CIIYO 52
Ncotuyandikila Kubikila Maano ku Nshetufwala Ambotuboneka
Soonse tulalisalila nshetusuni kufwala ambotusuni kuboneka. Kukonkela njiisho shiniinibo shamu Baibo inga kwatucafwa kusala nshetusuni kufwala akusangalasha Yehova. Amuleke tubandike panjiisho shimwi shamu Baibo.
1. Ino ninjiisho nshi sheelete kutucafwa kusala nshetusuni kufwala ambotusuni kuboneka?
Tulyeelete kusala shakufwala ‘shili kabotu, sheelela alimwi sha bulemu.’ Alimwi lyoonse tulyeelete kuboneka babuuya kwaamba ayi bamwi babone ayi ‘twakalyaaba kuli Lesa.’ (1 Timoti 2:9, 10) Amuleke tubandike njiisho shili 4: (1) Tulyeelete kufwala shakufwala ‘sheelela.’ Bweenka mbuli mbomwakabona kumabungano, Bakamboni Bakwe Yehova balafwala shipusenepusene, nacibi boobo, mbotufwala akulibotesha shilatondesha bulemu kuli Lesa. (2) Tulyeelete kufwala ca bulemu nkokwaamba ayi tatweelete kufwala shakufwala sheenga shapa bamwi kuyeeya shibiibi na sheenga shatondesha ayi tulalibonesha. (3) Tulyeelete kufwala shakufwala shitondesha ayi tuli bantu basala camaano. Aboobo tatweelete kukonkela bunene mafashoni ali woonse eenga esa. (4) Nshetufwala ambotulibotesha, lyoonse shilyeelete kutondesha kwaamba ayi tuli bantu bakalyaaba kuli Lesa wancine.—1 Bene Kolinto 10:31.
2. Ino nceebonshi tulyeelete kuyeeya pabamakwesu abenankashi ndyetutosala shakufwala abwakulibotesha?
Nabi kwaamba ayi tulicite lwaanguluko lwakulisalila nshetusuni kufwala, tulyeelete kuyeeya nshetufwala mbweenga shakuma bamwi. Tulacita nsheenga twacikonsha kwaamba ayi tutakalashi bamwi, sombi tulisuni ‘kusangalasha babyesu mushintu shibotu kwaamba ayi tubayuumye.’—Amubelenge Bene Loma 15:1, 2.
3. Ino nshetufwala ambotulibotesha inga shalengesha buyani bamwi kusuna kwiiya pali Yehova?
Nabi kwaamba ayi lyoonse tuleelesha kufwala sheelela, tulabikila bunene maano kumfwalilo ambonekelo yesu ndyetutooya kumabungano na muncito yakushimikila. Tatusuniiwo kwaamba ayi mbonekelo yesu ipe kwaamba ayi bantu baalilwe kukutika kumakani ayandika abuumbi. Aboobo nshetufwala ambotulibotesha shilyeelete kupa bantu kusuna kwiiya cancine.—Taitasi 2:10.
AMWIIYILEWO ASHIMWI
Amwiiye nsheenga twaciita kwaamba ayi tushinishe kufwala akulibotesha munshila yeelela Mwineklistu.
Mfwalilo ambonekelo yesu inga yatondesha na tulalemeka beendeleshi nabi sobwe. Nabi kwaamba ayi Yehova alabona shili mu moyo, mfwalilo yesu ambotulibotesha shilyeelete kutondesha bulemu kuli nguwe
4. Kufwala akulibotesha kabotu kulatondesha bulemu kuli Yehova
Ino nceebonshi ncociyandikila abuumbi kubikila maano ku nshetufwala ambotulibotesha? Amubelenge Kulumbaisha 47:2, akubandika miipusho iyi:
Ino kushiba kwaamba ayi tulemikaninaako Yehova kulyeelete kutupa kufwala buyani?
Sa mutoobona ayi kubikila maano ku nshetufwala ambotulibotesha ndyetutooya kumabungano amuncito yakushimikila kulayandika? Ino nceebonshi?
5. Sheenga shatucafwa kusala kabotu nshetufwala ambotulibotesha
Lyoonse nshetufwala shilyeelete kuba sha buuya alimwi sheelela bukaalo mbotubeteemo, inga caba ayi nsha muulo unene nabi sobwe. Amubelenge 1 Bene Kolinto 10:24 a 1 Timoti 2:9, 10. Lyalo amubandike ncotuteelete kufwalila shakufwala . . .
sha matombe na shiteeleli.
shicata kumubili, shitondesha shamukati na sheenga shalengesha bamwi kuyeeya shibiibi.
Nabi kwaamba ayi Beneklistu tabakonkeli Mulawo wakwe Mose, inga beeya Yehova mbwaabona shintu kuswa ku Mulawo uyu. Amubelenge Dutolonomi 22:5, akubandika mwiipusho uyu:
Ino nceebonshi tatweelete kufwala akulibotesha munshila itondesha basankwa kuboneka anga mbanakashi, na banakashi kuboneka anga mbasankwa?
Amubelenge 1 Bene Kolinto 10:32, 33 a 1 Joni 2:15, 16, akubandika miipusho iyi:
Ino nceebonshi tulyeelete kubikilako maano kwaamba ayi nshetufwala ambotulibotesha shitakalashi bamwi nkotukala na mulibungano?
Ino ni mfwalilo ya buyani ipukite nkomukala?
Sa mutobona ayi mfwalilo iyo inga yeelela ku Mwineklistu? Ino nceebonshi?
Inga twafwaala akulibotesha munshila shipusenepusene shisangalasha Yehova
BANTU BAMWI BALAAMBA AYI: “Ndicite nkusu shakufwala cili coonse nconsuni.”
Sa amwebo mbomubona? Ino nceebonshi?
CITEENTE CINENE
Kusala kabotu nshetufwala ambotulibotesha, shilatondesha ayi tulalemeka Yehova abantu bamwi.
Kwiindulukaamo
Ino nceebonshi nshetufwala ambotulibotesha shilayandika kuli Yehova?
Ino ninjiisho shili sheelete kutucafwa pamakani ambotuboneka?
Ino nshetufwala ambotulibotesha inga shapa bamwi kukubona buyani kulambila kwesu?
AMULANGWETEEWO ASHIMWI
Amubone bamwi nsheenga bayeeya na babona shakufwala nshemufwala.
Amwiiye ncocibetele ca busongo kutaanguna kuyeeyawo kamutana kulilemba pamubili.
“Ino Baibo Ilaamba Nshi Pamakani Akulilemba Pamubili?” (Makani acanika pa jw.org)
Amubone njiisho ashimwi sheenga shamucafwa kusala kabotu.
“Sa Nshomufwala Shilatondesha Bulemu Kuli Lesa?” (Njashi Yamulindilishi, September 2016)
Ino mwanakashi umwi ushomeka wakatalika buyani kulemeka bamwi nshobasala pamakani ashakufwala akulibotesha?
“Ndakalinga Kukalashikwa Amfwalilo Akulibotesha kwa Bamwi” (Sinsimuka!, December 22, 2003)