Amutolelele Kukonkela Cakubonenaako Cakwe Yesu Pesule Lya Kubombekwa

1-2. Ino nshoolwe nshi muntu nshaacana pesule lya kubombekwa?

CILASANGALASHA abuumbi na twabombekwa akuba lubasu lwa mukwashi wakwe Yehova. Ncoolwe cilibetele kuba abushicibusa buyumu a Yehova. Tulalinyumfwa bweenka shikulumbaisha Defedi mbwaakalinyumfwa ndyaakaamba ayi: ‘Balisangalete abo mbomwakasala akusenya kuli ndimwe [no Yehova], abo mbomwakaleta ayi bekale mumusena wanu usalalite.’—Kulu. 65:4.

² Ino mbantu ba buyani Yehova mbwaasuminisha kuba lubasu lwa mukwashi wakwe? Kweelana ambotwakeeya mumutwi wamana, alasalawo kusenya pafwiifwi anguwe abo batondesha ayi balisuni kuba abushicibusa buyumu anguwe. (Jemu. 4:8) Na mwaaba buumi bwanu kuli Yehova akubombekwa, mulaba abushicibusa bulibetele anguwe. Inga mwashoma cakutatoonsha ayi pesule lya kubombekwa, ‘alaakumupuumwita shoolwe shiinji cakwaamba ayi mukabule apakushibika.’—Mala. 3:10; Jele. 17:​7, 8.

3. Ino nciinshi ciyandika abuumbi Beneklistu bakalyaaba akubombekwa ncobeelete kutolelela kucita? (Shikushimikila 5:​4, 5)

³ Kubombekwa ngamatalikilobo akusebensela Yehova. Pesule lya kubombekwa, mulaakusuna kucita nsheenga mwacikonsha kwaamba ayi mutolelele kushomeka kuli Yehova ndyemweeleshekwa kucita shibiibi nabi ndyemuli mubukaalo buyumu. (Amubelenge Shikushimikila 5:​4, 5.) Mbuli shikwiiya wakwe Yesu, mulaakutolelela kweelesha cankusu kukonkela cakubonenaako cakwe amilawo yakwe. (Mate. 28:​19, 20; 1 Pit. 2:21) Mutwi uyu utoomucafwa kucita boobo.

AMUTOLELELE KUKONKELA CAKUBONENAAKO CAKWE YESU NDYEMWEELESHEKWA ANDYEMULI MUBUKAALO BUYUMU

4. Ino bashikwiiya bakwe Yesu balanyamuna ‘cisamu cakupenshesha’ munshila nshi? (Luka 9:23)

⁴ Tamweelete kulangila ayi pesule lya kubombekwa teshi mukanokwiinda mumapensho. Yesu wakaamba cakuteenda mweela ayi bashikwiiya bakwe balaakunyamuna ‘cisamu cakupenshesha.’ Alimwi balaakunoocita boobo ‘bushiku abushiku.’ (Amubelenge Luka 9:23.) Sa Yesu wakalinga kusansulula ayi bashikwiiya bakwe bananokwiindabo mumapensho lyoonse? Sobwe napaceyi. Sombi wakalinga kusuni ayi bashibe ayi kwiilika pashoolwe nshobakalinga kusa mukucana, balaakunokwiinda mumapensho. Mapensho ayo amwi inga aba ayumu abuumbi.—2 Timo. 3:12.

5. Ino nshoolwe nshi Yesu nshaakashomesha baabo balyaaba?

⁵ Mpashi bamumukwashi wanu bakalinga kumupikisha na mpashi mwakalyaaba kutaba amaali ashintu shiinji lwakumubili kwaamba ayi mubike sha Bwaami panembo. (Mate. 6:33) Na ubo mbocibete, amushibe kwaamba ayi Yehova alicishi shoonse nshomwakamucitila. (Ebu. 6:10) Mpashi amwebo mwakabona ayi maswi Yesu ngakaamba ngancine, ndyakaamba ayi: ‘Ndushinisho ntoomulwiita ayi taaku muntu uyo wakashiya Ŋanda yakwe nabi wakashiya banandumi, banankashi shakwe, banyina, baishi, baana nabi myuunda ceebo ca ndime alimwi a makani abotu eshi akabule kutambula myaanda ya shintu paciindi cino, nkokwaamba ayi maanda, banandumi, banankashi shakwe, banyina, baana alimwi amyuunda, sombi alaakutambula alimwi amapensho. Ono sombi muciindi citoosa, alaakutambula buumi butamaani.’ (Maako 10:​29, 30) Shoolwe nshomwakacana shiliindite pakulyaaba kuli koonse nkomwakacita.—Kulu. 37:4.

6. Ino nceebonshi mulaakuyandika kutolelela kulwana ‘lunkumbwa lwamubili’ pesule lya kubombekwa?

⁶ Mulaakuyandika kutolelela kulwana ‘lunkumbwa lwamubili’ pesule lya kubombekwa. (1 Joni 2:16) Cili boobo mukwiinga tamumaninite. Cimwi ciindi mpashi inga kamulinyumfwa mbuli mutumwi Paulo, uyo wakalemba ayi: ‘Ndakondwa amoyo wangu woonse ceebo ca Milawo iswa kuli Lesa. Sombi ndishi kwaamba ayi muli ndime muli mulawo uyo utasuni miyeeyo yangu. Mulawo umwi uyo ukonkela nshila ya bubi ngoulengesha ayi mbe musha wa bubi.’ (Loma. 7:​22, 23) Inga mwalinyumfwa kulefuka ceebo cakulwana lunkumbwa lutabete kabotu. Nacibi boobo, kuyeeya pa ncomwakashomesha Yehova ndyemwakaaba buumi bwanu kuli nguwe, kulaakumucafwa kuba bashinishite kukaka meelesho. Cishomesho ico cilaakumucafwa na mweeleshekwa. Munshila nshi?

7. Ino kwaaba buumi bwanu kuli Yehova kulaakumucafwa buyani kutolelela kushomeka kuli nguwe?

⁷ Na mwaaba buumi bwanu kuli Yehova, mulashiya akusuula shintu shoonse shimusangalasha. Ici cilaamba ayi mulasalawo kucileka kucita shintu nshomusuni anshomukuumbwa sheenga shakalasha Yehova. (Mate. 16:24) Aboobo na mweeleshekwa, teshi mukatalike kuyeeya nshomweelete kucita. Mulaakunocishi kale shakucita, nkokwaamba ayi kutolelela kushomeka kuli Yehova. Mulaakutolelela kuba bashinishite kusangalasha Yehova. Mulaakuba anga ngu Jobo. Nabi kwaamba ayi wakeenda mumapensho ayumu abuumbi, wakaamba cakutatoonsha ayi: ‘Kushikila nkafwe, teshi nkacileke kushomeka!’—Jobo 27:5.

8. Ino kukutumana kuyeeya pa nshomwakashomesha Yehova mumupailo ndyemwakalinga kulyaaba, inga kwamucafwa buyani kukaka bweelesho?

⁸ Kukutumana kuyeeya pa nshomwakashomesha Yehova mumupailo ndyemwakalinga kulyaaba, kulaakumucafwa kukaka bweelesho buli boonse. Kucakubonenaako, sa inga mwatalika kutondesha lusuno lwamucikwati kumuntu weebete na weebetwe kuumwi? Sobwe napaceyi! Mwakashomesha kale Yehova ayi inga tamuciti boobo. Na mwacita boobo, teshi mukapenge kulwana lunkumbwa lutabete kabotu pesule lyakwaamba ayi lwatalika. Mulaakusonoka ku ‘nshila sha bamucita shibiibi.’—Tus. 4:​14, 15.

9. Ino kukutumana kuyeeya pa nshomwakashomesha Yehova mumupailo ndyemwakalinga kulyaaba, inga kwamucafwa buyani kutolelela kubika kulambila Yehova panembo mubuumi bwanu?

⁹ Ino mbuyani na mwacana ncito yeshi ikape kwaamba ayi mutanoocanika kumabungano lyoonse? Inga kamucishi kale cakucita. Kamutana kucana ncito iyo, mwakasalawo kale ayi inga tamusumini kunjila ncito yeenga yapa kwaamba ayi cimwi ciindi munoolofwa kumabungano. Aboobo inga tamusumini kunjila ncito iyo lyalo akweelesha kucana nshila sha mbweenga mwabika Yehova panembo. Kukutumana kuyeeya pacakubonenaako cakwe Yesu inga kwatucafwa. Wakalinga kushinishite kusangalasha Baishi. Bweenka mbuli Yesu, amube bashinishite kukaka cakushinisha peenkaapo cintu cili coonse ncomucishi ayi inga cakalasha Lesa uyo ngomwakashomesha cakulumbila.—Mate. 4:10; Joni 8:29.

10. Ino Yehova alaakumucafwa buyani pesule lya kubombekwa kwaamba ayi mutolelele kukonkela cakubonenaako cakwe Yesu?

¹⁰ Cancine ncakwaamba ayi kweeleshekwa akwiinda mubukaalo buyumu kulamupa coolwe cakutondesha ayi mulishinishite kutolelela kukonkela cakubonenaako cakwe Yesu. Alimwi inga mwashoma cakutatoonsha ayi Yehova alaakumucafwa kucita boobo. Baibo ilaamba ayi: ‘Lesa ulashomeka alimwi inga taamulekeli mumasunko ngomutakoonshi kuliyumya. Sombi na mwasuunkwa, Lesa ulamupa nshila yakuleyelamo masunko ayo kwaamba ayi muliyumye.’—1 Koli. 10:13.

NSHEENGA MWACIITA KWAAMBA AYI MUTOLELELE KUKONKELA CAKUBONENAAKO CAKWE YESU

11. Ino ninshila nshi yomwi ibotu abuumbi yeenga yamucafwa kutolelela kukonkela cakubonenaako cakwe Yesu? (Amubone acikope.)

¹¹ Yesu wakasebensela Yehova amoyo woonse, alimwi wakatolelela kuyumya bushicibusa bwakwe a Baishi kwiinda mukupaila. (Luka 6:12) Nshila yomwi ibotu abuumbi yeenga yamucafwa kutolelela kukonkela cakubonenaako cakwe Yesu pesule lya kubombekwa, nkwiinda mukutolelela kucita shintu sheenga shayumya bushicibusa bwanu a Yehova. Baibo ilaamba ayi: “Kweelana akuya panembo nkotwacita kale, atutolelele kweenda kabotu munshila yeenka iyi.” (Filip. 3:​16, NWT) Ciindi aciindi, munanonyumfwa shakubonenaako sha bamakwesu abenankashi abo bakasalawo kucita shiinji muncito yakwe Yehova. Mpashi bakacanika ku Cikolo ca Bashimikila sha Bwaami na kuya mukusebensela kumusena ubulishite. Na kacikonsheka, amwebo amusalewo kucita boobo. Bantu bakwe Yehova balisunishishi kucana nshila sha mbweenga bacita shiinji muncito yakwe. (Milimo 16:9) Ano ino mbuyani na pacecino ciindi inga tamucikoonshi kucita boobo? Mutanoolinyumfwa ayi taakuwo mbomubete kubaabo beenga bacikonsha. Ciyandika abuumbi nkutolelela kuliyumya. (Mate. 10:22) Mutaluubi kwaamba ayi mulasangalasha Yehova abuumbi na kamucita nsheenga mwacikonsha kweelana abukaalo bwanu. Iyi ninshila iyandika abuumbi mbweenga mwatolelela kukonkela cakubonenaako cakwe Yesu pesule lya kubombekwa.—Kulu. 26:1.

12-13. Ino nshiinshi nsheenga mwaciita na mwacileka kusangalala kusebensela Yehova? (1 Bene Kolinto 9:​16, 17) (Amubone akabokosi kacite mutwi utokwaamba ayi “Amutolelele Kucica.”)

¹² Ino inga mwacita buyani na mutolinyumfwa ayi tamutopaila kuswa panshi lya moyo na tamutosangalala muncito yakushimikila mbuli kale kale? Ino mbuyani na tamutosangalala kubelenga Baibo mbuli mbocakalinga kale kale? Na mwatalika kulinyumfwa boobo pesule lya kubombekwa, mutayeeyi ayi Yehova wacileka kumucafwa amushimu wakwe usalashi. Mukwiinga tatumaninite, inga katulinyumfwa munshila shipusenepusene. Na mwacileka kusangalala kusebensela Yehova, amuyeeye pacakubonenaako ca mutumwi Paulo. Nabi kwaamba ayi Paulo wakalinga kweelesha kukonkela cakubonenaako cakwe Yesu, wakalinga kucishi ayi cimwi ciindi taakalinga kusunishisha kucita shintu nsheenga kaayandika kucita. (Amubelenge 1 Bene Kolinto 9:​16, 17.) Wakaamba ayi: “Mukwiinga nshikwe kuliyandila, ndasebensabo ceebo Lesa ngowakantuma.” Munshila imwi inga twaamba ayi Paulo wakalinga kushinishite kukumanisha ncito yakushimikila teshi mulandu ambwaakalinga kulinyumfwa shiindi shimwi.

¹³ Amwebo mutanosalabo shakucita ceebo ca mbomutolinyumfwa. Amube bashinishite kucita ciluleme nabi ndyemutolinyumfwa ayi tamusuni kucita cintu ico. Na mwatolelela kucita ciluleme, mukuya kwaciindi mulaakutalika kusunishisha kucita cintu ico. Alimwi na mwatolelela kuba amulongo wakucita shintu shakumushimu mbuli kucita ciiyo capalwaanu, kupaila, kucanika kumabungano akwaabanamo lubasu muncito yakushimikila, shilaakumucafwa kutolelela kukonkela cakubonenaako cakwe Yesu pesule lya kubombekwa. Na bamakwesu abenankashi babona mbomutoliyumya ndyemutosebensela Yehova, balaakuyuminishikwa.—1 Tesa. 5:11.

AMUTOLELELE ‘KULYEELESHA’

14. Ino nshiinshi nshotweelete kunolilanga langa ciindi aciindi, alimwi ino nceebonshi? (2 Bene Kolinto 13:5)

¹⁴ Cimwi ceshi cikamucaafwe pesule lya kubombekwa, nkunolilanga langa lyoonse. (Amubelenge 2 Bene Kolinto 13:5.) Ciindi aciindi, ncibotu kulilanga langa akubona na mulapaila bushiku abushiku, mulabelenga akwiiya Baibo, mulacanika kumabungano alimwi ana mulaabanamo lubasu muncito yakushimikila. Amweeleshe kucana nshila sha mbweenga kamusangalala kucita shintu ishi. Kucakubonenaako, inga mwaliipusha miipusho mbuli: ‘Sa inga ndacikonsha kusansulwiitako bamwi njiisho shakutaanguna shamu Baibo? Sa kuli shimwi nsheenga ndaciita kwaamba ayi incito yakushimikila inonsangalasha abuumbi? Ino nshintu nshi nshompaililawo bunene, alimwi sa shilatondesha ayi ndacinka manungo muli Yehova cakumaninina? Sa ndacanika kumabungano lyoonse? Ino nshiinshi nsheenga ndaciita kwaamba ayi nookutika cakubikila maano akwaabanamo lubasu ndyetutobungana?’

15-16. Ino nshiinshi nshomweeya kushakacitikila mukwesu umwi pamakani akukaka bweelesho?

¹⁵ Alimwi cilayandika kushiba shintu nshemutaciti kabotu. Mukwesu waliina lya Robert wakaamba shakamucitikila shakatondesha kuyandika kwakucita boobo. Wakaamba ayi: “Ndyendakalinga kucite myaaka 20, ndakalinga kusebensako ncito imwi. Bushiku bumwi pesule lyakukotoka, mwanakashi umwi ngotwakalinga kusebensaakwe wakandwiita ayi tuye soonse kumishaabo. Wakaamba ayi tutobabo sweenka alimwi tutolisangalasha. Pakutaanguna, nshina kukaka cakushinisha, sombi mukweelaako ndakakaka akumusansulwiita ncondakakakila.” Ba Robert bakakaka bweelesho alimwi bakacita kabotu. Sombi pesule bakayeeya pashakacitika akushiba ayi bakalinga kweelete kucita shintu munshila ipuseneeko. Bakaamba ayi: “Nshina kukaka cakushinisha na kukaka peenkaapo mbuli Josefu mbwaakacita muka Potifa ndyaakamweelesha. (Mata. 39:​7-9) Alimwi ndakakankamana mbocakanjumina kukaka. Bukaalo ubu bwakancafwa kushiba ayi ndakalinga kuyandika kuyumya bushicibusa bwangu a Yehova.”

¹⁶ Kulilanga langa bweenka ba Robert mbobakacita inga kwamucafwa. Nabi kwaamba ayi mwacikonsha kukaka bweelesho, amuliipushe ayi, ‘Ino pakeenda ciindi cilaamfu buyani kwaamba ayi nkake bweelesho?’ Na mutobona ayi mutoyandika kwaalulako mbomucita, mutalefuki. Amusangalale kwaamba ayi mwashiiba lubasu ndomweelete kusebenselaawo. Amupailileewo akucita shintu sheenga shamucafwa kusunishisha kunoonyumfwila Yehova.—Kulu. 139:​23, 24.

17. Ino liina lyakwe Yehova lilalemekwa buyani na twatolelela kushomeka kuli nguwe?

¹⁷ Kuli ashimwi nsheenga tweeya ku shakacitikila ba Robert. Bakatolelela akwaamba ayi: “Pesule lyakukaka kuyaakwe kumishaabo, wakandwiita ayi, ‘Wapaasa testi!’ Ndakamwiipusha ncaakalinga kusansulula. Wakaamba ayi shicibusa wakwe umwi musankwa uyo pakutaanguna wakalinga Kamboni, wakamulwiita ayi Bakamboni bacanike boonse balacita shibiibi mubushishi na baba acoolwe cakucita boobo. Aboobo mwanakashi uyo wakalwiita shicibusa wakwe ayi atonjelesha kwaamba ayi abone na anebo mbombete. Ndakasangalala abuumbi ndyendakashiba ayi ndakalemeka liina lyakwe Yehova.”

18. Ino nshiinshi nshomushinishite kucita pesule lya kubombekwa? (Amubone akabokosi kacite mutwi utokwaamba ayi “Mitwi Yobilo Njeshi Mukasangalale Kubelenga.”)

¹⁸ Na mwaaba buumi bwanu kuli Yehova akubombekwa, mulatondesha ayi mulisuni kusalasha liina lyakwe tacicite mulandu asheenga shacitika. Alimwi inga mwashooma ayi Yehova alicishi bukaalo mbomwiindaamo ameelesho ngomukaka. Alaakumucafwa pakweelesha cankusu kwanu kwaamba ayi mutolelele kushomeka. Inga mwashoma ayi alaakumupa nkusu shakucita boobo, kwiinda mumushimu wakwe usalashi. (Luka 11:​11-13) Kwiinda mulucafwo lwakwe Yehova, mulaakucikonsha kutolelela kukonkela cakubonenaako cakwe Yesu pesule lya kubombekwa.