CIIYO 54
Mukuli Ucite ‘Musebenshi Ushomeka Alimwi Ucite Maano’
Yesu ngo Mutwi walibungano lya Bwineklistu. (Bene Efeso 5:23) Mbuli Mwaami wakwiculu, Yesu alatanjilila bashikwiiya bakwe pacishi capanshi kwiinda mukusebensesha ‘musebenshi ushomeka alimwi ucite maano.’ (Amubelenge Mateyo 24:45.) Yesu ngowakasala “musebenshi ushomeka” uyu alimwi wakamupa ankusu shakusala shintu shimwi. Nacibi boobo, musebenshi uyu alyeelete kunyumfwila Klistu akusebensela bamakwabo Klistu. Ino musebenshi uyu ngani? Ino alatulama buyani?
1. Ino ‘musebenshi ushomeka alimwi ucite maano’ ngani?
Kuswabo kale kale, Yehova alatanjilila bantu bakwe kwiinda mukusebensesha musankwa na likoto liniini lya basankwa. (Malaki 2:7; Bene Ebulu 1:1) Pesule lyakufwa kwakwe Yesu, batumwi abamanene ku Jelusalemu mbobakatalika kutanjilila libungano lya Bwineklistu. (Milimo 15:2) Mukukonkela bubaambo ubu, munshiku shino kuli kakoto kaniini kabamanene batootwaabila shakulya shakumushimu akutanjilila ncito yakushimikila pacishi capanshi. Kakoto aka kaletwa ayi Likoto Litanjilila lya Bakamboni Bakwe Yehova. Likoto Litanjilila ngo ‘musebenshi ushomeka alimwi ucite maano [Yesu] ngwakasala.’ (Mateyo 24:45a) Bamu Likoto Litanjilila boonse balinanikitwe, aboobo batoolangila kuya mukweendelesha pomwi a Klistu mu Bwaami bwakwiculu, pesule lyakumanisha buumi bwabo bwa pacishi capanshi.
2. Ino musebenshi ushomeka alatwaabila shakulya shakumushimu sha buyani?
Yesu wakaamba ayi musebenshi ushomeka ‘alaakunoopa [Beneklistunyina] cakulya paciindi ceelete.’ (Mateyo 24:45b) Bweenka mbuli shakulya shakumubili mboshitupa nkusu akutucafwa kuba abuumi bubotu, acalo cakulya cakumushimu ciswa mu Maswi akwe Lesa—cilatupa nkusu nshetuyandika kwaamba ayi tutolelele kushomeka kuli Yehova akucita ncito Yesu njaakatupa. (1 Timoti 4:6) Tulatambula cakulya ici kwiinda mumabungano ansondo ansondo, kubungana kwalubasu akubungana kunene. Nshila imwi mbotutambula cakulya cakumushimu nkwiinda mumabuku esu aamba shamu Baibo amavidyo atucafwa kunyumfwishisha kuyanda kwakwe Lesa akuyumya bushicibusa bwesu anguwe.
AMWIIYILEWO ASHIMWI
Amubone ncotuyandikila ‘musebenshi ushomeka alimwi ucite maano’ na Likoto Litanjilila.
Bamu Likoto Litanjilila balatwaabila cakulya cakumushimu, kutupa butanjilishi alimwi akupa lucafwo Bakamboni Bakwe Yehova nsengwe yoonse
3. Bantu bakwe Yehova balyeelete kuba bacatene
Bamu Likoto Litanjilila balakonkela butanjilishi bwakwe Yesu ndyebatootanjilila ncito ya Bakamboni Bakwe Yehova. Ubu mbocakalinga amuciindi ca Beneklistu bakutaanguna. Amweebele VIDYO.
Amubelenge 1 Bene Kolinto 14:33, 40, akubandika mwiipusho uyu:
Ino lilembo ili lilatondesha buyani ayi Yehova alisuni Bakamboni bakwe kuba bantu bacatene?
4. Musebenshi ushomeka ngoopa butanjilishi muncito yakushimikila
Kushimikila njoyakalinga ncito iyandika abuumbi Beneklistu bakutaanguna njobakalinga kusebensa. Amubelenge Milimo 8:14, 25, akubandika miipusho iyi:
Ino mbaani bakalinga kupa butanjilishi muncito yakushimikila pakati ka Beneklistu bakutaanguna?
Ino Pita a Joni bakacita buyani ndyebakalwiitikwa shakucita kuswa ku batumwinyinaabo?
Kushimikila njencito iyandika abuumbi bamu Likoto Litanjilila njobatanjilila. Amweebele VIDYO.
Yesu wakayuminisha kuyandika kwa ncito yakushimikila. Amubelenge Maako 13:10, akubandika miipusho iyi:
Ino nceebonshi bamu Likoto Litanjilila balabona ayi incito yakushimikila ilayandika abuumbi?
Ino nceebonshi tulayandika ‘musebenshi ushomeka alimwi ucite maano’ kwaamba ayi incito iyi icitwe kabotu nsengwe yoonse?
5. Musebenshi ushomeka alatulwiita shakucita
Likoto Litanjilila lilapa butanjilishi ku Beneklistu nsengwe yoonse. Ino nciinshi cibacafwa kushiba butanjilishi bweelete? Amuleke tubone shakalinga kucita bamu likoto litanjilila bamuciindi ca batumwi. Amubelenge Milimo 15:1, 2, akubandika miipusho iyi:
Ino Beneklistu bakutaanguna bakalinga bapusana pamakani nshi?
Ino nkuli baani Paulo, Banabasi, abamwi nkobakaya mukusenga lucafwo?
Amubelenge Milimo 15:12-18, 23-29, akubandika mwiipusho uyu:
Kabatana kusala cakucita, ino likoto litanjilila lya muciindi ca Beneklistu bakutaanguna lyakacita buyani kwaamba ayi lishibe butanjilishi bwakwe Lesa pamakani aya?—Amubone mavesi 12, 15, a 28.
Amubelenge Milimo 15:30, 31 a 16:4, 5, akubandika miipusho iyi:
Ino Beneklistu bakutaanguna bakacita buyani ndyebakatambula butanjilishi kuswa kulikoto litanjilila?
Ino nshoolwe nshi Yehova nshaakabapa ceebo cakunyumfwila kwabo?
Amubelenge 2 Timoti 3:16 a Jemusi 1:5, akubandika mwiipusho uyu:
Ino bamu Likoto Litanjilila balakonkela butanjilishi buswa kuli ndyebatoosala shakucita?
BANTU BAMWI BALAAMBA AYI: “Na kamunyumfwila shaamba bamu Likoto Litanjilila, nkokwaamba ayi mutookonkelabo bantu.”
Ino nciinshi cimupa kushoma kwaamba ayi Yesu ngoototanjilila Likoto Litanjilila?
CITEENTE CINENE
Likoto Litanjilila ngo ‘musebenshi ushomeka alimwi ucite maano’ Klistu ngwakasala. Lilapa butanjilishi acakulya cakumushimu ku Beneklistu nsengwe yoonse.
Kwiindulukaamo
Ino ngani wakasala ‘musebenshi ushomeka alimwi ucite maano’?
Ino Likoto Litanjilila lilatulama buyani?
Sa mulashoma kwaamba ayi Likoto Litanjilila ngo ‘musebenshi ushomeka alimwi ucite maano’?
AMULANGWETEEWO ASHIMWI
Amubone bamu Likoto Litanjilila mbobasebensa kwaamba ayi bakumanishe ncito yabo.
“Ino Likoto Litanjilila lya Bakamboni Bakwe Yehova Lilacita Nshi?” (Makani acanika pa jw.org)
Amwiiye Likoto Litanjilila mbolishinisha kwaamba ayi twatambula cakulya cakumushimu cibambitwe kabotu.
Ino bamu Likoto Litanjilila balalinyumfwa buyani pancito Yesu njaakabapa?
Ino mabungano esu ansondo ansondo akubungana kunene shilatondesha buyani ayi Yehova ngoototanjilila Likoto Litanjilila?