CIIYO 46
Ino Nceebonshi Mulyeelete Kulyaaba Akubombekwa?
Kulyaaba kuli Yehova cilaamba kumushomesha mumupailo ayi mulaakunoolambilabo nguwe eenka alimwi mulaakunoobika kuyanda kwakwe panembo mubuumi bwanu. (Kulumbaisha 40:8) Pesule lyakulyaaba kulaba kubombekwa. Kwiinda mukubombekwa mulatondesha bamwi kwaamba ayi mwakalyaaba. Kusalawo kulyaaba kuli Yehova nkusala kuyandika abuumbi mubuumi bwesu. Ino nciinshi ceenga camucafwa kwaamba ayi musalewo kucita cintu ciyandika abuumbi ici?
1. Ino nciinshi cipa kwaamba ayi muntu alyaabe?
Lusuno ndolupa kwaamba ayi tulyaabe kuli Yehova. (1 Joni 4:10, 19) Baibo ilaamba ayi: “Suna Yehova Lesa wako amoyo wako woonse, abuumi bwako boonse, amiyeeyo yako yoonse alimwi ankusu shako shoonse.” (Maako 12:30) Tulatondesha ayi tulisuni Lesa kuteshibo kwiinda mushintu nshetwaamba sombi akwiinda mushintu nshetucita. Bweenka lusuno mbolupa kwaamba ayi musankwa amwanakashi beebane, kusuna Yehova kulatupa kwaamba ayi tulyaabe kuli nguwe akubombekwa.
2. Ino nshoolwe nshi Yehova nshaashomesha Bakamboni Bakwe bakabombekwa?
Na mukabombekwe, mulaakuba lubasu lwa mukwashi wakwe Yehova usangalete. Mulaakubona Yehova mbweshi akamutondeshe lusuno lwakwe munshila shipusenepusene, alimwi ici cilaakuyumya bushicibusa bwanu anguwe. (Amubelenge Malaki 3:16-18.) Kwiilika pakuba abushicibusa a Yehova mbuli Ishiwanu, mulaakuba amukwashi wakumushimu wabamakwesu abenankashi nsengwe yoonse basuni Yehova alimwi bamusuni andimwe. (Amubelenge Maako 10:29, 30.) Nacibi boobo, kuli shimwi nshomweelete kucita kamutana kubombekwa. Mulyeelete kwiiya pali Yehova, kumusuna, alimwi akushoma mu Mwanaakwe. Mukweelaako, mulyeelete kwaaba buumi bwanu kuli Yehova. Na mukacite boobo lyalo akubombekwa, mulaakuba panshila yakutambula buumi bwamuyayaya. Maswi akwe Lesa alaamba ayi: “Kubombekwa . . . uko kumupulusha bulya.”—1 Pita 3:21.
AMWIIYILEWO ASHIMWI
Amwiiye akubona kulyaaba akubombekwa ncokuyandikila.
3. Soonse tulyeelete kusalawo ngotweelete kusebensela
Muciindi ca bene Isilaeli bakale kale, bantu bakalinga kuyeeya ayi inga kabapaila Yehova alimwi a Lesa wakubeca Baali. Sombi Yehova wakatuma mushinshimi wakwe Elija kwaamba ayi abacaafwe. Amubelenge 1 Baami 18:21, akubandika mwiipusho uyu:
Ino bene Isilaeli bakalinga kweelete kusalawo nshi?
Bweenka mbuli bene Isilaeli, aswebo tulyeelete kusalawo ngweshi tunoosebensela. Amubelenge Luka 16:13, akubandika miipusho iyi:
Ino nceebonshi inga tatusebenseli Yehova alimwi amuntu na cintu cimwi?
Ino inga twatondesha buyani kuli Yehova kwaamba ayi twasala kusebensela nguwe?
4. Amukutumane akuyeeya Yehova mbwaamusuni
Yehova wakatupa shipo shiinji shibotu abuumbi. Ino nshiinshi nsheenga twamupa? Amweebele VIDYO.
Ino ninshila nshi shimwi Yehova mbwamutondesha lusuno? Amubelenge Kulumbaisha 104:14, 15 alimwi a 1 Joni 4:9, 10, akubandika miipusho iyi:
Ino ncipo nshi kuswa kuli Yehova ncomulumba abuumbi?
Ino shipo isho shilamupa kulinyumfwa buyani pali nguwe?
Na twatambula cipo ncetusuni abuumbi, tulisuni kutondesha kulumba kuwooyo wakatupa. Amubelenge Dutolonomi 16:17, akubandika mwiipusho uyu:
Na mwayeeya pashintu shoonse Yehova nshaakamucitila, ino nciinshi nceenga mwasuna kumupa kwaamba ayi mutondeshe kulumba?
5. Kulyaaba kulaleta shoolwe shiinji
Bantu baanji balashoma ayi kupuka, kusebensa ncito ibotu, na kuba amaali aanji nkweenga kwabapa kuba alusangalalo. Sa ici ncancine? Amweebele VIDYO, lyalo akubandika miipusho itokonkelaawo.
Ino nceebonshi shikusekana boola watondeshekwa muvidyo wakacileka kusekana boola, nabi kwaamba ayi wakalinga kwiisuni abuumbi?
Wakasalawo kulyaaba kuli Yehova kuteshi kukusekana boola. Sa mutobona ayi wakasala kabotu? Ino nceebonshi?
Mutumwi Paulo kaatana kuba Mwineklistu, wakalinga kusebensa ncito yapeculu. Wakaiishikwa mu milawo yaba Juda kuli shikwiisha wakalinga kushibikitwe abuumbi. Sombi wakaishiya ncito iyo akuba Mwineklistu. Sa Paulo wakashiyeeya nshaakashiya? Amubelenge Bene Filipi 3:8, akubandika miipusho iyi:
Ino nceebonshi Paulo ncakaambila ayi nshaakalinga kucita kaatana kuba Mwineklistu shakalinga anga “nshakusowabo,” na mbuli matombe?
Ino wakacana mpindu nshi?
Sa kuli ncito imwi njeenga mweelanya kukusebensela Yehova?
Paulo ndyaakaba Mwineklistu, wakacana shoolwe shiinji kwiinda shintu nshaakashiya
BANTU BAMWI BALAAMBA AYI: “Kwaaba buumi bwako kuli Lesa teshi kuyeeya kabotu.”
Ino nceebonshi kulyaaba kuli Yehova ncintu cibotu?
CITEENTE CINENE
Kusuna Yehova kulatupa kulyaaba kuli nguwe akubombekwa.
Kwiindulukaamo
Ino nceebonshi tulyeelete kulambila akusuna Yehova camoyo woonse?
Ino ncilambu nshi Yehova ncaapa Bakamboni Bakwe bakabombekwa?
Sa inga mwasuna kulyaaba kuli Yehova?
AMULANGWETEEWO ASHIMWI
Amubone cakapa kwaamba ayi muntu wakalinga shikwiimba alimwi aumwi wakalinga shikusekana boola balyaabe kuli Yehova.
Miipusho Bacanike Njobeepusha—Ino Ndaakucita Nshi Abuumi Bwangu?—Mbocakalinga Kubwanike (6:54)
Amubone sheebo ashimwi sheenga shamucafwa kulyaaba.
“Ino Nceebonshi Mulyeelete Kulyaaba Kuli Yehova?” (Njashi Yamulindilishi, January 15, 2010)
Ndyemutokweebela vidyo ya nyimbo iyi, amubone abo balyaaba kuli Yehova mbobaba alusangalalo.
Ndyemutobelenga mutwi utokwaamba ayi “Kwa Myaaka Iinji Ndakalinga Kuliipusha ayi, ‘Ino Twakalengelwa Nshi?’” amubone shakapa kwaamba ayi mwanakashi aalule nshaakalinga kubika panembo mubuumi bwakwe.
“Baibo Ilaalula Buumi bwa Muntu” (Njashi Yamulindilishi, November 1, 2012)