CIIYO 34
Ino Inga Twatondesha Buyani ayi Tulimusuni Yehova?
Sa mulimusuni abuumbi Lesa, kwiinda ndyemwakatalikabo kwiiya Baibo? Sa inga mwasuna kutolelela kuyumya bushicibusa bwanu anguwe? Na mboboobo, amwiibaluke kwaamba ayi na lusuno lwanu pali Yehova lwaya panembo, alakwe alaakumusuna abuumbi akumubikila maano. Ino inga mwacita buyani kwaamba ayi mutondeshe ayi mulimusuni?
1. Ino nshiinshi nsheenga twaciita kwaamba ayi tutondeshe ayi tulimusuni Yehova?
Tulatondesha ayi tulimusuni Yehova kwiinda mukumunyumfwila. (Amubelenge 1 Joni 5:3.) Taakakatishi muntu uli woonse kumunyumfwila. Sombi alapa coolwe kumuntu uli woonse cakusalaawo kumunyumfwila na sobwe. Ino nceebonshi? Yehova alisuni ayi ‘tunoomunyumfwila amoyo woonse.’ (Bene Loma 6:17) Nkokwaamba ayi alisuni ayi munoomunyumfwila ceebo cakwaamba ayi mulimusuni, kuteshi ceebo cakwaamba ayi mulyeelete kucita boobo. Lubasu 3 alimwi a 4 lwa libuku ili lwakabambilwa kumucafwa kushiba mbweenga mwatondesha ayi mulimusuni Yehova kwiinda mukucita shintu shimusangalasha alimwi akuleya kucita nshaapatite.
2. Ino nceebonshi inga caba ciyumu kutondesha ayi tulimusuni Yehova?
Baibo ilaamba ayi: “Muntu ululeme uleenda mumapensho aanji.” (Kulumbaisha 34:19) Soonse tulaalilwa kucita shintu shimwi ceebo cakuba bantu batamaninite. Alimwi cimwi ciindi inga twaba alipenshi lyakubula maali, kulyatililwa, alimwi amapensho amwi. Ndyetutokwiinda mumapensho, inga caba ciyumu kukonkela Yehova nshaatulwiita. Mukwiinga nshila itabete kabotu njeenga yaboneka yuubu kukonkela. Ano na cakushomeka mwakonkela Yehova nshamulwiita, mulatondesha ayi mulimusuni kwiinda cintu cili coonse. Alimwi kucita boobo kulatondesha ayi mulashomeka kuli nguwe. Lyalo alakwe alaakunooshomeka kuli ndimwe. Teshi akamushiyewo.—Amubelenge Kulumbaisha 4:3.
AMWIIYILEWO ASHIMWI
Amwiiye cilengesha kwaamba ayi Yehova anoosangalala na kamumunyumfwila, asheenga shamucafwa kutolelela kumunyumfwila.
3. Makani akumite ndimwe
Kweelana a Baibo nshoyaamba mulibuku lyakwe Jobo, Satana taakwe kubekeshabo Jobo, sombi wakabekesha bantu boonse basuni kusebensela Yehova. Amubelenge Jobo 1:1, 6–2:10, akubandika miipusho iyi:
Kweelana a Satana nshaakaamba, ino nceebonshi Jobo wakalinga kunyumfwila Yehova?—Amubone Jobo 1:9-11.
Ino mbubeshi nshi Satana mbwaabeca pabantu boonse kwiilikaawo andimwe?—Amubone Jobo 2:4.
Amubelenge Jobo 27:5b, akubandika mwiipusho uyu:
Ino Jobo wakatondesha buyani ayi ncakwiila wakalinga kusuni Yehova?
Jobo wakatondesha ayi wakalinga kusuni Yehova kwiinda mukutolelela kushomeka
Tulatondesha ayi tulisuni Yehova kwiinda mukutolelela kushomeka kuli nguwe
4. Amulengeshe Yehova kukondwa
Amubelenge Tushimpi 27:11, akubandika miipusho iyi:
Ino Yehova alalinyumfwa buyani na mwatondesha busongo akumunyumfwila? Ino nceebonshi?
5. Inga mwacikonsha kushomeka kuli Yehova
Tulalwiitako bamwi pali Yehova mukwiinga tulimusuni. Kushomeka kwesu kuli nguwe kulatucafwa kushimikila bamwi nabi ndyecibete ciyumu kucita boobo. Amweebele Vidyo, lyalo akubandika miipusho itokonkelaawo.
Sa cilamuyumina kulwiitako bamwi pali Yehova?
Kweelana anshomweebela muvidyo, ino nciinshi cakacafwa ba Grayson kucileka kuloonda?
Cilaba cuubu kushomeka kuli Yehova na katusuni nshaasuni akupata nshaapatite. Amubelenge Kulumbaisha 97:10, akubandika miipusho iyi:
Kweelana anshomweeya, ino nshintu nshi shimwi Yehova nshaasuni? Ino nshintu nshi shimwi nshaapatite?
Ino inga mwacita buyani kwaamba ayi mwiiye kusuna shibotu akupata shibiibi?
6. Kunyumfwila Yehova kulatucafwa
Lyoonse kunyumfwila Yehova nkubotu. Amubelenge Isaya 48:17, 18, akubandika miipusho iyi:
Sa mutoobona ayi inga twashoma ayi Yehova alisuni ayi shintu shinotweendela kabotu? Ino nciinshi ncemwaambila boobo?
Kuswa ciindi ndyemwakatalika kwiiya, ino mbubotu nshi mbomwacana mukwiiya Baibo akushiba Lesa wancine Yehova?
BANTU BAMWI BALAAMBA AYI: “Lesa taabikili maano kushintu nsheencita.”
Ino ndilembo nshi ndyeenga mwasebensesha kwaamba ayi mucafwe umwi kushiba ayi nshotucita inga shasangalasha Yehova nabi sobwe?
CITEENTE CINENE
Inga mwatondesha ayi mulisuni Yehova kwiinda mukumunyumfwila alimwi akutolelela kushomeka kuli nguwe nabi ndyecibete ciyumu kucita boobo.
Kwiindulukaamo
Ino mweeya nshi kuswa kucakubonenaako cakwe Jobo?
Ino mulaakutondesha buyani ayi mulimusuni Yehova?
Ino nciinshi ceshi cikamucaafwe kutolelela kushomeka kuli Yehova?
AMULANGWETEEWO ASHIMWI
Amwiiye nsheenga mwaciita kwaamba ayi mutolelele kushomeka kuli Yehova akulibungano.
Amwiiye shiinji pamakani Satana ngaabekesha bantu.
“Jobo Wakatolelela Kushomeka” (Ino Baibo Ilaamba Makani Nshi? lubasu 6)
Amubone bacanike abalo mbweenga batondesha ayi balisuni Yehova.
Ino wacanike inga wacita buyani kwaamba ayi acite cili kabotu pameenso akwe Lesa nabi bamwi ndyebatoomuyunga ayi acite cibiibi?