwila bamanene nshebatulwiita kuswa mu Baibo. Mukwiinga tulabona shilubo shabo, ici inga calengesha ayi twaalilwe kukonkela nshebatotulwita. Nacibi boobo, Klistu Mutwi walibungano alikondetwe kusebensesha basankwa batasalalite aba. Anu nceceeco nshetucita na batulwita shakucita, shilatondesha na tuli beshicibusa bakwe Klistu nabi sobwe. Na katutalangibo pashilubo sha bamanene alimwi akukonkela butanjilili bwabo, tulatondesha ayi tulisuni Klistu.
Kubelenga Baibo: (Mateyo 25:1-23)