Sa Shakusekelela Shoonse Shilasangalasha Lesa?

Yehova alisuni ayi tunoosangalala mubuumi alimwi cimwi ciindi akucitako shakusekelela. Ano sa nkusekelela koonse alimwi anshiiku bantu nshobeebaluka shisangalasha Yehova? Ino inga twatondesha buyani ayi tulisuni Yehova na cesa kumakani ashakusekelela?

1. Ino nceebonshi shakusekelela shiinji tashisangalashi Yehova?

Inga mwakankamana kushiba cancine cakwaamba ayi shakusekelela shiinji tasheendelani a njiisho shamu Baibo. Shakusekelela sha mushobo uyo shakaswa kubupailishi bwakubeca. Shilaba shicatene ashamishimu na kuyuminisha muyeeyo wakwaamba ayi na muntu wafwa kuli cimwi citolelela kuba abuumi. Shakusekelela shimwi shilikumite kukushoma mucoolwe. (Isaya 65:11) Yehova wakacenjesha basebenshi bakwe ayi: ‘Amuswe pakati kabo . . . alimwi mutacati cintu citasalalite.’—2 Bene Kolinto 6:17.a

2. Ino Yehova alalinyumfwa buyani na bantu kabacita shakusekelela shilemeka bunene bantu?

Yehova alatucenjesha ayi tatweelete ‘kucinka manungo mu bantunyineesu.’ (Amubelenge Jelemiya 17:5.) Inshiku shimwi bantu nshobasekelela nshakulemeka beendeleshi na masoja. Bamwi balasekelela bushiku cishi ndyecakaba alwaanguluko kuswa kubweendeleshi bwa cishi cimwi. (1 Joni 5:21) Bamwi balasekelela tubunga twa beshimapolitiki. Ino Yehova inga walinyumfwa buyani na katupa bulemu bwiinditeewo kumuntu na libunga, bunene bunene liyuminisha miyeeyo iteendelani akuyanda Kwakwe?

3. Ino nshakucita sha buyani sheenga shapa kwaamba ayi kusekelela kube kutabete kabotu?

Baibo ilaamba ayi “bucakolwa, kusekelela cakwiindilila, [alimwi] akusekelela kwakukolwa,” tashibete kabotu. (1 Pita 4:3, NWT) Mushakusekelela shimwi, bantu balacita shintu shibiibi kwakubula kulikasha. Kwaamba ayi tutolelele kuba beshicibusa bakwe Yehova, tulyeelete kuleya shintu shitasalalite mbuli sha mushobo uyu.

AMWIIYILEWO ASHIMWI

4. Amuleye shakusekelela shitalemeki Yehova

Amubelenge Bene Efeso 5:10, akubandika miipusho itokonkelaawo:

• Ino nshiinshi nshotweelete kushinisha ndyetutosalawo pamakani akusekelela olide?

• Ino kumusena nkomukala bantu balasekelela maolide abuyani?

• Sa kusekelela uko kulasangalasha Yehova?

Kucakubonenaako, sa mwakayeeyawo kale Yehova mbwabona makani akusekelela bushiku bwakushalwa? Taakuwo musebenshi wakwe Yehova nabi womwi Baibo ngoyaambawo ayi wakasekelelawo bushiku bwakushalwa, sombi ilaamba pabantu bobilo batakalinga basebenshi bakwe Lesa abo bakasekelela bushiku bwabo bwakushalwa. Amubelenge Matalikilo 40:20-22 alimwi a Mateyo 14:6-10. Lyalo amubandike miipusho iyi:

• Ino nshiinshi shakacitika pakusekelela kwa kushalwa koonse kobilo?

• Kweelana amakani amu Baibo aya, ino Yehova alalinyumfwa buyani pamakani akusekelela bushiku bwakushalwa?

Nacibi boobo, mpashi inga mwayeeya ayi, ‘Sa Yehova alabikilako maano kwaamba ayi ntokwaabanamo lubasu mukusekelela bushiku bwakushalwa na kusekelela kumwi kuteendelani a Malembo?’ Amubelenge Kulonga 32:1-8. Lyalo amweebele VIDYO akubandika miipusho itokonkelaawo.

VIDYO: Inshiku Bantu Nshobasekelela Shitasangalashi Lesa (5:07)

• Ino nceebonshi tulyeelete kushinisha kucita shintu shisangalasha Yehova?

• Ino inga twacita buyani ubo?

Mbweenga twashiiba na kusekelela takusangalashi Yehova

• Sa kuleendelana anjiisho shamu Malembo? Amweeleshe kushiba kusekelela uko nkokwakaswa.

• Sa kusekelela uko kulayuminisha kupa bulemu bwiinditeewo kubantu, tubunga, na shitondesho shimikaninako cishi? Tulalemeka Yehova kwiinda muntu na cintu cili coonse alimwi tulashoma ayi lakwe eenkabo ngweshi akamane mapensho oonse pacishi capanshi.

• Sa kusekelela uko kuleelikawo milawo ashakucita shiteendelani anjiisho shamu Baibo? Tulyeelete kutolelela kuba bantu basalalite mumakani akulilemeka.

5. Amucafwe bamwi kulemeka nshomushoma

VIDYO: Amusansulule Nshemushoma Munshila Yeenga Taikalashi Bamwi (2:01)

Amubelenge Mateyo 7:12, akubandika miipusho iyi:

• Kweelana avesi iyi, sa mulyeelete kulwiita beshikamukowa banu bateshi Bakamboni ayi tabeelete kusekelela bushiku bumwi?

• Ino inga mwacita buyani kwaamba ayi mucafwe mukwashi wanu kushiba kwaamba ayi mulibasuni nabi kwaamba ayi teshi mwaabanemo lubasu mukusekelela kumwi?

6. Yehova alisuni ayi tunoosangalala

Yehova alisuni ayi tunoosangalala kuba pomwi amikwashi yesu abeshicibusa. Amubelenge Shikushimikila 8:15, akubandika mwiipusho uyu:

• Ino lilembo ili lilatondesha buyani ayi Yehova alisuni ayi tunoosangalala?

Yehova alisuni kwaamba ayi bantu bakwe banoosangalala kuba pomwi. Amweebele VIDYO kwaamba ayi mubone ishi mboshibonekela patuba ndyekuli kubungana kunene kwa baswa mushishi.

VIDYO: Kutambula Beensu Kukubungana Kunene kwa Bakaswa Mushishi (5:40)

Amubelenge Bene Galatiya 6:10, akubandika miipusho iyi:

• Sa tulayandika kwaabanamo lubasu mushakusekelela shipukite kwaamba ayi tucitile bamwi shibotu?

• Ino nkupa kwa buyani kweenga kwamupa kukondwa—kupabo ceebo cakwaamba ayi mutokonkela mulawo wakusekelela bushiku bumwi na kupa ceebo cakwaamba ayi mulisuni kucita boobo?

• Bakamboni baanji ciindi aciindi balabambila bana babo shintu shimwi shilibetele alimwi cimwi ciindi balabapa ashipo shakuteengashila. Na mulicite baana, ino nshintu nshi shilibetele nsheenga mwabacitila?

CITEENTE CINENE

Yehova alisuni ayi tunoosangalala kuba pomwi amukwashi alimwi abeshicibusa. Sombi alisuni kwaamba ayi tunoleya kusekelela kutamusangalashi.

Kwiindulukaamo

• Ino njimiipusho nshi njeenga twaliipusha kwaamba ayi tushibe na kusekelela kumwi takusangalashi Yehova?

• Ino inga twacita buyani kwaamba ayi tucafwe mukwashi alimwi abeshicibusa kunyumfwishisha nshetwasala pamakani akusekelela maolide?

• Ino mulishi buyani ayi Yehova alisuni ayi tunoocita sheenga shatupa kukondwa?

AMULANGWETEEWO ASHIMWI

Amubone maolide Beneklistu ngobatasekeleli.

“Ino Nceebonshi Bakamboni Bakwe Yehova Tabasekeleliiwo Maolide Amwi?” (Makani acanika pa jw.org)

Amubone sheebo shili 4 shitupa kushoma kwaamba ayi kusekelela bushiku bwakushalwa takumusangalashiiwo Lesa.

“Ino Nceebonshi Bakamboni Bakwe Yehova Tabasekeleli Bushiku Bwakushalwa?” (Makani acanika pa jw.org)

Amubone bacanike basuni Yehova mbweenga bamusangalasha ciindi ndyekuli maolide.

Yehova Alimusuni Abuumbi (11:35)

Beneklistu baanji bakasalawo kutasekelela Kilisimasi. Ino balalinyumfwa buyani ceebo cakusala kwabo?

“Bakacana Cimwi Ciinditewo” (Njashi Yamulindilishi, December 1, 2012)