Sa Mulilibambite Kwaaba Buumi Bwanu Kuli Yehova?

1-2. Ino nshiinshi muntu nshaeelete kucita kaatana kubombekwa?

MUMYAAKA 5 yainda, bantu beendilila 1 miliyoni bakabombekwa akuba Bakamboni Bakwe Yehova. Baanji pabaabo bakabombekwa, bakatalika kwiiya cancine “kuswa kubwanike” bweenka mbocakalinga kuli Timoti shikwiiya wakalingaako muciindi ca Beneklistu bakutaanguna. (2 Timo. 3:​14, 15) Bamwi bakeeya pali Yehova kabali banene lyalo bamwi kabali bacembela. Mwanakashi umwi wakalinga kwiiya Baibo a Bakamboni Bakwe Yehova myaaka iniini yainda, wakabombekwa kaacite myaaka 97!

² Na muli shikwiiya Baibo nabi na bashali banu Mbakamboni, sa mutoyeeya kubombekwa? Ici ncintu cibotu nceenga mwasalawo kucita! Nacibi boobo, kamutana kubombekwa, mulyeelete kwaaba buumi bwanu kuli Yehova. Mutwi uyu utomucafwa kushiba ncocaamba kwaaba buumi bwanu kuli Lesa. Alimwi utoomucafwa kushiba ncomuteelete kuwayawaya kwaaba buumi bwanu kuli Yehova akubombekwa na mwalibambila kucita boobo.

INO KULYAABA CILAAMBA NSHI?

3. Amwaambe shakubonenaako shamu Baibo sha bantu abo bakalinga kulyaabite kuli Yehova.

³ Mu Baibo, muntu wakalyaaba kuli Yehova wakalinga kupatulwa kwaamba ayi asebense ncito imwi ilibetele. Bene Isilaeli bakalinga mushobo wakalyaaba kuli Yehova. Sombi bene Isilaeli bamwi bakalinga kulyaabite kuli Yehova munshila ilibetele. Kucakubonenaako, Aloni wakalinga kufwala ‘keshibilo kasalalite kakulyaaba’ ka golodi ako kakalinga kuba peculu lya cisani ca kumutwi. Keela ako ka golodi kakalinga kutondesha ayi wakapatulwa kwaamba ayi asebense ncito ilibetele ya kuba mupailishi munene wa bene Isilaeli. (Lefi. 8:9) Ba Nasili abalo bakalinga kulyaaba kuli Yehova munshila ilibetele. Liswi lyakwaamba ayi “Munasili,” ilyo lyakaswa kuliswi lyamu ciEbulu lyakwaamba ayi nazirʹ, lilasansulula muntu “Wakapatulwa,” na “Wakalyaaba.” Ba Nasili bakalinga kweelete kukonkela milawo ilibetele njobakapekwa iyo yakalinga mu Milawo yakwe Mose.—Shakube. 6:​2-8.

4. (a) Ino nciinshi ciba ciyandika abuumbi kuli ndimwe na mwaaba buumi bwanu kuli Yehova? (b) Ino “kushiya akusuula shintu shoonse” cilaamba nshi? (Amubone acikope.)

⁴ Na mwaaba buumi bwanu kuli Yehova, mulasalawo kuba shikwiiya wakwe Yesu Klistu alimwi kucita kuyanda kwakwe Lesa kulaba cintu ciyandika abuumbi mubuumi bwanu. Ino nshiinshi shiilikitwe mukwaaba buumi bwanu kuli Yehova? Yesu wakaamba ayi: ‘Na muntu utooyanda kukonkela ndime, alyeelete kushiya akusuula shintu shoonse shimusangalasha.’ (Mate. 16:24) Maswi amu ciGiliki akasansululwa ayi “kushiya akusuula shintu shoonse” munshila imwi inga asansululwa ayi “kutanoocita shintu nshoosuni omwiine.” Mbuli musebenshi wakwe Yehova wakalyaaba, mulaakuyandika kutacita shintu shoonse shitasangalashi Yehova. (2 Koli. 5:​14, 15) Ici cilaamba ayi mulaakuyandika kucileka kucita “milimo ya buntu,” mbuli bufuule. (Gala. 5:​19-21; 1 Koli. 6:18) Sa kukonkela milawo iyo kulaakupa kwaamba ayi buumi bumuyumine? Teshi cikabe boobo na Yehova mulimusuni alimwi mulishomete ayi kukonkela milawo yakwe kulamucafwa nobeene. (Kulu. 119:97; Isa. 48:​17, 18) Mukwesu waliina lya Nicholas wakaamba ayi, “Inga kamubona milawo yakwe Yehova anga ntweela ntobabika ku jeele kwaamba ayi mutaciti shintu nshomusuni nabi anga ntweela ntobabika nkobalamina nkalamu kwaamba ayi shitamulyi.”

5. (a) Ino mulyeelete kucita buyani kwaamba ayi mwaabe buumi bwanu kuli Yehova? (b) Ino kulyaaba alimwi akubombekwa shilipusene buyani? (Amubone acikope.)

⁵ Ino mulyeelete kucita buyani kwaamba ayi mwaabe buumi bwanu kuli Yehova? Mulashomesha Yehova mumupailo ayi mulaakunolambila nguwe eenkabo alimwi mulaakubika panembo kucita kuyanda kwakwe mubuumi bwanu. Lyalo mulamushomesha ayi mulaakutolelela kumusuna ‘amoyo wanu woonse, abuumi bwanu boonse, amiyeeyo yanu yoonse alimwi ankusu shanu shoonse.’ (Maako 12:30) Mulalyaaba kuli Yehova kamulibo nweenka. Mubupusano, kubombekwa kulacitwa kunembo lya bantu baanji; alimwi bamwi balashiba ayi mwakalyaaba kuli Lesa. Kulyaaba ncishomesho ciyandika abuumbi. Mulyeelete kuba bashinishite kucita kweelana ambomwakashomesha Yehova alimwi alakwe mbwaamulangila kucita.—Shiku. 5:​4, 5.

INO NCEEBONSHI MULYEELETE KWAABA BUUMI BWANU KULI YEHOVA?

6. Ino nciinshi cipa kwaamba ayi muntu asalewo kwaaba buumi bwakwe kuli Yehova?

⁶ Cinene ceelete kumupa kwaaba buumi bwanu kuli Yehova nceebo cakwaamba ayi mulimusuni. Mulimusuni Yehova kuteshibo ceebo ca mbomulinyumfwa. Mwakeeya kusuna Yehova ceebo cakuba a “lushibo lwancinencine” palinguwe a pakuyanda kwakwe. (Kolo. 1:​9, NWT) Kwiiya Malembo kwakamucafwa kushoma cakutatoonsha ayi (1) Yehova nkwaali, (2) Baibo nga Maswi akwe akatanjililwa amushimu usalashi, alimwi (3) alasebensesha libunga lyakwe kukumanisha kuyanda kwakwe.

7. Ino nshiinshi nshotweelete kunoocita katutana kwaaba buumi bwesu kuli Lesa?

⁷ Abo baaba buumi bwabo kuli Yehova balyeelete kushiba njiisho shakutaanguna shamu Maswi akwe Lesa alimwi akunooshikonkela mubuumi bwabo. Balacita nsheenga bacikonsha kulwiitako bamwi shintu nshobakeeya. (Mate. 28:​19, 20) Lusuno lwabo pali Yehova lulakomenenaako alimwi balasunishisha kunolambila nguwe eenkabo. Sa ubu mbocibete akulindimwe? Na kamusuni Yehova amoyo wanu woonse, teshi mukasalewo kwaaba buumi bwanu kuli nguwe akubombekwa kwaamba ayi musangalashe batomwiisha Baibo na bashali banu nabi kusalawo kucita boobo ceebo cakwaamba ayi beshicibusa banu boonse mbobatoocita.

8. Ino kulumba inga kwamucafwa buyani kwaamba ayi musalewo kwaaba buumi bwanu kuli Yehova? (Kulumbaisha 116:​12-14)

⁸ Na mwayeeya pashintu shoonse Yehova nshaakamucitila, mulaakumulumba akusuna kwaaba buumi bwanu kuli nguwe. (Amubelenge Kulumbaisha 116:​12-14.) Baibo ilaamba lushinisho ndyeyaamba ayi Yehova Ngootupa “shipo shoonse shibotu shitacite kampenda.” (Jemu. 1:17) Cipo ciinditeewo ncaakatupa ngumulambu wakwe Yesu, Mwanaakwe. Amuyeeyebo cipo ici mbocilibetele! Cilubula cakapa kwaamba ayi cikonsheke kuli ndimwe kuba abushicibusa buyumu a Yehova. Alimwi wakamupa coolwe cakulangila kuba abuumi butamaani. (1 Joni 4:​9, 10, 19) Kwaaba buumi bwanu kuli Yehova ninshila ibotu abuumbi mbweenga mwatondesha kulumba palusuno lwiinditeewo ndwaakamutondesha, kwiilikaawo a pashoolwe shimwi shoonse nshaakamupa. (Duto. 16:17; 2 Koli. 5:15) Shimwi nsheenga mwaciita kwaamba ayi mutondeshe kulumba shilacanika muciiyo 46 citeente 4, mulibuku lya Amusangalale Abuumi Kwamuyayaya! kwiilikaawo amakani ali muvidyo yamamineti otatwe icite mutwi waamba ayi Kupa Shipo Shesu Kuli Lesa.

SA MULILIBAMBITE KULYAABA AKUBOMBEKWA?

9. Ino nceebonshi muntu taaelete kulyeelanya kubamwi ndyatoyeeya kulyaaba kuli Yehova?

⁹ Mpashi inga mwalinyumfwa ayi tamulibambiteewo kulyaaba akubombekwa. Mpashi muciyandika kwaalulako buumi bwanu kwaamba ayi munookonkela njiisho shakwe Yehova, na mpashi muciyandika ciindi kwaamba ayi muyumye lushomo lwanu. (Kolo. 2:​6, 7) Bashikwiiya Baibo balapusanapusana mbobaya panembo, alimwi teshi bacanike boonse baba balibambite kulyaaba akubombekwa paciimo comwi. Amweeleshe kushiba nshomutoyandika kusebenselaawo akucita nsheenga mwacikonsha kwakubula kulyeelanya kubamwi.—Gala. 6:​4, 5.

10. Ino nshiinshi nsheenga mwaciita na mwashiiba ayi tamulibambiteewo kwaaba buumi bwanu kuli Yehova akubombekwa? (Amubone akabokosi kacite mutwi utokwaamba ayi “Ku Bamakwesu Abenankashi Bacanike.”)

¹⁰ Nabi kwaamba ayi mwashiiba ayi tamulibambiteewo kwaaba buumi bwanu kuli Yehova, amutolelele kuyeeya pakulyaaba. Amusenge Yehova kwaamba ayi amucaafwe kwaalulako shimwi mubuumi bwanu. (Filip. 2:13; 3:16) Inga mwashooma ayi alaakukutika kumupailo wanu akumucafwa.—1 Joni 5:14.

CIPA KWAAMBA AYI BAMWI BANOWAYAWAYA KULYAABA AKUBOMBEKWA

11. Ino Yehova alaakutucafwa buyani kwaamba ayi tutolelele kushomeka kuli nguwe?

¹¹ Bamwi balibambite kulyaaba akubombekwa balawayawaya kucita boobo. Mpashi inga balisukama akuyeeya ayi, ‘Ino na nkacite cilubo cinene pesule lyakubombekwa lyalo bakankuushe mulibungano?’ Na ico ncomuloonda, amushibe kwaamba ayi Yehova alaakunoomucafwa kwaamba ayi ‘munookala buumi mbwaasuni akumusangalasha lyoonse.’ (Kolo. 1:10) Alimwi alaakumupa nkusu shakucita shiluleme. Wakacafwawo kale bamwi baanji kucita shiluleme. (1 Koli. 10:13) Ici ncoceebo comwi cipa kwaamba ayi kunokushikwabo bantu baniini mulibungano lya Bwineklistu. Yehova alacafwa bantu bakwe kutolelela kushomeka.

12. Ino nshiinshi sheenga shatucafwa kuleya kucita shilubo shinene?

¹² Bantu boonse batamaninite baleeleshekwa kucita shibiibi. (Jemu. 1:14) Nacibi boobo, mulyeelete kusalawo nsheshi mukacite na mukeeleshekwe. Cancine ncakwaamba ayi mwebo nobeene ndimwe mweelete kusalawo nsheshi mukanoocita mubuumi bwanu. Bantu bamwi balaamba ayi inga tatucikoonshiiwo kwaalula mbotulinyumfwa anshotucita. Sombi ubo mbubeshi. Inga mweeya kulikasha ku lunkumbwa lutabete kabotu. Aboobo nabi kwaamba ayi mweeleshekwa, inga mwasalawo kutacita cibiibi. Kuli shintu ashimwi sheenga shamucafwa kuleya kucita shibiibi. Kucakubonenaako, munoopaila kuli Yehova lyoonse, munoocita ciiyo ca Baibo capalwaanu, munoocanika kumabungano alimwi munoolwitako bamwi nshomutokwiiya. Kucita shintu ishi lyoonse kulaakumucafwa kutolelela kushomeka kuli Yehova. Alimwi lyoonse munokwiibaluka ayi Yehova alaakumucafwa kucita boobo.—Gala. 5:16.

13. Ino ncakubonenaako nshi cibotu Josefu ncaakatutondesha?

¹³ Cilaakumubeta cuubu kutolelela kushomeka kuli Yehova na mwasalila limwi nsheshi mukacite na mukeeleshekwe. Mu Baibo muli shakubonenaako sha bantu bamwi bakacikonsha kucita boobo, nabi kwaamba ayi abalo tabakalinga kumaninitewo. Kucakubonenaako, mankanda aanji muka Potifa wakeelesha kuyunga Josefu kwaamba ayi abishe. Sombi Josefu wakalinga kucishi kale ncaakalinga kweelete kucita. Baibo ilatulwiita ayi “wakakaka,” alimwi wakaamba ayi: “Ono nebo inga ndacita buyani cintu cibiibi ca mushobo uyu pameenso akwe Lesa?” (Mata. 39:​8-10) Ncakutatoonsha kwaamba ayi Josefu wakalinga kucishi cakucita nabi muka Potifa kaatana kumweelesha. Ici cakapa kwaamba ayi cimubete cuubu kucita cintu ciluleme ndyakeeleshekwa.

14. Ino nshiinshi nsheenga twaciita kwaamba ayi tuleye kucita shibiibi?

¹⁴ Ino cakubonenaako cakwe Josefu inga mwacikonkela buyani kwaamba ayi mutolelele kushomeka kuli Yehova na mweeleshekwa? Inga mwasalila limwi nsheshi mukacite na mukeeleshekwe. Amwiiye kukaka peenkaapo shintu Yehova nshaapatite akutanoshiyeeya nabibo paniini. (Kulu. 97:10; 119:165) Na mwacita boobo teshi mukabisheewo na mweeleshekwa. Mulaakunocishi kale nshomweelete kucita na mweeleshekwa.

15. Ino muntu inga watondesha buyani ayi atoyandoola Yehova camoyo woonse? (Bene Ebulu 11:6)

¹⁵ Mpashi mulicishi ayi ncemutokwiiya ncocancine alimwi mulisuni kusebensela Yehova amoyo wanu woonse, sombi kuli cintu cimwi citoomupa kuwayawaya kulyaaba akubombekwa. Inga mwacita Mwaami Defedi nshaakacita. Inga mwasenga Yehova ayi: ‘Noba Lesa, amunangenange kwaamba ayi mwishibe moyo wangu. Amunjeleshe kwaamba ayi mwishibe miyeeyo yangu. Amubone na ndakonkela nshila shibiibi. Lyalo muntanjilile munshila yanu yamuyayaya.’ (Kulu. 139:​23, 24) Yehova alabapa shoolwe abo “bamuyandoola camoyo woonse.” Kusebensa cankusu kwaamba ayi mwaabe buumi bwanu kuli Yehova akubombekwa kulatondesha ayi mutomuyandoola amoyo wanu woonse.—Amubelenge Bene Ebulu 11:6.

AMUTOLELELE KUYUMYA BUSHICIBUSA BWANU A YEHOVA

16-17. Ino Yehova alabasenya buyani kuli nguwe abo bacite bashali Bakamboni? (Joni 6:44)

¹⁶ Yesu wakaamba ayi bashikwiiya bakwe, Yehova ngobasenya. (Amubelenge Joni 6:44.) Amuyeeyebo ici mbociyuminisha ancocaamba kuli ndimwe. Yehova alabona shibotu mumuntu womwi awomwi akumusenya kuli nguwe. Alabona muntu uyo ayi “ncintu ciyandika abuumbi” kuli nguwe. (Duto. 7:​6, NWT) Ubu amwebo mbwaamubona.

¹⁷ Ano mpashi muli wacanike ucite bashali Bakamboni. Inga kamulinyumfwa ayi mulasebensela Yehova ceebo cakwaamba ayi bashali banu Mbakamboni kuteshi ceebo cakwaamba ayi Yehova wakamusenya kuli nguwe. Nacibi boobo, Baibo ilaamba ayi: ‘Amusene pafwiifwi a Lesa alakwe alaakusena pafwiifwi amwebo.’ (Jemu. 4:8; 1 Maka. 28:9) Na mwacitawo comwi kwaamba ayi musene pafwiifwi a Yehova, alakwe alaakusena pafwiifwi andimwe. Yehova taamubonibo ayi muli lubasu lwa mukwashi momubete. Alasenya muntu womwi awomwi kuli nguwe, kwiilikaawo abaabo bacite bashali Bakamboni. Kweelana a Jemusi 4:8 mboyaamba, na muntu wasalawo kusena pafwiifwi a Yehova, alakwe alasena pafwiifwi anguwe.—Amweelanye a 2 Bene Tesalonika 2:13.

18. Ino tulaakwiiya nshi mumutwi utokonkelaawo? (Kulumbaisha 40:8)

¹⁸ Na mwaaba buumi bwanu kuli Yehova akubombekwa, mulakonkela cakubonenaako cakwe Yesu. Wakalyaaba kuli Baishi kuswa panshi lyamoyo kwaamba ayi acite cili coonse nceenga bamulwiita. (Amubelenge Kulumbaisha 40:8; Ebu. 10:7) Mumutwi utokonkelaawo, tulaakwiiya sheenga shamucafwa kutolelela kusebensela Yehova cakushomeka pesule lyakubombekwa.